توبة فتاة الليل

الفصل الثاني

دخلو للدار....دار صغيرة فيها ثلاث بيوت و صالون و كوزينة..دار شابة و تحفونة ديكورها حاجة هبال بيتها كي تدخل ليها تحس روحك فالسما حيطانها كلهم نجوم تلمع و هلال في وصطهم يضوي...سريرها على شكل نجمة كبيرة في وسط البيت
بيت منى كي تدخل ليها تقول في غابة راسمة على حيطانها الشجر و الورد و فراشات بكل الوانها.....اما الصالون فهو بحر ازرق صافي مع موج عالي فيه فوطاي على شكل دلافين ديكور كلو اصداف و حوايج بحرية....اما البيت الاخيرة مغلوقة و حتى واحد مايدخل ليها ما يعرف عليها حد واش فيها ولا كيفاش شكلها ولا علاش مغلوقة....
لينا:ادخل ترقد غدوة عندنا خدمة لفوق ريوسنا
منى:تصبح على خير و حتى انت امشي ترقد ماتقعدش كيما موالفة تخمم و يطلع عليك النهار
منى طفلة يتيمة لا اب ولا ام توفاو في حادث وقت لي كان عمرها 7 سنين عاشت عند جداتها تعرفت على لينا فالمدرسة ولاو صحبة يفرحو كيف كيف و يحزنو كيف كيف جداتها زادت توفات و خلاتها عمرها 19 سنة...حاول خالها يحبسها من قرايتها و يزوجها لراجل كبير عليها ارمل وعندو ولاد بصح هي رفضت و هربت من البيت و مالقات غير لينا عاونتها و وقفت معاها فتحتلها بيبان دارها اعتبرتها اختها هي صندوق اسرارها و ملجأها فالدنيا......منى ماتنساش فضل لينا عليها مهما صار
كل وحدة دخلت لبيتها منى رقدت و لينا قعدت جبدت بوست قديم و معاه لي كاسيت (📻 الراديو كيما يسميوه) حطت وحدة منهم و قعدت تسمع و تتفكر في ايام صغرها...امها و باباها و دارهم كيفاش كانو عايشين فالحب و الهنا حياتهم كانت الحياة المثالية لي يتمنى كل انسان يعيشها...كونها وحيدة والديها كانت مفششة و عزيزة لي تطلبو يحضر امها استاذة جامعية و باباها محامي كبير يعني عايشين فالخير و النعمة...لكن الحياة السعيدة و العيشة الرغدة الهانية راحت وقت لي توفاو والديها و هي عمرها 5 سنين...عاشت عند عمها لي ستولا على املاكها كامل و عاملها هو و مرتو كيف الخديمة.
طفات البوست و رقدت و كيما كل ليلة نفس المنامة الخايبة لي تنوضها ترعش و تقطر بالعرق
صباح ناضت فاشلة دارت دوش و لبست من غير هدوم(كيما قال عادل امام هههه) دارت ماكياج خفيف بصح ديما تركز على الروج حطت برفان ريحتها توصل لأخر النهج خرجت من بيتها و فاتت على بيت منى
لينا:نوض يا خايبة نص ساعة نلقاك واجدة
منى:خليني نزيد شوية 10 دقايق و نوض
لينا:انا قلتلك نص ساعة ماتلقانيش...عندي خدمة قد السما اليوم
منى:باهي هاني نضت علابالي تصرعني على جد الخدمة....يلعن بو الخدمة معاك
لينا:نوض بلا صماطة...شكون من غيري يخدم وحدة فنيانة كيفك
منى ناضت دخلت للدوش و لينا خرجت من بيتها راحت للكوزينة تشم في ريحة القهوة البنينة
لينا:امممم على قهوتك يا خالتي نجية ما نفطن و نصحصح غير اذا شربتها
نجية مرا خمسينية العمر انسانة بشوشة تحب الضحك و الڨصرة هي الخديمة ولا بالاحرى مولات الدار لانو عمرهم لا حسسوها بلي خديمة معاملتهم ليها احسن من معاملة بعض لولاد لامهاتهم...ارملة و عندها 4 اولاد تخدم عليهم باش تأمنلهم واش ياكلو و باش تقريهم.
نجية:صباح الخير يا بنتي
لينا:صباح الخير خالتي نجية قولي واش هو السر في قهوتك مهما نشرب قهاوي بصح قهوتك ديما المخيرة
منى:اممم كلامك صحيح هيا خالتي نجية قولنا على سر قهوتك....تحكي معاها و تلعبلها بخدودها
نجية:اطلقني و اقعد تشرب قهوتك قبل ما تروح عليك لينا و تولي في مشكل
منى:هههههه عندك الحق مجنونة تروح و تخليني و تزيدلي تبهديلة فالخدمة