الأصابع الشريفة.. طارق اللبيب

الحــلقة الثالثة

هند قالت احتارت في كلام امها وقعدت تتكلم بي دواخلها .. قالت انا ماعندي حل غير اتكلم مع ابوي.. لكن ابوي ذاتو ما فاضي لي.. الم فيهو كيف ..انتظر ابوي ان شاء الله الليلة بس يجي بدري .. اتلفتت على امها قالت ليها انا ح اتكلم مع ابوي ..
امها قالت ليها ابوك الدخلو في امور الحريم شنو؟ .. وتتكلمي تقولي ليهوشنو وريني ..
قالت انا بعرف يا امي اقول ليهو شنو ..قالت ليها مخيرة يهو داك ابوك كلميهو .. قولي ليهو انا في زول داير يعرسني بالفاتحة .. ويسوقني بالمجان شوفيهو بوافق؟
اها الابو وقت جاء.. البت ارتبكت .. وماعرفت تكلم ابوها كيف وتقول ليهو شنو؟ ومافي زول من ناس البيت ممكن يساعدها.. اخوانها اتنين اكبر منها .. واحد اصغر .. وفي بتين صغار .. يعني حتى مافي اخت قريبة ليها في العمر .. عشان تقعد تنفس معاها ..
في النهاية قوت قلبها.. وجات لابوها في غرفتو.. لقتو قاعد لقتو عندو دفاتر قديمة بقلب فيها ..
قالت ليهو ابوي انا عايزة اتكلم معاك .. قال ليها مرحب ياهند .. اتفضلي .. قعدت في الكرسي كدا.. وابوها مازال مشغول بي دفاترو
وهي قاعدة منصرة ومتكرفسه وتفرك في يديها وشكلها متوترة شديد ..
وهو خاتي دفتر في السرير .. ودفتر شايلو في يدو.. وقلم وبعاين في الدفتر الفي السرير وبكتب .. شكلو بنقل ليهو في حاجة من هنا لي هنا ..
قالت ليها ياهند ما بتتكلمي مالك؟.. قالت ليهو شايفاك مشغول .. قال ليها انا سامعك بي اضني ..
قالت ليهو كويس يا ابوي .. انا في زول اتكلم معاي وعايز يجي البيت .. قال ليها خدر ولا منو؟.. امك حكت لي .. اها المشكلة وين؟ مرحب بيهو في اي لحظة .. قالت ليهو والله يا ابوي الزول ده زول ممتاز وانا عرفتو كويس .. المشكلة يا ابوي الزول ده اليومين دي ظروفو شوية كدا ما تمام ..
وهو بس جاي يتقدم .. ونتم الموضوع لي قدام .. ان شاء الله ..
قال ليها وهو وكت ظروفو ماتمام المستعجل ليها شنو؟.. قالت ليهو بس نحن عايزين الكلام يكون رسمي.. ويكون كلام رجال .. ابوها خت الدفتر .. وخت فوقو القلم وعاين ليها كدا وشكلو بقى مركز ..قال ليها والله يابتي كلامك صح .. طيب خلاص خليهو يجي في اي لحظه .. مرحب بيهو .. قالت ليهو المشكلة امي مطالبة بي حق قولة خير والحاجات الماليها داعي دي .. قال ليها قولة خير دي اصلا .. لامفروضة في دين ولافي اعراف .. وناس امك ديل ياهم الناس البزيدو الطين بله .. وماعارف الزول يعمل معاها شنو؟.. بس دايرة تنفذ الفي راسها لو غلط ولا صاح .. انا بقول ليك ما تشتغلي بيها .
لاقولة خير ولا غيرو .. خليهو يجي في اي لحظة حبابو .. وما طالبين منو قرش لاتعريفة .. الا الحقوق الاساسية المعروفة مهرك وشيلتك وغيرها ..
بس لي علمك انا ابوك .. والابو ماعليهو اي مصاريف في زواج بتو .. يعني زوجك هو البقوم بي كل شي .. لانو هو البياخد قروش الكشف .. نحن في زواج البت ماعندنا دفتر .. فهمتي ؟
قالت ليهو طبعا" طبعا يا ابوي .. اها هنا في اللحظة دي جات امها داخلة .. قالت ليهو البت اللذيذة قالت ليك شنو؟
قال ليها كلام بيني وبينها .. قالت ليهو اسمع ياسيف الزولة دي دايرة تجيب لينا زول مقطع.. وماعندو حق العشاء .. عشان يعرسها التقول بالله هي بايرة .. ولا فوقها عيبه .. يعني هسي يا سيف زول ماقدر يدفع قولة خير.. كيف يعني يفكر ليهو في بت ناس عشان يعرسها .. والله انا الم فيهو اكان اوريهو الكلام المابعرف ليهو ..
قال ليها ح يجي.. ويجيب اهلو.. وبدون قولة خير ولاغيرها ..
قالت ليهو اصلا قولة خير دي مصاريف الضيافة البنضيفهم بيها .. تدفعها ليهم انت ليه يعني ؟
قال ليها والله انا ذاتي نفسي مابتسمح لي اشيل قروش من ضيفي عشان اضيفو بيها .. ياناس ماتخافو من ربنا .. ده شنو العوارة دي ؟
طبعا" هند حست بانو ابوها واقف معاها.. واطمأنت جدا .. لكن ماعارفة انو وزارة الداخلية ممكن تطوع القصر الرئاسي .
في النهاية امها قالت ليهو انتو يعني بتعاندو فيني ولاشنوياسيف ؟ انتو عارفين انا ممكن اعمل شنو .. واطفش الزول ده من افكاركم .
سيف الدين ابو هند.. راجل حكيم ومتعلم.. لكن زيو زي 90 في المية من الرجال .. بخافو من المراة .. ومابقدرو يمشو رايهم عليها .. ودي الحاجة المخليه العادات والتقاليد المضرة مسيطرة علي الوضع .. بسبب جهل النساء وضعف الرجال .. وعجز الابناء والبنات .. اللهم لطفك ..
اها بعد الام طلعت زعلانة تهرج .. سيف الدين قبل على بتو قال ليها شفتي امك زعلانة .. واي موضوع زي ده يكون فيهو غضب الوالدين ربنا ماببارك فيهو .. خليها تعمل الفي راسها .. ويكون كل شي برضاها.. انتي مابتفهمي الامور اكتر منها .. قالت ليهو لكن يا ابوي ...... ...........
ماخلاها تمت كلامها قال ليها اسمعيني.. هم الناس ديل جاين يطلبو؟
قالت ليهو ايوة .. قال ليها خليهم يجو ويتوكلو على الله .. انا بديهم واليحصل يحصل .. بس اليحددو لينا المواعيد ..
قالت ليهو بس انا خايفة من امي تعمل لي مشكلة.. والله ماعندها مانع تذلهم وتطردهم ..
قال ليها طيب والحل؟ .. انا في يدي شنو اعملو ليك.. ؟ قولي لي وانا جاهز .. قالت ليهو والله يا ابوي انت ماقصرت .. مافي مشكلة الفيها خير ربنا يسويها .. خير يا ابوي انا ماشة اجهز العشاء ..
وطلعت وراسها جايط وماعارفة تعمل شنو .. دخلت تعمل في العشاء .. وجواها الاصوات تتزاحم والافكار .. طيب .. بس خدر لو لقا ليهو ستة مليون وجابهن سكت بيهن امي دي .. انا على الاقل بعيش مطمئنة اني .. بقيت على بر من الجهجهة دي .. والله العنوسة دي شبح واقف لي كدا قدر الفيل .. ومخوفني خوف شديد خلاص .. لكن انا اعمل شنو؟ ومخها يودي ويجيب .. والهم كايل راسها وما مركزة لي اخر دقيقة كانت عايزة تكب الملح في اللبن .. لكن انتبهت في اخر ثانية ..
طبعا اخونا خدر اشتغل اليوم داك لاقريب المغرب .. وهو راجع البيت .. في الشارع جاهو تلفون من واحدة اسمها نسرين .. قالت ليهو وين انت يافره .. منتظرينك بعد المغرب في الحدايق.. ولو ماجيت .. بتكون بايخة ومسيخة .. عليك الله عشان خاطري انا تجي ..
قال ليها عشان خاطرك اشرب البحر المالح .. جدا بس اصل البيت.. واستحم واغير هدومي.. وطوالي عليكم ..
نسرين دي واحدة من خمسة .. كلهن عندهم علاقة بي الود المصيبة الاسمو خدر ده .. بس الوحيدة الجادي معاها ومديها وعود اللهي هندويه.. كل مرة يعاين للتلفون منتظر تلفون منها .. وماداير يدق ليها هو .. المهم وصل البيت واول ما وصل لي امو .. قال ليها ابشري الليلة لقيت شغل كويس .. واحتمال يجيب لي قريشات .. قالت ليهو والفايدة شنو.. تاني شهر مابجيك شغل .. وبتقعد تصرف فيهن لامن يكملن والدايرة تدور .. قال ليها لالا المرة دي بسلمك ليهن على داير المليم ومابشيل منهن قرش ..
قالت ليهو نشوف . قال ليها انا طالع عندي اصحابي في الحدايق دقو لي تلفون ماشي ليهم ..
قالت ليهو ياخدر انت شغال من صباح الرحمن.. ياولدي ما تطرح ضهرك عشان تقوم على شغلك بدري .. قال ليها الحمد لله في عافية ياحجة .
لبس طلع مشى الحدايق .. ولقى اتنين من اصحابو ومعاهم نسرين ووسام .. وسام دي مثبتها علاء . ونسرين دي منتظراهو .. وعمار جاي بدون رفيقه ..
انا شخصيا ماعارف البنات ديل بطلعو من اهليهم بالليل كيف؟.. بي علم ابواتهم ولا لا؟ .. وين اولياء امورهم ؟ وين المسؤولين عنهم؟ .. وين اخوانهم .. كيف الراجل برقد مرتاح في البيت.. وبتو فتاة حايمة في الحدايق وشارع النيل .. مع ناس علاء وخدر وغيرو .. لانصاص الليالي ..
وين كلكم را وكلكم مسؤل عن رعيته ؟ ربنا يسترنا ويحفظ بناتنا واخواتنا من الزيغ والضلال .. ويقدرنا على تحمل المسؤولية ..
نرجع للقصة .. خدر طوالي سأل عمار قال ليهو اها يا اخونا معالي وينها ماجات ؟ قال ليهو والله امها عيانة ..
قال ليهو والله طلعتو ناس ماعندكم اي عشرة.. البت امها عيانة وانتو جاين تشربو قهوة؟ ....
خدر بتكلم ونسرين بتعاين ليهو في وشو .. هو ملاحظ ليها .. لكن ماشغال بيها .. بعد شوية قالت ياجماعة انا ماشة اجيب رصيد .. يلا معاي يا خدر .. قال ليها جدا لبس شبشبو وقام معاها ..
هم ماشين .. قالت ليهو ممكن اسالك سؤال يا خدر؟؟ ..انا شنو بالنسبة ليك؟ .. قال ليها انتي صديقه وفيه وفردة صاقعة وبت حربية ..
قالت ليهو يعني بتحبني ؟
قال ليها ايوة بحبك جدا والله .. لكن بحبك كصديقة .. عمري مافكرت فيك غير كدا .. قالت ليهو انا ماشايفة صداقة بين البت والولد .. يا اما علاقة حب هدفو زواج يا اما مافي علاقة .. لانو المجتمع بسميها علاقة مشبوهة ..
قال ليها انا عايز اقول ليك كلام ياننو .. الحب ده شي في القلب .. ومافي زول بقدر يتحكم فيهو .. والزواج ده قسمة برضو مافي يدنا .. يعني حكاية انك تربطي الحب بالزواج .. دي زي العايزة تتصرفي في حاجة انتي مابتملكيها .. يعني حتى لو حبيتي زول .. ماحتقولي اناقررت احب فلان .. لانو الحب بهجم على القلب بدون مفاهمة ولاقرار .. ثم ثانيا لو الحب اتهجم على قلبك وملكك .. مابتقدري تجزمي انك ح تتزوجي الزول الحبيتيهو.. لانو الزواج برضو قدر ومافي يدنا .. وفي كتير محبين ماتو من دون مايلقو حبايبهم .. لو الحب نتيجتو الحتمية الزواج ده ماكان الحال ..
قالت ليهو دقيقة ماتتفلسف لي ي خوي .. انا من زمان حاسة بانك بتحبني وماشاكه في الموضوع ده .. بس منتظراك تفتح خشمك تقول دايرني .. هسي يا خدر.. انت بتحبني ودايرني.. تجي بيتنا ..
عندك اي راي غير كدا ..ده اخر يوم نتلاقى فيهو ..وتاني وشي ده مابتشوفو .. عايزاك تقول لي رايك هسي ..
الى اللقاء ..