جان اكو ولد يجي بكل عيد للربيعي ..من اهل المدينة
نضحك على ملابسه ونصوره من يركص
اتصور،هو صار صديقنا وراح نلتقي وياه واتخيل هو انسان اله تقديره وهو يدري بداخله احنه ننبذه لان شروكي
لان وسخ ومتخلف و جاهل
لان ماعنده شهاده ويشتغل يوميه
جان بداخله يتمنى هو من زيونه عنده سيارة وبيت وامه الفاقده 3 ولد بحرب ايران جان يتمناها دكتوره .. حتى مرة اتعارك وياها لأن وصته على خمره لان جان يفكر بلحظتها بنادي،العلوية .
جانت امنيته يصير احد اعضاء النادي وينزل بالفيس هو ويه جماعته هناك بحفلة عادل عكله .
يومية يسهر للصبح يدز رسائل النه ومحد يجاوبه وبعده مقتنع هو صديقنه .
مرة اشتره حذاء بخمسين الف لان شافنه نباوع على حذائه ونضحك ..بدله حتى بس يرضي نظرتنا ..غيره حتى بس يجذب بنيه توكع بحبه ..
يتمنى يحب وحده ويوفيلها ..
يتمنى اكثر من شي
بس هذه الشي مايتعده كونه حلم .
البارحه قرر يجينا ..وقبل لايجي قررنا نسوي بي فلم
قررنا نكله وحده معجبه بيك وتريد رقمك
خابرناه ومن حجيناله السالفه ضحك وكال جايكم بالطريق
انتظرناه اتأخر.
خابرنا علّي مقفل.
رحتله للمدينه داجيبه صار الانفجار
بقه منه بس حذائه الي اشتراه غصب
بقه حذائه لان بس،هو النشاز اللابسه
بس،هو الشي المو من كل كلبه مشتري
صعدت روحه وبقت حسراته واحلامه الماحققهن
بعد مااشوفه بأي عيد ..بكل عصر يلتقون بي الشباب المليانه
صعدت روحه الغنيه
وبقت ارواحنا الفقيرة اتأجل موعدها
صديقنا الشروكي المزيف طلع صديق حقيقي
خلانا غصباً ماعلينا يبقى بذاكرتنا
فرض نفسه بطيبته
واحنه خدعناه
لأن ما عدنا سنت من احساسه
احنه داعش بأخلاقنا الوضيعه
بنرجيستنا
ذبحنا مشاعره
احنه نستحق الموت
مو هو .