أبنة السفير اصبحت خادمة

السفر للامارات

#ابنة السفير اصبحت خادمة
البارت الرابع
عزمي من هلكد مرايح وجاي للامارات اتعرف على عوائل عراقية يكدرون يدلونا اضافة الى انه احنة عدنا فلوس نكدر نعيش بيها ..اتواصلنا وية ايهم بعمان وجان ابوه يدزله فلوس بس ابوه ميحجي وياه نهائي وهذا الحجي سنة 2002 الولد اجلوا سنة لان واحد 4 طبية واللاخ ثاني طبية فمن رحنا للامارات بالباخرة جان يوم خلاصنا من العراق طلعت وكت الفجرية بالباخرة واشوف دولفين بالبحر🐬 الله منظر ممألوف ولا عمرنا شفناه بس كون واحد مرتاح نفسيا حتى يفرح بهيج منظر .. اجةدكتور عزمي حط ايده على چتفي وهاي اول مرة احس بحنية گال ياما جنت انهاج عن الخلفة انتي كومتيهم 9 عبالج يفيدونا .. لا راح يكسرون ظهرنا بالنص .. اني گمت ابجي وگتله طول عمرك بعيد عننا وطول عمرك مستنكف من عائلتك واني صايرة اب وام بس وين الي يقدر وتاليها ابننه من العقد النفسية الي ربيتلنياها راح اشترك بجريمة قتل قاطعني الدكتور وگلها الي صار صار وهذا امر ربج خلينا نگلب صفحة جديدة بس نوصل للشارجة ونستقر هناك نحاول نغير حياتنا جذريا .. وصلنا للشارقة الله شكد حلوة الامارات وخاصة من فتنا لدبي شارع الشيخ زايد اني والجهال ال8 اتخبلنا عليه وگلت بيني وبين نفسي لعد الجنة شلونها ..فرحنا لبيت جماعة عراقيين ابوهم دكتور فكال ابقي انتي والجهال بالتكسي ..والجهال ناس على ناس ماشاء الله اخذلناهم تكسيين هو مخلانا نصعد لشقة دكتور سعد حتى ليشوف الزعاطيط لان قسمنا كعدتنا بتكسيات اثنين  المهم اجة دكتور سعد ورحب بينا هواية بس اتعجب من عدد الجهال بس اني مااهتم الجهال اموت عليهم وخاصة الصغيرة روزا اتجنن وهي المدللة لان اخر العنقود جبتها ب98 هي متعلقة بية بشكل ..المهم راح دكتور سعد دلانا على صاحب العمارة الي تتكون من 18 طابق المنظر مال الشقة ساحر عالبحر فإجرناها سنويا ب60 الف درهم يعني يمكن بعملتنا هسة اتساوي 30 مليون عراقي رتبنا امورنا وحصلنا الشقة بالطابق ال16 لان الشقق بالامارات كلما تعلى  تغلى لان منظر البحر والمصاعد مثل الطلقة اضافة الى الخدمات كلها متوفرة والمسواگ يصعدولنياه بتلفون صغير .. عشنا احلى عيشة وودعنا العراق الي كلشي مشفنا منه غير الضيم والقهر ولدي الي بالطبية ايهم وادهم واوسم ابوهم كمل اوراقهم وسفرهم لبلاروسيا يكملون الطب ..ايهم اخر سنة اله بقيت بس اني والبنات الصغار واثنين من ولدي هم صغار ولارسا شالت البيت شيل لان ماعدنا خدامة فكمنا نتساعد عالبيت بالتنظيف والطبخ ابوهم اشتغل بمستشفى القاسمي بالشارقة هاي المستشفى متخصصة بامراض القلب والشرايين وبما انه جان دكتور عزمي اختصاص قلبية فرأسا عينوه وشافوه يفهم كلش بأختصاصه صار عنده منصب معاون مدير المستشفى .. راتبه كلش زين والدنيا زهتلنا فمرة من المرات اجتي شيخة اماراتية صاير عدها جلطة وتقريبا راح تموت الهنود الدكاترة مكدروا يسعفوها ولا يسوولها شي بس دكتور عزمي عرف شلون يسعفها وعرف شلون ميخلي حالتها تتازم فخلاها للشيخة يوم بالعناية المركزة وراها الله حياها من جديد فمن سألت منو داواني ومنو عالجني گلولها دكتور عراقي اسمه دكتور عزمي كالت اريد اشوفه واشكره فأجاها دكتور عزمي شكرته هواية وگلتله بس اصير زينة ازورك لبيتك واكافئك على الي سويته وياية انطيني عنوان بيتك گلها الي سويته واجبي وجيتج على عيني وراسي بس مااقبل بأي هدية ضحكت وكالت(ماابي تفشلني )دنگ راسه وگلها الي تشوفيه شيختنا
رجع للبيت وجان  فرحان كلش بأنجازه واحنة هم فرحنا كلش .. كال الشيخة راح اتزورنا وتجيبلنا هدية اني گتله بلكن اتجيبلنا علبة نستلة من باچي (pat-chi) كال ليش مو سندويجات من صب واي احسن وضحك  فيوم الجمعة رتبنا البيت اني ولارسا والجهال اشترينالهم لبس جديد من دبي دننتظر الشيخة اني من جان عزمي يكول الشيخة اتذكر امي زاهدة خانم وگمت احجي وية روحي  يجوز بكدها ويجوز تشبهها زين اخاف من كبرها تتخربط بالمصعد واتدوخ لان عزمي كن كال بيها جلطة بالقلب وگوة اتلاحگنالها گلت هاي الشيخة اليازيا يمكن غادية الحلقة الاخيرة ..كالعادة اتأنق عزمي ولبس قاط حلو هو يلوگله اللبس وظل ينتظر الشيخة اليازيا شكد صعب اسمها عبالي اسم اجنبي طلع اصله الجازية يعني اتجازي الناس هههه المهم اندگ الجرس اني رحت طلعت والجهال ختلناهم بالغرفة لان ابوهم كال لتطلعيهم عيب من الشيخة ففتحت الباب وشفت بنية شابة عمرها بالتلاثين اتخبل لابسة جبة مخصرة وضيقة كلش والمكياج الي حاطته بعرسي محاطة مثله خرب .. اني ابتسمت لان معرفت شنو السالفة ..شنو شيخة شنو وحدة شابة اتدك الباب ..فرأسا اجة عزمي من وراية وصاح هلا كل الهلا بالشيخة فگلها اتفضلي اتفضلي اني ولارسا بقينا صافنين فاتت وريحة العود كفخت خشومنا فهي راسا ضحكتلي وگالت سالخير عود مساء الخير گتلها زارتنا البركة شيخة هي بس مبتسمة والخدامة الفلبينية كلسع اتعدل ربطتها وتعدل العباية .. عزمي متهمه هاي السوالف فراسا دخل بالحديث وياها شيخة كلفتي حالج وانتي مريضة گلتله (شو تگول انت حييتني من جديد) المهم سولفوا هواية واني بس ابتسم لان مواضيعهم مداكدر ادخل بيها تالي سمعته يگول لا شيخة هذا واجبي هذا واجبي فطلعتله ورقة گلتله بس وقع وروح باجر كمل الاجراءات واني الممنونة هو خجل صار احمر وبدا يوقع الاوراق الي انطتهياه شيخة اليازيا