يلا التومة وبتها سعادة لفحن تيابن لبسنها وجرن علي الشارع اشوفن الكواريك دي وين ؟؟....وبس طلعن الشارع لقن شفع كمية ونسوان اتنين بضاربن عديييييل.....وحالتن صعبة صعبة ......جرت التومة عليهن ومسكت وحدة من الحريم البضاربن ديل ....طلعت جارت التومة...... وقامت التومة مسكتا من وشها ...........وبقت تقول ليها الزهرا دا شنو البتسوي فوقو دا يختي مالك جنيتي ولا جنيتي ....... انتي زولة عاقلة بتضاربي مع جارتك في الشارع دا اخر الزمن والله....الزهرا بدت تتنهد وتاخد نفس وعرقانة وحالتا بالبلا......قبل تفتح خشمها وتتكلم مع التومة ....التومة قالت ليها البسي توبك دا الاول وانستري يخسي عليكن ....التومة خلت الزهرا بتلبس في التوب وبتصلح في هدوما ....ومشت علي المرا التانية لقتا واقعة في الواطة... وبترش فيها سعادة وكم شافعة واقفات بالموية ......وكمية من الشفع في رأسا......جات التومة عليها .. وقالت العافية قومي ....التومة قالت للشفع وسعادة زحو لي منها نشوفا ....التومة بتفوق فيها وبتقول ليها ....انشاء الله يالعافية تكوني موتي عشان لو ماموتي هسي بعد عملتك السودة دي بجيك ابوك بقتلك ......يخسي عليك في بت بقت مرا وبشفعا وابوها شيخ الحلة وركازة الصغار قبل الكبار بتسوي كدي .....تفوووو عليك قومي قام ضلك........الليلة وااافضيحتكن وااا فرحة الشمات في اهلكن ....قومي اتنفضي ....التومة قومت العافية وعرفت من سعادة والشفع سبب الشكلة دي انو ود العافية فلق ود الزهرا برأسو وهم بلعبو مع الشفع وخرتو في بليهو ويلا اتغالطو .....والشفع حمشوهم ...وبقو اتصارعو لما ودا العافية ضرب ود زهرا جاب دمووو......الولد جرا لامو بالدم والام قبل تسعف ولدا ساقتو بدمو ....ومشت بيت الزهرا ..والزهرا مسكت الولد عملت ليهو شاي حب في الجرحة لما وقفت الدم وربطنها ليهو هي واختا بالشاش .... والعافية بتهرج وتجوط .....ومسكت ولدا وطلعت ....دا كلو والزهرا بتعتزر للعافية ... والعافية وقت وصلت باب الشارع حق ناس الزهرا نبزتم وقالت ليهم ياوسخ ....ويلا جات محصلاها الزهرا في الشارع كلمة من دي و كلمة من ديك ...مسكت الزهرا العافية لبعتا .....ويلا بقن اتخامشن واكوركن ....ويلا .....التومة بتسمع كدا في القصة ...... بس لقتن تاااي قامن اشاكلن و يعيدن في النبز.... انتي قلتي وما قلتي .......وتاني اتشابكن بالضرب ......والتومة وسعادة وكم مرة بالحلة طلعو بالكواريك.... بقن احجزن فيهن ......بس وهم مدنقرين كدا بحجزو في العافية وزهرا...سمعن ليك صوت راجل بقول لاحولة ولاقوة الا بالله ....يلا الوقت دا بالتحديد الرجال بكونو في المزارع والسوق ......والحلة غير الحريم والشفع مافيها زول .... وكلهن رفعن رأسن اشوفن دا صوت منو دا .....حتي المصارعات العافية والزهرا قامن فكن بعضن .... واي وحدة فيهن خافت اكون الراجل دا من اهلا .... لانو لو طلع من اهل اي وحدة فيهن بتتقطع رقبتا ......بس يلا الراجل طلع غرررريب لامن اهل العافية ولا من اهل الزهرا ولا من الحلة كلها ........ طلع ود شاب وسيييييم وليهو عضلات خوفت الزهرا والعافية ....... واخر قشرة وعطر ...شاف الشكلة ...ومصارعة التيران وقف احجز ن.... وكان سائق عربية جنبا .... ونزل طبعا مابقدر اهبش وحدة بس قال لاحولة ولاقوة الا بالله بصوت عالي .......العربية حقتو باين جديييدة باكياسا .... صوت مافيها ....لانو الحريم اتهجمن لما شافن العربية ......والحريم متسمرات بعينن للشاب الجذاب دا ....وهو بكل زوق وررقي قال ليهم ..ياجماعة ماصاح كدا لو عندكم ااي خلاف خشو حلوهو جوة انتو ستات وعيب كدا ......صراحة النسوان خجلن بكلام الشاب دا .....وبقن اضايرن ....التومة بقت تعين للولد وتقول ليهن عجبكن كدا في داعي لجنس الفضائح دي ....وعينت للشاب ...وقالت ليهو معليش ياولدي .... والله بنات قبائل الا الشيطان شااطر....رد وهو بعين لكل وحدة في الحريم كانو عايز احفظ شكلن ..... .وقال ولو يا خالة ربنا اهدي .... وقفت نظرات الشاب في سعادة ....وهي كانت فاتحة خشمها بتعين ليهو مهجومة ماشافت النوع دا اول مرة تشوفو .....ولما ركز معاها نزلت سعادة عيونا ودنقرت ......التومة طردت الشفع وقالت ليهم يلا كل واحد امش بيتم..... ونادت ولد الزهرا وولد العافية يعني الفالق والمفلوق ....ومسكت العافية والزهرا وقالت ليهن تعالن ارح .....الشاب استأذن ودور عربيتو مشى .........التومة دخلت النسوان وعيالم وسعادة ..وقفلت الباب .....مشو تحت ضل الشجرة . .......جابت سعادة عنقريب تاني وقعدو ....التومة وبخت النسوان لما قلبن وجعن ...والزهرا قالت ليها والله ياخالتي التومة انا بعترف غلطت بس استفزاني نبزا لي اهلي .....ولما جاتني البيت لقتني طالعة جات غاشياني اختي ماشين نبارك لحوا مولود بتها ......وجا ولدي داخل منطط عيونو وخائف بسأل فيهو ياود مالك ياود مالك ؟؟؟.....قبل ارد .......جات هي داخلة بولدا ....وشكت لي من ولدي .... طوالي ضربت ولدي كفين .....وجريت ازعفت ولدا.......... وبقيت اعتزر ليها ......وقلت ليها لما اجي ابو يأدبو.......هي مسكت ولدا جرتو وبقت تنبز ......دا الحصل ....التومة قالت للعافية اعتزري ليها ........العافية بالاول رفضت .....قالت ولد الزهرا طبيعي داقي ليها ولدا بالشارع ........وهي وراجلا مابتكلمو معاهو ولا بغلطو ......التومة قالت ليها معليش انا بعدين بنفسي بمش اكلم ابوهو .....العافية اعتزرت لزهرا ...وطوالي الزهرا قالت لي العافية سمح بس تجيبي لي كريم لوشي الخربشتي لي دا...... وقعدو اضحكو...... انتبهو لقو الشفع في نص الحوش شغالييييين العبو في البلي ساااي....التومة ضحكت قالت ليهن ياهم ديل الاتصارعتن في دربم ؟؟؟ ......ضحكو وقبل تمش ااي وحدة بشافعا بيتا..... اتواعدن اتلمن العصرية مع التومة وبتها وامشن اباركن المولود لنمارق بت حواء
يتبع....
