اها يلا التومة جات المسا راجعة من بيت السماية.... وشافت وش سعادة نضيييف ومتغيير كدا ..... قالت ليها يابت عملتي شنو في وشك دا ؟..... سعادة خافت امها تشاكلا.....قالت ليها شلتو بالموس..... بس بالعكس التومة اتبسطت شديييد..... وقالت ليها بقا سمح ....اها جهزتي غيار بكرة .....سعادة ردت ااي يا امي عباية .....التومة استاءت وقالت لي سعادة عباية شنو يالغبيانة!.... انتي ماشفتي الحال هناك كيف ؟ جو اهل راجل نمارق نسوان صلاة النبي نايراااات اسون كدي..... والعجب الحنة والدهب مشاءالله ...سعادة ضحكت قالت ليها عليك الله يا امي صحي ....التومة برمت عينا قالت ليها ااي والله..... ومشاءالله جسمن دا منسسسق التقول ماولدن .....سعادة قالت ليها ديل برقصو زومبا يا امي وبتريضن..... قايلاهن زيكن انتن النهار كلو تكوضمن وتنومن ههههه ....التومة قالت ليها يابت هو مالك شايفاني برميل قدامك ....ماياهي الكريشة الحتة دي ....ضحكت سعادة ومسكت كرش امها قالت ليها ياماما... ماما حقت الحبشية.هههه.... هسي دي حتة! ....ههههه....وضحكو مع بعض... سعادة قالت ليها يا امي سوما جات؟.... التومة ردت ....هيي ياسعادة ماوريتك سوما انا مااا ماعرفتها .....الا لما قالت لي ياخالتووووو.....وسلمت علي ... من الصوت بس حتي عرفتها ....وقلبنت الحروف دي جنس قلبين ....كلو ج ج .....عاد جنس عولاق .....وبقت القشة بس ....اكان نفخوها تطير ....وماشفتي اظن جاها مرض ولا اكلت ليها شئ مانفع معاها ....لانو جسما دا مظلط كلووو والله ....سعادة ضحكت قالت ليها يا امي دا الفسخ دي كريماااات.....التومة برمت عينا وقالت ليها دا عولاق ساي ....وفوق دا لابسة بنطلون ضييييق ....ومعاهو بلوزة قصيرة بس عريضة ....وملفلفة شعرا بخراطيش كدا .....سعادة قالت ليها واااي يا امي دا لوووور .....غايتو انتي ياامي تشبيهاتك دي اصلووو مابتخليها ....اها يمة وماسألتك مني ...التومة قالت ليها سالتني والله .....الا ياسعادة جن معاها بنات من الجامعة ...زي تلاتة ولا اتنين اظن ....وحدة زيها ضعيييفة ...والتانية سميييحة ...بس خفيفة خفة العدو ...تقع في ود العين ....بري زي خفتا مالاقتني ....واصلت التومة اها وانتي العمل ليك وشك كدا منو اكيييد سبا ....سعادة قالت ليها ااي وادتني منكير هههه..... التومة قالت ليها سمح ... بس قومي تعالي وريني العباية الدايرة تتبشتني بيها بكرة .....تعالي النشوفا.... ولما سعادة ورت العباية لامها وشرحت ليها اللبسة بتكون كيف ... يلا الفكرة عجبت التومة ....التومة كانت دايرة بتها تكون زيها زي البنات متحس انها اقلة منهن بشئ ......وفعلا التومة اتحننت بالليل داك ....والدغش اخدت ليها بوخة دخان...... وسعادة ساقت امها لسبا شالت ليها وشها ....التومة شعرا اسوااااد وبتعمل مساير الحبوبات بتجي سمممحة فيها ...وعندها الدهب كمية من زمن كرسي جابر ....وسعادة اتعبطتت فيها الا تقشر بيهو ....والتومة اقتنعت بعد اتزكرت حريم الخرطوم الشافتن امس ....ويلا سعادة بعد لبست وسرحت التسريحة العجبتا ....رجعت لسبأ لانها وعدتا تجيها تشوف اللبسة ...سبا عدلت لسعادة التسريحة بتاعة ام كلثوم ....وسبأ بعد تعب قدرت هجرت سعادة مكيجتا ....لانها مابتعمل مكياج ...ويلا سبأ مكيجتا مكياج خفيييف.... لانو الدنيا صباح والعزومة فطور .....ويلا الحريم انتظرن سعادة بالبرندة... وهي مع سبا جوة الغرفة ...وسبا كيتن علي سوما طلعت من مكياج شيلتا..... ومكيجت بيهو سعادة .....جنس غيظ هو...والتومة والنسوان بعد شافن سعادة طلعت ليهن برة ... قالت ليهن انا جييييت ....ردن كلهن وقالن الصلاة علي النبي ... وقامت فرحة خالت سبأ قسمت من كمونا الخاتة في صدورا ....وختت منو لي سعادة عشان العين ....سبحان الاه قالوا لو في عين شافت السماحة ومازكرت الله ....والزول طلع من بيتو متحصن وشايل كمون ...سبحان الله العين مابتقع في الزول ....بتقع في الكمون دا .....ولما اتفتح الكمون بعد العين الوقعت فيهو..... بكون وقتها الكمون اتغير شكلو ....سبحان الله يلا ببقا زي الاتسحن ناااعم.... ولونو بغبش كدا..... وريحتو بتبقا اقوي من الاول....سر الحبة السوداء قادر الله.....وطلعن الحريم مشن.....و كل ما امرن في زول بالشارع يعين لسعادة هن اقرن ليها ههههه....اها بيت السماية قريب مابعيد ....ولما وصلو شكلو الفطور بدوهو ..... وطلعو كم صفرة للرجال ...وكان في خلق وامة كأنو عرس عدييييل ماسماية بزخ شديد ....يلا الخيمة مقسومة علي اتنين الاولى حريم والتانية رجال .....بس في رجال خاتين كراسي علي مدخل خيمة الرجال تحت ضل الحيطة.....ياها عادة الرجال .....وقاعدين فيها شباب الحلة ومعاعم اولاد ناس البيت ....بتناولو بالحيطة الصفر من محل الطباخ......وبدخلو صواني الاكل مرة للحريم ومرة للرجال ....ومن ضمن الشباب اتنين اخوان نمارق ...ومعاهم واعد ابو المولود وخوهو وضاح ....وكم شاب اولاد اهل واعد ووضاح ....جو من الخرطوم للسماية....يلا مدخل الحريم في الخيمة فاتح جنوب في باب الشارع حق ناس حوا فاتح شمال....وبيناتم مسافة.....و قصاد المسافة دي لي جوة الضل القاعدين فيهو الشباب يمين....وقصاد الضل خيمة الرجال فاتحة شرق .....بس التومة والحريم جن داخلات من علي الغرب...الشباب قهو في سعادة ....واعد واقف وجمبو وضاح واحمد ود اهلم.....وضاح واحمد دايرين اتناولو صنية صفرة من الحيطة .....وضاح ضهرو علي ناس التومة ......بس واعد عينو في عيون الحروم ........واعد قال اوووووومممممك بالله الحلة دي فيها صواريخ كدا ....هههه قصدو سعادة ....تلقائيا اتلفت احمد و وضاح ....
وتك وضاح عينو جات ويييين ؟؟؟، جات في سعادة ولما الصفرة دائرة تقع منهم ....ولقو ملاح التقلية اتكشح في الصينة .....و.......
يتبع....
