Collection of One shots

A. PAIGE'S FOREVER part 1

Pinigilan niya ang sariling hindi maiyak sa harap nito. Alam niyang wala siyang ginagawang masama at nahihiya na rin siya sa mga pinagsasabi nito tungkol sa kanya. At nasasaktan siya dahil wala itong tiwala sa kanya bilang bestfriend nito mismo.

“Wala ka bang tiwala sa akin, Hansel? Hindi ko alam na ganyan mo pala ako tingnan.” Umalis na siya sa harap nito bago pa man siya bumigay. Nagmamadali siyang pumasok sa restroom at doon umiyak.

Ilang beses na ba ito nangyari sa kanya? Halos hindi na niya mabilang ang mga babaeng lumapit at umaway sa kanya dahil sa kadahilanan na sa kanila may gusto ang mga lalaking mahal ng mga ito. Wala naman siyang ginagawa, ah! Masama ba na pangarapin niya na maging isang normal na nilalang lang siya. At ngayon, ang taong pinagkakatiwalaan pa niya ng husto ang humusga sa kanya.

Galit na tiningnan niya ang repleksiyon sa salaman. Kung pwede lang, kung maaari lang sana ay matagal na niyang binago ang kanyang mukha. Hindi naman niya kasalanan kung nakakaangat ang mukha niya sa mga karaniwan. Hindi niya ginusto ang bagay na iyon.

Tumulo na naman ang luha sa kanyang mga mata. Wala na si Hansel, wala na ang taong pwede niyang kausapin ng maayos.

“HUWAG kang lalapit kay Paige aagawin niyan ang boyfriend mo gaya ng ginawa niya kay Paige.”

Bulong lang iyon pero sa tingin niya ay umabot iyon ng one hundred twenty decibels sa kanyang pandinig.

“Kawawa nga si Hansel dahil hindi na pumapasok.” Kulang nalang ay mapunit niya ang dala niyang textbook dahil sa namumuong galit sa loob niya. Magmula kasi ng araw na iyon ay hindi na pumasok si Hansel. Ilang beses na siyang nagpunta sa bahay nito pero ayaw siya nitong harapin. At ngayon siya na ang center of attraction ng buong campus. For a fifteen years old teenager like her, life is too complicated.

“Bakit ka pa nandito? Hindi ka ba nahihiya sa mga tao o hindi ka lang talaga marunong mahiya?” Nakataas ang kilay na tanong ng class president nila na si Alice. Sa simula pa lang ay may lihim ng galit sa kanya.

“Excuse me?”

“Tama naman si Hansel hindi ka na dapat nag-transfer dito sa una pa lang. Gusto mo lang talagang maging stand out kaya napili mong mag-aral sa isang public school.” Matalas talaga ang dila nito.

“I don’t know what you are talking about.” Ipinasok niya ang aklat sa loob ng kanyang bag.

“Alam mo kung ano ka Paige? Isa kang fame sucker and attention getter.” Na-insulto na siya sa paraan ng pagsasalita nito. “No one needs you here by the way. Huwag mong ipagmalaki ang ganda mo dahil marami niyan sa tabi-tabi. Kung sasabihin mong matalino ka wala din

kaming pakialam dahil ginagamit mo lang iyan sa pang-aakit ng mga
lalaki.”

Sampalin kaya niya ito? Hindi pa niya nagagamit ang kanyang galing sa judo at taekwondo. Pwede niya itong maging target practice.

“Wala akong alam kung iyan ang nasa isip mo.” Pambabalewala niya sa sinabi nito.

“Hindi mo ma-gets? Look around you. Sa simula pa lang wala ng nagtangkang maging kaibigan mo. Nakakaawa nga si Hansel dahil sa pakikipaglapit niya sa iyo. Ang hindi niya alam nagmumukha lang siyang alalay kapag kasama mo.”