جان اكو بفرعنا شخص غريب الأطوار بيته اقدم بيت بالمنطقه ، بي شجرة عملاقه تخوف .. حرنا بهاي الشجرة من يانوع .. بالربيع توكع اوراقها وبالخريف تخضر .
اذا يوكف عليها عصفور او بلبل يظل ساكت كأنما يتذكر اله موقف سابق بيها والشجرة الوحيده الجان يسكن بيها هدهد محد يكدر يلزمه .
جان ابو البيت سكير شعره مخربط ولحيته طويلة
كلما يباوع عليه يبتسم .. جانت ابتسامته تفسر هو انسان طيب عكس ماكالوا الجيران هو ساحر .
مرة شفته بالليل طلع شاف جهال يلعبون طوبه كعد يباوع عليهم
جان تطفه الكهرباء .. شاف طفل زعل لان ماسجل هدف اتحول بلوجكتر .. اتعجبت اول مرة اشوف ساحر بحياتي
الجهال فرحوا من شافوا الضوه رجع كملوا لعبهم .. حتى من خلصوا لعب ظل يضوي ينتظر ابو جوزيف المسيحي الشايب يذب زبالته بالقطعه حتى ليوكع بالطريق .
رجعت نمت وافكر بهذه الساحر اتمنيت اكله اتحول بشخصية المدير حتى ينجحني
بقت الفكرة ببالي .
ثاني يوم افتروا الحزب عالبيوت اي واحد افرار من الجيش يكصون اذانه ..
سمع الساحر بيت ام علي ابنها فرار واجوي على ابنها .. فات قبلهم للبيت واطشر صار خمس لوحات الصدام وزع روحه بالمطبخ والاستقبال حتى بالبيتونه حط نفسه صوره
اجوي البعثيه دياخذون علي شافوا صور صدام بكل مكان انقهروا وشكروا ام علي على وطنيتها
اتعجبت ام علي واتعجب علي منين اجتي هالصور .
بالشته شاف عائلة فقيره سطحهم ممزفت اتحول سكف حتى ليخر عليهم
من فرحتهم نزلت دمعته عليهم من السكف
كلش حبيت الساحر وبقه دائماً من يشوفني يبتسم .
مرة راقبته فتت جوه البيته شفته كاعد وغراض البيت تشتغل بداله بس الليمونه واكفه يمه تعاتبه عل الشرب الزايد
باوع عليها وابتسم كلها لا راح ابطل بس هم متخلصين مني من يجي الشته واسوي لبلبي
ظل يمشي والحكه مااخلي يشوفني
مرة شاف ولد رايح لأخته دك بابها مافتحتله الباب من وره زوجها .. فات البيتها اتحول البوم صور وخله كبالها صورتها ويه اخوها من جان صغير .. ظلت تبجي وفتحت الباب لأخوها وحضنته .
وصل المرحلة يمشي يرجع تعبان البيته وعيونه تعبانات بين المرض على وجهه .
رجع تعبان للبيت البرده تسأله ليش عيونك سود .. كلها شفت سيطرة لزموا طفل مايدري ابوه منو وطلبوا هويته الولد ظل ساكت انجبرت انكتل بداله حتى يرجع لامه ينطيها اسبوعيته تجمع بي الايجار وخط الكهرباء .
من صار السقوط اختفى شفته وره سنة يم جامع كلما يفوت شخص طائفي شيعي يتحول العبارة عالجامع .. من كنت مولاه فعلي مولاه
وكل ما يفوت سني طائفي يلكه شيعي يصلي بحسينية يتحول لابو حنيفه حتى يبينله ابو حنيفه اصله من ايران
آخر يوم بحياته من شاف اصدقاء بالفرع جانوا يلعبون طوبة واحد بلغ عالثاني لان الكولجي بالحشد والمهاجم حارس بجامع ..
قرر ياخذ مصيرهم ..
اجوي جماعه تكفيريه اتحول الساحر الشخصية الكولجي ضربوا ٣ طلقات وانهزموا
بقه ينزف الحد مااجوي ميليشيا كملوا فوكاه بست طلقات وبقت جثته بالشارع
حسوا بندم وظلوا يبجون اثنينهم الكولجي والمهاجم الجانوا بفريق
الجان يضويلهم انطفى للأبد
ارتفع فوك وصار نجمه
كلما يشوف يتيم توكع فلوسه يصير نيزك
حتى يضويله
مرة اشتاقيتله سألت امي وين هذه الساحر
كلتلي ياساحر ابني روح نام
اليوم المدير مدحك كلي ابنج شاطر
