الأصابع الشريفة.. طارق اللبيب

الحــلقة الرابعة

خدر قال ليها .. اجي في بيتكم؟؟ لشنو؟؟ عشان زواج يعني؟ قالت ليهو امال عشان شنو؟ .. قال ليها اسف والله .. انتي معناها فهمتيني غلط .. انا مرتبط مع انسانه .. وباني عليها كل امالي .. ورغبتي في الزواج منها هي بالذات.. ولاغيرا .. ولو انتي خوتك معاي .. للموضوع ده .. ممكن تقطعيها من هسي .. مافي مشكلة بس انا لايمكن اخدعك بي حاجة.. هي اصلا مافي حساباتي ..
البت قعدت في الواطة.. في نص النجيلة .. ودموعها ديل يقعن اربعة اربعه. قالت ليهو انت انسان سخيف يا خدر .. وماعندك احساس ولاتقدير لاحاسيس الناس ..
يعني الكلام ده .. ماكان ممكن تقولو لي بطريقة احسن من كدا ؟
خدر شكلو مستغرب في تصرفات البت .. قال ليها والله انا اصلا ما متوقع منك تقولي لي كلام زي ده .. لاني في بداية الكلام قلت ليك انا بعتبرك صديقة واخت .. ومافكرت فيك غير كدا..
قالت ليهو انا بقول ليك .. مافي حاجة اسمها خوة وصداقة مع بت اجنبيه عنك .. كل اصحابنا المعانا ديل.. فاهمين انك عايزني امشي اسألهم ..
قال ليها والله ما اظن .. وحتى لو افتكرو كدا .. ده شي بخصهم هم.. انا وريتك حقيقة الموضوع ..
قالت ليهو المهم .. برضو شكرا ليك يا خدر.. كونو كشفت لي الحكاية .. عشان ما اعيش على امل كاذب .. يلا ارجعاكا انا خليتو الرصيد ..
خدر مشى معاها راجعين .. جاهو تلفون من هندوية .. قالت ليهو انت وين ياخدر؟ .. قال ليها انا في الحدايق .. قالت ليهو معاك منو ؟.. قال ليها معاي اصحابي .. قالت ليهو طيب.. انا عايزة اتكلم معاك .. قال ليها جدا .. بس برجع ليك بعد عشرة دقايق .. ونسرين تاني قعدت في الواطة تبكي ..
قفل التلفون.. وقال لي نسرين ..
يا نسرين عليك الله قومي .. وقشي دموعك دي .. وارح الناس ديل ما يقلقو .. يشوفوك بتبكي .. يفتكرو ام معالي ماتت .. ارح قومي ..
قامت على حيلها .. قالت ليهو الاتصل عليك ده منو؟.. قال ليها دي الزولة الحكيت ليك بيها قبل شوية دي ..
قالت ليهو انت عارف ياخدر العاجبني فيك شنو؟
انك مابتكذب نهائي.. ياخي انت اكتر زول مريح في الدنيا دي .. ياريت الناس لو كلهم زيك ..
احكي ليك قصة حصلت علي قبل سنتين .. قال ليها قومي احكي ونحن ماشين .. قامت تتبسم.. وباقي الدموع على جفونها ..
قالت ليهو .. واحدة صحبتي جابت لي واحد.. الله لايبارك فيهو .. ورشحتني ليهو.. وهو لاقاني معاها .. انت بتعرفها صحبتي دي بس مافي داعي اقول ليك هي منو ..
المهم ياخدر .. الولد ده كان جادي معاي شديد .. وونسات ولقاءات وبقول لي انتي اغلا حاجة في حياتي .. وانتي عمري.. وانا لو ما اتزوجتك بموت وكدا يعني .. ومكالمات لغاية الصباح ورسايل ..
المهم .. يوم ناس البيت اتكلمو معاي.. قلت ليهم ده انسان جادي وبينا اتفاق .. قالو لي لو جادي يجي البيت .. قلت ليهم جدا .. ومشيت كلمتو .. وهو دق صدرو.. وقال لي بجيكم بي اسرتي واعمامي وخيلاني يوم الخميس ..
وكل يوم بنتصل مع بعض .. ونأكد المواعيد .. والله نحن ظروفنا في الوقت داك كانت صعبة شديد .. عارف لملمنا كل العندنا عشان نكفي الضيوف.. لقيناها مافايتة اتنين مليون.. واتدينا عليها تاني اربعة .. ودعينا اعمامي وخيلاني وكل الاسرة.. وفي ناس من قرايبنا ماكانو قبلانين حكاية انا اتزوج واحد غريب ..
المهم يازول اول ماجات المواعيد .. وهم المفروض يجونا المغرب اتصلت عليهو .. يا قصي انت انت وين؟ .. قال لي قريب خلاص نحن ركبنا .. خلاص .. بس الحريم بتاعتنا ديل حركتهن تقيلة .. مسافة السكة ونحن معاكم ..
ونحن انتظرنا وكل الاسرة والقرايب منتظرين لغاية صلاة العشا.. ماجو ..!!!!
اتصلنا عليهو .. تلفون لقينا تلفوناتو الاتنين مقفلات .. وانا بقيت زي المجنونة ماعارفة اسوي شنو ؟
واهلنا ديل بقو يهرجو.. وشتموني لامن ارتاحو .. وشاكلو ابوي وقالو ليهو انت مدلع بتك.. وطالقها لليسوي والمايسوى ..
وقصي لغاية الصباح مافتح تلفونو .. انا اتصلت على الزولة صاحبتي الجابتو لي .. وحكيت ليها .. وانا ببكي لغاية ما الشمش شرقت.. دمعتي ماوقفت .. قالت لي والله ماعارفة الحاصل .. ومامعروف ظروفهم شنو .. لكن انا بسأل وبعرف .. قلت ليها ماتسألي ولاتعرفي ..
خلاص انا اتحطمت .. انا ادمرت ..
والناس الجو للدعوة.. ما اكلو ولالقمة من الحاجات الجاية بالدين دي.. وكبيناها في الوساخة .. وبقينا ماعارفين نسدد الاربعة مليون من وين ..
والله ياخدر.. انا حصلت لي حالة نفسية.. وبقيت لاباكل ولابشرب.. ولابنوم .. يمكن تلاتة شهور انا ماطبيعية ..بس الحمد لله بوقفة بابا معاي.. وتخفيفو علي .. اتجاوزتا المحنة الحمد لله ..
عشان كدا ياخدر انا دايما" بقول.. الكذب مافي اضرا منو.. والحقيقة مافي اجمل منها مهما كانت مرة .. وانا ان شاء الله خوتي معاك ماتنقطع لايوم الدين ..
وعليك الله ناس عمار ديل .. مايعرفو حاجة من الكلام القلناهو.. اتفقنا؟؟ قال ليها ان شاء الله ..
ومشو قعدو .. بعد شوية قال ليهم ياجماعة عن اذنكم عندي اتصال .. مشى بعيد .. واتصل على هند.. وسلم عليها وبسأل فيها .. من االامور والاحوال ..
حكت ليهو الحصل بالتفصيل ..
قال ليها والله كلو مافي هو مشكلة .. المشكلة في حتة واحدة بس ..
انتي كيف تقولي لي امك انو انا مقاول؟؟ بشتغل بالملايين؟؟ .. انتي عارفة انو انا اوسطى بشتغل بي ضراعي .. وده بختلف عن المقاول ..
قالت ليهو ياخي ماتكون زول نظرتك ضيقة .. وبتعاين تحت كرعيك .. انت برضو بسموك مقاول.. موش بتقاول صاحب العمل على الشغل؟
قال ليها ده اسمو تزوير معلومات ياهند .. انتي قولي الحقيقة عشان الامور تكون واضحة .. واي حاجة مبنية على الخداع والتزوير ما بتنفع .. ولابتتقدم ..
قالت ليهو بس كدا بالطريقة دي.. الموضوع بتاعنا ماح يتم.. انا متأكدة .. قال ليها والله انا غايتو دي حاجة مافي يدي .. كونو يتم ولا مايتم ده عند الله .. الفي يدي اني ما اقول كلام خلاف الحقيقة .وبعدين اتكشف قدام نسابتي زول كضاب.. وبتاع لف ودوران .. والكضب حبلو قصير .. قريب بتكشف ..
قالت ليهو اها كدا ح تطلعني انا كضابة .. قال ليها بس صححي المعلومة .. احسن من تستمري على الكضب ..
قالت ليهو كويس خلاص مافي مشكلة يا خدر .. بوريهم .. اها هسي انت رايك شنو؟.. انا وريتك الحصل .. ابوي قال تجي في لحظة .. وماطالب منك حاجة .. وامي داقة جرس وانا خايفة تبوظ لينا المواضيع ..
قال ليها والله كمان انا امي .. زولة ابرتها مابتشيل خيطين.. لو جاتكم وامك سمعتها كلام ماياهو ..بنزين وجدعو فوقو قشة كبريت مولعة .. وعينك ماتشوف الا النور ..
قالت ليهو اها وانت رايك شنو؟ الحل؟؟ .. وريني يا خدر ..
قال ليها اصبري شوية .. اديني فرصة .. خليني الم لي قريشات.. الله يخليك ..
قالت ليهو لكن ياخدر الزمن مافي صالحنا .. الزمن مافي صالحي انا
.. قال ليها يا هند .. قولي بسم الله.. انتي اتخرجتي ليك شهرين .. ولسع ياددوبك تميتي التلاتة وعشرين .. يعني شنو الشفقة دي .. البسمع كلامك ده يقول قربتي للاربعين ..
قالت ليهو انت قايل الاربعين بعيدة .. هسي بتكبس والسنين بقت تجري .. قال ليها ابوي عندو مثل قاعد يقولو طوالي .. بقول (العجله على الغنى فقر) ..
وبيت الشعر بقول .. قد يدرك المتأني بعض حاجته .. وقد يكون مع المستعجل الزلل.. كدي هسي انتي اصبري.. خليني اصل البيت واشاور الوالدة والوالد في الكلام ده .. واشوف الراي شنو ..
قالت ليهو اصلك ما اديتني كلام يطمن القلب.. بس شغال لي الصبر الصبر .. خلاص صبرت ..
اخد ليهو ضحكة صغيرة كدي.. وقال ليها خلاص تصبحي على خير .
طبعا خدر قاعد بعيد.. وبتكلم في التلفون مع هند .. ونسرين بس بالها معاهو .. واصلا ماختت بالها في الونسة .. وقهوتها بردت ولا شالت منها رشفه .. وطبعا ناس علاء بعاينو ليها.. وبعلقو وهي ماجايبة خبر.. بس بالها هناك .. لامن لفتوها .. علاء قال ليها شنو يانسرين؟؟ نحن قاعدين هنا .. انتي الزول ده .. مبارياهو بي عيونك كدي .. الحاصل شنو ؟
قالت ليهو والله انتو ماعارفين حاجة ساي .. قالو ليها وبعد ده كلو ماعارفين؟؟ .. نحن لازم بعد كدا نفكر في المناسبة.. لانو شايفين الجنون بدت تزيد .. قالت ليهو ياحليلي انا يايمة ..
الماعارفو يقول عدس ..
اها لمن جا خدر .. علاء طوالي نطا ليهو.. قال ليهو شنو يا فره .. ماتتحرك ياخي .. ننو ماخلاص بعد كدا .. فات فيها الفوات ؟
خدر قال ليهو في شنو ياعلاء؟؟ .. وبقى يعاين لي نسرين نظرة لوم..
يعني انتي شكلك حكيتي ليهم الكلام الدار بينا .. يعاين ليها بدون مايتكلم .. هي فهمت نظرة اللوم .. قالت ليهو ابدا يا خدر..
والله انا خشمي مافتحتو اهو ديل اسألهم ..
طبعا" ياجماعة .. حقيقة خدر اتضايق جدا .. لمن عرف طريقة تفكير نسرين تجاهو .. انها كانت بانيه امال في زواج .. وهو معتبرها صديقة واخت وكدا .. على حسب فهمو .. وبقى ماقادر يقعد مع الشلة ..
وكلام هندويه وترو زياده ..
قام قال ليهم ماتجيبو لي قهوة .. ماعندي فيها مزاج .. انا حاسي بي توتر وماشي البيت .. علاء قال ليهو مايكون كلامي اثر معاك.. نحن بنهظر يا اصلي ..
قال ليهو ابدا" والله انا بس حاسي اني متضايق.. وماشي البيت ..
نسرين قالت ليهو انا ذاتي ماشه .. وصلني معاك على المواصلات ..
قال ليها جدا قومي ارح ..
قالو ليها طيب اشربي قهوتك .. قالت ليهم لالا خلاص .. طبعا" نسرين بصراحة .. بعد الحقيقة القالها ليها خدر.. ازدات تعلقا" وحبا" ...
واصرت انها تستولى على قلبو باي طريقة.. لانو الانسان الصادق ده.. في مجتمع اليوم عملة نادرة نادرة جدا .. والبنات عارفات كدا ..
فعايزة تعمل اي حاجة .. عشان يكون من نصيبها .. وتابعو النشوفها ح تعمل شنو ..
بعد قامت معاهو .. وهم ماشين على المواصلات .. قالت ليهو .. قلت لي سعيدة الحظ دي اسمها منو؟
قال ليها اسمها هند .. من بحري حلة حمد .. قالت ليهو والله نفسي اتعرف عليها.. واكون صاحبتها .. عندك مانع صديقتك تكون صديقة خطيبتك؟
قال ليها ابدا" مافي مانع .. لكن هسي نحن ماقلنا مافي صداقة بين ولد وبت اجنبية .. وانا اقتنعت بالموضوع .. مالك رجعتي في كلامك؟؟ ..
قالت ليهو صراحة انت زول صداقتك مكسب.. وخسارتك اكبر خسارة .. المهم حتديني تلفون هند ولالا؟؟ .. قال ليها اكتبي معاك .. ملاها الرقم .. ودي شكلها دقسه من امها ياخدر.. و غلطه تمنها غالي ..
الى اللقاء ..