بيت الزار

الجزء 04

تاني يوم الصباح صحينا لقيت جسمي مبقع كلو احمر من قريص الحشر وقامت لي حبوب في جسمي ووشي شكلو الجو بتاع السخانة والتراب ما نفع معاي .. دخلته شلته هدوم الرياضة ولقيت بنوته في قدامي سألتها من الحمام وين ودتني شي مبني كدا من دون سقف وما فيه باب .. قلت ليها دا شنو .. قالت لي الحمام

.. اتخلعته قلت ليها كيف يعني بتستحمو وبتغيرو هدومكم هنا؟

.. قالت لي اي .. قلت ليها لالا مستحيل استحمي هنا عملت خلف دور ورجعت الغرفة الخاتين فيها حاجاتنا دخلته وقفلتها علي لبسته هدوم الرياضة وركبت سماعاتي وطلعت الحوش اتريض زي ما متعودة كنت .. جو نسوان اعمامي وبناتهم واولادهم طالعين بقو بعاينو لي .. ولا اشتغلت بيهم بقيت بجري حوالين البيت .. المرا بتاعت الظار هههههه سميتا كدا قامت قالت لي البنات قومن كنسن الحوش دا ما انتو بنات السرور البتخدمو وبتنضفو ما بتقعدو عالة علي الناس .. ولا رديت عليها .. وقت شافتني كدا اتحرقت شفتها دخلت جوه وشوية جا معاها عمي نهرني وقال لي قلة الادب نحن ما عندنا بناتنا مستورات وستات بيوت وكلام الخواجات دا ما بتاعنا .. ومن الليلة تلبسي ساتر وتغتي شعرك دا انتي قايلة روحك وين .. خوفني شديد وكان وشو متجهم كدا وبكورك بي صوت عالي .. دموعي نزلو غلبني لانو ما حصل حد كورك فيني كدا او سمعني كلام فارغ لا ماما ولا بابا ولا اخواني .. قال لي واحدة من البنات امشي جيبي ليها قميص يسترا وقال لي بكرا لما عثمان يعرسك بعرف يلمك كويس .. بقيت ارجف وما فتحت خشمي وجريت اشوف ماما وين وقلبي بدق منو عثمان دا البلمني .. جيت جارية لقيت ماما بتتكلم في التلفون وكنت ببكي وقت شافتني اتهجمت قالت لي في شنو الهبشك منو .. حكيت ليها بالقالو عمي .. طلعت طوالي وجرتني من يدي وجينا طالعين قدامهم ماف زول اتكلم طلعنا بره الحوش ومشينا علي بيت كدا قالو بسموه ديوان الرجال .. ماما وقفت بره وقعدت تكورك يا علي يا علي .. شوية وبابا جا طالع ووراه اخواني حكت ليه الحصل .. بابا سكت وما رد .. انا هنا خفته شديد وعرفته انو معناها راضي بالحصل .. ماما قالت ليه يا علي نحن راجعين الخرطوم الليلة وانا اتصلت بي اسامة اخوي وهو جاي يسوقنا و ... قبل ماما تتم كلمتها جا صوت عمي الكبير وقال ليها الباب يفوت جمل بس زي ما جيتي اول مرة براك حا تمشي برضو المرة دي براك ... ماما قالت ليه اولادي انا التعبت فيهم وولدتهم ما بخليهم ليكم تقتلوهم لي ومكان ماشة بمشو معاي مافي زول بخاف عليهم اكتر مني .. اعمامي الاربعة جو واتلمو وقالو لي بابا يا تعقل مرتك وتلمها ولا لينا تصرف تاني .. بابا ساق امي وقال ليها يا نهي اعقلي وما تعملي لي مشاكل مع اخواني وانا اديت كلمة انو رهام لي عثمان من زمان قبل نجي هنا .. ماما قعدت تكورك بتي لسه صغيرة يادوب ١٥ سنة عايز تدفنا لي بالحياة مع جنس ديل .. بابا بقي يكورك مالم يا نهي جنس ديل اهلي وناسي الما عاجبنك ديل انا منهم ولميتك انا يا نهي والفيه دا انتي دا كلو من خيرهم وحقك .. ماما بقت تبكي وقالت ليه الله يلعن اليوم الخلاني اعرف واحد زيك جاي تعيرني ونسيت انو ابوي كتر خيرو خدمك ووقف جمبك وقت هم طردوك وما وقفو معاك .. واحد من اعمامي قال لي بابا يا علي انت بقيت ملطشة للمرا والله عايز تفضحنا وسط اهلك وتمشي كلام المرا .. ماما قالت لي عمي امشي لم عواليقك بتاعت الظار دي وتعال تاني اتكلم في النسوان .. عمي قد يجوط ومد يدو ضرب ماما كف وهي ردت ليه الكف برضو .. بابا زعل شديد وقال لي ماما انتي طالق يا نهي وزي ما جيتي تمشي براك اولادي بتربو معاي انا غصبا عنك ... في الساعة ديك جا خالو اسامة عايزة اجري عليه بابا جراني من يدي وانا ببكي ودموعي نازلة وقال لي نهي اتفضلي درب السلامة .. اعمامي بقو واقفين واخواني ساكتين ما قالو شي .. ماما مشت وخلتني ودموعها في عيونا وخالو ما قدر يعمل شي ركبو العربية وفاتو .. بقيت بكورك ليها يا ماما ما تمشي ما تخليني ليهم ما تخليني لي بتاعة الظار دي عليك الله تعالي سوقيني .. بابا نهرني واول مرة يصرخ فيني قال لي رهام ابقي مرا وامك لو عايزاك كانت قعدت معانا وتاني كلمة ما اسمعها منك وجيبي التلفون دا .. اتخيلو شال مني التلفون وطلع مع اخواني وخلاني لي نسوان اعمامي وكل واحدة تغمز للتانية ...

يتبع....