الأصابع الشريفة.. طارق اللبيب

الحــلقة الحادي عشر

خدر غير الصادق عندو اختين .. لبني وميمي ..لبنى عندها شرين سنة بالتقريب و ميمي زي 13 سنة اصلا اسمها مدينة مسميها حسيب على امو .. لكن بدلعوها بقولو ليها ميمي .. طبعا هسي الصادق اتزوج يمكن ليهو شهرين.. ولبنى مخطوبة لود خالتها .. وخدر شغال يعرس للناس.. وهو ما عندو نيه ..بقى يعاين للحريم كلهن بمنظار واحد .. كل مايفكر في واحدة .. يجيهو احساس انها ح تعمل فيهو نفس عملية هندوية .. 

طبعا المفروض ياجماعة صراحة .. انا لفول لي خدر .الزول ما يكون ضعيف امام المواقف .. والناس كلها ماواحد اكبر.. غلط يا خضر انو الزول يحكم على الناس بي حالة واحدة .. يعني ياخدر المفروض تكون عارف انو الدنيا بي خيرا .. وامة محمد لا ينقطع منها الخير .. والله في بنات عندهن وفاء اكتر من الرجال .. لكن خدر كان ضعيف .. واثر فيهو الموقف تاثير بعيد المدى..
عمك حسيب الحمد لله هسي دي قريب السبعة او8 شهور من طلع من المستشفى .. واثر الجلطة راح منو تماما .. وبقى مواظب على حبوب الضغط .. وماشي كويس .. حتي رجع السوق .. بس ما مريح خدر في بورتو دي .. كلو مرة بمسك خدر.. ويقول ليهو انت حدك وين ياخوي؟ .. زمان ماكنت مستعجل .. خدر بس يقول لسه ... وفعلا ماعندو اي تفكير في الامور دي ..
اها في هسي يوم المشكلة بتاعة الاسمنتي دي . عندو صاحبو اسمو علاء اتصل وسلم عليهو وسأله من اخبارو ..
.. وخدر كان في الوقت ده بالو مشغول بالموضوع القصة دي .... علاء سلم عليهو كيف.. يا خدر مالك يازول بتسلم علي بي طرف لسانك .. وكان متضايق من اتصالي ..
ياخي لو انا ازعجتك اسف شديد ..
خدر قال ليهو ابدا والله ياعلاء .. بس حاصلة علي مشكلة في الشغل .. انا بتصل عليك براي .. بس اكون رايق شوية ..انا ذاتي داير خبرك ..
خدر على طول اتصل على المهندي المستشار .. المهندس ده اصلا جايبو خدر .. وهو زول ثقة في فهم خضر .. لكن ماعارف الحصل شنو؟
قال ليهو ياباش مهندس يوسف.. عليك الله انا دايرك في الموقع رقم 28.. تجيني بكرة الصباح لازم.. الشغل متوقف عليك ..
قال ليهو في شنو ياخدر؟ ان شاء الله مافي عوجة؟ قال ليهو بس انت تعال ..
خدر كان مهموم هم شديد خلاص .. ورجع البيت غلبو النوم وناس البيت لاحظو عليهو الحكاية دي .. بس ابا يكلم زول بالكارثة .. ولسع ماتصل على علاء وشكلو نسى ..
والنوم طاير من عينو ..الزول امكن قريب الساعة 2 حتي شوية نعس ونام
وفي النوم شاف نفس الرؤيا الشافها قبل 8 شهور.. في المستشفى
حكاية الشباك والزول الرافع يدو واصابعيهو الاتنين .. وماعرف اي حاجة من الموضوع .. وما اشتغل بالموضوع ده كتير ..
قام الصباح بدري ركب مشى الموقع .. وانتظر المهندس يوسف بفارق الصبر .. ولغاية الان (ابراهيم) رجل الاعمال صاحب العمل ماعندو خبر بالمصيبة دي ..
قال ليهو ياباش مهندس والله انت واقع في ورطه خطيرة ..
يوسف قال ليهو انا؟ مالي في شنو؟
قال ليهو بتتذكر المبنى النحن واقفين تحتو ده؟
قال ليهو ايوة مالو؟ في مشكلة في حاجة ؟ خدر قال ليهو الاسمنتي بتاع القريدبيم ده ماعارفو مالو؟؟ ..
قال ليهو فعلا الاسمنتي كان فيهو وفيهو .. لكن مامشكلة القصة دي عادية ياخدر .. وانا اساسا" ماختيت بالي .. والشغل مشى وخلاص ..
يعني (ابراهيم ) ح يعرف من وين؟؟ .. بس والله كل المباني التانية مية في المية ..
قال ليهو ماحكاية ابراهيم يعرف ولا مايعرف .. نحن مكلفين نشتري المواد الاصليه .. والجيدة عشان المفهوم البقول (من اخذ الاجر حاسبه الله بالعمل) .. انا شخصيا لايمكن اسكت على حاجه زي دي.. لازم البيت يتهدم .. ويتأسس تأسيس صحيح .. ويكون آمن .. عشان بعدين مايقع ليهو فوق ناس ..
انت عارف البيت ده لو وقع ليهو فوق ناس.. ده بيعتبر قتل عمد .. لانو نحن عارفين خطورة الاسمنتي الفاسد .. المهم لازم ابلغ ابراهيم بالموضوع .. وانت ياخوي تشيل شيلتك .. والله الحكاية دي ماساهلة .. قال ليهو كدا ياخدر؟ انت عايز تغطس حجري .. والله انا لو بعت الوراي والقدامي.. ما اقدر اوفي الموضوع.. والموضوع ده بدخلني السجن وبخرب سمعتي .. ..
قال ليهو انا بقيف معاك .. ونتقاسم الخسارة انا وانت وابراهيم ..
قال ليهو ابراهيم الشايفاهو عيني ده.. والله مايتحمل لينا تعريفه .. بعدين انا ماعندي قروش قدر دي .. حتى لو اقسمناها .. لكن مامشكلة ياخدر.. انا بستحمل مسؤليتي .. حتى ولو المطالبات كان وراها سجن .. خدر ده وكت سمع كلام المهندس .. الهم زاد عليهو اضعاف وبقى في حتة حرجة ..
قال ليهو خلاص يا يوسف .. انت امشي وانا بتصل عليك .. لو احتجت ليك .. المهندس مشى مهموم.. وخدر قعد فوق صبه وخاتي يديهو فوق راسو .. زي الزول الكابة فوقو محنة.. يعني بصراحة هدم بيت يكلف مالايقل عن المليار .. حكاية كارثة كارثة ..
وح ترجع خدر لي نقطة الصفر.. وتعبو كلو ح يروح شمار في مرقة ..
جاب الورقة والقلم وبقى يحسب في الخسارات .. ويقول لا حول ولاقوة الا بالله .. حسبي الله ونعم الوكيل .. الله يسامحك يا يوسف ..
والخسارات طلعت شي فوق الحد المعقول ..
يعني عملية الهدم ذاتها مكلفة.. خلي مواد جديدة وعمالة جديدة ووو..
المهم اتصل على ابراهيم صاحب العمل.. وقال ليهو انا العصر جاييك في البيت لموضوع ضروري .
العصرية ركب مشى لابراهيم.. ابراهيم عندو بيت ماشاء الله تبارك الله ..
البيت حدادي مداي.. وحدايق وفلل وجنة في الارض بس..
لمن دق الجرس وجاهوالشغال .. وقال ليهو انت المقاول خدر؟؟
قال ليهو نعم .. قال ليهو قاليك ابراهيم ادخل لي في بيت الصيافة..
بيت الضيافة قسم قايم بي ذاتو .. من الفلل المجدعة في الحديقة دي ..
ومشوار بينو وبين بيت السكنى ..
مشى خدر دخل .. ويعاين للبيت وطريقة البنيان على النسق الهندي القديم .. والنجف الالماني ... والستاير السويسرية ..
والعفش من تركيا ووو ..
واخد قعدو فترة انتظارو طالت.. شال التلفون واتصل علي علاء .. المديهو مواعيد من امس .. واخد خبرو .. ومن ضمن الاخبار الاداهو ليها علاء.. انو نسرين اتزوجت ..
قبل اسبوعين .. والله خدر ده فرح فرح بزواج نسرين .. قال ليهو
اصلا البت كانت مخلوعة ساي .. لكن انا عارف قسمتها بتجيها ..
الواحدة فيهن كان ختت الامان في قلبها .. ورضت بالقسمة
قسمتها بتجيها بلا شفقة ..
خلص مكالمتو مع علاء .. وقعد منتظر ابراهيم يجيهو ..
انتظر لغاية ماجاهو ابراهيم لابس عراقي وسفنجة .. شكلو كان ماخد راحتو في بيتو .. .. حتي العصير الجابوهو لي خدر .. عصير مستورد ..
خدر لمن شاف وضع الزول ده ومقدرتو .. عرف انو الزول ده ممكن يتحمل الخسارة ..
المهم بدا الكلام مع ابراهيم .. وقال ليهو ياخي نحن حصل معانا غلط كبير.. المبنى رقم كدا حصل فيهو كيت كيت .. والخطأ حصل من المهندس.. وكانت خطأ غير متعمد .. وجلا من لا يسهى .. ايوة في اهمال بس ما ظنيتو كان متعمد ..
عشان كدا يا ابراهيم انا قلت نتقسم الخسارة دي بينا التلاتة ..
ابراهيم بقى يقول .. لاحول ولاقوة الا بالله.. وهاج وماج .. وبقى يقول ليهو .. انا ذنبي شنو في الموضوع ده؟ .. ليه يعني اتحمل معاكم حاجة انا دافع قروشها؟؟ ..
قال ليهو القدر وقع يا ابراهيم .. ونحن لازم نقوم بالواجب مع الراجل .. ابراهيم قال ليهو اسمعني ياخدر ..
اول حاجة قصة الاسمنتي الفاسد دي اصلا الزبون ما حيكشفها ..
البياض ماشاء الله مزبط والبيت واقف زي القصر .. انت بس اتكتم على الموضوع.. لغاية مانحن نبيع البيت .. ياخي البلد كلها شغالة بي اسمني ضارب .. خلاص جلي الموضوع .. وامشي اشتغل عادي ..
طبعا خدر اتفاجأ بالكلام ده ..من الراجل ونطط عيونو .. زي فناجين القهوة .. وقال ليهو مقعول؟؟ انت يا ابراهيم بتقول كدا؟ انا والله كنت متوقعك تقوم بالموضوع براك.. وتحمي ارواح الناس البعدين بسكنو في البيت .
قال ليهو ياخدر انت مفتكر انو بس خلاص الناس سكنو في البيت وطوالي ح يقع فيهم .. ياخي الجالوص بقعد بالسنين ..
قال ليهو حتى لو وقع بعد خمسين سنة .. نحن المسؤلين يا ابراهيم .. والناس البموتو نحن بنعتبر كلتناهم والله انت ماقادر تتصور الحكاية دي؟
قال ليهو طيب انا اديتك اقتراح.. انت ما رضيان اتصرف وانا بره .. انا علي استلم بيتي جاهز من مجامعيهو.. وما مستعد اخسر قرش عشان غلط زول تاني..
خدر قعد يحنس في الزول ياخي .. دي حاجة مابتاثر معاك انت.. لكن نحن ناس على قدر حالنا .. والمهندس يوسف حالتو اصعب .. يا ابراهيم الله يرضى عليك ..
يازول ابراهيم راسو والف سيف .. قال ليهو بس داير تخليهو على كدا سلمني.. وانا ماعندي مانع.. عايز تهدو وتعيد بناهو .. انا مابتحمل قرش ..
خدر قنع من الزول.. ورجع البيت مستاء استياء غريب .. ومستغرب في الدنيا البقت احوالا غريبة .. والناس ممكن تغش وماعندها مانع في سبيل الغش يموتو ناس ..
فيا من تقرا حروف اللبيب .. اتاكد تمام التأكد اذا انت بتغش في حاجة.. او تهمل.. والحاجة دي ممكن تكون سبب في موت الناس .. انت مسؤول امام الله .. وقد تكتب لك جريمة القتل شبه العمد ..
يعني مثلا الناس الببيعو لساتك العربات الضاربة.. ومدتها منتهية ..
او معدات الفرامل التقليد .. على اساس انها اصليه .. والحاجات دي تتسبب في حوادث مرور ويموتو فيها ناس ..
والناس البغشو في مواد البناء .. وغيرهم الناس البيعو خضروات مسرطنه .. او دجاج محقون بالكيمائيات او معلبات فاسدة .. وتكون سبب في امراض الناس وموتهم .. دي كلها بلقوها يوم القيامو في صحائفهم .. فليكونو مستعدين للمسأءلة امام الله .. حسبي الله ونعم الوكيل .
المهم ياجماعة الخير .. خدر الصباح جمع اقرب العمال ليهو.. وناسو القدام وحكى ليهم الحاصل .. واتشاور معاهم وقال ليهم انا اتوكلت على الله .. وعايز اهدم المبني ده وابنيهو بنيان صحيح .. واخلص من الشغل ده ونمشي ..تاني ماح نشتغل مع الزول ده نهائي ..
انا ان شاء الله ابيع الوراي والقدامي.. وابني المسكن ده بنيان آمن وصحيح .. واطلع من هنا بخفي حنين .. لكن اكون مرتاح الضمير.. .. والباقي على الله .. وانا ربنا كفيل علي ..
قالو ليهو جدا .. ونحن معاك ولاقرش لاتعريفة .. وبدو في الهدم طوالي من اول يوم .. اظن اكتر من 13 عامل شغالين كسر تقيل.. وجاب اللودر من جيبو .. وهدمو المبنى الكان جاهز من مجاميعو ..والبيت في يومين رقد كوم طوب ..
تاني يوم زي الساعة 4 كدا خدر جاهو تلفون من زوجة المهندس يوسف.. انو المهندس يوسف في المستشفى بي صدمة سكري ..
الى اللقاء ..