فزعت شيرين عندما سمعت آلات تنبيه السيارات خلفها لتتحرك بعد فتح الإشارة .تحركت بسيارتها وعقلها مازال يفكر كيف ستعلن قرارها للجميع...
ما الطريقه المثلي التي ستجنبها كثيرا من الاعتراضات والانتقادات من والدتها وشقيقتها ؟
تريد أن تقضي اجازه نهايه الاسبوع في جو هادي .بلا اسئله .بلا مناقشات .بلا محاولات إقناع
تعودت منذ سنوات أن قرارتها غير قابله للنقاش ...تتخذ القرار ثم تنفذه .سواء في عملها أو في شئون المنزل الذي تعتبر هي المسئولة عنه .
لماذا يشغلها إعلان القرار هكذا ؟
هل معنى ذلك ترددها ؟
لا ...قرارها عن اقتناع تام ،ستعلنه اليوم وليكن ما يكون..
*دخلت منزلها بعد السادسه مساء بقليل ..كل شي كالمعتاد ..استقبلتها والدتها بالدعاء،ثم وقفت علي باب غرفه مروه توقظها ،ثم ذهبت الي المطبخ لتسخين الطعام ..بينما دخلت شيرين غرفتها استعدادا لأخذ حمامها اليومي بعد العمل
وقبل تناول الطعام ..
كل شي كالمعتاد ..حتي الآن
قبل انتهاء تناول الطعام، قالت مروه مازحه ((تتخيلي يا ماما انه فاضل لنا علي اللمه الحلوه دي شهر واحد وبعد كده نبقي انا وانتي بس؟))
ردت الأم بسعادة ((ربنا يهنيها ويسعدها ..وعقبالك إنتي كمان يا مروه يا بنتي ))
همت شيرين أن تخبرهما لكنها أثرت علي عدم الحديث الآن والانتظار حتى الانتهاء من تناول الطعام تماما ..صمتت واكتفت بابتسامة باهتة .
...
جاءت شيرين حامله صينيه شاي وضعتها علي طاوله أمام والدتها وشقيقتها ..
اطفات التليفزيون وجلست قائله : انا عايزه اقولكم حاجه مهمه
انتبهت الأم ومروه بقلق وترقب وصمت في انتظار أن تكمل...
اكملت:انا قررت افسخ خطوبتي لحسام .
صرخت الأم وخبطت علي صدرها واندهشت مروه..
فاكملت شيرين تفسير قرارها :سيبوني أكمل كلامي ..
الام:تكملي ايه ؟..انتي ازاي فجأه كده بعد ما كل حاجه تقريبا قربت تخلص؟وبعدين ازاي ترفضي واحد زي حسام بالسهولة دي .؟
مروه:يا ماما استني ..ليه يا شيرين ماله حسام.؟
الام:واضح انها نسيت حاجات كتير اوي بتخليها تتبطر .
شيرين:نسيت ايه يا ماما ؟
الام:نسيتي أن عندك 32سنه ومش سهل انك تسيبي واحد كويس زي حسام ..نسيتي أن السبع سنين الي فاتوا كان كل الي بيجيلك مش مناسب ...نسيتي أن كلها كام سنه وفرصتك في الخلفه تقل وانا مش عايشالكم انا نفسي اطمن علي كل واحده فيكم في بيت جوزها ومعاها عيالها .
شيرين:يا ماما الراجل والعيال مش هما كل حاجه
الام:اومال ايه ؟شغلك الي عايشه علشانه ؟انتي بتروحي من تسعة الصبح لحد سته المغرب ومفيش راجل هيرضي بكده وحسام وافق وقال وماله انا عايزها بكل ظروفها ..
شيرين:يعني يا ماما ده شغل حد يفرط فيه؟
الأم.:انا عارفه أن مرتبك بالآلاف وعارفه أن منصبك كبير بس انتي لو تعبتي ومقدرتيش تشتغلي هيرموكي ويشوفوا غيرك إنما جوزك وعيالك مش هيرموكي.
شيرين:يا ماما الشغل مالوش علاقه اصلا.
الام:طيب فهميني ايه الي حصل فجاه؟
شيرين:انا طول الكام شهر اللي فاتوا دول وبقول هحبه ولما محستش الحب قلت هيجي بالعشره طول ما هوا كويس معايا.
مروه:بس فعلا حسام كويس معاكي ومستواه الاجتماعي والتعليمي وكل حاجه مناسب ليكي ومش مهم الحب بتاع الروايات علشان الجوازه تتم ..ده غير ذوقه ووسامته يعني زوج يشرف من جميع الجهات.
شيرين:بس فيه حاجه مش قادره اتكيف معاها
الأم ومروه بقلق:ايه هي دي ؟
شيرين :كداب..وقبل ما تدافعوا عنه وتقولوا انه مبيكدبش علينا .انا شفته بيكدب في حاجات كتير هيا اه حاجات صغيرة بس كتير اوي اوي وده خلاني مبقاش عندي ثقه فيه ومش بصدقه في حاجه خالص وانا مس قادره أكمل معاه وكمان بتاع مظاهر بشكل مبالغ فيه لدرجه اني حاسه أنه خطبني علشان مظهري مناسب له في العزومات والحفلات.
مروه:ولما يهتم بمظهره ايه المشكله..انتي نفسك بتهتمي بشكلك ومظهرك وكل واحد فينا بيحب يبان بشكل حلو .
شيرين:الأوفر يا مروه هوا المشكله ..عارفه لو لاقيته بيكدب مره عابره هقول عادي مش طبع ..إنما في الصغيره قبل الكبيره ..المظهر كمان يعني حتي كلامه معايا رسمي اووي..رسمي بمعني انه حتي لو عايز يقول كلام حلو تحسيه حافظه مش من قلبه ..فاهميني وحاسين بيا ولا بتكلم علي الفاضي .
الأم بالاستسلام :وقلتي له ولا لسه ؟
شيرين :لسه هو عموما جاي الساعه 9 وانا حضرت الشبكه وكل الهدايا اللي جابها والموضوع بالنسبه لي منتهي .
الأم :انتي حره بس خايفه انك تندمي وتقولي ياريتني.
مروه:طيب ما تستني كام يوم تفكري تاني
شيرين:انا بفكر بقالي فتره وخلاص قررت
نهضت الأم وعلي وجهها كل علامات عدم الرضا عن قرار شيرين وهي تتمتم بصوت مسموع:يا عالم الفرصه اللي ضيعتيها دي جايه تاني إلا لأ
حاولت مروه أقناع شيرين بانتظار وعدم أخبار حسام بقرارها لعلها تعجلت في قرارها
بهدوء انسحبت شيرين لغرفتها متعلله بالاستعداد لاستقبال حسام
دخلت غرفتها ...رتبت شبكه حسام وهداياه وهي تنظر في الساعه تتعجل حضوره وإنهاء هذه العلاقه في أسرع وقت
سمعت والدتها وهي تردد:ياريت ابوكم كان عايش مكنتش هبقي خايفه عليكم كده.........
YOU ARE READING
تحت سقف واحد
Romanceهذه الرواية للكاتبه دينا عماد وقد أعجبتني جدا وأحببت أن انقلها وهي روايه تجمع الرومانسية و الدراما والتشويق .
