الأصابع الشريفة.. طارق اللبيب

الحــلقة العاشرة

ﻋﻤﻚ ﺣﺎﺝ ﺍﻟﺤﺴﻴﺐ ﺭﻗﺪ ﻓﻲ ﺍﻟﻌﻨﺎﻳﺔ ﺍﻟﻤﻜﺜﻔﺔ .. ﺭﺑﻨﺎ ﻳﺸﻔﻴﻬﻮ ﻭﻳﻌﺎﻓﻴﻬﻮ .. ﻭﺧﺪﺭ ﺍﺻﺮ ﻋﻠﻰ ﺍﻟﺼﺎﺩﻕ .. ﺍﻧﻮ ﻳﻤﺸﻲ
ﺍﻟﺴﻮﻕ ﻻﻧﻮ ﺷﻐﻠﻬﻢ ﻓﻲ ﻳﺪﻫﻢ ..
ﻣﻊ ﺍﻧﻮ ﻓﻲ ﺍﺗﻨﻴﻦ ﻣﻦ ﺍﻟﻌﻤﺎﻝ ﻓﻲ ﺍﻟﺠﺰﺍﺭﺓ .. ﺑﻔﺘﺤﻮ ﻣﻦ ﺻﻼﺓ ﺍﻟﺼﺒﺢ .. ﺑﺲ ﻻﺯﻡ ﺍﻟﺼﺎﺩﻕ ﻳﻤﺸﻲ ﻳﺘﺎﺑﻊ ﺍﻟﺸﻐﻞ ..
ﻭﺧﺪﺭ ﺷﻐﺎﻝ ﻣﻊ ﻋﻤﺎﻟﻮ ﺑﺎﻟﺘﻠﻔﻮﻥ .. ﻭﺑﻘﻰ ﻣﻼﺯﻡ ﺍﺑﻮﻫﻮ .. ﻳﻮﻣﻴﻦ ..
ﺗﺎﻧﻲ ﻳﻮﻡ ﺍﻟﻌﺼﺮﻳﺔ ﻛﺪﺍ ﺟﻮﻫﻮ ﺍﺻﺤﺎﺑﻮ .. ﻧﺎﺱ ﻋﻼﺀ ﻭﻋﻤﺎﺭ ﻭﻣﻌﺎﻟﻲ .. ﻭﺟﺎﺕ ﻣﻌﺎﻫﻢ ﻧﺴﺮﻳﻦ .. ﻋﺸﺎﻥ ﻳﺰﻭﺭﻭ ﺍﺑﻮﻫﻮ
ﻭﻳﻜﻔﺮﻭ ﻟﻴﻬﻮ ..
ﻭﻻﻣﻮﻫﻮ ﻟﻮﻡ ﺷﺪﻳﺪ .. ﺍﻧﻮ ﺍﻧﻘﻄﻊ ﻣﻨﻬﻢ .. ﻃﺒﻌﺎ " ﻧﺴﺮﻳﻦ ﺣﺎﻛﻴﺔ ﻟﻴﻬﻢ ﺍﻟﺤﺼﻞ ﻋﻠﻴﻬﻮ .. ﻭﺍﻟﺸﺎﻛﻮﺵ ﺍﻟﻔﻈﻴﻊ ﺍﻟﻐﻴﺮ
ﻟﻴﻬﻮ ﺣﻴﺎﺗﻮ ..
ﻭﻓﻌﻼ " ﻟﻘﻮ ﺧﺪﺭ ﻣﺘﻐﻴﺮ ﺷﺪﻳﺪ.. ﻭﺣﺎﻭﻟﻮ ﺑﻘﺪﺭ ﺍﻟﻤﺴﺘﻄﺎﻉ ﻳﺨﺸﻮ ﻓﻴﻬﻮ ..
ﻟﻘﻮﻫﻮ ﺍﻓﻜﺎﺭﻭ ﺫﺍﺗﻬﺎ ﺍﺗﻐﻴﺮﺕ .. ﻭﺑﻘﻰ ﻫﻤﻮ ﻛﻞ ﻓﻲ ﺍﻟﺸﻐﻞ ﻭﺍﻟﻘﺮﻭﺵ..
ﻭﻧﺴﺮﻳﻦ ﺗﻌﺎﻳﻦ ﻟﻴﻬﻮ ﻭﺗﺘﺒﺴﻢ .. ﻣﺎﻋﺎﺭﻑ ﺑﺘﺘﺒﺴﻢ ﻣﺎﻻ ؟ .. ﻣﺒﺴﻮﻃﺔ ﻣﻨﻮ .. ﻭﻻ ﺷﻤﺘﺎﻧﺔ ﻋﻠﻴﻬﻮ .. ﻭﻫﻮ ﺫﺍﺗﻮ ﺍﺳﺘﻐﺮﺏ
ﻓﻲ ﺣﺮﻛﺎﺕ ﻧﺴﺮﻳﻦ .. ﻧﺴﺮﻳﻦ ﻃﺒﻌﺎ ﻟﻴﻬﺎ ﻓﺘﺮﺓ ﻣﺎ ﻣﺘﻮﺍﺻﻠﺔ ﻣﻊ ﺧﺪﺭ .. ﻭﻣﻦ ﺯﻣﺎﻥ ﻗﻨﻌﺖ ﻣﻨﻪ ..
ﺑﺲ ﺩﺍﻳﺮﺓ ﻓﺮﺻﺔ ﻓﻴﻬﻮ ﺗﺘﻜﻠﻢ ﻣﻌﺎﻫﻮ . ﻣﺎﻣﻌﺮﻭﻑ ﺩﺍﻳﺮﺓ ﺗﻘﻮﻝ ﺷﻨﻮ؟
ﺍﻟﻤﻬﻢ ﻳﺎﺯﻭﻝ ﺧﺪﺭ ﺍﻛﺮﻡ ﺍﺻﺤﺎﺑﻮ .. ﻭﻗﺎﻟﻮ ﻣﺎﺷﻴﻦ .. ﺑﺲ ﻧﺴﺮﻳﻦ ﻗﺎﻟﺖ ﻟﻴﻬﻢ ﺍﻣﺸﻮ ﺍﻧﺎ ﻋﻨﺪﻱ ﻛﻼﻡ ﻣﻊ ﺧﺪﺭ ..
ﻓﺎﺗﻮ ﺧﻠﻮﻫﺎ ﻗﺎﻋﺪﺓ ﻣﻌﺎﻫﻮ ..
ﻗﺎﻟﺖ ﻟﻴﻬﻮ ﻭﺍﻟﻠﻪ ﻳﺎﺧﺪﺭ ﺣﺎﻟﺘﻚ ﻣﺎﻋﺎﺟﺒﺎﻧﻲ ﻧﻬﺎﺋﻲ .. ﺑﻘﻴﺖ ﺯﻭﻝ ﺑﺎﻫﺖ ﻭﺩﻣﻚ ﺑﺎﺭﺩ .. ﻭﻛﻼﻣﻚ ﺍﻟﻜﺘﻴﺮ ﺩﺍﻙ ﻛﻠﻮ ﺭﺍﺡ ..
ﺑﻘﻴﺖ ﺳﺎﻛﺖ ﻭﺑﺎﻟﻚ ﻣﺸﻐﻮﻝ ..
ﻗﺎﻝ ﻟﻴﻬﺎ ﻳﺎﻫﻮ ﺍﻟﺪﻧﻴﺎ ﺩﺍﻳﺮﺓ ﻛﺪﺍ ﻳﺎ ﻧﺴﺮﻳﻦ ..
ﻗﺎﻟﺖ ﻟﻴﻬﻮ ﺍﻧﺖ ﺧﻼﺹ ﻗﻨﻌﺖ ﻣﻦ ﺣﺎﺟﺔ ﺍﺳﻤﻬﺎ ﺯﻭﺍﺝ ﻭﻏﻴﺮﻭ ..
ﻗﺎﻝ ﻟﻴﻬﺎ ﺍﻧﺎ ؟؟ ﺍﻧﺎ ﻟﺴﻊ .. ﺑﺲ ﺍﻟﻴﻮﻣﻴﻦ ﺩﻳﻞ ﻗﺎﻋﺪﻳﻦ ﻧﺠﻬﺰ ﻟﻲ ﺍﻟﺼﺎﺩﻕ ﺍﺧﻮﻱ ﺡ ﻳﺘﺰﻭﺝ .. ﻟﻜﻦ ﺍﻟﺤﻤﺪ ﻟﻠﻪ ﺟﺎﻧﺎ
ﻋﻴﺎ ﺍﻟﻮﺍﻟﺪ .. ﻟﺨﺒﻂ ﺣﺴﺎﺑﺎﺗﻨﺎ ..
ﻗﺎﻟﺖ ﻟﻴﻬﻮ ﺍﻥ ﺷﺎﺀ ﺍﻟﻠﻪ ﻳﻘﻮﻡ ﺑﺎﻟﺴﻼﻣﺔ .. ﻭﻳﻔﺮﺡ ﺑﻴﻜﻢ ..
ﻣﺎﺳﺄﻟﺘﻨﻲ ﻣﻦ ﺍﺧﺒﺎﺭ ﻫﻨﺪﻭﻳﺔ ؟ .. ﻗﺎﻝ ﻟﻴﻬﺎ ﺑﺘﺒﺎﻟﻐﻲ ﻳﺎﻧﺴﺮﻳﻦ .. ﺍﺳﺄﻝ ﻣﻨﻬﺎ ﻟﺸﻨﻮ؟ .. ﺯﻭﻟﺔ ﻋﺮﺳﺖ ﻭﺑﻲ ﺭﺍﺟﻼ ..
ﻳﻌﻨﻲ ﺍﺳﺄﻝ ﺍﻗﻮﻝ ﺷﻨﻮ ﺗﺎﻧﻲ؟ ..
ﻗﺎﻟﺖ ﻟﻴﻬﻮ ﻭﺍﻟﻠﻪ ﻃﺒﻌﺎ .." ﺍﻧﺎ ﻣﻦ ﺯﻣﺎﻥ ﺩﺍﻳﺮﺓ ﺍﻛﻠﻤﻚ .. ﻟﻜﻦ ﺍﻧﺖ ﻣﺎﻋﺎﻳﺰ ﺗﺴﻤﻊ ﻛﻼﻡ ﻋﻨﻬﺎ .. ﻃﺒﻌﺎ ﻳﺎﺧﺪﺭ ﻫﻨﺪﻭﻳﺔ
ﻛﺎﻥ ﻋﺮﺳﻬﺎ ﺣﺪﺙ ﻓﻲ ﺍﻟﻤﻨﻄﻘﺔ ﻛﻠﻬﺎ .. ﻋﺮﺱ ﻋﻠﻰ ﺍﺭﻗﻰ ﺍﻟﻤﺴﺘﻮﻳﺎﺕ .. ﻭﺣﻘﻘﺖ ﻛﻞ ﺍﻣﻨﻴﺎﺗﻬﺎ ﻓﻲ ﺍﻟﻌﺮﺱ ﻣﺎﺷﺎﺀ
ﺍﻟﻠﻪ .. ﻭﺍﻟﻌﺮﺱ ﻛﺎﻥ ﻓﻲ ﺻﺎﻟﺔ .. ﻭﺣﺘﻰ ﻛﺎﻥ ﻓﻴﻬﻮ ﻛﺒﺎﺭ ﺭﺟﺎﻻﺕ ﺍﻟﺪﻭﻟﺔ ..
ﻭﻋﻠﻰ ﺍﻟﻌﻜﺲ ﺍﻟﺘﻤﺎﻡ ﻋﺮﺱ ﺧﺎﻟﺪﺓ .. ﻛﺎﻥ ﻋﺮﺱ ﻣﺘﻮﺍﺿﻊ .. ﻭﺑﺴﻴﻂ ﺷﺪﻳﺪ .. ﻻﻣﻦ ﺍﻟﻨﺎﺱ ﺑﺘﻜﻠﻤﻮ ﻓﻴﻬﻮ .. ﻭﻫﻨﺪﻭﻳﺔ
ﻭﺍﻫﻠﻬﺎ ﺍﺑﻮ ﻳﺠﻴﻮ ﻋﺮﺱ ﺧﺎﻟﺪﺓ .. ﻭﻫﻨﺪﻭﻳﺔ ﺑﻘﺖ ﺗﺨﺠﻞ ﺗﻘﻮﻝ ﺧﺎﻟﺪﺓ ﺻﺎﺣﺒﺘﻲ .. ﻭﻋﻤﻠﺘﻬﺎ ﻇﺎﻫﺮﻩ .. ﺣﺘﻰ ﺑﻘﺖ ﺗﻄﻠﻖ
ﻓﻲ ﻛﻼﻣﺎﺗﻬﺎ .. ﻭﻗﺎﻟﺖ ﻋﺮﻳﺲ ﺧﺎﻟﺪﺓ ﺍﻟﻤﻘﻄﻊ ﺍﻟﻤﺸﺮﻣﻞ .. ﻭﺧﺎﻟﺪﺓ ﺳﻤﻌﺖ ﺑﻴﻬﺎ .. ﻭﺯﻋﻠﺖ ﻻﻣﻦ ﺑﻜﺖ .. ﻟﻜﻦ ﺳﺒﺤﺎﻥ
ﺍﻟﻠﻪ ﻳﺎﺧﺪﺭ ﻫﻨﺪﻭﻳﺔ ﻫﺴﻲ ﺭﺑﻨﺎ ﺍﻧﺘﻘﻢ ﻣﻨﻬﺎ ﺣﻘﻚ ﻭﺣﻖ ﺧﺎﻟﺪﺓ ﺍﻟﻤﺴﻜﻴﻨﺔ .. ﻫﻨﺪﻭﻳﺔ ﻓﻲ ﻭﺭﻃﺔ ﻳﺎ ﺧﺪﺭ .. ﺍﻟﺰﻭﻟﺔ ﺩﻱ
ﻓﻲ ﻛﺮﺏ ﺷﺪﻳﺪ ﻳﺎ ﺧﺪﺭ ..
ﻗﺎﻝ ﻟﻴﻬﺎ ﻛﺮﺏ؟ﻛﺮﺏ ﺷﻨﻮ ﻣﺎﻻ ؟؟ ﻗﺎﻟﺖ ﻟﻴﻬﻮ ﺍﻟﻌﺮﻳﺲ ﺍﻟﻤﻐﺘﺮﺏ ﺯﻱ ﻣﺎ
ﻇﻨﻴﻨﺎ ﻓﻴﻬﻮ ﺍﻧﺎ ﻭﺧﺎﻟﺪﻩ .. ﻃﻠﻊ ﺯﻭﻝ ﻣﺰﻭﺭ .. ﻭﻃﻠﻘﺎﺗﻮ ﺩﻳﻚ ﻛﻠﻬﺎ ﻓﺸﻨﻚ ..
ﻗﺎﻟﻮ ﺍﻟﺰﻭﻝ ﺩﻩ ﻋﻨﺪﻭ ﺷﺮﻛﺔ ﺻﺮﺍﻓﺔ ﻓﻲ ﺍﻟﺨﺮﻃﻮﻡ .. ﺑﺘﺎﻋﺔ ﺗﻤﻮﻳﻞ ﻭﺗﻌﻤﻴﺮ .. ﻃﻠﻊ ﺍﻟﻜﻼﻡ ﺩﻩ ﻛﺬﺏ ..
ﻭﻃﻠﻌﺖ ﺍﻟﺸﺮﻛﺔ ﺣﻘﺖ ﻭﺍﺣﺪ ﺳﻌﻮﺩﻱ .. ﺑﺘﺎﻉ ﺷﺮﻛﺔ ﻣﻘﺎﻭﻻﺕ ﺍﺻﻼ ﺳﻌﻮﺩﻳﺔ .. ﻛﺎﻥ ﺷﻐﺎﻝ ﻓﻴﻬﺎ ﻣﻌﺘﺰ ﺩﻩ ﺫﺍﺗﻮ ..
ﻭﻋﻤﻠﺖ ﻓﺮﻉ ﻓﻲ ﺍﻟﺴﻮﺩﺍﻥ .. ﻭﻣﻌﺘﺰ ﻭﻛﻴﻠﻮ ﻓﻲ ﺍﻟﺴﻮﺩﺍﻥ .. ﻭﺍﻟﺸﺮﻛﺔ ﺷﻐﺎﻟﺔ ﺑﺎﻻﻗﺼﺎﺩ ﻭﻻﺷﻨﻮ ﻛﺪﺍ ﻣﺎﻋﺎﺭﻓﻪ .. ﻏﺎﻳﺘﻮ
ﻣﺎﻋﺎﺭﻓﺔ ﺷﻜﻞ ﺍﻟﺸﻐﻞ ﻛﻴﻒ .. ﺍﻟﻤﻬﻢ ﺑﺸﻴﻠﻮ ﻣﻨﻚ ﻗﺮﻭﺵ.. ﻭﻳﻘﻮﻟﻮ ﻟﻴﻚ ﺑﻨﺒﻨﻲ ﻟﻴﻚ ﺑﻴﺘﻚ .. ﻭﻧﻜﻤﻞ ﻟﻴﻚ ﻣﺸﺮﻭﻋﻚ ..
ﻟﻜﻦ ﻣﻌﺘﺰ ﺑﻘﻰ ﺑﺸﻴﻞ ﻗﺮﻭﺵ ﻣﻦ ﺍﻟﻨﺎﺱ .. ﻭﻻ ﺑﻨﻔﺬ ﻟﻴﻬﻢ ﻣﺸﺎﺭﻳﻊ ﻭﻻ ﺑﺮﺟﻊ ﻟﻴﻬﻢ ﻗﺮﻭﺷﻬﻢ .. ﻭﺑﻴﺎﻛﻞ ﻣﻦ ﺳﻨﺎﻡ
ﺍﻟﺸﺮﻛﺔ .. ﻭﺑﻨﻰ ﺑﻴﺖ ﻓﻲ ﺣﻲ ﺍﻟﻨﺼﺮ ﺑﺎﻻﻭﻧﻄﻪ ﻭﻗﺮﻭﺵ ﺍﻟﻨﺎﺱ ..
ﻓﻲ ﺍﻟﻨﻬﺎﻳﺔ ﺩﺧﻞ ﻓﻲ ﺩﻳﻮﻥ ﻭﺷﻴﻜﺎﺕ .. ﻭﺍﻟﺸﺮﻛﺔ ﻗﻔﻠﺖ .. ﻭﺍﻟﺒﻴﺖ ﺍﺗﻌﺮﺽ ﻓﻲ ﻣﺰﺍﺩ .. ﻭﺍﺗﺒﺎﻉ .. ﻭﺍﻟﺴﻌﻮﺩﻱ ﻓﻨﺸﻮ
ﻣﻦ ﺍﻟﺸﺮﻛﺔ .. ﻭﻣﻄﺎﻟﺒﻮ ﺑﻘﺮﻭﺷﻮ .. ﻭﻣﻌﺘﺰ ﻫﺴﻲ ﻫﺎﺭﺏ ﺑﺎﻟﺪﻭﻝ .. ﻣﻦ ﺩﻭﻟﺔ ﻟﻲ ﺩﻭﻟﺔ .. ﻭﺍﻷﻧﺘﺮﺑﻮﻝ ﻛﺎﻳﺴﻴﻦ ﻟﻴﻬﻮ ..
ﻻﻧﻬﺎ ﺍﻟﻘﺮﻭﺵ ﻣﺎﻫﻴﻨﺔ ..
ﻭﻫﻨﺪﻭﻳﺔ ﻗﺎﻋﺪﺓ ﻓﻲ ﺑﻴﺖ ﺍﻫﻠﻬﺎ ﻻ ﻣﻌﺮﺳﺔ ﻻﻣﻄﻠﻘﺔ .. ﻭﺗﻠﻌﻦ ﻓﻲ ﺧﺎﻟﺘﻬﺎ ﺳﻤﻴﺔ ﺍﻟﺼﺒﺎﺡ ﻭﺍﻟﻤﺴﺎﺀ .. ﻣﻊ ﺍﻧﻮ ﺧﺎﻟﺘﻬﺎ
ﺳﻤﻴﺔ ﺫﺍﺗﻬﺎ ﻣﺘﻔﺎﺟﺌﺔ ﺑﺎﻟﺤﺎﺻﻞ ..
ﺧﺪﺭ ﻗﺎﻝ ﻟﻴﻬﺎ ﻻﺣﻮﻝ ﻭﻻﻗﻮﺓ ﺍﻻ ﺑﺎﻟﻠﻪ .. ﻭﺍﻧﺘﻲ ﺍﻟﻜﻼﻡ ﺩﻩ ﺟﺒﺘﻴﻬﻮ ﻣﻦ ﻭﻳﻦ ﻳﺎﻧﺴﺮﻳﻦ ؟ ﻗﺎﻟﺖ ﻟﻴﻬﻮ ﺍﻧﺎ ﻃﻮﺍﻟﻲ ﻣﻊ
ﺧﺎﻟﺪﺓ .. ﻭﺍﻟﺤﻠﺔ ﻛﻠﻬﺎ ﻋﺎﺭﻓﺔ ﺍﻟﻜﻼﻡ ﺩﻩ.. ﻭﻛﻠﻮ ﻳﻮﻣﻴﻦ ﺗﻼﺗﺔ ﻧﺎﺱ ﺑﺠﻮ ﺑﻲ ﻋﺮﺑﻴﺔ ﻛﺎﻳﺴﻴﻦ ﻟﻴﻬﻮ ﻓﻲ ﺑﻴﺖ ﻧﺎﺱ
ﻫﻨﺪﻭﻳﺔ .. ﻣﻄﺎﻟﺒﻴﻦ ﺑﻘﺮﻭﺷﻬﻢ ..
ﻗﺎﻝ ﻟﻴﻬﺎ ﺭﺑﻨﺎ ﻳﺴﺘﺮ ﺍﻟﺤﺎﻝ .. ﺍﻧﺘﻲ ﻛﻴﻒ ﺣﺎﻟﻚ .. ﻗﺎﻟﺖ ﻟﻴﻬﻮ ﻣﺘﺨﻴﻼﻙ ﺗﻔﺮﺡ ﻟﻤﻦ ﺍﻗﻮﻝ ﻟﻴﻚ ﺍﻟﻜﻼﻡ ﺩﻩ ..
ﻗﺎﻝ ﻟﻴﻬﺎ ﺍﺑﺪﺍ ﻭﺍﻟﻠﻪ ﻣﺎﺑﻔﺮﺡ ﺍﻧﺎ ﻣﻦ ﺍﻭﻝ ﻳﻮﻡ ﺍﺗﻤﻨﻴﺖ ﻟﻴﻬﺎ ﺍﻟﺴﻌﺎﺩﺓ .. ﻭﻣﺴﺤﺘﻬﺎ ﻣﻦ ﻗﻠﺒﻲ .. ﻻﺑﻔﺮﺡ ﻟﻴﻬﺎ ﻭﻻ ﺑﺰﻋﻞ
ﺍﻟﻤﻮﺿﻮﻉ ﺑﻘﻰ ﻣﺎﻣﻬﻢ ﺑﺎﻟﻨﺴﺒﺔ ﻟﻲ .. ﺑﺲ ﺑﺘﻤﻨﻰ ﺭﺑﻨﺎ ﻳﺤﻞ ﻣﺸﺎﻛﻠﻬﻢ .. ﺍﻟﺤﺎﺟﺔ ﺍﻟﻜﻌﺒﺔ ﺍﻟﺰﻭﻝ ﻣﺎﺑﺘﻤﻨﺎﻫﺎ ﻟﻠﻨﺎﺱ ..
ﻭﺧﺎﻟﺪﺓ ﻛﻴﻒ ﻋﻠﻴﻚ ﺍﻟﻠﻪ ﺍﻟﺰﻭﻟﺔ ﺍﻟﺼﺎﺩﻗﺔ؟ .. ﻗﺎﻟﺖ ﻟﻴﻬﻮ ﻭﺍﻟﻠﻪ ﺧﺎﻟﺪﺓ ﻛﻮﻳﺴﺔ ﺷﺪﻳﺪ .. ﻭﻃﺒﻌﺎ ﺍﺑﻮﻫﺎ ﺍﺗﻮﻓﻰ ﻗﺒﻞ
ﺗﻼﺕ ﺷﻬﻮﺭ .. ﻭﻫﺴﻲ ﻗﺎﻋﺪﺓ ﻓﻲ ﺑﻴﺖ ﻧﺎﺱ ﺍﻣﻬﺎ ﻣﻌﺎﻫﺎ ﺯﻭﺟﻬﺎ .. ﺍﻟﺮﺍﺟﻞ ﻣﺴﻜﻴﻦ ﻣﺎﺳﻚ ﺧﺎﻟﺪﺓ ﻭﺍﻣﻬﺎ ﻋﻴﺎﻧﺔ ﺑﺮﺿﻮ
.. ﻭﺍﻟﺒﻴﺖ ﻃﺒﻌﺎ ﺑﻴﺖ ﺍﻳﺠﺎﺭ .. ﻭﺧﺎﻟﺪﺓ ﻫﺴﻲ ﺣﺎﻣﻞ ﻓﻲ ﺍﻟﺸﻬﺮ ﺍﻟﺘﺎﺳﻊ .. ﻭﺍﻟﺤﻤﺪ ﻟﻠﻪ ﻇﺮﻭﻓﻬﻢ ﺯﻱ ﺍﻟﺰﻓﺖ .. ﻟﻜﻦ
ﻣﺮﺗﺎﺣﺔ ﻭﺳﻌﻴﺪﺓ .. ﻭﺑﺎﺭﺓ ﺍﻣﻬﺎ ﺑﺮ ﻋﺠﻴﺐ .. ﺍﺭﻳﺘﻨﻲ ﺑﻲ ﺣﺎﻟﻬﺎ ..
ﻗﺎﻝ ﻟﻴﻬﺎ ﻭﺍﻧﺘﻲ ﻭﺿﻌﻚ ﺷﻨﻮ ﻓﻲ ﺍﻟﻘﺼﺔ ﺩﻱ؟؟ .. ﻗﺎﻟﺖ ﻟﻴﻬﻮ ﺍﻧﺎ ﺍﻟﺤﻤﺪ ﻟﻠﻪ . ﻋﻮﺍﺭﺽ ﻋﺠﻴﺒﺔ .. ﻭﻛﻞ ﻣﺎﻳﺠﻴﻨﻲ
ﺯﻭﻝ ﻭﺧﻼﺹ ﻳﺘﻜﻠﻢ ﻣﻌﺎﻱ ﻋﻼﻗﺘﻨﺎ ﺑﺘﺪﻭﻡ ﺗﻼﺗﺔ ﺍﺳﺎﺑﻴﻊ ﻭﻻ ﺷﻬﺮ ﻭﺗﺎﻧﻲ ﻳﻄﻔﺶ ﻣﺎ ﺍﻟﻘﺎﻫﻮ ﻻ ﺳﻤﺎ ﻻ ﺍﺭﺽ ﻳﻤﻜﻦ
ﺩﻱ ﺍﻟﺤﺎﻟﺔ ﺍﻟﺴﺎﺑﻌﺔ ..
ﻗﺎﻝ ﻟﻴﻬﺎ ﺍﻧﺘﻲ ﻋﺎﺭﻓﺔ ﻟﻴﻪ؟
ﻻﻧﻚ ﺑﺘﻄﻠﻌﻲ ﻣﻌﺎﻫﻮ ﻭﺑﺘﻼﻗﻴﻬﻮ .. ﻭﺑﺘﺘﺼﻠﻲ ﻋﻠﻴﻬﻮ .. ﻭﺑﺘﺮﺳﻠﻲ ﻟﻴﻬﻮ ﺭﺳﺎﻳﻞ .. ﺑﺘﻔﻜﻲ ﺍﺧﺮﻙ ﻣﻦ ﺍﻭﻝ ﺍﻳﺎﻡ
ﻭﺗﻨﺪﺍﺣﻲ ..
ﻛﺪﻱ ﺍﻥ ﺑﺪﻳﻚ ﻭﺻﻴﻪ .. ﻏﻴﺮﻱ ﻃﺮﻳﻘﺔ ﻟﺒﺴﻚ ﺩﻱ .. ﻭﻃﺮﻳﻘﺘﻚ ﻛﻼﻣﻚ ﻭﺧﻠﻲ ﺍﻟﺤﻮﺍﻣﺔ ﺍﻟﻜﺘﻴﺮﺓ .. ﻭﺧﻠﻴﻚ ﺯﻭﻟﺔ ﺗﻘﻴﻠﺔ
ﻭﺯﻳﻨﺔ .. ﻭﺍﻟﺰﻭﻝ ﺍﻟﺒﺘﻘﺪﻡ ﻟﻴﻚ .. ﻗﻮﻝ ﻟﻲ ﻟﻴﻬﻮ ﻻﺯﻡ ﺍﻟﻜﻼﻡ ﻣﺎﻳﻜﻮﻥ ﺑﻴﻨﻲ ﻭﺑﻴﻨﻚ .. ﺍﻟﻜﻼﻡ ﻳﻜﻮﻥ ﺭﺳﻤﻲ ﻭﻛﻼﻡ
ﺭﺟﺎﻝ .. ﺍﺻﻼ ﺑﻌﺪ ﺟﻠﺴﺔ ﺍﻟﺘﻌﺎﺭﻑ ﺍﻟﻤﻔﺮﻭﺽ ﺗﺎﻧﻲ ﻣﺎﻳﻜﻮﻥ ﻓﻲ ﻟﻘﺎﺀﺍﺕ ﻭﻃﻠﻌﺔ ..
ﻗﺎﻟﺖ ﻟﻴﻬﻮ ﺍﻧﺖ ﺗﺮﺍﻙ ﺍﻟﺰﻣﻦ ﻛﻠﻮ ﻗﺎﻋﺪ ﺗﻄﻠﻊ ﻣﻊ ﻫﻨﺪﻭﻳﺔ ..
ﻗﺎﻝ ﻟﻴﻬﺎ ﺩﻩ ﻛﺎﻥ ﺯﻣﺎﻥ .. ﻟﻜﻦ ﻫﺴﻲ ﺍﻧﺎ ﺗﺎﻧﻲ ﻣﺎﻓﺎﺿﻲ ﻟﻲ ﺟﻨﺲ ﺩﻩ ..
ﺍﻧﺘﻲ ﺍﺳﻤﻌﻲ ﻭﺻﻴﺘﻲ ﺩﻱ .. ﻭﻧﻔﺬﻳﻬﺎ ﻭﺑﺮﺍﻙ ﺑﺘﺸﻮﻓﻲ .. ﺍﻟﻤﻬﻢ ﻳﺎﺯﻭﻝ ﻏﺎﻳﺘﻮ ﻭﺩﻋﺘﻮ ﻭﻓﺎﺗﺖ .. ﻭﺍﻟﻤﻮﺿﻮﻉ ﺑﺘﺎﻉ
ﻫﻨﺪﻭﻳﺔ ﺍﺛﺮ ﺟﻮﺍﻫﻮ ﺑﺲ ﻛﺎﻥ ﺍﺛﺮ ﺑﺴﻴﻂ ..
ﻭﺍﻻﻳﺎﻡ ﻣﺮﺕ ﻋﻠﻰ ﺧﺪﺭ ﻓﻲ ﺍﻟﻤﺴﺘﺸﻔﻰ ﺍﻳﺎﻡ ﺗﻘﻴﻠﺔ .. ﻭﻛﻠﻬﺎ ﻫﻤﻮﻡ .. ﻳﻮﻡ ﺑﺎﻟﻠﻴﻞ ﻓﻲ ﺍﻟﻨﻮﻡ ﺭﺍﻗﺪ ﻓﻲ ﺍﻟﻤﺴﺘﺸﻔﻰ
ﺷﺎﻑ ﺭﺅﻳﺎ ﻏﺮﻳﺒﺔ . ﺷﺎﻑ ﺍﻧﻮ ﻗﺎﻋﺪ ﻓﻲ ﻏﺮﻓﺔ ﻣﻀﻠﻤﺔ .. ﺑﺲ ﻓﻴﻬﺎ ﺷﺒﺎﻙ ﻭﺍﺣﺪ .. ﺟﺎﻱ ﻣﻨﻪ ﺿﻮﺀ ﺍﺑﻴﺾ .. ﻓﺠﺄﺓ ﻓﻲ
ﻳﺪ ﺑﺘﺎﻋﺔ ﺯﻭﻝ ﻇﻬﺮﺕ ﻓﻲ ﺍﻟﺸﺒﺎﻙ .. ﻭﺭﺍﻓﻊ ﺍﺻﺎﺑﻌﻴﻬﻮ ﺍﻻﺗﻨﻴﻦ .. ﻳﻌﻨﻲ ﻛﺎﻧﻮ ﻓﻲ ﺯﻭﻝ ﺧﺎﺭﺝ ﺍﻟﻐﺮﻓﺔ ﻣﺪﺍ ﻟﻴﻬﻮ ﻳﺪﻭ
ﻭﺍﺷﺮ ﻟﻴﻬﻮ ﺑﻲ ﺍﺻﺎﺑﻴﻌﻴﻮ ﺍﻻﺗﻨﻴﻦ .. ﺑﻘﻮﻟﻴﻬﻮ .. ‏(ﻣﻊ ﺑﻌﺾ .. ﻣﻊ ﺑﻌﺾ ‏) .. ﺑﺲ ﻣﺎﻋﺎﺭﻑ ﺩﻩ ﻣﻨﻮ؟ ﻭﻗﺎﺻﺪ ﺷﻨﻮ؟ ..
ﺍﻫﺎ ﺍﻟﺼﺒﺎﺡ ﻃﻮﺍﻟﻲ . ﺍﻟﺪﻛﺘﻮﺭ ﻗﺎﻝ ﻟﻴﻬﻮ ﺍﻟﺒﺸﺎﺭﺓ ﻳﺎ ﺍﺳﺘﺎﺫ ﺍﺑﻮﻙ ﺍﺳﺘﻌﺎﺩ ﻭﻋﻴﻬﻮ .. ﺍﻟﺤﻤﺪ ﻟﻠﻪ ﺍﺛﺮ ﺍﻟﺠﻠﻄﺔ ﺍﻧﺘﻬﻰ
ﺗﻤﺎﻣﺎ .. ﺑﺲ ﻟﺴﻊ ﻋﻨﺪﻧﺎ .. ﺗﺤﻔﻈﺎﺕ ﻋﻠﻰ ﺍﻟﺮﺟﻞ ﺍﻟﻴﻤﻴﻦ ﻭﺍﻟﻴﺪ ﺍﻟﻴﻤﻴﻦ .. ﺍﺩﻋﻲ ﻟﻴﻬﻮ ..
ﺍﻥ ﺷﺎﺀ ﺍﻟﻠﻪ ﻳﻘﻮﻡ ﺑﺎﻟﺴﻼﻣﺔ .. ﺧﺪﺭ ﻓﺮﺡ ﻓﺮﺡ ﺷﺪﻳﺪ ﻭﺍﺗﺎﻛﺪ ﺍﻧﻮ ﺍﻟﺮﺅﻳﺎ ﺍﻟﺸﺎﻓﻬﺎ ﺑﺎﻟﻠﻴﻞ .. ﻟﻴﻬﺎ ﻋﻼﻗﺔ ﺑﻲ ﺷﻔﺎﺀ
ﺍﻟﻮﺍﻟﺪ .. ﻭﺧﻼﺹ ﻧﺴﺎﻫﺎ ﻋﻠﻰ ﻛﺪﺍ .. ﺍﺗﺼﻞ ﻋﻠﻰ ﻧﺎﺱ ﺍﻟﺒﻴﺖ ﻳﺠﻮ ﻓﻲ ﺍﻟﻤﺴﺘﺸﻔﻰ .. ﻭﻋﻠﻰ ﺍﻟﺼﺎﺩﻕ ﻗﺎﻝ ﻟﻴﻬﻮ ﻗﺒﻞ
ﻣﺎﺗﻤﺸﻲ ﺍﻟﺸﻐﻞ .. ﺗﻌﺎﻝ ﻏﺎﺷﻴﻨﻲ ﺑﻲ ﺟﺎﻱ .. ﺩﺍﻳﺮ ﻳﻮﺭﻳﻬﻮ ﺍﻟﺒﺸﺎﺭﺓ ﺑﻲ ﺍﻟﻌﺎﻓﻴﺔ ﺍﻟﻠﻘﺎﻫﺎ ﺍﺑﻮﻫﻮ ..
ﺍﺻﻼ ﺍﻟﺼﺎﺩﻕ ﻣﻦ ﺍﻟﻌﺼﺮﻳﺔ ﺑﺠﻲ ﺍﻟﻤﺴﺘﺸﻔﻰ .. ﻭﺑﺎﻟﻠﻴﻞ ﺑﻤﺸﻲ ﻳﺒﻴﺖ ﻓﻲ ﺍﻟﺒﻴﺖ .. ﺍﻫﺎ ﻧﺎﺱ ﺍﻟﺒﻴﺖ ﺟﻮ ﺍﻟﻤﺴﺘﺸﻔﻰ
ﻭﻣﻌﺎﻫﻢ ﺍﻟﺼﺎﺩﻕ .. ﻭﻟﻘﻮ ﺍﺑﻮﻫﻢ ﺍﻟﺤﻤﺪ ﻟﻠﻪ ﺍﺳﺘﻌﺎﺩ ﻭﻋﻴﻮ ﺗﻤﺎﻡ .. ﻭﺍﺳﺘﺒﺸﺮﻭ ﺧﻴﺮ ..
ﺑﺲ ﺍﻟﻤﺸﻜﻠﺔ ﺍﻧﻮ ﻓﻲ ﺗﻘﻞ ﻓﻲ ﺍﻟﺸﻖ ﺍﻻﻳﻤﻦ .. ﺍﻟﺮﺟﻞ ﻭﺍﻟﻴﺪ .. ﻟﻜﻦ ﺍﻟﻮﺵ ﺗﻤﺎﻡ ﻭﺍﻟﻠﺴﺎﻥ ﺗﻤﺎﻡ ..
ﺧﺪﺭ ﺣﻜﻰ ﻟﻲ ﺍﻣﻮ ﻭﺍﺑﻮﻫﻮ ﺍﻟﺮﺅﻳﺎ ﺍﻟﺸﺎﻓﻬﺎ ﻓﻲ ﺍﻟﻤﻨﺎﻡ .. ﻭﺑﻌﺪﻳﻬﺎ ﻃﻮﺍﻟﻲ ﺍﺻﺒﺢ ﻟﻘﻰ ﺍﻟﺒﺸﺎﺭﺓ .. ﺑﺲ ﻣﺎﻋﺮﻓﻮ ﺩﻻﻟﺔ
ﺍﻟﺮﺅﻳﺎ ﺩﻱ ﻓﻲ ﺍﻟﺸﻔﺎ ﺷﻨﻮ؟
ﺍﻟﻤﻬﻢ ﺑﻲ ﺍﺧﺘﺼﺎﺭ ﻳﺎﺟﻤﺎﻋﺔ.. ﻛﻞ ﻳﻮﻡ ﺍﺑﻮﺧﻀﺮ ﻣﺎﺵ ﻓﻲ ﺗﺤﺴﻦ .. ﻟﻐﺎﻳﺔ ﻣﺎ ﺟﺎ ﻳﻮﻡ ﺗﺨﺮﻳﺠﻮ ﻣﻦ ﺍﻟﻤﺴﺘﺸﻔﻰ ..
ﻭﻳﻤﺸﻲ ﺍﻟﺒﻴﺖ ﻳﻮﺍﺻﻞ ﺩﻟﻚ ﻭﺗﻤﺎﺭﻳﻦ .. ﻻﻧﻮ ﺭﺟﻠﻮ ﻓﻴﻬﺎ ﺗﻘﻞ ﺑﺲ ﺍﻟﺤﻤﺪ ﻟﻠﻪ ﻳﺪﻭ ﻛﻮﻳﺴﺔ .. ﺷﺪﻳﺪ ..
ﻋﻤﻚ ﺣﺴﻴﺐ ﺍﺻﻼ ﻛﺎﻥ ﻋﻨﺪﻭ ﺍﺭﺗﻔﺎﻉ ﻓﻲ ﺍﻟﻀﻐﻂ .. ﻭﻫﻮ ﻣﺎﻋﺎﺭﻑ .. ﻭﺩﻩ ﻃﺒﻌﺎ ﻳﺎﺟﻤﺎﻋﺔ ﻣﻦ ﻋﻴﻮﺑﻨﺎ ﻧﺤﻦ
ﻛﺴﻮﺩﺍﻧﻴﻴﻦ .. ﺑﻨﻬﻤﻞ ﺣﻜﺎﻳﺔ ﺍﻟﻔﺤﺺ ﺍﻟﺪﻭﺭﻱ ..
ﺧﺼﻮﺻﺎ ﻟﻜﺒﺎﺭ ﺍﻟﺴﻦ .. ﺍﻟﻤﻔﺮﻭﺽ ﻛﻞ ﺑﻌﺪ ﻓﺘﺮﺓ ﺷﻬﺮﻳﻦ ﺗﻼﺗﺔ ﺗﻮﺩﻱ ﺍﻟﻮﺍﻟﺪ ﻭﺍﻟﻮﺍﻟﺪﺓ .. ﻻﺟﺮﺍﺀ ﻓﺤﻮﺻﺎﺕ ﻭﺗﺤﺎﻟﻴﻞ ..
ﺷﺎﻣﻠﺔ ﻟﻠﺘﺎﻛﺪ ﻣﻦ ﺍﻟﺴﻼﻣﺔ .. ﺣﺘﻲ ﻟﻮ ﺑﻘﻰ ﻓﻲ ﺍﻱ ﻋﻠﺔ ﺍﻻﻧﺴﺎﻥ ﻳﺘﻮﻗﻰ ﻣﻦ ﺟﻠﻄﺎﺕ ﺍﻟﻀﻐﻂ .. ﻭﺻﺪﻣﺎﺕ ﺍﻟﺴﻜﺮﻱ
ﻭﺗﻄﻮﺭ ﺍﻟﻤﺮﺽ .. ﻭﺍﻟﻨﺎﺱ ﺗﻘﺪﺭ ﺗﺘﻼﻓﻰ ﺍﻱ ﻋﻠﺔ ﻓﻲ ﻣﺮﺍﺣﻠﻬﺎ ﺍﻻﻭﻟﻰ ..
ﺍﻭﻝ ﻳﻮﻡ ﺧﻀﺮ ﻳﻨﺰﻝ ﺍﻟﺸﻐﻞ ... ﺟﺎﻫﻮ ﺍﺗﺼﺎﻝ ﻣﻦ ﺭﺟﻞ ﺍﻋﻤﺎﻝ ﻣﻌﺮﻭﻑ
ﻗﺎﻝ ﻟﻴﻬﻮ ﺍﻧﺎ ﺟﺎﻳﻴﻚ ﻣﻦ ﻃﺮﻑ ﻋﺎﺩﻝ ﺣﺴﻴﻦ .. ﻭﻗﺎﻝ ﻟﻲ ﺍﻧﺖ ﺍﺻﺪﻕ ﻣﺨﻠﻮﻕ ﻓﻲ ﺍﻟﺴﻮﺩﺍﻥ .. ﻭﺍﻟﻠﻪ ﻣﻦ ﺣﻜﺎﻳﺎﺗﻮ
ﻋﻨﻚ ﺍﻧﺎ ﺍﺗﻤﻨﻴﺖ ﺍﻻﻗﻴﻚ ..
ﺍﻧﺎ ﻳﺎ ﺑﺎﺵ ﻣﻬﻨﺪﺱ ﺍﻟﻨﺎﺱ ﺍﻛﻠﻮﻧﻲ ﺍﻛﻞ .. ﻭﺍﻟﻤﺠﺘﻤﻊ ﺍﻟﺴﻮﺩﺍﻧﻲ ﺑﻘﻰ ﻛﻠﻮ ﺍﻛﺎﺫﻳﺐ ﻭﺣﺮﺍﻣﻴﺔ .. ﻣﻦ ﺍﻛﺒﺮ ﺩﻗﻦ ﻻﺧﺮ
ﺣﺮﺍﻣﻲ ..
ﻭﺍﻥ ﺷﺎﺀ ﺍﻟﻠﻪ ﺍﻧﺖ ﺗﻜﻮﻥ ﺯﻱ ﻣﺎﺣﻜﻰ ﻟﻲ ﻋﺎﺩﻝ ..
ﺍﻧﺎ ﻋﻨﺪﻱ ﺧﻄﺔ ﺍﺳﻜﺎﻧﻴﺔ .. ﻭﻗﻌﺖ ﻟﻲ ﻓﻲ ﻋﻄﺎﺀ .. ﻓﻲ ﺍﻟﺤﺘﺔ ﺍﻟﻔﻼﻧﻴﺔ ﻭﻋﺎﻳﺰ ﺍﺑﻨﻲ ﻓﻴﻬﺎ ﻣﻴﺔ ﻭﺧﻤﺴﻴﻦ ﻣﺴﻜﻦ .. ﻭﺍﻧﺎ
ﺷﻔﺖ ﺷﻐﻠﻜﻢ ﺍﻧﺘﻮ .. ﻫﻞ ﻣﻤﻜﻦ ﺗﻘﻮﻡ ﻟﻲ ﺑﺎﻟﻌﻤﻞ ﺩﻩ .. ﺧﺪﺭ ﻗﺎﻝ ﻟﻴﻬﻮ ﺟﺪﺍ ﺑﺲ ﺑﺸﺘﻐﻞ ﻟﻴﻚ ﺧﻤﺴﺔ ﻭﺳﺒﻌﻴﻦ
ﻣﺴﻜﻦ .. ﺑﻲ ﻣﺼﺮﻭﻑ ﺍﻟﻌﻤﺎﻟﺔ ﻭ ﺍﻟﻤﻮﺍﺩ .. ﻣﻨﻚ .. ﻣﻘﺎﻭﻟﺔ ﻳﻌﻨﻲ .. ﻭﺑﻌﺪﻳﻦ ﻟﻮ ﺍﻟﺸﻐﻞ ﻋﺠﺒﻚ ﻭﺛﻘﺘﻚ ﻓﻴﻨﺎ ﺍﺗﻮﻓﺮﺕ ..
ﺑﻘﻴﺔ ﺍﻟﻤﺴﺎﻛﻦ ﺗﻮﻋﺪﻧﻲ ﺍﺷﺘﻐﻼ ﻣﻌﺎﻙ ﺑﻲ ﻧﺴﺒﺔ ﺍﻻﺭﺑﺎﺡ ..
ﺍﻧﺖ ﻣﻨﻚ ﺍﻷﺭﺽ ﻭﺍﻧﺎ ﻋﻠﻲ ﺍﻻﻧﺸﺎﺀ .. ﺑﻲ ﻣﺠﺎﻣﻴﻌﻮ . ﻭﺍﻟﺮﺑﺢ ﻣﻨﺎﺻﻔﺔ ﺍﻧﺖ ﻻﺗﺨﺴﺮ ﻗﺮﺵ ﻻﻧﻌﺮﻳﻔﺔ .. ﺍﻫﺎ ﺭﺍﻳﻚ
ﺷﻨﻮ؟؟
ﺍﻟﺮﺍﺟﻞ ﻭﺍﻓﻖ .. ﻭﻗﺎﻝ ﻟﻴﻬﻮ .. ﺍﻧﺎ ﻣﻮﺍﻓﻖ ﻣﺒﺪﺋﻴﺎ " ﻭﻳﺘﻢ ﺍﻻﺗﻔﺎﻕ ﺑﻌﺪ ﻧﻬﺎﻳﺔ ﺍﻟﺸﻮﻁ ﺍﻻﻭﻝ ﻣﻦ ﺍﻟﻤﺸﺮﻭﻉ ..
ﺍﻟﻤﻬﻢ ﻋﺸﺎﻥ ﻣﺎﻧﻔﺼﻞ ﻓﻲ ﺍﻟﺤﺘﺔ ﺩﻱ ﻛﺘﻴﺮ ﺧﺪﺭ ﻟﻌﺐ ﺍﻟﻤﻮﺿﻮﻉ ﺑﻲ ﻋﻘﻠﻴﺔ ﺍﻗﺼﺎﺩﻳﺔ ﺟﺒﺎﺭﺓ ﻭﺭﺑﻨﺎ ﻭﻓﻘﻮ .. ﻭﻣﺸﺖ
ﻣﻌﺎﻫﻮ ﻣﻴﺔ ﺍﻟﻤﻴﺔ ..
ﻭﻓﻲ 8 ﺷﻬﻮﺭ ﻛﺎﻧﺖ ﺍﻟﺨﻤﺴﺔ ﻭﺳﺒﻌﻴﻦ ﺑﻴﺖ ﺟﺎﻫﺰﺓ .. ﺧﺪﺭ ﻣﺸﻐﻞ ﻣﻌﺎﻫﻮ ﻗﺮﻳﺐ ﺍﻝ 28 ﻋﺎﻣﻞ .. ﺷﻐﺎﻟﻴﻦ ﻓﻲ ﺍﻛﺘﺮ
ﻣﻦ 7 ﻣﻮﺍﻗﻊ ﻓﻲ ﺍﻟﻮﻗﺖ ﺍﻟﻮﺍﺣﺪ .. ﻭﺧﺪﺭ ﻻﻓﻲ ﻓﻮﻕ ﺍﻟﺸﻐﻞ ﺯﻱ ﺍﻟﻨﺤﻠﺔ ..
ﻓﻲ ﻳﻮﻡ ﻣﻦ ﺍﻻﻳﺎﻡ ﺍﻟﻌﻤﺎﻝ ﺻﺒﻮ ﻟﻴﻬﻢ ﻗﺮﻳﺪﺑﻴﻢ ﺑﻲ ﺍﺳﻤﻨﺘﻲ ﻓﺎﺳﺪ .. ﻭﻛﺎﻥ ﺍﻟﻐﻠﻂ ﻣﻦ ﺍﻟﻤﻬﻨﺪﺱ ﺍﻟﻤﺸﺮﻑ
ﺍﻟﻤﺸﻌﻠﻮ ﺧﺪﺭ .. ﻭ ﻓﻲ ﻭﺍﺣﺪ ﻣﻦ ﺍﻟﻌﻤﺎﻝ ﻛﺸﻒ ﺍﻟﻘﺼﺔ ﻟﻲ ﺧﺪﺭ .. ﺑﻌﺪ ﺍﻟﻤﺒﻨﻰ ﺍﻭﺷﻚ ﻋﻠﻰ ﺍﻟﻨﻬﺎﻳﺔ .. ﻭﻗﺎﻝ ﻟﻴﻬﻮ
ﺍﻟﺤﻜﺎﻳﺔ ﺩﻱ ﻗﺎﻟﻮ ﻳﺘﻜﺘﻤﻮ ﻋﻠﻴﻬﺎ .. ﻻﻧﻮ ﻣﺎﻓﻲ ﻃﺮﻳﻘﺔ ﺍﻻ ﻧﻬﺪﻡ ﺍﻟﻤﺒﻨﻰ ﻛﺎﻣﻞ .. ﻭﺩﻱ ﺧﺴﺎﺭﺓ ﻛﺒﻴﺮﺓ .. ﻭﻟﻮ ﻫﺪﻣﻨﺎﻫﻮ
ﺡ ﻳﺘﺤﻤﻼ ﺍﻟﻤﻬﻨﺪﺱ ﻳﻮﺳﻒ .. ﻭﻣﻤﻜﻦ ﻳﺪﺧﻞ ﺍﻟﺴﺠﻦ .. ﺧﺪﺭ ﻗﺎﻝ ﻟﻴﻬﻮ ﻃﻴﺐ ﺍﻧﺖ ﻟﻴﻪ ﻣﺎﻛﻠﻤﺘﻨﻲ ﻣﻦ ﺑﺪﺭﻱ؟ .. ﻣﻦ
ﻳﻮﻡ ﺑﺪﻭ ﺍﻟﺼﺐ ..
ﻭﺧﺪﺭ ﻓﻌﻼ " ﺩﺧﻞ ﻓﻲ ﻣﺸﻜﻠﺔ ﻛﺒﻴﺮﺓ .. ﻻﻳﻤﻜﻦ ﻳﺘﺤﻤﻞ ﺍﻟﺨﺴﺎﺭﺓ .. ﻭﻻﻳﻤﻜﻦ ﻳﻐﺶ ﻓﻲ ﺍﻟﺸﻐﻞ .. ﻭﻻﻳﻤﻜﻦ ﻳﻜﻮﻥ
ﺳﺒﺐ ﻓﻲ ﺿﺮﺭ ﺍﻟﻤﻬﻨﺪﺱ ﻭﺩﺧﻮﻟﻮ ﺍﻟﺴﺠﻦ .. ﻭﺑﻘﻰ ﻣﺤﺘﺎﺭ ..
ﺍﻟﻰ ﺍﻟﻠﻘﺎﺀ