مدافن الألم

الجزء 14

لمن وصلنا البيت هناك ..عشان ندي العريس مراتو..

انا جاني تلفون من رقم ياسر اخوي .. فتحت الخط .. ونحن يادوب نازلين علي البيت .. فتحت الخط ياسر قال لي يافتحي كيفك؟؟

قلت ليهو الحمد لله تمام .. قال لي ابوي عايز يتكلم معاك .. قلت ليهو جدا" حبابو ..

بقيت ماسك التلفون . والجماعة خشو جوة .. وانا وقفت برة ..مسافة كدا اظنها دقيقتين .. وسامع في التلفون كشة الكرعين كوشوت كوشوت .. شكلو ماشي على وين ماعارف ..

قال لي فتحي؟؟

قلت ليهو نعم.. قال لي .. امك قريبة منك؟

قلت ليهو قريبة نعم ..

قال لي لو سمحت اديني ليها في التلفون .. قلت ليهو جدا .. ولاسلم علي ولا سال من صحتي ولا قال لي مبروك ولا اي شي ..

مشيت دخلت الغرفة الداخلية الفيها امي وبدرية ..

اديت التلفون لامي .. قالت الو .. وبدا يتكلم معاها ..وهي تسمع .. بعد ما اتكلم كتير ..

انا سمعتها تقول ليهو ..اعوذ بالله منك يا الامين .. خليناك لي الله .. شكيتك على من هو اقوى مني واقوى منك .. بتمشي وين من حقي وحق ولدي يا الامين ؟؟..

بينا وبينك الميزان والحساب يوم القيامة .. وادتني التلفون وانهارت وقعدت تبكي .. وتقول حسبي الله ونعم الوكيل .. انا مسكت منها التلفون .. وختيتو في اضاني ..

قلت ليهو .. انت قلت لي امي دي شنو يا ابوي ؟

قال لي خليها تقول ليك هي .. بس انت، انا عايز اقول ليك كلام .. تاني لو قابلت واحد في الاولاد ديل ..انا بفتح فيك بلاغ ..

قلت ليهو ياتو اولاد؟ ..قال لي اولادي معاذ وياسر .. قلت ليهو ايوااا .. اولادك ديل هم بنات ولا رجال ؟ هم ماعندهم شخصية يتصرفوا؟

كلمهم هم انهم مايقابلوني .. لاني انا ماحصل سعيت عشان الاقيهم..

ولاحصل جيتك في بيتك ..

وانا والله اي زول يجيني . انا برحب بيهم .. لو عايز تشكيني امشي يهديك العدالة .. مع السلامة يا الامين ..

وقفلت منه التلفون .. عرفت انو قال لامي ولدك تاني مايلاقي اولادي .. المهم دخلت على امي ..لقيتها بتبكي بي حرارة .. قلت ليها يا امي الزول ده قال لك شنو؟

قالت لي الزول ده ابعد منه ..وابعد من اولاده يافتحي..

الزول ده اسوء مخلوق يلاقيني في حياتي .. اعوذ بالله من غضب الله ..اعوذ بالله ..حسبي الله ونعم الوكيل .. قلت ليها يا امي يعني انت ما ح تكلميني قال ليك شنو؟

قالت لي مابكلمك امشي شوف شغلتك .. اسمع يافتحي انا عايزة افسخ العقد ده ..ماعايزة زواج .. قلت ليها قلتي شنو.؟؟؟