انثى من عالم اخر

3

اتفاجأته بي خالتي فاطمة جات داخله ، و عن احساسي في اللحظة دي ، زي الكبو فيني مويه تلج ، عبودي بسلم عليها وانا واقفه قبلي وبعاين ف الباب حشوف منو تاني يا ربي ، معااها بتها و ولد واحد ( لمياء ونادر)

جو داخلين وانا متصمغه في مكاني ، لمن جات خالتي ما حسيت الا وهي بتبوس و تحضن فيني وانا جماد واقف قداما ، بس دموعي ديل نازلات وحاسه بمغسه جوة بطني ، كشيت من خالتي و لمياء سلمت عليها عادي بالمصافحه ، و نادر جا مد لي يدو قلت ليهو اسفه ما بصافح والله ..ّ

امي سمعت الجمله دي ، شلكلتني قالت لي ولد خالتك عيب م صح واسي احرجتيهو ، قلت ليها امي ما قصدي احرجو بس انا كدا يا اصافح كلو بدون استثناء ، يا ما اصافح نهائيا

، خالتي قالت ليها معزة خلي البت بي راحتا ، في سري قلت ليها ( اصلاً براحتي )

صراحه اتفاجاتا بي نفسي كميه من الكراهيه شايلاها جواي ، انا العمري م كرهت زول ، الليله بقيت شايله ضغاين ،

تقي استاذنت مشت واتواعدنا الصباح للجامعه ،انا نسيت الشاي والقهوة ، الا عبودي تلني ناداني نبهني ، جريت عملتهم سرعه و وديتهم ، ناديت عبودي ما ردا علي ، رد لي صحبو القبيل داك قال لي طلعو برا بتكلمو تلفون ، قلت ليهو تمام اتناول مني الصينيه ، جااا شالها ، وقف يعاين فيني جوة عيني ، قال لي بصوت همس (سبحان الخلقك) ، و جريت يدي و مشيت ، زعلت شديد من كلامو دا ، براي متعقده ، جيت قعدت خالتي قالت لي اموله والله كبرتي ما شاءالله ، م رديت ابتسمت بس ، ابتدت تدردش معاي و علي اليعترا جابت سيرة زواج ، قالت لي : رايك شنو اخطبك لواحد من اولادي ؟ ووووبعلي

هو انا تاني شفتا قدامي ، عشان م اجيب كلام من برا راسي ،قلت ليها خالتو يا ريت ما تهزري معاي هظار زي دا طوالي قمتا علي و مشيت الغرفه ..

( في جانب آخر )

يا مروة انا بمشي بعزي الجماعه ديل ، تربسي الباب دا عليكي لحد ما اخوي يجي ، خلاص يمة سوقيني معاكي ، لالا خليكي هنا عزة حريم البوديكي شنو ، خلاص يا امي قعدتا

.....

جا تاني يوم الجامعه ، قعدتا منتظرة تقوي ما جات ، مشيت خبطتا عليها ، امها قالت لي ، اصبحت بي حمة شديدة ، خشيت اطمنت عليها لقيتا نايمة ، و رجعت البيت عبوديرقال لي يلااا ، قلت ليهو وين ؟

قال لي نمشي جامعتك ، وبعدين جامعتك دي الانا قريت فيها ، حافظا عدلة و قلبا 😹

يلاا قومي ، قلت لسمر ارح معانا قالت لي لا عندي برنامج و انتو زاتكم ما تتاخرو ، ولا اقوليكم م تمشو الليله جايننا الضيوف الكلمتك عنهم يا عبوووودي ، قاليها طيب وابوي ؟ قالت ليهو امي حتكلمو ، امي قالت ان شاءالله خير ، وانا مافاهمه حاجه ، قلت ليهم انتو بتتكلمو بالالغاز ولا كيف يعني فهموني حاجه ، سمر قالت لي : جايني عرييييس و الليله بجو البيت رسمي و يتقدمو لي ، قلت ليها كذاااابه ، تعرسي و تخليني ؟ قالت لي علي اساس انو لو جاك واحد ما حتعرسي و تخليني ؟ ،قلت ليها الصراحه بعرس ههههه ضحكنا ، وجا المسا