عندي صديق كلش بسيط وفقير .. هلكد مايحب الخير اذا شاف جريدة بالكاع يشيلها ويخليها عالحايط ..
مرة امه كلتله البزونه جايبه بالكنتور طلع جهالها بره .. شالهن خلاهن بغرفته وحط جواهن دشداشة امه حتى امه من تنام تتوارد بخوف ام البزونه وتبقيهن الصبح .
مره راد ينام بالليل اتعاجز يطفي الضوه .. باوع عالشمعه بحنان جان تنطفي .. مخدته البدون وجه رادها تصير جوه راسه شافها جوه راسه مبطنه بريش ومكتوب عليها نوماً هنيئاً .
اتعجب الولد بالديصير .. هذه حلم ؟ معقوله صارت عندي قوى خارقة .
كعد الصبح شاف صديقه ديقره الفرويد كتاب موجز التحليل النفسي كله علي شتريد تاخذ من هذه الكتاب .
كله احب بنيه ومااعرف اتصرف وياها هي مدللة وتريد واحد شخصيتة قوية واني ضعيف .. ضعيف احبها من كل گلبي ومتجاهلتني وسمعت بفرويد محلل شخصية المرأة .
كله علي من تقترب الشخص يبتعد عنك لأن دائماً السعي يكون للشي المفقود مو للشي الموجود .. ظل صافن علي .. كله الجرأة والكباحه سلوكيات مموجوه بالمرأة من متشوفها بيك تتخيلك امرأة مثلها متتخيلك رجل .
علي طبق هالكلام وخله اي وحده تشوفه تتمنى تحجي وياه .
صفن صديقي كال اني شمدريني بهالشي مع العلم اني مااعرف اي بنية معقولة صارت عندي قوى خارقة اكدر اسوي كل شي .
مرة شاف وحده كلش معجب بيها هي متباوع علّي خلاها متشوفه اصلاً
بشارعهم شاف ابو سمج باقيه عنده سمجايه خلاها تكمز بالمي حتى تضحكه
هو ماقرر يبيعها لوما هي تموت نفسها على مود رزقه
ظل يمشي بمنطقتهم شاف موكب عزاء للحسين ظل واكف شاف واحد سب عمر اتقربله كله ليش سبيته .
كله هو الكسر ظلع الزهره .
كله تدري الحسين من ثار لزمه عبدالله بن عمر وكله لاتخرج ياحسين ولاتفرق جماعة المسلمين
الحسين كله لو كان ابوك حياً لنصرني .
يعني عمر لو عايش جان ثار ويه الحسين وانت تسب عمر ، !
الولد اتأسف وراح يخوط واول ماصارت الهريسة وده جدر لأم عثمان كلها هذه جدر الجهالج لأن عمر بخلافته مابقه واحد جوعان
لأن عمر بخلافتة جان علي القاضي
ام عثمان اخذت الجدر ووكلت جهالها قبل جانت تذبه لان جان بعقلها الشيعة كفار
عافه صديقي وراح لأسواق شاف ابو المحل
يبيع بالدين العائلة والبيضه الوحده يحسبها بألف .. باوع على ابو المحل خلاه يلغي الديون ويروح للعائلة ينطيهم غرفه من بيته الجبير يكعدهم بيها بلاش .
ظل يمشي صديقي الحد ماوصل الشارع المتنبي .
فتح كتاب كتاب وظل يقره
شاف كتاب ابن تيمية كباله خله كل مثلبه العلي تصير منقبه وكل كتب الدين والتاريخ حولهن روايات وجدانية
خله نيتشه يطلع من مؤلفاته ويكعد بصف علي وجيه يصنفون عالعالم
خله مكيافللي يشتغل بالشابندر واي واحد يطلب جاي يكله الحامض يبرر الوسيلة
خله مقدمة ابن خلدون ينضربن بمؤخرة كتب الفقه والشريعة
ظل يمشي مايعرف وجهته وين وصل للأعظمية سمع واحد بالكوستر سب ابو حنيفه
ركض صديقي عالكوستر كعد بصفه باوع على وجهه خلاه ينام ويحلم بزيد بن علي ابن الحسين
كله ابو حنيفه انسجن مثل الكاظم لأن انطه فتوه بالخروج على هارون الرشيد وسماه اللص المتغلب المسمى الخليفة
صحى الولد من حلمه ونزل من الكوستر وخلاه يخابر صديقه عمر كله اني يم الجندول واللكمه غصيت بيها واتذكرتك .
آخر شي رجع صديقي للبيت شاف امه تبجي كلها يمه شبيج كلتله صار انفجار ولد ام عثمان وام زينب جانوا بنص الانفجار ومالكوا شي منهم
راح لهناك شاف امهاتهم وحده تسأل على ولدها وتبجي والثانية تركض بنص السوك عليهم .
غمض عينه دقيقه . واتذكر قول الرسول العلي قبل لينازل عمرو بن ود من لزم راسه وكله اللهم انك اخذت حمزةبأاحد فلا تاخذ علي بهذا اليوم
اتخيل روحه نبي ودعه لله واختفى
رجعوا ولد ام عثمان وام زينب واتفاجئوا من شافوهم
حضنتهم امهاتهم بس صديقي اختفى
اختفى للأبد
شكد دورت علّي ودوروا اهله ومالكيناه
اختفى وماشفت بعد هيج صديق
مرة امه خابرتني ..كلتلي لكيت رسالة بغرفته اخاف افتحها
اجيت فتحتها
مكتوب بيها حرامات مالحكت على ملجأ العامرية وسبايكر وفاجعة الكرادة
