في مكتب الديكور قاعدة تستنا في ميادة باش تجي تديها للدار تشوفها و يتفاهمو على كل حاجة...دخلت سورية تجري...ليناااا...لينااا...لينا تخلعت و ناضت مش فاهمة واش صرا
لينا:واش بيك سورية غير الخير؟؟؟انطق ماتهبلنيش
سورية تنكز و تسوطي...يااااي يا لينا كون تشوف شكون برا يهبل يدي العقل...
لينا:احبس و حكي نورمال خليني نفهم عليك...شكون برا
قبل ما تفتح سورية فمها تفتحت الباب و دخل عليهم عُدي لابس لبسة البوليس....يا الزح صح يدي العقل هذاك البدن عليه ياااااه حوالو عينيها كي شافتو قعدو في زوج باهتين فيه قوة حضورو قنبلة ناسفة...خزرت في سورية تاع اخرج خليني وحدي معاه و استجمعت افكارها لي تشتت وقت شافتو تنهدت و قالتلو: مسيو عُدي قداش من مرة لازم نقولك طلبك مرفوض مش انا لي نقدر نعاونك
عُدي تبسم نحا الكاسكيطة من راسو....اسمع ماجيتش نطلب منك تعاوني...عندي امر بالتفتيش
لينا تخلعت..واش من امر؟؟؟ و على واش رايحين تفتشو
عُدي:جاتنا اخبارية بلي عندك مخذرات فالمكتب...و هذا امر التفتيش
مدلها ورقة و عيط لرجالو دخلو بداو يفتشو فكل بلاصة من مكتب الديكور....لينا كانت هايمة بأفكارها الدوخة لعبت عليها قريب طيح مافهمتش واش قاعد يصرا كانت غير تتفرج فرجال البوليس لي قاعدين يقلبو في كل شوكة من مكتبها...جواد لحق شوية متأخر وقف قدام عُدي لي كان يخزر فيها متشمت و قالو بصوت ضعيف...يا خويا واش لي قاعد يصرا هنا؟؟....سمع واحد من البوليس يعيطلو راح عندو جواد و لينا يتبعو فيه
عُدي:انعم كاش مالقيت؟؟؟
البوليسي:سي عُدي لقينا هاذ الكوكايين تحت الطابلة كان مخبي مليح بصح لقيناه
مدلو رزمة الكوكايين و خرج....دور شاف جواد يتخنزر فيه بغش كبير و في عينيه الف سؤال...لينا مش مصدقة لي قاعدة تشوف فيه عينيها وساعو الكلام هرب من فمها...واش قاعد يصرا مراهي فاهمة والو
عُدي احكمها من يدها و قالها: اتفضل معانا لمركز البوليس
لينا نحاتلو يدو و خزرت فيه بحقد..مستحيل نتحرك من هنا....و رجعت للبيرو تاعها منى و سورية داهشين دخلو عندها و مالقاو واش يقولو
جواد متغشش للشوشة حكم عُدي من رقبتو و قالو...واش راك دير....علاش تعمل معاها هكا
عُدي نحالو يديه عدل لبستو بكل برود و قالو: واش تقصد؟؟ راني ندير في خدمتي و الكوكايين لقيناه في مكتبها
جواد:ههه واقيلا تحسب فيا حمار ولا بهلول باش مانعرفش رزمة الكوكايين لي جبتهالك البارح....تنهد و حط يدو على كتف عدي...واش قاعد دير ا صاحبي علاش حاط مور الطفلة هاذي؟؟؟ واش عملتلك؟؟
عُدي: اعطيني ربع ساعة نهدر معاها و نرجع نفهمك في كلش
دخل عدي للبيرو لقاها قاعدة و مغمضة عينيها أشر على سورية و منى باش يخرجو...قعد يخزر فيها كأنها تحاول تهرب من الصدمة لي جاتها هدوءها و طولة البال لي عندها قوتها منين تجيب فيها و هي انسانة وحيدة لا اهل ولا اقارب لا اصحاب ولا زوج....قعد يتأمل في ملامحها طفلة زينة وجها فيه ملامح طفولية و براءة....واش هي حكايتك يا لينا علاش مهتم بيك و نحب نعرف عليك كلش...مش خدمة و خلاص عندي فضول كبير نعرف واش لزك باش تدخل للعالم لي راك فيه
أنت تقرأ
توبة فتاة الليل
Romanceتوبة او لينا هي فتاة يتيمة عاشت في ظلم و نهب من طرف عمها و زوجته لتكبر و يصبح اهم اولوياتها الانتقام من عمها الذي سلبها طفولتها و حرمها من والديها و لم تفكر يوما في الحب لكن القدر كان له مخطط آخر منى و هي صديقة لينا المقربة ، منى ايضا يتيمة عاشت عند...
