#بنت_الشيخ
الجزء الرابع
Nada hs (ندى ح.س)
يومين وانه مرتاحه من الهوسه وحته خطار مااجه لابوي..وهو حته ابوي طول هل مده مايتغده يمنه ونظل وحيدنه انه وزيدون وامي..
ومره امي ودت ع سميرة چي هي بيتهه يمنه واجت تغدت يمنه وراحت همزين خلصت ماظلت هي وفروخهه هههه..
ثالث يوم واخوتي هم ماكو بس ابوي خابرهم وكال زينين ومتونسين غادي يجوز اسبوع يله يردون..انه طرت من الفرحه وحته حيل صار بيه هههه مو كره لاخوتي لا والله من فروخهم مطلعين روحي وحته غلط يغلطون عليه...
عاد انه ثاني يوم گعدت من وكت وكلي حيل وقوه.. نزلت لكيت امي تطبخ وعاجنه..
-يمه راح انظف..
امي:اي يله انه راح اخبز وهم بهزي(شوفي او راقبي) ع الجدر..
-اي يمه...
راحت امي تخبز وانه بلشت تنظيف البيت من فوگ ليجوه.. كملت كل شي وظلت بس ديوانيه ابوي.. گلت هسه انه شعدي.. خل اروح انظفهه... والله طبيت بلشت بالنفاظات مال جگاير مترسه گطوف والمخاد مطشره والصور المعلگينهه مال يدي(جدي) ومال ابوي ومال شيخنه گبل خمسميه سنه مدري شكثر ههه.. لكيتهن متروسات تراب.. مسحتهن ونوب كنست الديوانيه وفتحت الشبابيچ ... نوب من كملت شغلت مبخرة ابوي مخليهه للخطار وحطيت البخور وگعدت.. الديوانيه مال ابوي مابيهه تخم لا گعدته بالگاع وحاطين زوليه چبيره كلش وداير مداير مدات وتكيات ومخاد... انه حطيت راسي ع المخده وغطيت روحي بعباة ابوي لگيتهه ببديوانيه واباوع ع دخان البخور واشم الريحه حيل وشني من بخور يخبل مو منا جابو هديه لابوي مدري منين... مدري شصار وبعدهه ماحسيت ع روحي وعيوني غمضت واحس تعب وراحه بنفس الوكت....
نمت الثوله بالديوانيه.. ومااسمع بس صوت زلم تشحط برواحهه شحط واحححححممم واحححححمممم...
انه جمدت بمكاني... حته ماتحركت.. نوب لااكو باب ثاني اطلع منه..واسمع اصوات هواي واكفه بلباب...شسوي يربي شسوي..
ماحس اله ايد وشالتني من الگاع... غمضت عيني وماريد اشوف شراح يصير بيه...
حسيت روحي انشمرت بالگاع ومدري شلون ماانشك راسي.. باوعت لگيت روحي مشموره بالطمبخ وابوي عگاله ومتخوصر گبالي وصاير احمر دم...
ابوي:گليلي شسوي بيچ هسه؟
-بويه والله چنت انظف ومادريت بروحي غفيت..
ابوي:اشش لا اشگ حلگج! الله لا يوفقج الله لايرضه عليج فشلتيني سودتي وجهي كدام الشيوخ!
ركع باب المطبخ حيل وانه مدري اضحك مدري ابجي هههه... هسه هم حظ هذه انه شورطني... نوب اجت امي كالت شبي ابوج يصيح... سولفتلها السالفه وهم ماگصرت(قصرت) وياي
طاحتلي بذاك الغلط والحچي...
انه من الفشلة رحت لغرفتي وبعد ماطلعت حته غده ماتغديت...
نوب كل مااتفطن(اتذكر) بصوت الزلم واتخيل روحي نايمه وهمه طابين عليه مدري شيصير بيه...
يومين انه مااواجه ابوي وهمزين اخوتي مو هنا چا شسوو بيه عاد ابوي اشوه شويه... نزلت بسكوت جوه اريد اكل عود..
سمعت ابوي وامي كاعدين بالمطبخ ياكلون ويسولفون..
امي:جا شنسوي هذه هم حظهه!
ابوي:لهسه انه فشلان من ربعي.. چا شني عود ماسولفو لاهلهم لو ماسولفو يم الناس؟!
امي:اندري .. هسه كون يجيهه واحد منا منا ونطيهه نسترهه..
ابوي:شني؟ انه؟ اطي بتي منا منا؟ لو تظل طول عمرهه ماخليهه تاخذ ياهو الچان.. شني اخلي الناس تعيرني بالمضايف اطه بته بس حته يخلص! هو انه سميره ولهسه متندم ومدري شلون اطيته!
من سمعت ابوي هيج يكول كيفت وضجت بنفس الوكت.. كيفت چي ابوي يعزني ومايرضالي اله بالزين..وضجت اذا ع حجي ابوي انه اظل طول عمري بلايه زواج ورجل..
رديت لغريفتي وتانيت شويه يله رديت نزلت..تغديت وشبعت كرشتي وسبحت وصعدت... شويه واسمع الهوسه ترست البيت😩 رد الجيش مالنه😩😩
غلست وماطلعت هم تعاي سلمي وتعاي جاملي وانه روحي طالعه من مليحه وفليحه وفروخهن كون گطيعه التگطعهن.
ماطلعت اله لليل..لگيت امي مسويه العشه والفروخ دايرين عليهه وياكلون... ما گربت لواحد منهم ولا حبيتهم... همه سلمو عليه شلونچ عمه انه رديت من وره خشمي زينه!.
امي:كملي وغسلي المواعين ..
ظليت سكته ماحچيت.. تعبت حته ماحچيت بوكتهه ..احس مخنوگه واريد ابچي..احس غصه بصدري مدري شلون اطلعهه
احس حيلي مهدود... كملت عشه انه وتكومن المواعين مال عشيره
ظليت اغسل وارجع ليوره... احس روحي گوه اتحرك ماله وروحي طالعه..
كملت وصعدت لغرفتي ..شمرت روحي ع الفراش وفليت گصيبتي وظليت امشط بيهه بأصابعي..مدري شجاني وتذكرت عمه ابوي الظلت بغير زواج ولا شافت الخلفه ولا تهنت بحياتهه ظلت يم ذاك وهذا لحد ما ماتت... تخيلي انه مثلهه وياعين شيسكتچ بعد..
ظلت دموعي تصب وانه اتخيل روحي عيوز كبرانه ويوم يم حليم ويوم يم محيد ويوم يم زيدان وفروخهم تكتل بيه..ازعل من هذا اروح لذاك وبعدين ارد لهذا.. تخيلت امي وابوي ميتيتن وحته من ورثهم محد اطاني.. تخيلت معلگه برگبتي چيس مثل مال عمة ابوي برگبتهه والناس تطيهه وتخلي بچيسهه..انه هم هيج لازم وتخيلت شيبي ابيض ومعصبه ومشيله وعطوبي طالعات منا ومنا وعصتي بيدي والفروخ تكتل بيه واريد اطگهم مااگدر مابيه حيل..
تخيلت حياتي بعد خمسين سنه وانه ابچي ومصدگه هيچ راح اصير...لحد ما غفيت مادريت بروحي بعدهه....
گعدت الصبح ناسيه افكاري وتخيلاتي مال البارحه... وهم ردينه ع نفس السالفه مال الهوسه والطيحان حظ...
نوب شني الشغله الچايده من ردن نسوان اخوتي كل شي مايجيسن وبطونهن تمشي كدامهن وبس يتشكن...
هذيج بطني وهاي خاصرتي وهاي والله تلعب روحي ماطب المطبخ وطحنه بيهه انه وامي... خلف الله ع مجيده كامت تجينه اذا يجي خطار لابوي... نخابرهه وتجي تعاونه...
ويوم ابوي عزم مثل كل مره... متعود بين مده ومده يعزم..
فليحة ومليحة شردن بغرفهن... امي ماسكتت مدري شعجب.. طاحت بفروخهن وطردتهم.. گاتلهم روحو لامهاتكم احنه عدنه شغل مو فوگ الضيم تجون هوستكم وانتم... امي سوت الطليان ومجيده سوت الروس مال طليان و التمن والمرگ الاحمر وانه رحت اخبز... شنگت وخليت الشناگات يرتاحن... رحت اشوف التنور ونظفته من السگطات(الخبز الي يوگع ويصير مثل صمونه محروگه) فتحت الغاز مانفس.. لكيت الدبه(قنينه غاز) مخلصه..
رحت للمطبخ وچان يغص ويبلع من الهوسه...
-يمه ماكو غاز ..
امي:شوفي وين زيدان خل يجيبلج الدبه بالحوش ..
-هو وينه غير كاعد يم الزلم..
مجيده:روحي لبسي عباتج بسرعه وجيبيهه... راح يبطي الغده وابوي يسوي فلك..
-شيطلعني دروحي انتي فدوة..
مجيده:انتي شمالج مو تشوفيني اطبخ !
-خايبه فدوه خليلي اللسان مو تنسين..
مجيده:اي نعوف الشيخ ونطيچ الفشجه(نصف راس الغنم يقدم للشيخ كنوع من الاحترام)
-والله مشتهيتهه چا هسه انه مو بت شيخ واذا اكلت الفشجة؟
امي:بسج لغوة روحي جيبي الدبه واخبزي راح الوكت..
جريت عباة امي معلكه ع باب المطبخ لبستهه وفتحت باب المطبخ
مشيت مسافه احنه حوشنه چبير(الگراج) اباوع الدبه كلش يم الباب مدري ياهو المبدلهه وعايفهه بره...
من نمشي بالحوش نطر(نفوت) من الديوانيه والحديقه نوب يله نوصل لباب الشارع:.. عاينت ماشفت احد طالع وباب الديوانيه مسدود..والمرافق(تواليت) مفتوح محد بي يعني .... مشيت بسرعه ورحت وصلت يم الدبه شلتهه ودرت وجهي وانه جمدت بمكاني...
شفت زلمه معگل داير وجهه ويخابر من شلت الدبه صار صوت.. التفت عليه واشوف الماشفته عيني ... اول مره اشوفن هيج واحد معكل وحلو... صفنت علي باوعتله من فوك ليجوه... شو هذه الطول يخبل العيون والشوارب والسكسوكه تگطع... نوب طاحت عيني ع الساعه اللابسه والمحبس والتلفون بيده... نوب شني بعده شاب وجسمه وطوله ويه الدشداشه خذن عگلي(عقلي)
نوب شني من دشداشه..بيضه ترفرف والعگال مصبوب صب علي... هو هم ظل صافن بعدين دار وجهه عني وكمل تلفونه انه حسيت ع روحي وكبل اخذت الدبه وشطحت جوه..
امي:نمتي شني؟ عجينج يبس روحي خبزي بسرعه ماظل شي ع الغده...
-اي يمه..
مجيده:شبيج؟ شماله وجهج اصفر؟
-مابيه تعبت من الشغل..
مجيده:اليسمعج يكول طابخلتلج ناگه(بعير او جمل)
-يله انه اروح اخبز...
رحت فتحت باب الترك وره البيت وشكلت الدبه وتأكدت من الغاز وانه شني صح اشتغل بس عگلي مو براسي.. يم المصيبه الشفتهه.. شغلت تنوري وحميته ..بلشت اخبز عود.. نوب كرصه اطيح نوب وحده تحترك نوب وحده تنزرف..
انه اباوع بالتنور بس بالي يم هذه الحلو..اكول هذه منين وشجابه وليش هيج حلو وماخذ يو لا.. هو شكله يطلع بالثلاثينات نهايتهه اي اكيد ماخذ وعده فروخ.. زين شني مرته الماخذهه اكيد مثله حلوه...
فاتت مني مجيده ومااسمع بس الصيحه:ولج شنهذا الخبز؟
-شسوي كام يطيح!
مجيده:يمن غسل الغسلج.. ميلي(وخري) هيج ميلي! هسه اذا ابوي شاف هذه الخبز يحطج بالتنور..مامنج بس سواد الوجه!
عفت التنور وكامت مجيده تخبز..
رحت دايخه وحايره شسوي طبيت يم امي..
امي:ها شو جيتي والخبز؟
-مجيده تخبز كالت خبزي مزين..
امي:دتعاي كشري هذه البصل خل احطه للمرگة جنهه زنچه (زفرة او دسمه زياده)
-اي هسه..
بديت اكشر بصل وانه دموعي تصب..احس روحي كمت صدك ابچي..هيج هاي الزلم ظاله وتارسه الديوانيه وتارسه الريف والمدينه محد بيهم ياخذني.. نوب انه من شفت هذه احس فقدت فصلت كلش بعالم ثاني.. دموعي تصب بچي ومحد يسألني عبالهن من البصل.. طب ابوي علينه وسألنه ع الغده وامي جاوبته ماظل شي ساعه هيج ونصب...
باوعت ع ايدي اشوف الدم يسرسب(يجري) شويه حسيت ع اصبعي مكصوص ويحرگني..
امي:يامن عمه! شجاج! كومي وصختي البصل كومي!
كمت غسلت اصبعي ورحت شديته بوصله من ثوب امي عتيگ
وانه بعدني بيه بچيه بس ماعدي حجه ابجي البصل واخذته مني امي بعد... صار وكت الصب وشويه التهيت بالهوسه مال صب والصواني والمواعين وترتيبات العزيمه خضره وطرشي واللبن والتمر وكاسات المرگ وصواني الشلوخ (يقسم الخروف اقسام كبيره وينطبخ ويخلو ع التمن )
اجو اخوتي ينگلون واحنه بلشنه نغسل االمواعين التدمرت(توسخت) بالطبخ ومسحنه الكاونترات وشلنه الگوزانات وشني المطبخ صاير تنور من الحر...
رجعو المواعين وانه اعاين عليهن واكل بله هذه الحلو بيا واحد اكل وشكال من اكل طيب مو طيب وشكد اكل اكيد واحد مثله ماياكل هواي حته بطنه ممسوحه بس شويه شويه كرش صغير كلش مو مثل اخوتي وابوي وولد عمامي وعماتي وكل گرايبنه... اذا نحط الصينيه يطيحون بيهه بعد ما يكومون اله تفغر(تقبط او تنملي) بطونهم...وواحدهم كرشه ها كبره مثل كرشه الهايشه من تحبل ههههه... جا مايصيرون مثل هذا الحلو ...
ودينه الچايات والدله مال گهوة ومايات بطاله خطيه خاف تهورشو من الاچل نوديلهم مي خمس ست مرات ههه... گسمنه المواعين وبدينه نغسل انه ومجيده نوب نزلن فلحة وملحة تغدن وهم عاوننه شويه ... نوب اخر شي وره كل عزيمه لازم نغسل البيت كله مثل ما تگول امي ونرد انوب انطگه بالمبخره نخلي الدخان تارس البيت محد يشوفرالاخر منا لهنا هههه...
للظهر وانه ماصعدت غرفتي اريد ابوي يجي يمنه بلكت يسولف ويجيب طاري هذا الغزال...اجه ابوي كعد يم امي ومجيده وراد جاي انه طفرت سويلته وجبته...يا هسه يسولف عله الخطار ياهسه ماكو ..ظل بس يحمد(يمدح) بالطبخ وتشكر من امي..
امي:همه ياهم ذوله اليمك اليوم...
ابوي:شيخ البو... واخوته..ونوب اجانه عذاب
انه گلت هذا الحلو اكيد اخو واحد من ذول الشيوخ..
امي:يااا .. چا هو شيخ البو... مو مات؟ ياهو صار اخو لو ابنه؟
ابوي:لالا حطو ابنه الچبير ..شيخ عناد..
امي:دهر كون.. كالو اخو گبل كتل روحه ع الشيخه حته گالو موتت الشيخ من وراه..
ابوي:اي..هو حته عناد ماريدهه الشيخه.. بس عمامه البلبصره طايحين علي ومخلينه ياخذهه... هو هل چلب عمهم ياهو اليريده محد يريده الله وكيلج..
مجيده:بويه چا عجب رضه وسكت؟
ابوي:بويه الناس ماتريده وهو لاز روحه كوه.. اليوم ضافوني ورادو نروح ع عمهم يراضونه.. الولد يگول انه ماريد منه شي بس يرجع يحاچينه عيب گدام الوادم مايسلم علينه لا بفاتحه ولا يمر بينه بگعده ..
امي:يا خطيه ويلاه.. روح وياهم خطيه..
ابوي:اي چا شلون ماروح.. بعد طلبو جيتي واردهم افه!
يتبع...
