انثى من عالم اخر

11

عايزة ارجع التلفون للمياء لفت انتباهي الخلفيه بعد مديتو ليها ، لقيتا خاته صورتا هي و تقوي ، رجعت ليها التلفون و استغربت شديد في الصورة بس ما سالتها ، حاسه في حاجه غلط ،
بعدها طوالي دخل علي اتصال من عروة ، رفضت المكالمة اكتر من مرة ، رسل لي رساله ردي ضروري يا امل ، انتظرت لمن لمياء طلعت من الغرفه ،
ورجعت ليهو ، قلت ليهو معليش كان جمبي بنت خالتي قال لي انتي بالجد حتعرسي ؟ و كنتي متواصله معاي طول الفترة دي وانتي مخطوبه !!انا انصدمتا مرات بحس عروة دا ساكن معانا في البيت لانو بالجد ما معقول ، قلت ليهو دا كلام شنوو ؟ قال لي ردي لي لو سمحتي ،قلت ليهو دا واحد كان متقدم لي واترفض ، قالي تمام في خلال شهر ونص انا حكون في السودان و حجي اقابل اهلك
قلت ليهو طيب خير يا عروة .. و قفلت علي كداا ، رقدتا نمت من غير ما احس ، صحيت زي الساعه 5صباحاً البيت صاني ، عاينت للساعه ما سمعتا صوت صلاه ، قمت صليت
و رجعتا غرفتي ، و من هنا ابتديت اخطط
مشيت فتشت لابتوبي لقيتو و ما لقيت الشاحن ، راسي ضرب قلتا لو مشيت غرفه سمر حتصحا ، بس ما عندي حل غير كدا مشيت علي اطراف رجولي براحه فتحت الباب لقيت الكلبه صاحيه تودود في التلفون ، قالت لي امل !!! انتي كويسه ؟ قلت ليها ياخ انتي صاحيه كنته خايفه اصحيكي ، قالت لي انتي كويسه ؟ قلت ليها لالا تمام بس عايزة لابتوبك ، قالت لي ليه ؟ قلت ليها سمر عليكي الله اديني الابتوب و تمي تلفونك بعدين بفهمك ، قالت لي في درج الكمدينه ، مشيت شلتو ، وخشيت المطبخ عملت لي عصير كدا و قفلت بابي و جريت وصلتي جمبي و وصلتا الابتوب و الشاحن وتلفوني جمبي ، بحاول اتذكر في حسابي حق الفيس نسيت البسورد حقو ، طييب والحل يا امل و الحل
طيب نعمل استرجاع كلمة المرور اممممم طيب ، بسسس ظبطت ، تاني حنعمل شنو يا امل شنوو يا امووووله ، طيب انا ضايفه منو من الاهل ؟ طيب نبحث امممم بس لقيتا عبودي اخوي بكون ضايفو ، طيب اوووف عبودي قافل الاصدقاء عندو ، طيب بقيت بفتش في الناس العاملين ليهو لايك و معلقين ليهووو برضو ما لقيتو ، امم نادر بس بس نخش صفحه نادر ، طيب نادر كمان قافل الاصدقاء ، التعليقات امم بسسسس لقيتك يا كلب لقيتك ، نسخت رابط الصفحه و عملت بحث عام لقيت كل القروبات الداخل فيها ، و عملت تسجيل خروج من صفحتي ، و ابتديت اعمل صفحه جديده في الفيس بأسم امممم منوو، منو منو ، بس مرام ولا لالالا لازم اسم كدا ، يلفت انتباهو ، نظام توته العثوله و ميمب السمحه و الكلام دا ما بينع ، لازم اسم وهمي حزين بسسس ( دموع انثي ) ههه انا عارفه انه الاسم فعلا وهمي وهمي بس معليش حكم القوي ، و عملت الصفحه و دخلت بياناتي كامله طبعا بيانات و هميه و خفيت تاريخ انشاء الصفحه و نزلتا منشورات كمية ، و عملت اخفاء الاصدقاء حلوو ؟
يلا بعد داك دخلت القروبات والمنشورات المعلق فيها اي منشور كنت برد بي حزن و عكس الكلام البقولو ، و طلعت من الفيس و فتحت الحساب من تلفوني ، لانو الابتوب ما بقدر اقعد فيهو .. رجعت كل حاجه في مكانها و علي وضعها ، ممكن تفتكروني ابتديت ارجع لحياتي الطبيعيه حابه اقوليكم لالالا انا حياتي ما حتتصلح ، يكفي كسرة امي و ابوي ، يكفي الخجل يكفي العار يكفي كلام الجيران عني و عن تربيه اهلي ، انا عمري م كنته زوله كعبه و كنت متسامحه في اكبر و اصغر امور حياتي .. عشان كدا في اللي جاي ما تلوموني
الانسان الكويس و عاش عمرو كلو كويس صدقوني ما حيبقي كعب الا للشديد القوي وكسرة النفس حارة و انا انكسرت و ما اظن كسري ينجبر بالساهل ، نمت بعدها ساعه تقريبا و قمت مشيت اطمن علي ابوي ، رغم كل حاجه ابتسم لي ، ابوكي لمن يكون مؤمن بيكي و ماديكي ثقه في نفسك والله مهما يحصل حتحسي انك قويه ،
جا عبودي زي الظهر كداا قعد مع ناس امي في الغرفة الفيها ابوي ، قاليهم انتو عارفين ان مواعيد العرس المحددة زمنا فات ، و سمر و مهيد م ليهم زنب يا ريت خلال اسبوع او اتنين نتمو ، طبعا امي من الزعل والبكا لمن وشها مورم و ما بتعاين لي خالص ، طبعا شايله تلفوني في جيبي ، حسيت بي هزاز رساله ، من المستحيلات اطلعو من جيبي قدام ناس امي ،اتفقو علي عرس سمر ، و بعدها الجرس رن عبودي مشا فتح، سمعتو بقول ليهو اووووه الوسيله وين يا حبيب والله مشتاق ليك ، و دخلو سلم علينا ، طبعا عكس الاتوقعنو دايما بعاين لي من تحت تحت بس المرة دي ولا كأني قاعده ...