يلا سعادة نامت نوم عميييييق بعد الحقنة..... والنصيحة حقنة المسكن دي بتخلي الزول بعد انوم واصحى بكون نشييييط ......وتحس وزنك خفيييف .... ويلا سعادة قامت نشييييطة ....و سعادة من نوع البنات اللمن اجيهن مغص بفتح لونهم ......وبنورن نورة غريبة سبحان الله ......وسعادة من اصلها صفورية وماطويلة وماقصيرة .....رقبتا بس الطويلة ..... وجسمها مقسم زي التومة امها..... وشعرا ماطويل شديد بس ناااعم ومغتي جبهتا .... ورموشها غزيرة ....وحواجبا فيهم قرنة ..... عيونا كبااار ومدور ونخرتا مستقيمة في وشها تشبة السعوديات بس بالوزنة السودانية السممممحة ديك .....بالمختصر سعادة سممممحة سمحة عديييل......وشها حكمة الله من اتخلقت ماقامت ليها فيهو حبة ولاحبوب المراهقة العبيطة ديك .....وجات التومة جابت ليها حرجل بلتو مع محريب من بالليل يلا علي الريق بشيل المغص .....وسخانة البول والالتهابات كلها ......التومة جنهااااا اعشاب وحاجات بلدية ......وسعادة قامت صبحت علي امها ...وشربت المشروب دا....وابوها جا صبح عليها وطلع شغلو ......والتومة قامت علي شغلة البيت وابت تخلي سعادة تشتغل شئ .....مرات التومة زااااتا بدلع سعادة ....ااي التومة البتهرج في محمد حاج لما ادلع سعادة..... وبتقول ليهو بتخرب البت دي بالدلع ....... نضفت التومة البيت .... وسعادة النهار كللللو تشرب في عصير الليمون ...زي المرا البتتوحم .....والضهرية كالعادة هي والتومة قاعدات في ضل الشجرة في الحوش.....يلا في قعدتم ديك الباب دقا ....مشت سعادة فتحت الباب لقتا دي حبشية ناس حوا ....ومعاها شافعة من بنات الجيرات ....جات توصلا بيت التومة .....والحبشية قالت لسعادة سلام وين ماما؟..... سعادة ضحكت قالت ليها سنة يا انا ....انا ماقاعدة اقول ماما هههههه....خشي ماما جوة ... ودخلت الحبشية .....سعادة كورك للتومة ياماما .....دايرنك....التومة اندهشت لماما دي ... وعينت شافت الحبشية ومعاها الشافعة .....سلمو علي التومة وكلموها بالسماية بكرة .....وقالت ليها الحبشية ماما قالت انتي كلمي الجيران جمبك ....وقالت ماما عايزة حلل كبيرة اربعة .......وفعلا شالن الحلل وكم حاجة ... والحبشية والبت الشافعة طلعن.....التومة قالت لسعادة انا بمش اكلم ليهم الحروم ديل .... عشان لو نسيت ولا انشغلت مااا ادخل في لوم الحريم ......لواماااااات ومابسكتن كان فتحن باب اللوم دا ........وفعلاااا.....طلعت التومة غشت الرضية كلمتا.....ومشت لي العافية ... ودار السلام ....والزهرا ...وبتول بت زينب .....والتومة مع القص والرص اتأخر من البيت ....جات لقت سعادة تمت الغدا ......وشوية ومحمد حاج جا .....قعدو التلاتة اتغدوا واتونسو حبة ... التومة قالت لي محمد حاج دائرة امش علي بيت السماية... قالو جايبين طباخ ....وضابحين تور وكم خروف..... عاد معناها حتكون سماية حدث .....سعادة قالت ليها يمة انتي مامشيتي عرفتي الكلام دا كيف؟؟؟ ....ضحكت التومة وقالت ليها دي اخررر الاخبار.....ما بتتلقي الا عند بتول بت زينب هههههههههههه ......وقالو عاد الخيمة جابوها مقفلة من الخرطوم قالوا الا بالمكيفات ......وشئ عجيب ....وكمان واعد راجل نمارق زاااتو جا امس وصل الحلة ..سعادة ضحكت هي وابوها .. و محمد حاج قال والله انتو الحريم ديل الله ادينا خيركن بس ......التومة حمرت ليهو وقالت ... اها النسوان قالن بمشن اساعدن الطباخ .... زمان حوا قبل فلهمتا الجاتا متأخر دي مااااقصرت مع زول في الحلة....وحتي نمارق زاااتا كانت من بنات الجمعية البقيفن في البكا والعرس بالخدمة وخدووومة مشاءالله.....محمد حاج قال ليها طيب يلا امشي عارفاني ااي مجاملة فوق الحلة مابمنعك تمشي......التومة عينت لسعادة قالت ليها تقدري تمشي معاي ؟.... سعادة عينت وهي بتحمر لي التومة نظام ابوي قاعد ماتجيبي سيرة المغص ... وردت والله يا امي انا كويسة بس لكن امشي ليهم من هسي!!! .....التومة قالت ليها ااي مالو عشان تتعودي علي الواجب من هسي.....ردت سعادة يا امي ماعندي مزاج امش الليلة بمش بكرة ....التومة حدرت ليها وقالت ليها بررراااحتك .....وقامت التومة لبست توبا وطلعت ....سعادة قالت اقوم اظبط لي قشرة عشان بكرة سوما حتكون قاشرة بقشرات بنات الجامعة .....ياربي البس شنووووو؟؟؟؟.....وبتفكر كدا .....يلا مشت رقدت بعد فتحت التلفزيون وجابت قناة النيل الازرق ......وشوية جات مذيعة قرض مسرحة تسريحة ام كلثوم..... وخاتة الطرحة في نص راسا......التسريحة عجبت سعادة شديد..... والمذيعة لابسة اكسسوارات وعباية ملونى كدا ظريفة .....سعادة اتزكرت عبايتا اللونا سماوي هاااادئ وظررريف..... جاب ليها عمها الزين من السعودية.... وماااالبستا خاااالص .....سعادة قالت بس خلاص لقيت القشرة .... زمان كانت العباية كبيرة علي ....وزمن ماطلعتها من الكيس ....جرت عليها قدرتا لقتا شوووية طويلة.... جابت الجزمة الوحيدة عندها سمحة وكعب مسمار ثابت ....وبتقدر تتحرك بيها كتير لونا احمر .....قالت ياربي اعمل زي بنات الخرطوم البس كلو لون من بلد ....ضحكت قالت والله فكرة مالو اجرب ......عشان سوما ماتتجدع علي..... بس الا افاجأة واخليها تتبسط ....يلا سعادة طلعت من الحاجات الرسلم ليها عمها .....طقم اكسسوار احمر رقيييق..... والعباية فيها شغل بتاع خرز من قدام بالوان الطيف.....فيهم احمر قالت بس كدا حلو ..... ياربي وشي اعمل ليهو شنو ؟؟؟مشت كورت لسبا بالحيطة سبا دي سمممحة سماحة جد.....عندها قصة براها ..... وابوها مابخليها تطلع من البيت ولا شبر...... وخلاها تخلي الجامعة ......ومحبوسة للعرس.....سعادة كوركت ليها بالحيطة .....سبا بتريد سعادة ......وجات سلمت عليها .....ولما سعادة كلمتا بالسماية ....سبا قالت ليها ااي ناس امي ماشين بكرة .....سعادة حكت ليها بالوضع حق السماية .....وبقت تتشاور معاها في اللبسة ....سبا قالت ليها والله ماشفتي سوما في الجامعة هناك اااخر قشرات وفلهمة وجكس ....وسبا اصلا مابتحب سوما من المدرسة ...... وسوما بالفسخ بشتن جسما بشتنة شديدة......وانتي ياسعادة مشاءالله عليك جميلة ......النبي ياسعادة اقشري وغيظيها لي .....اصلا هي من زمان بتغير منك ....سعادة ضحكت قالت ليها ياخ ماتظلميها .....والله سوما زولة علي نياتا الفي قلبها علي لسانة ....سبا قالت ليها اه انتي الطيبة .....ماعلينا..... اها عندك مكياج .؟..سعادة نططت عيونا وقالت ليها مابعمل مكياج....سبا عينت لوش سعادة لقتو ملااان شعر.... وحواجبا فيييي طبيعتم ....ومن الله خلقا ماشالتم ولا نضفتن حتي ....سبا قالت ليها تعالي لي بالدرب سررريع ياسعودة .....سعادة استأذنت ابوها وجررري مشت .....وسبا مااااقصرت نضفت لسعادة وشها وشالت ليها حواجبا ....ومعالم وش سعادة بقت عسسسسل .....وسبا ادتا منكير وقالت ليها بعد تلبسي بكرة تعالي غاشياني ....اشوف القشرة واطلعي مع ناس امي وخالتي الصغيرة ....وفعلا حصل وتاني يوم .....
يتبع....
