Surrender

Chapter 34

Hinigit ko siya para magsimula na kaming maglakad.

"May problema ba tayo?" Halata sa boses niya ang kuryosidad pero halata din sa kanyang mukha ang saya. "Bakit madalas mong sabihin kung gaano mo ako kamahal? Hindi mo alam kung gaano ako napasasaya kapag sinasabi mo 'yan."

Tila piniga ang dibdib ko dahil sa sinabi niya.

"Wala tayong problema." Umiling ako. "I just wanna enjoy the remaining hours. Bukas ng umaga ay babalik na tayo sa atin diba?"

Tumango siya at ang kamay naming magkasalikop ay idinikit niya sa kanyang labi. Napalunok ako at pinigil ang panginginig ng labi.

Tangina Phoenix, napakahina ko pagdating sayo!

Hindi na kami nag-imikan habang naglalakad. Mainit ang araw pero hindi ko alintana ang paglalakad namin marating lang ang sinabi ni Phoenix na kakainan namin. Panaka-naka ang pagtingin ko sa aming mga kamay na tila iisa.

Napakaswerte ng babaeng susunod na makakahawak sa kamay mo Phoenix. Alam kong hindi ka mahihirapan na maghanap ng babae dahil kahit saan ka pumunta ay mga babae pa mismo ang nagbibigay sa'yo ng ikalawang sulyap.

Nang makita ang nakahilerang mga restaurant ay pinutol ko na ang pagtitig sa aming mga kamay. Pumasok kami sa Zylka's.

"Malapit lang dito ang Regale. Kung gusto mo ay pumunta tayo doon mamaya pagkatapos nating kumain." Hinila niya ako paupo sa table na medyo tago. Kumunot ang kanyang noo nang pasadahan niya ulit ako ng tingin. Hindi kami magkatapat, magkalapit kami kaya malaya niya akong nainspeksyon. "Good thing you're not wearing net cover up. Nahiya rin naman pala si Tamiya at ipinili ka niya ng cover up na hindi masyadong malaswa ano?"

"Hindi ko 'to napansin kahapon. May binili pala siyang gan'to."

Tinanguan niya ako. "Where's the waiter?" Bulong niya. Halatang gutom na.

Napag-usapan kasi namin kanina habang naliligo na huwag na muna kaming magpalit dahil hindi pala siya nag-umagahan. Nawalan daw siya ng gana nung umalis ako kanina sa cottage.

"Bakit kasi hindi ka nag-umagahan? Mukha ka na tuloy mangangain ng tao." Biro ko.

"Oo binibini, kaninang-kanina pa kita gustong kainin." Aniya at ngumisi.

Hinampas ko siya sa braso at saktong dumating na iyong lalaking waiter. Nginitian ako nito at tumikhim naman si Phoenix dahilan para maibalik ko ang tingin sa kanya. Hindi pa rin nawawala ang ngisi niya pero kita ko ang saglit na paglarawan ng inis sa kanyang mga mata.

Ibinigay ng waiter ang menu sa kanya. Hindi na siya nag-aksaya pa ng oras na pumili ng oorderin. Tipid akong napangiti habang pinapanood siya at nang isa sa mga inorder niya ang paborito ko.

Nang matapos sa pag-order ay umalis na ang waiter at saka niya ako nilingon. Itinuon niya ang baba sa aking balikat at halos maduling ako sa lapit ng aming mukha sa isa't-isa.

"Ang ganda-ganda mo talaga..."

Kahit na ramdam ko na may mga nakuha kaming atensyon pagpasok pa lang dito ay hindi ko siya pinigilan sa ginagawa. Wala naman akong dahilan para ikahiya siya. Nakakailang ang tingin sa amin ng ibang mga tao ngunit wala na akong pakialam. I just wanted to feel the bliss of having him beside me.

"Bola!" Iniwas ko ang tingin at umiling-iling.

Hinawakan niya ang baba ko. Napasinghap ako nang bigla niya akong iharap sa kanya at inangkin ang aking labi.

Marahan ang kanyang paghalik dahilan ng pagngiti ko. I heard murmurs of other people but that didn't stop me to kiss him back. Dinala ko ang isang kamay sa kanyang pisngi at hinalikan siya ng buong puso habang hinahaplos ang gwapo niyang mukha.