ضياع

part '1'

هند: قوم ياكلب فوت صلاه الضهر!!!
مهند ومو راضي يتحرك
هند: إنا لله والحل معك؟
مهند: انقلعي اليوم عطله!
هند: مو على العطله حبيبي. الصلاه لاتفوتها
قام مهند: خلاص تقلعي عن وجهي!
راح فتح الدولاب واخذ المنشفه وملابس نضيفه وراح يتروش طلع وهو لابس بجامه كم طويل وفيها ازارير صلى ونزل من الدرج وهو يشوف اخته فالصاله تحط الأكل هو انهبل وقعد يركض بسرعه وبغى يطيح كم مره من الدرج والمخدات الطياحه بالصاله بس تفادها
هند وهي تضحك: كل ذا جوع؟ شوي شوي الأكل ماراح يطير
مهند: من الغداء حق سعود ما اكلت شيء عقبها.
هند جلست قدامه بالطاوله بكل هدوء وهي تناضر مهند بسرحان
مهند استغرب: وش فيك؟ هاتي الي عندك وش بتقولين؟
هند: اعوذ بالله منك اصبر طيب خن اجمع كلامي!
ضحك بخفيف مهند وهو يكمل اكله,
هند بتوتر: اسمعني للأخر وانا اختك, تعرفني بتم الثلاثين وانا عزباء وانت ماشاءالله ثاني ثانوي! يعني رجال وتعرف الصح من الخطاء وبعض المرات اشك انك اكبر مني من تصرفاتك وهدوئك الي مو طالع على احد من عايلتنا,
جتني صديقتي وتبي تخطبني لأخوها وتعرفني ابي اطلع من هالبيت حامت كبدي وابي ابداء حياة جديده بشكل جديد وانا كلمتك ابي مشورتك ياخوي..

مهند كان منصدم على الآخر مايدري وش يقول! اختي بتتزوج؟ طيب وانا وش اسوي لحالي من دونها؟ وش يصير فيني بعدين؟!
مهند معصب بس تمالك نفسه: وانا وش اسوي؟
لاتقولين انك بتجدعيني عند فلان وعلان؟
هند استغربت من اسلوبه: اسمعني انا بخلي هالبيت لك وبزورك كثير وبعدين الي كبرك يبون الحريه والراحه ليه تبيني اقعد على قلبك؟
مهند: مافي احد مايبي الحريه والراحه بس انا ابي احد يرعاني يداريني يعرف اموري! مو كذا! اصير مهيت مالي احد!
هند بضحكه خفيفه: اجل ازورك حلو؟ وبالعطل اجي انام هِنا انا وزوجي وش رايك؟
ما قبل مهند الوضع ابد بس تفهم بحكم انه اخته الوحيده الي تراعيه وتهتم فيه ومايبي يفرط فيها,
هند: يعني خلاص اخليهم يجون بكرا؟
مهند: طيب علوم الرجال ما اخذنها..وبعدين ليه العجله؟
هند: انا خلاص سألت عنهم من زمان وعرفت الرجال من اصله بس انتضرت عشان افتح معك الموضوع وخير البر عاجلُ يعني كل شيء بسرعه احسن!
مهند: شوفي الي تبينه

جلسوا الين العصر سواليف وضحك الى ماطق الباب
هند: شكلها نهى بروح اطلع معها
اومئ مهند وهو يرقى فوق عشان يهارج اصدقاه يجتمعون اليوم وبنص الدرج صرخت هند بمعسلامه وهو يسلك لها ويهز ايده بمعنى خلاص روحي
دخل غرفته وانسدح على ضهره بالسرير وفتح جواله يهرج بالقروب عشان يتجمعون بمكان
فيصل\ تعالوا بيتي!
سعود\ خلاص انا بجي وبمر مهند على طريقي
مهند\ انتضرك..
ترك جواله وراح يطلع له ملابس,
لبس بنطلون اسود ماسك شوي ومشقوق من الركبه وبلوفر ابيض فيه كلمات باللون الأسود طوال كمومه يغطو اصابعه ولبس جزمات عنابيت فيهم خطوط بيضاء. تعطر ونزل للصاله يقلب القناوات الى مايجي سعود,
طق الباب
مهند وهو يفتح الباب: بسم الله مسرع ماجيـ..
مافي احد عند الباب!
مهند بصوت طويل: من في؟.. يلف راسه يمين يسار يدور احد بس ماكان في شيء!
دخل البيت وهو مرتعب يمكن انه الي امس!!!
مهند: لااا خرابيط فاضيه ذولا بزران وحبوا يطقطقوا.
مسك جواله وهو يكلم سعود يجي بسرعه لأنه زهق من كثر ماينتضر
ربع ساعه ودق سعود على مهند يطلع
مهند فتح الباب وقفله وركض لم سياره سعود وهو مستانس..
سعود: وش عنده القشطه اليوم مروق؟
مهند بهدوء: ماني مروق بس استانست اخيراً طلعت من البيت
سعود: ليتك نمت عندي امس, فلينا ام امها انا وفيصل..
مهند: الله من الكذب, انتم ماوراكم غير انكم تقابلون وجيه بعض وتقولون كلام مو صدق لبعضكم عشان تمشون الوقت