روايتنا المره دي حتكون عن عائلتين منفصلتين م بعرفو بعض..عائله عثمان عبدالله.. و عائله امين الطاهر...
قاعد عثمان عبدالله..بشرب في شاي.. في بيتو.. عباره عن شقه كبيره عندو مرتو سميه و بناتو رانيا دكتوره و نهي بتدرس تصميم و اولادو مصطفي مهندس مكنيكي و محمد شغال في منظمه.. الترتيب بتاعهم..الاكبر مصطفي حتي محمد حتي رانيا و اخيرا نهي..
تجي سميه تقعد جمبو و تشيل كبايه الشاي حقتها تشرب..
عثمان : (وين الاولاد?)
سميه: (رانيا مناوبه الليله.. نهي بتقرا في غرفتها.. و محمد و مصطفي مافيشين.. )
عثمان:(الاولاد ديل اصلا م ببطلو حوامه? )
سميه:( لسه شباب خليهم.. )
عثمان: (طايشين ساي ديل..)
سميه:( ربنا يهديهم..اها عملتا شنو مع ميرغني اخوك?)
عثمان:( لسه.. حنقعد مع محامي و نشوف االحاصل.. )
سميه: (اوعي تتنازل عن حقك مهما حصل ي عثمان.. )
عثمان: (م بتنازل ي سميه بس ياخ المحاكم دي كعبه..)
سميه:(حتي لو كعبه ادخلا لانو اخوك حرامي و كذاب 😠.. زور ااي شي و شالو براهو.. مستحيل ابوك يظلمك و يكتب حلالو كلو ل ميرغني و يخليك انت 😠.)
عثمان:( والله م عارف ي سميه.. اصلا ابوي في شهورو الاخيره كانت تصرفاتو كلها غريبه.. )
سميه:( بس م لدرجه اكتب حلالو ل ميرغني و يخليك انت..و اصلا هو م عندو غيركم انتو الاتنين.. )
عثمان:( نشوف المحامي و نحدد البحصل)
سميه:( بس م تقرر حاجه بدون م ترجع لي)
عثمان:( حاضر ي سميه.. اصلا انا م بعرف اقرر حاجه بدون م ارجع ليك و اسالك..)
شغاله رانيا في المستشفي بتقيس ضغط لمرا كبيره و واقفه جمبها بتها..
رانيا: (امك كويسه بس ضغطها مرتفع لكن حاعمل شويه تحاليل عشان نتطمن عليها اكتر)
البت:( طيب ي دكتوره)
تجي عربيه الاسعاف و ناس الطوارئ يجرو عليها..
رانيا: (استر ي رب..دقايق..)
و تمشي علي الطوارئ.. تسال ناس الطوارئ..
رانيا:( حصل شنو 😰? )
يقول ليها:( حادث عربيه)
تمشي رانيا مع الممرضات و تحاول تسعف في المصابين يكونو راجلين و بت..
قاعد مصطفي مع اصحابو في نادي بلعبو كتشينه و بتونسو و يضحكو و يشاغلو بعض.. تلفونو ضرب.. القاهو ابوهو.. ارد.. مصطفي: (ايوا ي ابوي? .... في النادي مع اصحابي.... طيب...سلام)
و يقفل و هو مكشر..
تدخل رانيا غرفه الاستراحه بتاعتهم و تقعد تبكي تدخل وراها امل صحبتها.. تقعد جمبها ...
امل: (ي رانيا م ممكن كده ي بت.. م في يدك حاجه تعمليها ده امر ربنا.. م يبقي قلبك رهيف كده.. )
رانيا و هي بتبكي: (م بقدر اتحمل زول يموت قدامي.. م بقدر والله.. )
امل: (ده قضاء ربنا ي رانيا.. )
رانيا: (م قدرتا انقذو..م قدرتا..)
امل: (اصابتو كانت خطيره.. م ليك ذنب في شي.. انتي عملتي العليك.. عمره انتهي خلاص.. بعدين خلي قلبك شويه قوي... م ممكن من اقل شي تقعدي تبكي.. دكتوره كييف انتي بس 😒.. يلا قومي غسلي وشك و ارح اطلعي تمي شغلك.. رانيا: (طيب.. دقايق بس)
تطلع امل تمشي..
في منزل امين الطاهر البتكون من بيت كبير بطابقين يعيش امين الطاهر و زوجتو هنادي و ولدهم الوحيد يحيي و عندهم بتهم سميره متزوجه و عايشه في الامارات... امين و هنادي بحبو يحيي شديد و بدلعوهو.. ابوهو سفرو ماليزيا درس هناك.. و رجع عمل شركه صغيره بتاعت استيراد و تصدير و بدا يشتغل فيها.. ابوهو طوالي كان بدعمو و بقيف معاهو...
قاعدين امين و هنادي علي الصفره و قدامهم الاكل مستنيين يحيي ينزل..
امين بكورك : (يلا ي يحيي الاكل برد.. )
يجي صوت يحيي من فوق يقول: )جااي ي ابوي..)
واقف يحيي قريب من السلم و بتكلم في التلفون ..
يحيي: (خلاص حبيبتي.. اتغدا و برجع ليك... باي..)
و يقفل..
يجي نازل بقعد ياكل..
امين: (الشغل كيف?)
يحيي: (كويس والله احسن من الفتره الفاتت)
امين: (الحمدلله.. بعرف ناس دايرين اصدرو حاجات لبرا.. حاجيبهم ليكم.. )
يحيي:( ااي طوالي ي ابوي.. )
هنادي: (خليك من الشغل ي امين خلي الولد ياكل..ضوق السلطه ي يحيي حتعجبك شديد... )
يحيي: (حاضر ي امي.. )
يضوقها..
يحيي: (الله 😍 تجنن ي امي تسلم ايدك..)
هنادي: (بالهنا عليك ي يوو...)
يحيي يضحك..
يحيي: (يوو شنو ي امي.. ده كان زمان.. بس اسي انا كبرتا..م انفع يوو ده..)
هنادي: (حتي لو كبرتا و بقي عمرك ميه سنه حتبقي في نظري يوو ولدي الصغير البحبو 😍😍..)
يحيي يضحك..
يحيي :( برضو.. طيب ي امي.. قوليها بس بيني و بينك اوعي تقوليها قدام زول غريب.. )
هنادي: (حاقولا ليك قدام ندي خطيبتك 😍)
يحيي: (لالا ي امي يااخ م ينفع..)
امين: (اها م حتحددو العرس? )
يحيي: (والله ي ابوي حنحددو خلاص.. خلال كم شهر الجايين.. )
امين:( اي يلا دايرين نفرح بيك.. )
هنادي:(ااي يلا حدد و لو ناقصه ليك ااي شي ااحنا بنتمو ليك..)
يحيي:( لالا مستوره الحمدلله.. ان شاءالله ربنا يسهل..)
امين: (ان شاءالله..)
يتبع.....
