#فصليه_ملوك
#الجزء4
#بقلمي
ام آيه
#اماسي_الليل
مصطفى:اتفقوا العشيرتين باجر الصبح يجيبون بنت الشيخ سلمان فصليه لبيتي..
عسل:صاحني بابا وعمي منير وخوالي وكالولي السالفه وبقيت مصدومه وابجي..
كتله بابا شلون تبيعني واني وحيدتك ومستقبلي ضاع و راح ادمر ..
بابا ولاول مره نزلت دموعه وكلي لو ميت ولا شايف هذا اليوم الي انحطيت بي بين نارين نارج ونار اخوج..
لتصدكين اكو فرق بينج وبين احمد اثنينكم قطعه من كلبي..بس بنتي روحتج فصليه رغم تعاستج بس يبقى نفسج وحسج بالدنيا...بس اذا ما انطيج راح يقتلون اخوج واخسره للابد..
فبقت يمج انتي تحددين ..
عسل:من شفت دموع ابويه حسيته مجروح ودينزف كلبه ..دموعه غاليه عليه وهو حقه محطوط بين نارين..جاوبتهم موافقه..
امي وناديه وعمتي تركوا عزه قتيبه ابن عمي ومكابليني ويبجون..وامي كطعت قلبي تبجي بقهر سوده عليه..
حضروا جنطتي وبيها غراضي وانطتني امي ذهب وفلوس وكالتلي ضميهم لتشوفيهم لرجلج اكيد الزمن راح يحوجج للفلوس لان عيالج فقره وبسيطين وانتي بنت ملوك ،واتحملي منهم كلشي وربج ميرضه بالظلم ومينسه عبده.
الليل كله منمت ،واذكر سيف وابجي وردت اخابره بس كلبي منطاني ،الزمن كفيل ويخلي ينساني.
#اماسي_الليل
صار الصبح لبست نفنوف اسود وحطيت على راسي شال كيبور اسود واخذني عمي منير وعيونه مغوركه وداني لبيتي وحياتي الجديده وماعرف شنو منتظرني هناك
دك عمي بابهم وطلعنه شاب طويل بس منتبهت لملامحه وطبينا اني وعمي لكينه سيد ينتظرنه وشهود وعقدلنه اني وهذا الولد وطلع اسمه مصطفى والوصي مالتي عمي منير وباركلي عمي وطلع والسيد والشهود هم طلعوا...
اول مطبيت انكربت روحي بيتهم بسيط وقديم. وداني لغرفه صغيره يم الدرج وكالي هاي غرفه امي فوتي سلمي عليها وعرفيها بنفسج..
عسل:شلونج خاله اني عسل ،خفت منها كلت هسه تكوم تكتلني لو تصيح عليه..باوعت عليه وعينها كلها حزن وقهر بس مبينه طيبه كلش
ام مصطفى:هلو خاله مبارك زواجكم ،اخذه مصطفى لغرفتكم خل ترتاح..
وداني للغرفه وجان بسيط اثاثها سرير خشب ابو نفر وكنتور ابو بابين وميز للقرايه ودوشك بالكاع
مصطفى:ذبت الشال الي على راسها وطلعت ماشاءالله ايه من الجمال لونها خمري وشعرها جوه ظهرها وعيونها ملونه كامله مكمله..
عسل:رفعت راسي وانتبهت مصطفى ديباوع عليه وشفته كلش حلو طول وعيون ملونه وكامل والكمال لله..
عسل:اني انجبرت عليك وماحبك ولتنتظر مني حب ومشاعر ،واني لخاطر ابويه وخوفي على اخويه قبلت بيك..
مصطفى:شوفي يبنت الناس اني مثل حالج هم انجبرت عليج لان خيروني لو اقبل بيج لو عشيرتنا تكتل منكم رجال ومعناها يبقى الدم ومتصفى..
ادري بيج هسه انتي مستنكفه من بيتنا وعيشتنا لان انتوا وين واحنه وين ،وانتي بنت ملوك واني بنظرج حافي ومعدوم...
راح احجيلج من الاخير ،اني وياج راح يبقى زواجنا على الورق واوعدج 30 يوم واعوفج وترجعين لااهلج...
عسل:وشيخكم وعمومتك شتكولهم؟؟
مصطفى:اخدعهم واكول اخذت الي اريده وطلكتها،الي اريده منج بهالشهر تصيرين حبابه ويه امي لانها مكسوره وجرحها مو هين، انتي راح تعاشريها وتشوفين شنو معدنها..
واني راح اعاملج كدام عمامي بجفاء ،دانطيج علم لان انتي فصليه..بس من نبقى وحدنه ويه امي واخويه ارجع لطبعي واتعامل بخلق وياج ،يله اخذي راحتج وبدلي اني طالع من الغرفه، ومن وصل الباب كلي عسل تره اني طبيب مو سفاح...
عسل:كلش ارتاحيت من حجه ويايه وجان مي بارد على كلبي والي ريحني من كلي هو طبيب يعني هو انسان مثقف وراح يفهمني..
غيرت ملابسي وبما همه بعدهم حزانه لبست دشداشه سوده ومجان عندي غيرها،خلتها امي بجنطتي وكالتلي خاف عمتج متقبل تلبسين الوان البسيها بالنهار وبتالي الليل غسليها حتى تنشف ثاني يوم وتلبسيها بين مادزلج بيد احد.
عدلت شعري ورتبت غراضي بالكنتور جان مفرغلي خانه،وبقيت اكلب بكتبه وكلشي مفهمت منها مبينه الطبيه تخوف وصعبه..
دك الباب وكتله تفضل فات شافني وبقى صافن ودار وجهه .
تعالي ويايه نحضر غده لان امي تعبانه ورايدلها وكت حتى تطلع من صدمتها
صار اجيت
رحت ويا للمطبخ وفتحت الثلاجه وطلعت منها خضره وهو انطاني لحم من المجمده وطلب مني اسويلهم مركه شجر حمره ..
كملت المركه وسويت التمن وهو طلع غراض الزلاطه وغسلها وثرمها واني اتفرج عليه شلون هادئ وشغله مرتب اي حاجه يستعمله يغسلها ويحطها بمكانها..
جان تعامله ويايه بااسلوب راقي وهادئ،متوقعته هيج واحنه ابن عمي كاتل ابووو..
كمل مصطفى الزلاطه وانفتح باب الشارع وفاتت مره.
شافها وكلي هاي عمتي ترى راح اتغير بالتعامل وياج كدامهم...
بهمس كتله براحتك
فتحت المره باب المطبخ وطبت تباوعلي بطارف عينها
هاي انتي الفصليه،مبينه حلوه وملعبه وينخاف منج
مصطفى:شلونج عمتي اتفضلي اني ماعندي مره ملعبه اكسر راسها، يله روحي سويلنا جاي بسرعه كلتها بنتر وامر..
عسل:بهمس حاضر،وعيوني دمعت مع العلم انطاني علم راح يعاملني هيج..بس استهضمت لان اني كلش مدلله يم اهلي..
VOUS LISEZ
#فصليه_ملوك
Roman d'amourالقصه تتحدث عن فتاه من عائله ميسوره وتجبرها الظروف والقدر وبسبب خطا من احد افراد عائلتها ونتيجه للعادات العشائريه تصبح (فصليه) لفرد من افراده عائله المجني عليه
