أبنة السفير اصبحت خادمة

حياة الباشوات

#ابنة السفير اصبحت خادمة
#قصة حقيقية
يمكن قصتي اليوم تختلف عن بقية القصص قصة من واقع الحياة المخملية الي جانوا عايشيها اهلنا بوكت الخمسينات حياة الباشوات والافندية وراح اتگولون يمكن هذه قصة خيالية لكن هي قصة واقعية 100بالمية نبدي قصتنا من ذاك الوكت الى يومنا هذا  واترك القلم لبطلة القصة سمؤال
السلام عليكم اني سمؤال بنت احد السفراء بزمن الملك فيصل الثاني ولدت 1952ونشأت بعائلة ارستقراطية ابوية سفير وامي من خوانم گبل يسموها مرت السفير زاهدة خانم .. وبما انه امي جانت ملتهية بالقبولات والبرستيج فمصار عدها غير 3 بنات الجبيرة مواليد 1951 عايدة واني الوسطانية سموأل والصغيرة مواليدها 1953 ازهار .. خواتي يدورون برستيج مثل امي..  بالستينات من جنا بالثانوية خواتي ماخذين ذبة امي يلبسون مني جوب وشفقات بيها تول وكوستمات واني الوحيدة الي جنت البس جارلس واشيل شعري بكلة جانوا يحاولون يسووني مثلهم بس اني هاي ذبتي احب الحرية بالمناسبة اني گصيرة وضعيفة وحنطاوية ويكولون خواتي احلى مني 😩جان عدنا خادمات 2 بالبيت فمنعرف لا نشتغل ولا نطبخ ولا حتى امي .. جانت بس تشرف على الطبخ وتأمر وتنهي وتشرف على تحضير المائدة بيتنا 1000 م عالشط بالمحيط وجانوا خطارنا من يجون نگعدهم عالشط ويجي السماچ يصيد سمج ويشوون ويظلون يتسامرون للصبح .. اني جنت اعوفهم واروح لغرفتي وخواتي هم يلتهون بدراستهم لان بالسبعينات عايدة وازهار انقبلوا بكلية الطب اني الوحيدة الي مجنت مهتمة بدراستي فأنقبلت اداب ومجنت راغبتلها .. اتزوجوا خواتي بعد التخرج  عايدة اخذت طبيب وازهار هم اخذت طبيب بقيت اني شوية اتاخرت لان الي خطبوا خواتي عوائل راقية واغنياء مجانت تعجبهم ذبتي واصلا اتأثرت بالهيبز هاي حركة شبابية طلع موديلها بالسبعينات اني گمت البس هدوم مخربطة ومشگگة وكفشت شعري جانوا اهلي وخاصة امي زاهدة خانم تمنعني من هاي الحركة لان بيها شخص ويانا بالحركة اسمه  منير  اجة خطبني واهلي طردوه  جانت عمتي اخت ابوية تجي تتوددلنا وابوية جان يساعدها ماديا لان زوجها متوفي وجان عدها ابن واحد اسمه عزمي .. عزمي مواليد 1950 جانت اتخاف عليه كلش ومجان ايام الدراسة يطلع لباب البيت حتى مجان يجي لبيتنا
فدخل كلية الطب واتخرج طبيب ومن اتخرج گام يجي يزورنا يشوف خاله فجانت امه عمتي سعاد تزورنا وتحاول اترغب ابنها عزمي بية لان اني الوحيدة الي ممتزوجة من خواتي .. عمتي سعاد ورة مشافني عزمي وانطاها موافقة فاتحت امي بالموضوع .. امي رفضت لان عمتي سعاد مو من مستواها لان جانت اتدور عوائل راقية بس قنعها ابوية انه عزمي طبيب ويگدر يسعدها لسمؤال / اني هم قررت انه اعوف صديقاتي بحركة الهيبز وكلت وية نفسي كل لعب ووراه بس ..اتزوجت بدون  فترة خطوبة يعني كل الاجراءات مطولت اسبوع لان وراه سفر يريد يكمل بورد ابريطانيا وهذا الحجي سنة 1974 جان عمري 22 سنة .. اني هم جهزت حالي عالسريع ولبست بدلة العرس وصعدت بالطيارة .. هذا موديل قبل عروسة تصعد للطيارة ابدلة العرس رحنا هناك للندن الجو مغيم 24 ساعة وهذا عزمي هم مغيم لا يحجي ولا يسولف شكد محاولت وياه .. اوف شلون عيشة لو باقية على حياتي بالعراق والطربگة جان احلى من هاي العيشة المقرفة .. بدأ عزمي دراسته واني صرت حامل وفرحت بحملي هواية مجنت اطلع هناك لان باردة كلش واني صار بية كآبة كلما يرجع للشقة يلگاني داابچي المهم الشي الزين الي حصلته من لندن هو الليسن اجازة السوق وبسنة76 جتنا اول طفلة ملت علينا المملكة البريطانية حلوة سميناها لارسا وعزمي بهذي السنة اخذ البورد وقررنا نرجع لبغداد
يتبع