فتحت الباب لقيتا لمياء ، استغربت ، قلت ليها حابك شنو انتي ؟ طبعا بتتكلم معاي و عينا جوه بيتنا ، بحسها بتميل عبودي اخوي ، قالت لي الناس تقول صباح الخير ، قلت ليها معليش بس اتفجاتا ، في لحظتا حو تقي و تقوي ، قالو لي جاهزة ؟ لمياء قالت ليهم امل حتجي معانا ، قلت ليها معاكم كيف يعني ؟ قالت لي م عارفه والله لكن مختار براهو جا علي هنا قال نسوقك في طريقنا ، قلت ليها ايواااااااه لالا تمام بس انا بمشي مع تقي و تقوي ، جا عبودي اخوي ، قال ليها لمويه صباح الخيررر بيتنا نور ، طبعا الخجل والربكة ، قالت ليهو تسلم و هو بعاين لتقوي صحبتي ، طبعا انا شغلتي اتابع الافلام دي 😹 ، مختار ضرب بوري ، قلت ليها قولي ليهو يمشي لانو انا بمشي مع تقي و تقوي ، قالت م مشكله نمش كلنا سواا ،
مشينا و طبعا تقي عينا في مختار حتي من ضمن الايام خاته مكياج و متكندشه ، تقول عارفاهو جاي ، المهم انا بقيت في ربنا انو ما يديها سكة لانو مختار انتو عارفنو و غير كدا حتفشل لي خطتي ، وصلنا و نزلنا كلنا و مشينا اتجاه البوابه اتلفت م لقيت تقي ، قلت لتقوي اختك دي وينا ؟ قالت لي بري ،
عاينا لعربيه مختار لقيناها لسه واقفه و تقي بتتكلم معاهو و ابتسامات شديده ، قلبي اكلني قلت ليهم يلا نمشي بتكون بتسالو من حاجه ، مشينا و وصلنا مع محاضرتنا طق طرق وانا و تقوي جرينا ذوالي بعد ودعنا لمياء ، خلصنا المحاضرة وانا الجوعه كاتلاني رغم اني فطرتا ، قلت ليها انا جعانه والله ، مشينا وقعدنا فجاه جو علينا تقي و لمياء ضحك و ونسة ما تديكم الدرب ، استغربت ،قلت ليهم ماشاء الله بقيتو صحبات ، حلاتكم ، لمياء قالت لي حلاتك انتي والوجنه الطالعه مع الاكل دي ، قلت ليها ي بت عيييييب ، بقت تضحك ، قلت ليهم اهاا العندو محاضرة منو ؟ تقي قالت انا ما عندي محاضرة لكن منتظرة زووول حيجي يسوقني ، قلت ليها ايامك ، تقوي قالت ليها دي امور جديده ي تقي من متين بتمشي براك ولا في زول بيوصلك ،و بعدين انتي عارفه امي حتسالني منك واخوانك لو سمحتي ما تورطيني ، اتصلت علي سمر ، قالت لي لو خلصتي تعالي عشان نمشي السوق ، قلت ليها سمح ، قلت ليهم هوي انا بمشي بعد دا ، تقوي قالت لي انا معاكي ، قلت ليها خليكي مع اختك عشان امك م تشاكلا ، قالت لي لا تتحمل مسؤليتا براها ، المهم مشينا و لمياء قعدت مع تقي ،
ماشه و حاسه بواحد ورانا ،
تقوي قالت لي كدي اقيفي ، قلت ليها نفس الفي بالي ، وقفنا كدا تحت ضل شجرة ، قام مشاا ، بعد فات مسافه انحنا اتحركنا و بقينا نضحك و مشينا ، ركبنا المواصلات و وصلنا حلتنا ، مشينا من شارع الظلط مسافه ، لقيت واحد بقول لي لو سحمتي ، اتلفتنا عاينا ليهو ، تقوي قالت ليهو مرحب ، قاليها اسف بس ممكن اتكلم مع صحبتك ثواني ؟
طبعا دا جاري العزيز ، تقوي قالت ليهو تمام ويلا امول انا حمشي بنتلاقي ، قلت ليها لحطة ، حيتكلم معاي في شنو ؟
![](https://img.wattpad.com/cover/116951701-288-k722377.jpg)
YOU ARE READING
انثى من عالم اخر
Romanceو كلما أحتضنني المووت ، طالت علىّ الحياه .... روايه انثي من عالم آخر واقعيه بأحداث معدلة ... بقلم / سحر سمير انتظرونا يوميا السابعة مساء