توبة فتاة الليل

الفصل التالت

فطرو و ناضو رايحين للخدمة تفكرت قطها الصغير
لينا:ييييييي على ذيك النسوة
منى:واش نسيت غير الخير؟؟؟
لينا:ماجبتش لمينوش الماكلة...ها خالتي نجية نتكل عليك تجيبلو ماكلة
نجية:ماعليش يا بنتي ضرك نخرج نقضي و نشريلو ماكلتو
لينا:بلاما نوصيك اتهلا فيه خالتي
منى:اووووه على حكاية قط دايرة روطار نص ساعة...امشي خلينا
نجية:طريق السلامة بناتي و ربي يوفقكم
خرجو من الدار ركبو الطونوبيل و قالو ربي للخدمة....وصلو للبيرو دخلت كيما كل يوم بوكي ورد احمر محطوط فوق الطابلة تاعها
لينا:سورية...سوووورية
سورية بنية تخدم عندها فالبيرو سكرتيرة تتعامل معاها مليح و عمرها حاسبتها على الغلطة ولا حسبت روحها مولات الخدمة و هي خدامة عندها
سورية:لينا عيطتلي؟؟؟
لينا:قولي واش في راسك...شحال من مرة نقولك بوكي الورد ترميه
سورية:و الله حرام ورد باهي و ريحتو مليحة علاش كل يوم ترميه
لينا:هههههههه لوكان تعرف لي يبعث فيه مش غير ترميه راك تقطعو ولا تحرقو
سورية هزت بوكي الورد و خرجت و تليفون المكتب صونا رفدت:الو
المتصل:.....
لينا:انعم تقدري تتفضلي للبيرو و نتفاهمو على كلش على الخدمة و على وقت التسليم
المتصل:.......
لينا:اوكي مدام بعد ساعتين نتقابلو.
من جيهة اخرى...عُدي 28 سنة راجل اسمر زين وحطة العين الكحلة و الغمازة فالخد و بدن طويل و عريض يدي العقل و كل البنات تعشق فيه...هو من عايلة لاباس بيها عايش حياتو مش سامع بحد...عندو دارو وحدو بصح عايش مع يماه و خوتاتو البنات باباه متوفي من 15 سنة.....ضابط فالبوليس خدمتو مقدسة بالنسبة ليه انسان حازم و قوي و قاسي...اذا تعديت على حاجة تخصو راح يوريلك الويل يتحول من الشخص الهادئ و الرزين للهايج المفترس اذا زعف مايعرفش يهدا غير اذا دار ديڨا ولا عطا شي حد طريحة..
كي العادة فالبار قاعد مع صاحبو جواد قاعد مقابلها يشوف فيها اللبسة المعرية هيأتها توحي بالفسق و الفجور..الرجال رايحة جاية ليها تقول قاعدة في معرض و بدنها سلعة تعرض فيها للكلاب لي فالبار
جواد:واش خويا يضهرلي نسيت علاش راك هنا؟؟عندك شهر و انت تعس فالطفلة هذيك واقيلا طحت فيها
عُدي:لا منسيتش علاش راني هنا...و مش من عادة الرجال طيح في بنات الليل...وحدة خامجة لا دين ولا تربية قاعدة تبيع في بدنها للي يعطيها شوية دراهم و كل ليلة مع واحد
جواد:هههه صح تبان بنت ليل بصح نظن بلي هي مش منهم...هاي كل يوم هنا ولا مرة شفتها خرجت مع واحد
عُدي:واش يهمنا فيها كل واحد حر في روحو...نوض خلينا نروحو قعدتنا مافيهاش فايدة
دور خزر فيها لقاها قاعدة و راجل واقف معاها وحاط يدو على فخضها و باين عليه في جو رومنسي...هز مفاتحو و خرج هو وصاحبو كل واحد فيهم روح لدارو....دخل للدار كانت الساعة 12 تاع الليل الظلمة في كل الدار غير في بيت يماه لي كانت تصلي و تدعي في ربي..دخل لبيتو تكسل فوق السرير و ضربها برقدة للصباح...يسمع في تليفونو يصوني فتح عينيه بالسيف ناض دوش و لبس و خرج لقا يماه و خواتاتو فالكوزينة يفطرو
عُدي:صباح الخير عليكم
فاطمة يمات عُدي فالخمسين من عمرها مرا وقورة عندها شخصية رزينة...خواتاتو هند عمرها 26 سنة كملت قرايتها فالخارج و رجعت للبلاد متعجرفة و متكبرة مايعجبهاش العجب تحب كلمتها تمشي بصح على شكون على عُدي.!!! غير هاذي ماتخممش فيها علاقتها معاه ديما متوترة...ميادة عمرها 24 سنة كملت قرايتها و تخدم محامية مخطوبة و قريب عرسها علاقتها مع عُدي علاقة متينة و قوية على عكس ختها هي متواضعة تحب تعاون الناس متربية و خاطيها المشاكل.
فاطمة:صباح الخير ولدي..اقعد تفطر
عُدي:لا يما عندي خدمة لازم نروح
خرج ركب طونوبيل و توكل على ربي للخدمة
فاطمة:ميادة مش قلت اليوم تروح لمكتب الديكور باش تخدمو الدار؟؟
ميادة:اوووووو يما و الله نسيت كامل...ضرك نعيطلهم و نشد رونديفو
عيطت ميادة للمكتب و شدت رونديفو بعد ساعتين.
فاطمة:عيط لخوك يروح معاك..
هند بنرفزة:علاش يروح معاها هي صغيرة و ماتعرفش؟؟؟
ميادة:لا يا هند يما ماقصدتش هكا...كيما تعرف مراد(خطيبها) ماكانش هنا و الخدمة هاذي لازملها راجل باش تتفاهم معاه...اك تعرف بلادنا كي يلقاوك مرا يحبو يلعبو عليك و يديولك دراهمك
هند:هههههه كي يلقاو بهلولة كيفك بالتاكيد يلعبو عليك....و ناضت هزت مفتاحها و خرجت