مدافن الألم

الجزء 11

و دخلت كلية الهندسة جامعة النيلين هندسة مدنية . وكانت دي رغبتي .. البقرا عشانها من الاساس ..

وكاانت سعادة للوالدة مابعدها سعادة .. ويوم ظهر لي القبول .. جمعت حريم الجيران .. عملت ليهم عزومة .. وتتبسم مافاضل ليها الا تكورك وتقول للناس انا انتصرت ..

والله السعادة الشايفها فوقها دي لو اتزوجت ما كنت بشوفها ..

طبعا بي صراحة . انا شايف سنوات الجامعة دي طويلة طويلة .. لمتين تنتهي.. وتنتهي معاها معاناة امي والامها ..

في اول سنة دخلت الجامعة .. حصلت قصة ماكانت في الحسبان ابدا" ..

طبعا" انا على حسب وصية امي .. كنت بعيد من اصدقاء السوء.. والحناكيش وناس دك المحاضرات.. والناس الوهم .. وبعيد من البنات ..

وماعندي علاقة باي مخلوق .. يعني تعاملي مع زملاي كلمة وغطايتها .. اجابة على قدر السؤال.. واتعلمت لي جدية كدا غريبة .. وماسك في صلاتي .. وتسبيحي ..

في بت كدا من سنة اولى .. مبارياني ..وعايزة معاي موضوع

مرة شالت دفتري .. وكتبت فيهو ..

حبيبي .. الزولة القيافة ..

الطويل القامة حبيبي ..

الكلو وسامة حبيبي ..

والشعرو سبيبي ..

حبيبي .. وكتبت تحت مع تحيات ألاء ..

وعملت قلب كدا .. فتحي ورسمت قلب <3 وكتبت الاء ..

انا لمن جيت شلت الدفتر وقريت الكلام ..

مشيت لاقيتها .. قلت ليها ياخت .. انا عايز اقول ليك كلمتين ..

انا ما من الناس البلعبو بي مشاعر الاخرين.. ناس الحب اللحظي بتاع الجامعة الكلو فجور ومعاصي ده مابنفع معاي ..

انا لو حبيبت بحب واحدة فقط في حياتي.. ومابزيدها لو عايز اموت ..

وبالمناسبة الزولة الانا بقصدها ما انتي .. فعليك الله لو سمحتي حلي عن افكاري لاني بالجد مافاضي .. طبعا هنا ظهرت شخصيتي بتاعة الزول الوقح عديم المبالاة ..

البت بكت.. ورمت دميعاتها زي حبات الماس فوق خدودها .. وانا قلبي اتألم من بكاها.. لكن بالعقل كدا .. قلت احسن تبكي وتتالم .. من تضيع لي زمني .. وتدخلني في دوامة ماعندها طعم ..

البت مشت حكت لي صاحبتها اسمها نون .. نون سألتها قالت ليها اسمو بالكامل منو الولد ده.. ورتها ..

نون قالت ليها بالمناسبة يا الوية .الاسم ده عندنا في الحلة ..

بس ياسر الامين ماعندو اخو صغير قدر ده .. عنده اخو واحد مسجون .. الزول ده لو اخو ياسر.. ابعدي منه .. الناس ديل عندهم مرض نفسي وراثه.. امهم عيانة ليها سنين .. واخوهم في السجن