#بنت_الشيخ
الجزء الثاني
Nada hs ندى ح.س
شويه شويه كمت اتودد لبوي واحاجي واحطله الاكل واصبغ احذيته كدامه حته ينكسر كلبه عليه ويراضيني.. شويه شويه حاجاني ..بس مو عبالكم سوالف وهاي..لا يتومر عليه(يتأمر)
وانه اكيف من يگلي صبغي قندرتي لو يكلي اكوي صايتي وعباتي.. هههه تذكرت الكوي.. كبل من چنه بالريف ابوي كل مدة ياخذ ملابسه كلهه يغسلونهه ويكوونهه ويردهه... بس من شلنه لا سميرة كامت تكوي..بعدين تزوجت.. كام ابوي يحچي عليه ليش ماتعرفين تكوين وهو نمونه..
عاد انه صعدت عدي الغيره كلش..كمت طلعت ملابس ابوي وبديت اكوي..ماعرف منين ابدي بس اجيب الاوتي واحطه ع الملابس وامشي.. انه ماعبالي هيج يحرگ بسرعه..حطيته ع عباة ابوي وهي مال صوف ومن ذني الزينات مسويهه بمليون وفوك مال طلي هو رباه وكبره بس علمود صوفه يسوي عباة..
انه الثوله حطيت الاوتي واشم بس ريحة طلي محترگ.. اباوع ع الاوتي اشوف رگعه وبيهه وماتمشي وتكبر.. شلت الاوتي واشوف العطابه صايره سوده والريحة ترست غرفتي.. انه متت من الخوف كمت لفيت العباه بعلاكة وبليل دفنتهه دفن بالزباله...
ثاني يوم اجه ابوي يسألني كويتي لا؟ همزين محد شافني من كويت.. انه نكرت وكتله لا بويه اليوم اكويهن...
ابوي:جا وين عباتي السوده؟ عجيب ولكم وين راحت..
امي:ماكو ولا الهه ذچر(ذكر او اثر)
-هاا..انه هم مادري ماشفتهه..
ابوي:عجيب وغريب !
ظلو يدورون ومحد لگاهه لليوم هههه... هي شني النوب ابوي مالابسهه بس مرتين يمكن.. وراحت اختفت هههه..
بعدين شوي شوي كمت ادير بالي من اكوي.. بس هم ماضبطته كلش مثل سميرة.. بعدين لا تعلمت وكمت اكوي دوم..حته لاخوتي هم اكويلهم..
مرت الايام وانه بعدني افكر بسالفه الزواج.. بس بعدين وصلت مرحلة مااهتم ولا افكر ..جي طكت روحي بعد .. كمت اتابع تلفزيون ليل ونهار وماعدي غير شي.. وماكو شي صار جديد كله نفس الشي..باجر يشبه الگبله...
اجتنه سميرة عصريه بيوم وراحت..ومرت ايام وهم ماكو شي.. ويوم گعدت مرت حليم الصبح.. انه عرفتهه من مشيتهه بيهه شي.. مو خاليه... كعدت يم امي بالمطبخ وكامت..
مليحة:عمه..مدري شبيه.. شو دايخه وروحي تلعب..
امي:خاف حبلة ولج؟
مليحة:لا عمه منين ..
-فلك طرج! بس لا صدك؟
مليحة:لالا توني تنطفت.. مو حبله..منين عشتو احبل واجيب بعد وحيد حتى اقفل..
-شبيج خيه انسردتي انفلكتي ..اطي فنتگ لروحج!
مليحة:يا شجاج وانه منيلي همه كلهم ستياته(مصغر لكلمة سته)
امي:انه وجهج ماعاجبني..اخذج للطبيب اييوم ونحللج.. انه ادري بيج اذا ماتحبلين ماتكعدين راحه..
مليحة:لا عمه..بس هم اخذيني ميخالف.. علواه اطلع حبله..
عفتهه وانه اهز بيدي ..هاي صدگ تحجي.. شني والله موتوني خلفتهه.. اجه ابوي وحجت ويا امي كالتله مليحه مريضه اريد اخذهه للطبيب بس ماوضحت ع حباله جي عيب عود.. ابوي رضه وكال خل حليم يوصلجن.. انه لزيت روحي(خلت نفسها) حته اروح وياهن...
-بويه انه هم مريضه..اريد اروح وياهن..
ابوي:روحي.. كرعتن راسي سيارة رايحه سيارة راده للطبيب .. كربوله! كربوله! (امي اسمهه كربوله)
امي:ها خويه! (هو زوجهه بس لسانهه ماخذ ع كلمة خويه😂)
ابوي:جيبي سترتي حته اطيجن فلوس..
امي كيفت راحت تركض وجابت سترته..انطاهه وماخلتني اشوفن شكد اطاهه... تولمنه(تحظرنا) من الظهريه الحمره واخذنه حليم يستحي علينه يكول الظهر واللليل ستر الجن عيب شيكولون عليه حاطجن بسياره وافتر بيجن انه ابن شيخ منصور هيج اخلي الناس تحجي عليه..
وصلنه للسوك وجانت ظهر ولا بشر ذاك من ذاك الي توه يفتح محله .. كعدنه اباب عيادة الدكتوره..
امي:جا انتي شبيج المن اجيتي..
-يمه ضايجة وطالعه روحي..
مليحة:ميخالف عمه خل اتونس ..
امي:خايبات وغمه التغمجن جا هو الطبيب بي ونسه!!
-يمه خلي مليحة اتاني(تنتظر) سراهه وانه وياج نروح اشتريلي ثياب ماعدي واريد لباسات هم..
امي عاطت بيه:انتي شنهي تاكلينهن ! مو ذاك اليوم جبتلج ضبه (درزن) وين وديتيهن..
انه فشلت ودنگت هسه شطالبه انه هو كله لباس..
بدت الناس تجي وفتحو العياده طبينه جوه واخذنه باص لمليحة وكعدنه نتاني... انه ظليت شايهه(طايره) عيني ع الزلم الطب.. يبوووي كل واحد يكل للثاني انه احله منك.. شفت وحده طلعت گلبي من اباطي.. حبلة وبطنهه لخشمهه والوياهه رجلهه يخبل ويباوع لحلكهه.. وهي كل ساع موديته..جيب مي..اريد عصير.. اختنكت..لعبت نفسي .. وهو حاير بيهه..
اجه سراهم وطلعو عيني حاجزين ع التلفون واحنه جينه من الظهر وكدمنه خزله(كومه) من كامو كضت يد رجلها وشبكتهه ولا تستحي.. انه مدري شجاني صحت وراهه
-كضي حيل لا يطير منج!
التفتت عليه خزرتني انه متت خوف كلت راح اتعارك وياي.. امي كرصتني وشاورتني(مرض اليمرضج اخخ لسانج كون اكصه)
بس هي خزرتني وراحت..وشني عيني رجلهه باوعلي وضحك ضحكه كوه ساد حلكه...
من طلعو من الطبيبه هم خزرتني ورجلهه باوعلي وضحك مره ثانيه انه ماعت روحي اله شويه...
راحت امي خلتنه وحدنه انه ومليحة ..راحت تشتريلي .. واجه سره مليحة دخلنه ع الطبيبه ..
مليحة:دَكتورَه ..مدري شبيه هليام دورتي تبطي(تتأخر) وتلعب روحي...
الدكتوره:حاف هم حملتي مليحة؟!
مليحة:لا انه اعرف روحي مو حبله..
الدكتوره:روحي سوي هذا التحليل وارجعيلي .. وياويلج اطلعين حامل مره لخ..
رحنه سوينه تحليل واحنه مانندل طبعا بس الوادم دلتنه..نسأل ويدلونه.. ماكال ابو التحليل شطلع بيهه.. رجعنه للطبيبه واطيناهه التحليل..
الدكتوره:عزه بعينج مليحه! لج هم حامل؟! ماما راح يسگط رحمج وظهرج! انتي مخايفه ع نفسج؟
مليحة:يا دكتوره الله يبشرج بالخير..لا دكتوره هم اخافن ع روحي بس شني اريد بعد وحيد واعقديلي مااخلف بعد..
الدكتوره:الله يصلحج! ميصير ماما عمرج صغير وخلفتي هوايه هذا كله يأثر عليج بعدين..
انه رديت ع مليحة:ها ردت روحج من حبلتي!
الدكتوره:عيني لتخلوهه تحمل بعد! مو حاله هذي.. ع الاغلب لازم اسويلج ربط بهذا الطفل...
مليحه:مشكوره دكتوره..تطيني دوه لو مايحتاج..
الدكتوره:لا ليش انطيج..اكيد عندج باقي من ذاك حملج واذا مباقي جيبي ع نفس الوصفه لو ذبيتيهه؟
مليحه:لادكتوره شلون اذبنهه! يله انه اروح بعد.. مع السلامة دكتوره..
كعدنه بهاي اليكعدون بيهه المراجعين متانين امي ترد.. جي وصتنه مانطلع اذا خلصنه من وكت.. ردت امي محمله علاليك وانه اجر بيهن من ايدهه اريد اشوف شجابت..
امي:خايبه يمن هفه ! الناس منا فضحتينه!
خابرت مليحة ع حليم واجانه..الطريق كله انه اگلب بثيابي واكدرهن عليه... طرت بيهن نوب شني من الوان تخبل..
نزلنه ومليحة مكيفه بروحه وحتى حليم هم مكيف.. بشرت اختهه ع الحمل وذيج شو طنبت(طنگرت) جنهه ماعجبهه...
سوينه العشه انه وفليحة وامي ومليحه تمددت عود حبله بعد ماتتحرك...
تعشينه وخلصنه وغسلت ثيابي ولباساتي الجدد حتى اكشخ بيهن باجر.. هم سهرت ع التلفزيون يله نمت.. ثاني يوم كعدت للعشره.. جنت اتريك وبعدني منعسه.. كملت ريوك وكعدت يم امي بالمطبخ وهي تطبخ وفليحة تغسل ملابس بالحمام..
طب علينه حليم بس ماسلم! باوعت علي اشوف وجهه احمر دم
حليم شال ايده وبيهه لباس برتقالي وصاح:هذا المن!
يبووووي متت بدمي ماحجيت...
حليم:ولجن والله كارثه اكو واحد يسوي عملتجن اكو واحد ينسه هيج شغله! الكارثه وصلت ابوي وويا شيخ لمضيف السادة ومن نزلو احس بالزلمه يضحك باوعت بالسياره واشوف هذا جان يم رجليهم!
يمه متت والعباس.. شني هاي شوكت طاح مني ماحسيت.. والكارثه شيخ وي ابوي الله اليعلم ابوي شيسوي بينه اليوم.. صدفه وطبت مليحه..
مليحه:يا شكو ليش تصيح؟؟
حليم:هذا الج؟
مليحه:ايي اليه انه وصيت عمتي.. دهر بس لا ظال بالسياره؟
حليم:الله يطيح حظج ع هل دكه..
شمره عليهه وراح.. يمكن لو ما مليحه جا صارت كتلتي عمل شعبي هههه.. يالله نوب شعرضاته وحتى صاير بي تراب يمكن دايسين علي😂😂
مليحه:دهر دهرج وج شلون تنسينه!؟
-جا اندري طاح مني بعد..هذا حظي..
امي:يمن عمه بعينج حته! مدري شبيهه هاي البت .. صافگج ثول شبيج؟!
-يمه سبحانه الماينسه! جا بيدي..
امي:ولي مني..روحي غسلي الحوش يله...
رحت غسلت الحوش مثل ماطلبت امي ومنظر اللباس وحليم شلون شايله مايروح من بالي..حتى اللباس كرهته واطيته لمليحه ع موقفهه البطولي وياي هههه...
كملت تنظيف واجه ابوي متنك كلش ما يتحاجه.. ادري بي ع سالفه اللباس بس يستحي مايحجي ههه...
حتى مااكل ويانه بذاك اليوم كال لامي جيبيلي غداي بالديوانيه.
ديوانيه ابوي مفصوله عن البيت وباب واحد بيهه بس من بره ... وكلش جبيره.. كعد وحده واكل هناك ...
وره مده هيج يمكن تلث اسابيع .. فليحة اجت لامي..
فليحة:عمه اظن انه حبله..
امي صاحت:دهر ابيت اهلجن كون! شياجن!(شجاجن)
فليحة:عمه جا انه منيلي همه بس تلياثه(مصغر3)
امي:وشتردين هسه؟
فليحة:عمه اخذيني للطبيبه جا بس مليحه اخذتيهه!
امي:يبوو من عمر الاكشر..بعد التحبل منجن اچويهه ع ***
انه من سمعت امي هيج طكيت ضحك يبوو اتخيل امي صدك تچويهن وتسويهه متخاف ههههه...
انه كيفت شعدي..حته كل ما يرحن الز (احط او اخلي) نفسي وياهن... وهلمره وصلنه مجيد وهم بالظهر الاحمر ولا بشر طالع بس احنه...همزين مجيد مايعرف سالفه اللباس هههه..
همه ظليت انه اعاين(اتفرج) ع الناس وبالاخص ع الحلوين .. دهر ابيت اهلهم ع هيج حلاه.. ذابت روحي وانه اعاين بالوجوه..
تمنيت اشوف رجل هاي التتفستق وطكيتهه بحجايه بس ماكو مااجت... كملنه ورحنه نجيب الدوه من الصيديله امي التحجي واحنه وراهه واكفين... انه شني روحي ماعت ع ابو الصيدليه.. نوب لابس روب ابيض واشكر وطويل.. انه بگلبي اكول من فلك طرك ع هل جمال شني انته مخلوق من طين واحنه هم.. عمي احنه مخلوقين من سرجين من بعرور من دمن من صخام ..
كلش اندمجت بحركاته...سريع بسرعه يشتغل.. ادي بيض وناعمات يمكن انعم من ايدي🤤
مااسمع بس امي تصيح ولج يله امشينه اخوج اجانه.. كملنه شغلنه يم الطبيبه وردينه للبيت.. انه طول الطريق اتخيل هذا الصيدلاني واتذكر حركاته وشكله...
يتبع...
