بنت الشيخ

الجزء التاسع

#بنت_الشيخ

الجزء التاسع

Nada hs

حركت السيارة بسرعه وانه كاعده بصفه واستحي ادير وجهي ع الجهه مالته واباوع.... ظل هو ساكت ....شويه وگال...
ياسر:طالعه حلوه حبي...
-شكرن... انته هم...
رجع سكت وماحچه ولا كلمة...بس شني كل شوي يطلع التلفون ماله وچنه يودي رساله او هيج شي خيلي...
وصلنه لسوك الذهب ...انه ميته من الخوف...كل ظني واحد من اخوتي يشوفني...اوف منج سمره كله منج! هسه انه وين وهاي الطلعات المالهه معنه وين... من وصلنه هم فتحلي الباب... انه مثل الثوله مااعرف وين اروح وين اجي... بس اعاين داير مدايري...
ياسر:يله تعالي؟!
مشيت ورا وهو عين بالدرب النمشي وعين ع التلفون بيده... وصلنه ع محل مال ذهب چنه صاحبه ابو المحل.. تلكاه سلام ومحابب...انه مدنكه واستحي اشيل راسي... وهذا زلمه غريب وصاحب ياسر استحي منه... احنه عدنه صحبان الولد كون مايدرون عدهم بنات ولانشوفهم ابد...
ابو المحل:شلونچ خيتي؟ اتفضلي استريحي!
گعدت ع شي مثل التخم..بس هو مو تخم...مثل الصبه ومطبگينهه مرمر ومخلين فوكاهه تكيات اسفنج مبطن...
ظل ياسر يسولف وي ابو المحل وشلون الاسعار وشعندك موديلات... انه مدنكه راسي اعاين ع رجلي...لابسه حذاء سميره...دققت بيها حيل وسرحت حته انسه خوفي ...الحذاء بيها حلقات وحده متلابسه بالاخرى... گمت احرك اصبع رجلي وهو بالحذاء وابالي ارسم مثل ذن الحلقات... ظليت لاهيه بالحذاء والحلقات لحد ماصاحلي ياسر...
ياسر:احلام! تعالي شوفي؟
كمت وكفت قريب يم الميز مال گزاز والذهب اشكال والوان جوه الميز وبهاي اليعرضون بيهه الذهب بره...
ياسر بيده كلاده...كلش حلوه تخبل...:هاا؟ عجبتج؟
-اي
ابو المحل:اكو بعد موديلات اذا تحبين تشوفيهن؟
-لا
ياسر بنفس الوكت كال:اي خل نشوف...
طلع اشكال والوان وحده احله من الاخرى... انه دخت بيهن.. شكد عدي ذهب وخواتي ونسوان اخوتي بس ماشايفين هيج ذهب حلو مصبوب صبابه چنه... اخر شي اختارلي تخم كامل..
انتبهت ع الوكت صارت غروب اله شويه... متت بدمي..انه ياوكت ظاله هيج بره!
ياسر:يله حبيبي هذا ناخذه بعد..
ابو المحل بضحكه:هههه المدام مستحيه ماكدرت تاخذ راحتها بالاختيار...
انه دنگت واحس حروره صارت بوجهي...
ياسر:اي..يله حبيبي شوفلي شكد يصيرن؟
رجعت انه كعدت بمكاني وظل ياسر وابو الذهب يتحاسبون... انه بيهه رديت صفنت ع الكاشي...اعاين ع خطوط الكاشي وهم باصبع رجلي الچبير احرك واتخيل ارسمهن....
ياسر:يله...كملنا
كمت من مكاني وياسر ظل يسلم ع الولد وطلعنه... ظلينه نمشي مسافه لما وصلنا السياره بلكراج...ياسر يسألني بعد شمحتاجه وترحين ناكل؟ جوعانه؟ نشتري ملابس؟
-لا عفيه..اريدن ارجع للبيت... صارت دنيه الليل!
ياسر:هههههه حبي ياليل؟ هسه بده مشوارنا!
سكتت وصعدنه السياره وماخله شارع ماطب بي وانه الخوف ماكلني اكل...
ياسر:هسه نروح نتعشى ونكمل الملابس...
-لااا والله ابوي مايرضه! ومايدري طالعين وحدنه؟!
ياسر كالها بعيطه:واذا ابوج؟ اني زوجج شبيچ؟!
سكتت ودنگت خايفه لايعصب علي...
وصلنه ع هذا اليسمي مول...دهر شكبره شكده!! يمكن مره لو مرتين احنه فايتين من هذا الشارع وماشفت المول زين... بس من طبيناله شكبره والمحلات البي اشكال الوان...هو يمشي وانه وراه وصلنه ع مطعم حته مالحكت اقره اسمه والاسم هم مكتوب مو خط عدل مامفهوم...
كعدت وكعد ياسر كبالي...اعاين ع الناس...كلها ماخذه راحتها بس انه لوني مخطوف وخايفه...ونوب بنات مفرعات وشعرهن طالع وكاعدات وي ولد وعادي.... يمه هاي لو انه ابوي يذبحني بساعتهه...
ياسر:حبيبي؟ شنو تاكلين؟؟
-بكيفك؟
ياسر وهو رافع القائمه مال اكل وطالع منه بس عيونه وخشمه رفع حواجبه حيل وعيونه انفتحت اكثر:اطلبي! مااحب تكونين بلا شخصيه! اختاري الي يعجبج!
عاينت ع القائمه الكدامي...وقريتهن كوه واباوع ع السعر خاف اطلب شي ويطلع غالي علي... طلب لفة همبركر... واصلا انه بقيه الاكلتت مااعرفهن...بس الهمبركر يجيبه زيدون بين مدة ومدة
هو طلب بيتزه ...هو ياكل وانه روحي راحت ع البيتزه بس استحي اكل ويا...نوب مدري شلون كاظ السچينه والچطل وياكل يبو شكد نازك..ياكل لكمه ويمسح حلكه ...انه من المستحه مااكلت بس لكمتين... ردت نخلص بسرعه حته نرجع من وكت...
كملنه ودفع وطبينه بمحلات المول...شي احله من شي...حته الثياب غير شكل وقماشهه يخبل... ياسر مايستحي النوب هو يطلعلي ويكلي اخذي هذا وهذا... نوب ياريت لو شي مستور كله قمصان للركبه وبناطير واخذلي عبايه خليجيه هم تخبل بعد احله من الجابتهه سميره واخذلي حذاءات ...رادني اقيس ابو الكعب بس كتله ماريده... هو مدري شعجب تنازل ورجعه...واله هو بقيه الشغلات كلهه اختياره وحته اذا كتله ماريده ياخذه غصب عني
كملنه وطلعنه..
ياسر:بعد كم يوم همين نطلع ونشتري باقي الشغلات...
-لا بعد مامعتازه شي..عدي خير من الله...
ياسر:اول شي اسمها محتاجه مو معتازه؟! ثاني شي واذا عندچ؟ يعني تردين اجيبج بملابسج الي تلبسيها يم اهلج؟!
-بكيفك!
ياسر:لا تكوليلي بكيفك! تخبليني بهاي الكلمه! احب انتي اطلبين وتشرطين وتختارين شغلات حلوه! مو مثل قبل شوي! اخذج يم التراكات ترحين ع الدشاديش!
-اي..بس ع كيفك وياي...هسه اتعلم عليهن...
ياسر:ياريت والله! ياريت تتعودين! لان صبري بده يخلص تره!
انه دنگت وحسيت بالمهانه كلشش رفعت راسي وباوعتله وهو يسوق حچيت بهدوء:اذا من هسه صبرك خلص مني وانته ماصارلك شهر خاطبني شلون راح تتحملني!؟
ياسر ذباله حسره مثل كل مره ووياهه اوووووووف طويله. شال ايده بخفه وضرب ع رجله بس عكيف...
انه رجعت دنگت...واحس گلبي مفطور...حته مافرحت بالخطبه ولافرحت بالاشتريتهن ولا فرحت بطلعه ويا.. كضاهه كل يعلق عليه وينتقد.... كلت بگلبي هسه انه لو باقيه بلايه زواج مو احسن شورطني وين چنت احچي براحتي واكل براحتي والبس براحتي هسه كله اخذ بالي منه... حته الحچايه... اعد للخمسه يله احچي... خاف تطلع مني كلمة ماتعجبه! وهم كل هذا ومرات تطلع مني حچايات ويظل يصنف....
وصلنه لبيت سميره وتلگتني... اخذت العلاليك مني وكلبت الملابس وظلت متعجبه بيهن وتكول حلوات ويخبلن انه بالي كلش مو يمهه ولا الي واهس اگلب الشغلات الجابهه...
سميره:ولج حلومه شبيج؟
-مابيه شي...يله تعاي وياي وصليني لبيت اهلي...
سميره:ولج امي خابرتني مرتين تسأل عليج.. انتي كولي حموزه شلع كلبنه بالسوك وتأخرنه! هيچ فهتمتهه!
-خوش.. يله امشينه مابيه حيل كلش...
لبست سميره وعدلت روحهه ...سوت روحهه چنهه صدگ چانت ويانه..، طبينه لاهلي لكيت امي تفتر بالمطبخ واسمع فروخ اخوتي جوه ...
امي:خفت شكولجن! انه مو گلت تردن من وكت!
سميره:يمه مو گتلج هذا الشاذي شلع كلوبنه... كوه تسوكنه من عده...
امي خزرتني:روحي غسلي هذه الطحين البوجهج! جليله حيه ومستحه!
اخذت علالكي بيدي وصعدت ركض خاف احد يشوفني... غسلت وجهي ورتبت الملابس الجبناهن وضميت الذهب... حسيت بروحي جوعانه...نزلت جوه وچانت صنطه ماكو حس كلهه نايمه... رحت فتحت الثلاجة لگيت بتيته مگلايه ومخلايه بماعون... الثوله حطيتها بمعاونهه الكزاز وبالفرن...مااسمع بس صوت طگ! فتحن الفرن لگيت الماعون مكسور والبتيته طايحه والدهن صار شعواطه...طفيت الفرن وشلت البتيته وذبيته حسيت بروحي ماعي حظ حته بالاكل وانسدت نفسي بعد... نظفت الطباخ وصعدت لغرفتي كلشي مااكلت.... من خليت راسي ع المخده واذكر ياسر والخطبه والحچي ماله وتصنيفه عليه انفجرت بچي
حسيت انه جاي احمل روحي اكثر من گدرتي!
انه ماتعودت هيج ينضغط عليه... حته اهلي شكد متشددين بس احس ماخذه راحتي وياهم...ماافكر بشي...حته اغلاطي يسامحوني عليهه.... ظليت ابچي وحته ماشفت التلفون اذا دك عليه لولا... گبل لاانام اجه ابالي الشيخ ...ويمكن هو مو شيخ.. اذكرت خزرة عيونه من يخابر بالتلفون ودار وجهه عليه... گلبي رجف من ذكرته...دموعي نزلت مره ثانيه بغير مااحس... تالي تعوذت من ابليس وقريت ايات ونمت....
مرت ايام وانه وياسر بينه بس التلفون...وهم ع نفس الحچي والنغز ماله وياي...البسي وادلعي وغيري حچيج! انه احس صار مو خطيب احس صار طوگ ع رگبتي خانگني خنگ...
لااكدر احچي لاحد ولااكدر اسوي اليريده!
خفت لا احچي ونوب اهلي يسوون مشكله ويبطل مني واظل بلايه زواج...گلت ميخالف اتحمل المهاين ويجي يوم اصير مثل مايريد ويحبني وننسه هاي الايام...يجي يوم واصير اضحك ع روحي ع تفكيري هذا ...يجي يوم واشكيله من عده واكله جرحتني گبل وهو يرجع يعتذر مني.... هواي املت روحي بي...
هواي سويته بعيني مو غلطان...
وره مده...اجتنه سميره...انه من جيتهه عرفتها...عرفت جايه علمود ياسر... وصدگ بس اختلينه وحدنه گالت ياسر يريد يشوفج...وتشترون باقي الغراض المحتاجتهه! انه رفضت ومارضيت بس سميره ماينگدر الها...طلعت روحي ظلت تقره براسي لحد مااقتنعت... وكبل لاتطلع هم گعدت وي امي وحاچته وبلسانهه الحلو وتواسيلهه وسوالفهه خلت امي ترضه... بس شني امي هم وجهه انعقج كلش وتباوعلي بغيض...
يمكن عبالهه انه الوديت علي وانه الگلتله ع الطلعه... بس امي ماتدري بهاي الطلعه هم وحدنه! ولا ذيج الطلعه الاوليه هم وحدنه لو تدري يمكن تزين راسي صفر...
ثاني يوم هم ردت علينه سميره... واجت جايبه مكياجهه ... بس ماجايبه ملابس...چي تدري انه اشتريت وعدي ... عاد هي فتحت كنتوري ورتبت لي ملابس...بنطرون وقميص وفوگهن العباة الخليجية... هم رتبت وجهي شوي ...وشالت چم شعره زايده بحاجبي...بس مابين عليه شايلتهن ... مكيجتلي خفيف وتشجع بيه وطايره فرح...فرحانه اكثر مني اصلا... تريدني بس اتزوج...
هم مثل ذيج المره رحت لبيت سميره ع اساس مناك تروح هي ويانه...بس هو كله چذب وتمثيل گدام اهلي... من طبيت چان ياسر جاي عدهم...كاعد بالديوانيه...وانه ظليت بالمطبخ... سميره دفعتنني دفع دفع وطببتني علي للاستقبال... نوب طاحت بالباب سدته علينه... اختي يمكن تخبلت!! مدري نست اهلي!! ...
ياسر من شافني گام ع طوله وضحكلي:هلا بهل طله؟!
مشيت خطوات كدام حته اكعد ع القنفه... شو مااحس اله ادين وكضت راسي... نوب بوسه ع گصتي... ردت اموتن... كل جسمي ارتعش... رجعت خطوتين لوره..
ياسر:شلونج حبيبي؟ شبيج خايفه؟
-الحمد لله...مابيه شي..
ياسر:تعالي گعدي هنا؟!
ماگمت من مكاني...هو اجه وكعد بصفي...
ياسر:اني مو كلتلج مااريد هذا الخجل؟ انتي شلون بيچ؟ ليلة العرس شراح تسوين دخيل ربچ!!!
-بعدني مامتعوده!
ياسر:يعني صارلنا شهر ونص؟! ومتعودتي؟ تدرين اني مأجل الزفه لهل سبب! اريد من اشوفج انتي تركضين وتحضنيني تبوسيني تكوليلي حبيبي شبيك شمحتاج شسويلك!
-ع كيفك وياي... والله اتعود بس اطيني مجال!
ياسر گال بملل ونفس يزفر:يله يله ..كومي دنروح ... لا تصير دنيا ليل ونوب تخبليني!
كمت ورا وطلعت بغير مااشوف سميره.. طول الدرب ساكتين... محد حجه... انه كلش تواخذت من روحتنه! انه بعد مامحتاجه شي ليش هل ملحه مالته! ظلت فكرة تجيبني وفكرة توديني...
طبينه لمول مو نفس مال ذاك اليوم... لا غيره...هم حلو بس شويه اصغر... انه مثل اللعبه وين يوجهني اروح وين يكلي اكعدي اكعد... اختار الملابس هو وانه اطب اگدر واطلع... الطلع ع كدي اخذه بغير مااحجي... حته لو ماعاجبني اخذته...
كملنه وكعدنه نتعشه...هل مره صرت سباعيه... اختاريت انه وماكتله بكفيك... حته لا يعصب علي... اكلنه وانه حايره باللكمه اجيبها منا واردها منا... مو چي شبعانه...لا چي استحي منه.. هو ظل ياكل وچنه مايشوفني گباله...
انه هم دنگت راسي وماشفت كل شي... حته شكل المطعم والناس البي ماشفتهن...

يتبع...