بنت الشيخ

الجزء الثامن

#بنت_الشيخ

الجزء الثامن

Nada hs

‎وره العشه راحت سميره وصفيت انه وحدي بالغرفه... حسيت بكل شي هادي...حته انه هديت... اتذكر كبل چم ساعه چنت كاعده بنفس هذا مكاني وميته خوف وارجف...
‎ظليت نايمه ع ظهري واعاين ع السگف...تجيني حفنه افكار... وارجع اندار ع صفحتي هم اعاين ع الحايط وهم اظل افكر لحد ماامل وادير ع الجهه الثانيه... حته تلفزيون ماشغلت بذيج الليله انه صح فرحانه بس اكو شي بداخلي .... يخليني ساكته مااطلع الفرحه وخايفه هم اطلع الخوف البيه.... اخر شي حسيت راسي راد يطك من التفكير.... خليت مخده ع راسي ونمت....
‎ثاني يوم الصبح ماصار شي ...تريكت وصعدت غرفتي نزلت شويه بس مااشتغلت ..رجعت صعدت وطلعت صوره ياسر واتذكرت البارحه واعاين ع ايدي والحلقه الخلاهه بيدي....
‎للعصر اجت سمر مثل مايصيحونهه... انه فوك وسمعت صوتهه ونزلت... سلمت عليهه وهي ظلت تسولف وي اخوتي وامي نوب اجه ابوي سلم ومشت كل شي عادي.... لحد ما غمزتلي اصعد فوك صعدت وهي لحگتني وبيدهه جنطتهه...
‎فتحت جنطتهه اطتني تلفون... يمه انه شفت التلفون ومتت من الخوف ... رجليه بادن وايدي مااكدر امدهه اخذه...
‎سميره:ولج اخذي! ياسر خبصنه من الصبح جابه الج وماكدرت اجي هسه يله...
‎-لا فدوة والله اخافن!
‎سميره:اي مو راح ياكلج! اخذي بس ديري بالج من فلحة وملحة وامي.... مو تخلين احد يشوفه؟!
‎اخذته واباوع ع وجه سميره:اي...
‎سميره:حته منا وهيج ناخذكم تشترون باقي الذهب...
‎-اكلج هو مستعجل شني؟
‎سميره:اي خيه! ليش حته مايستعجل؟ غرفته وجاهزه واثاث هم جاهز ظال بس الذهب وملابس والزفه...
‎-هاا... اكلج سميره...شو انه خايفه...
‎سميره:عادي كلنه هيج نخاف وبعدين تصير مثل شربة الماي...
‎-اذا خابرني شحجي وياه؟
‎سميره:اندري! غير هو يحاجيج وانتي جاوبي!
‎-اي...
‎مزلت سميره وانه طليت اعاين ع التلفون المودي اليه... انه اعرف اجاوب واعرف اخابر وادز رساله بس كوه الكه الحروف... تعلمت بتلفون امي...وهو مو لامي..للبيت كله ... كل اليحتاج يخابر منه
‎ضميت التلفون ونزلت جوه شويه تعشيت بلايه واهس هيج اكل مااحس بطعم الاكل..
‎صعدت لغرفتي طلعت التلفون باوعت لكيت تلث مكالمات فائته وهو مسجلي اسمه ..استحيت ارد اخابر .. ظليت اعاين ع التلفون وجان يضوي... يمه مدري شصار بكلبي من شفت ضوه التلفون
‎كام يلمض... عرفت بي صامت...
‎فتحت خط وسكتت..
‎ياسر:الو؟ احلام؟ الوووو؟!!
‎-ها
‎ياسر:شبيج ياعيني ليش متحچين؟ خوفتيني عليج!
‎-هاا..لا مابيه شي..
‎ياسر:شلونچ؟
‎-الحمد لله..
‎ياسر:اي؟ شكو ماكو؟ شسويتي مسويتي؟
‎-ماكو شي..
‎ياسر:شبيج ؟ ضايجة من شي؟
‎-ها؟ لالا..
‎ياسر:احد گاعد يمج؟
‎-لا..
‎ياسر صاح بيه:تره ضوجتيني ؟ احجي ويايه كوليلي شلونك اخبارك كوليلي حبيبي حياتي!!! اظل اسحب الحچي منچ كوه!
‎انه انخطف كلبي وارتبكت شجاوب:لاااا..بس والله مامتعوده.. استحي واخافن!
‎ياسر:انتي احد جابرج عليه؟ جابريج مو؟؟
‎-لاوالله لااا...
‎ياسر اخذ نفس وذب حسره ووياهه اووووووووف... حسيت بي يدخن...مادري هيج تخيلي من سمعت صوته...
‎ظل ساكت وانه هم ساكته... نوب كال...
‎ياسر:انتي هم حبيتي قبل؟
‎-لا!
‎ياسر:يعني مااكو احد منا منا؟ بالقريه قبل؟ بالمدينه؟
‎-كلت بخوف..لا والله !
‎ياسر بدون لااحم ولادستور:تحبين تكونين يمي هسه؟
‎ظليت ساكته...
‎ياسر نتر بيه:جاوبي شبيج! انتي مرتي تره!!!
‎طلعت مني بغير مااحس :اي..
‎ياسر:كوليلي شلابسه هسه؟؟ اكيد طابگه ثوبين وجواريب ولابسه حجاب وعبايه...
‎حسيت بي يستهزء ويهين بيه...
‎-ليش هيج تحجي؟ اي البس ثوبين ...الستر مريود!
‎ياسر:اي...بس اني مااحب هيج تلبسين! يعجبني تلبسين بنطرون وقميص وحته اقبل بدون حجاب... انتو وين عايشين؟
‎-مانگدر احنه هيچ تربينه ومو عوايدنه نكشف رواحنه لياهو الچان!
‎ياسر:هلّه هلّه بينه! انتي مو بمضيف ابوج حتى هيج تحجين! اني زوجج واجبج تحترميني وشنو اطلب منج تسوي...
‎-انته ليش هيچ تحاچيني؟
‎ياسر:انتي ضوجتيني واني منا ضايج بالدوام! الله يخليج لتعذبيني! اني البيه كافيني!
‎-ليش احسنك مجبور عليه!؟
‎ضحك بعالي صوته:هههههههههههههههههههههه! اني؟ ومحبور؟ بعدج متعرفيني حبيبتي...
‎سكتت شويه... رجع كال..
‎ياسر:نزعي كل شي لابسته هسه...
‎انه انصدمت من حچيه رجعت كلت:هاااا؟
‎ياسر وهو يهمس بالتلفون وكوه يطلع الحجايه:نزعي.. كل شي.. لابسته...
‎انه كمت وسديت التلفون وضميته جوه المخده وخليت راسي ع المخده وعيوني تفتر ظلت بكل مكان تعاين بس مامركزه.... ظليت دايخه هذا شيقصد نزعي ويصنف ع لبسي... چا هاي اولهه هيچ شراح يسوي بيه بعدين! نوب يگلي بدون حجاب! يمه انه بالبيت وگبل سنتين يله تعودت مالبس بالبيت!! هذا شيحجي وين عايش ووين يريد يوصل!
‎ظل التلفون يهتز جوه راسي بس ماشلته ولا طلعته... ظل يدك لحد ماسكت من وحده...
‎ظليت للفجر كاعده ذيج الليله... اقنع بروحي انه اغيره من نتزوج واقنعه هو ع الحشمة والستر وهو رجلي لازم يغار عليه ومايخليني البس كل شي كدام كل احد.. وارجع اكول راح يتعبني وياه ومن هسه يعيب ع لبسي وانه الچنت لبالي يكيف من يشوفني مستوره ولاطابه ولا طالعه! ظليت افكر وافكر لحد مانمت ...
‎ثاني يوم اول ماكعدت شفت التلفون لكيت 7 مكالمات ورساله كاتب بيها (اني اسف) شويه فرحت جي اعتذر وحس ع روحه مارديت علي ورجعت ضميت التلفون بالكنتور ونزلت تريكت وغسلت ملابس وشريتهن وكعدت شويه ع التلفزيون الجوه ونوب كعدت يم امي وكل شوي بمكان بس حته لااصعد فوك واخابر لو اجاوب... وره الغده بعد ماكو مفر لازم اصعد...
‎طلعت التلفون مالكيت اتصال... مدري شجاني بلحظه خبال مدري طيش... دكيت علي وراسا كطعت...
‎وره نص ساعه يله دك عليه... سبيت روحي چي دكيت علي.. ظليت اغلط ع روحي والتلفون يدك... جاوبت..
‎-الو..هلو
‎ياسر يحجي وچنه مشغول بشي ثاني:شلونج؟ شعجب اتصلتي؟
‎-زينه... هيج..
‎ياسر:بس دقيقه خل اغسل واجي..
‎-وين انته؟
‎ياسر:داتغده قبل شوي رجعتمن الدوام.. ليش محتاجة شي؟
‎-هاا..لا..
‎ياسر:دقيقه حبي...بس اغسل واصعد غرفتي واخابرج..ماشي؟
‎-اي..
‎سد التلفون وانه ظليت بغرفتي رايحه وراده رايحه وراده ... گلت هسه انه شورطني وخابرت! شجاني... بين الفر والحيره مالتي دك التلفون بيدي...
‎-ها..
‎ياسر:ولج شنو ها؟؟؟ كوليلي حبيبي عمري! شبيج!
‎-اي..حح..
‎ياسر:ياالله! اي كمليها؟
‎-حححب..حبيبي!
‎كلتها وانصدمت من روحي ههههه...
‎ياسر:الحمد لله والشكر... هيج من اخابرج هيج سمعيني كلام حلو! لتصيرين جامده!
‎-اي.. رجعنه سكتنه اثنينه... هو صوته مال تعبان وصوت نفسه مال واحد طالعه روحه...
‎-شسويت ماسويت اليوم.؟
‎ياسر:رحت للدوام وماطلعت لحد ماخلص وقتي طلعت للبيت وملگيت احد بالبيت...
‎-هاا؟ چا وين راحو؟ چا امك وين؟
‎ياسر:قبل لااكولج وين...هاي الچا مااحبهه! حاولي تحچين مثلي كوليها لعد؟ ماشي؟
‎كلش انجرحت وانحرجت منه...انه وصتني سميره احجي ويا مثقف مثله بس مااكدر مرات حچايات تطلع مني بغير مااحس وهاي انه هيج متعوده...
‎ياسر:اي.. اعتقد معزومين...
‎ردت احچي بعدين خفت خاف اگولن چا:وشتغديت؟
‎ياسر:طلعت من الثلاجة وحميت واكلت...
‎-هاا..وهيچ تعرف؟
‎ياسر:حبي ...هيچ تنگال(هيچ تعرُف) مو هَيّچ تَعَرِف!
‎ردت ابچي اله شويه... مدري ليش انهزيت هز من يدقق ع كل حچايه اكولنهه... حسسني هو مو من طينتي ولاذبتي وفرق بيني وبينه بعد السمه عن الگاع..
‎ردت احچي وخفت لا هم يصنف ويدقق عليه...
‎-اي..بس شويه اتعود.. اطيني وكت...
‎ياسر:اي حبيبي... اتمناج يمي هسه..جاي تعبان وضايج ومامحتاج بس انتي...
‎من گال هيج انه صخنت ونسيت حچيه وياي مساع وراح بالي يمه اتخيله شلون نايم وطوله الحلو وع ياصفحه نايم...
‎ياسر:حبيبي؟!
‎نوب رد يكلي حبيبي...انه انتهيت...كوه طلع من الصوت..
‎-هاا؟
‎ياسر:شبيچ حبي؟ خدرتي؟
‎-مادري...لاتحچي هيچ وياي..
‎ياسر:حياتي..عادي ..لعد بشنو تردين نحچي؟
‎-مادري بكيفك..
‎ياسر:اريد اشوفج..
‎-ها..
‎ياسر:اييي مشتاقلج... اريد اشوفج وابوسج واحضنج!
‎سكتت وماجاوبت متت بدمي.. تمنيت يغير السالفه لو يحجي بغير شي... بس هو هم ظل ساكت ويذب حسرات ..
‎ياسر:يله حبيبتي.. اني راح انام شويه لان كلش تعبان.. بالليل اتصل بيچ...
‎كطعنه الاتصال وخليت راسي ع المخده...كل كلمه حچاهه انعادت عليه... من اوصل لكلمة حبيبتي لو حبيبي وعمري وحياتي انتهي خو اشوفج وابوسج... كل جسمي يثگل حته مااكدر احرك روحي اصير... ظليت ع هل حال ايام وياه... يوميه يشمرلي من هذا الحچي مالته... ابوسج احضنج شلابسه اريد اجي  يمج اريد اشوف جسمج وووو كله من هذا الحچي وانه بكل مره اسكت ماارد نوب هو يغير السالفه لويروح....كمت اخاف احجي حچي ومايعجبه... كمت اعلم بروحي احچي مثله... اني...وهيج مثل ماهو يكولهه...وهواي عدلت بحچي واظل اكرر بيني وبين نفسي الكلمة اكثر من مره حته احفظهه ولا ارجع للتحديث القديم ههههه....
‎مرت ايام وودالي سميره...كالت ياسر يريد اطلعون حته تكملون الذهب وتشترين ملابس...
‎انه مابيدي شي ولازم ابوي وامي يرضون يله اكدر اطلع ويا... وهم خايفه من اطلع ويا خاف مااعجبه لو يظل يصنف ع حچيي لو ع لبسي...
‎والله عاد امي وابوي ولا اعترضو ولا كالو...يمكن چي كبرت رادو يخلصون مني بكل صوره؟! حته امي ما عارضت! ومو من عوايدهه ابد.. هي كل شي تدخل بي...
‎اجت سميره وجايبتلي عباة خليجيه ومخصره ومن جوه عريضه نوب بيها تطريز من الظهر...كلش حلوة ...بس استحيت البسهه انه متعوده ع عباة الراس... هاي شلون راح ادبرهه...
‎كوه لبستني اياهه سميره.. وهم جايبه شال وياهه ورادت تلبسني كالت لا خل امكيجج خفيف وبعدين البسج الشال... صدك خلت الي كلش خفيف ولفتلي الشال بيدهه لفه تخبل طلعت وجهي...
‎شويه وانفتح الباب علينه انه وسميره... انه خفت لا واحد من الفروخ نوب يروح يفتن عليه يم اخوتي...
‎همزين طلعت امي... بس شني وجهه كلش مكدر وضايجة وكوه تحجي...وانه تعجبت من صعدتهه... هي ماتصعد فوك اله بلنادر
‎امي:سمره! مو تخلينهم يفترون وحدهم!
‎سميره وهي تعدل بشالي:اي يمه لا توصين...
‎امي:وصيهه مو تضحك لو تسولف واتكشمر(تتشاقه) وياه! زلمه غريب شنعرف منه؟!
‎سميره:اي يمه...
‎امي تحچي بس ماتعاين بوجهي...وماتوصيني انه توصي سميره هههه چني مسويه مكسوره ههههه...
‎نزلنه وهمزين ماشافنه احد لا من الفروخ ولا من نسوان اخوتي
‎طلعنه ركض لبيت سميره... طبينه نفسنه مكطوع... چي اجينه بسرعه ... طببتني سميره لمطبخهه وصبتلي ماي وشربت...وودت وليدهه بالكاروك ماله جوه وفروخهه الباقين وي ابوهم...
‎شويه ودك تلفون سميره...
‎سميره:ها حبي...اي حبي جاهزين...يله...الله وياك...
‎ولج حلومه يله راح يجي ياسر...
‎اعاين ع سميره شو ذبت عباتهه وذبت حجابهه...
‎-شو فرعتي خيه؟ غير جايين حته نروح؟
‎سميره:ههههه خره بحظي! ولج مااروح وياكم.. روحي انتي وخطيبج اني شكو رايحه؟؟
‎-لا عليج الله... وج لا ادكين بيه دكه ناقصه! انه ماعايزه!
‎سميره:هو طلب تلتقون وحدكم! اني مو بكيفي ... وحته اذا اني رضيت واجيت وياج! رائد مايرضه! بعدين همه هاي عادتهم مايرضون احد وياهم من يطلعون وي نسوانهم..
‎-خايبه شمالج! صدك تحجين! ليش ماگلتيلي؟ ولج انه مااعرف احچي وياه واستحي منه!
‎سميره:خيه هذا رجلج بعد تعودي علي!
‎انه حصرتني البچيه...يربي شلون بيه... عاينت ع الباب وردت ارد لبيت اهلي احسن..بس خفت لا يزعل ياسر نوب يسويله مشكله... ظليت گاعده ع نار واصبر واعلم بروحي احچي مثل حچيهم ومااجفص...
‎سمعت صوت باب الحوش انفتح... وي فتحته انقبض گلبي... چن مسويه جريمه وخايفه انكشف... اسمع صوت رائد وياسر طبو للديوانيه(استقبال) يحچون بس مااسمع شني بالضبط..
‎سوت سميره چاي وودته وانه اتوسل بيهه تروح وياي ومتخليني وحيدي... هي كلش قفلت عليه مارضت .... وره شويه اجت سميره منهم...كالت يله راح ترحون...
‎مدري شصار بيه:..حته رجليه بادت ومخنوگه حصرتني البچيه
‎ياسر وهو واكف بالحوش:هاا؟ شلونج؟ جاهزه؟
‎-الحمد لله..اي
‎رائد:حبيبي دير بالك عليها! هاي بنت الشيخ بعد ماوصيك...
‎ياسر:ههههه والله ثبرتوني انته ومرتك! متگلي وين ماخذها!
‎سميره:حلومه شبيچ اهدي شويه! جاي ترجفين چنچ سعفه..
‎-مادري سميره مادري...فدوة خل ارجع لاهلي!
‎ياسر سمعنه نبسبس:هاا؟ اكو شي؟
‎سميره:لا ماكو شي..يله انتو توكلو روحو!
‎ياسر:يله احلام...
‎طلعت من باب البيت واعاين ع بيت ابوي...اطگهه ركضه وارجع؟ خفت وترددت... عاينت ع ياسر فاتحلي باب السياره ويأشرلي براسه اصعد...
‎صعدت واحس الهوه صار ثگيل عليه گوه اجر النفس...

يتبع...
التفاعل ابد ميعجب ولا يسوي واهس😪