أبنة السفير اصبحت خادمة

موت حجي دحام

#ابنة السفير اصبحت خادمة
البارت الرابع عشر
جنت اردد قول الامام علي يادنيا ضيقي فتندار علية لارسا مبتسمة وتكول ماما ليش بعد اكو اضيق من هل عيشة ،، ب2009 الزنجي الي كاعد يمنا بالبيت لان هو بيت مقسم الى غرف وبي صالة جبيرة كل الي ساكنين بهاي الغرف يكعدون بيها يسموها
اللوبي / احنة ماخذين غرفتين بهذا البيت يادوب اتكفينا .. الزنجي جيراننا شال التلفون مال اللوبي واسمعه يكول
I don't speak Arabic
بعدين هذا الزنجي اشرلي لان يعرف اني عربية فكال تعالي انتي جاوبي مبين مديفتهم شي.. اول مگلت الو وحدة صوتها ناعم كالت منو ام ايهم .. كتلها اتفضلي منو حضرتج كالت اني اسيا
گتلها اسيا منو ؟؟ كالت مرت حجي دحام صففففنت 🙁 كتلها منين حصلتي رقمي كالت من اختج ازهار گتلها اي وشرايدة من عدنا ؟؟مكفاكم موت ابني مكفاكم السرطان الي نخر جسمي سمعت صوتها طبك مدتكدر تحجي وعبالك تريد تبجي ،، كالت ام ايهم الحجي انطاج عمره بسكته قلبية واني مرة صايمة مصلية مجنت اقبل على تصرفاته اني وياكم قلبا وقالبا ..طبعا اسيا مرت حجي دحام جنت دائما اشبهها بأسيا مرت فرعون وسبحان الله نفس الاسماء وهم مجانت تقبل على تصرفات زوجها المهم ،، اني من الفرحة عطت عيطة التموا علية الي بالبيت وجهالي خافوا عبالهم سمعت خبر موزين ، فكتلها الله يبشرج بالخير ،، كالت تعالي للعراق استلموا املاككم وحالليه وواهبيه للحجي لان اكيد الله راح يحاسبه وياخذ حقكم منه ،، رجعت للغرفة واني اول مرة من فترة طويلة مفرحانة هل فرح احس ايهم رجع للحياة واحس صحتي رجعتلي اللهم لاشماتة مات الي حرك كلبي وان شاء الله جزائه جهنم .. جتي لارسا بهذا اليوم بعد مخابرتها والجهال احسهم فرحانين على فرحي فقررت ارجع لبغداد بعد لازم اتلاوى وية الدنيا مثل مالوتني ،، فحجزت علمود ارجع لبغداد اول مرة اشم التكت مال بغداد واحس ريحته ردتلي روحي ،، واول مرة الي رغبة ارجع لبغداد ،، خليت الجهال بلندن ورجعت لبغداد ابيت اهلي شفت عايدة واهلها ولا سلمت عليها ولا الي نفس اسلم على زوجها بس اولادها جوي بوسوني رحت لغرفتي القديمة انقبضت روحي منها اتذكر من جينا قبل 3 سنوات دنشيع ايهم ،،وندفنه حبيبي الله يرحمك اليوم يرجعلك حقك يابعد بيتي ،، رحت ثاني يوم للعامرية واشوف المحل مال الموبليات مال حجي دحام معزل وعليه قطعة سودة انتقل الى رحمة الله المغفور له الحاج دحام،،،، هههه شيغفرله ماادري خرب روحه هيج اريد اكول رحت بكل حقد وخرت القطعة السودة وشگگتها وذبيتها يم المحل وكمت ادوس عليها برجلي ،، الله شوية شفيت غليلي ورحت للعمارتين وحدة منهم جان المرحوم عزمي مسجلها باسمي ،، طبعا مو لسواد عيوني بس علمود عنده املاك هواية ويصير عليها ضرايب ،، المهم الله يرحمه ،، اني رحت للعمارة الي بيها محلات الاثاث مال دحام الي هي اصلا عمارتي فدكيت الباب على شقة شقة وانطيتهم علم انه العمارة راح تنباع وانه همة لازم يخلوها لان العقد باسم دحام واني المالك الشرعي للبناية .. وبعد معرضتها عند الدلالين قريب الشهر الله سبحانه وتعالى فرجها علينا انباعت ب 480 مليون لان مجانت كلش جبيرة بهل ايام اني اروح واجي لبيتنا بالمحيط اشوف عايدة توكفلي اباب المطبخ من اجي واروح تالي جرتني وبوستني كالت شنو كاصة صدرج ،، هي تعرف لان طبيبة نسائية كتلها اي كامت تبجي كالت اريدج تسامحينا على كل الي بدر من عدنا انتي اختنا والي فات مات ياريت نرجع على لمتنا وعلى اخوتنا ،، اني بصراحة مجنت اريد اصالحها بس الدنيا متسوة والدنيا حقيرة ،، لذلك صالحتها فاجة زوجها هم صالحني ورادوا ابيعلهم حصتي ابيت اهلي بالمحيط الي قدروه بمليار تقريبا ويجوز اكثر بس كالت عايدة احنة اولى من الغريب فانطوني 350 مليون حصتي من البيت ورحت اتنازلت عن حصتي بالطابو لعايدة وبظرف شهر صار عندي تقريبا 800 مليون ،، يارب شكد عظيم انت صدك امير المؤمنين ابو الحسن لو كال ضاقت ولما استحكمت حلقاتها فرجت وكنت اظنها لاتفرج