خواطر

أختي لما وصديقتي الروعة تزوجت وحلمها الأبيض تحقق

قال أبوي ..
كِبرت بنتي وأجوها عرسان !

بس انا ما شبعت منها ، بعد اول عريس تقدملها ، ومجرد التفكير بالفكرة خلاني اضعف ، زرتها بغرفتها بالليل ، مسحت ع شعراتها وعيّطت ، بنتي الغالية كبرت ، وانا بعدني بشوفها صغيرة .
" البنت صارت كبيرة ، ولازم تشوف حياتها " خواتي وأمها حاولوا يضغطوا علي بعد ما حاولت اخليها عندي اكثر وقت واتحجج بتعليمها ، قرّرت انو افتحلها المجال .
وافقت بنتي ، وكبرت بنتي ، وخطبت الشب الي طول عمرها بتتمناه

قَلت لصهري ع باب المَحكمة : " حُط بنتي بعيونك ، هاي مدلِّلة اصبر عليها ، هاي حسّاسة لاطفها ، هاي روحي من جوّا دير بالك عليها

(( مسك أبوي كتف زوجي وحكالو يومها : هاي من عشرين سنه ما حدا حكالها ( لا ) دللها لبنتي " ))

ويوم حفلة بنتي ! قلت لازم أفرح من قلبي وأحضنها وأباركلها .. وأول ما فتح باب الصالة ، شفتها أميرة واقفه وراسها مرفوع ومزين بتاج بيلمع لمع ( حسيتها وردة بنص بستان ) وردة أنا زرعتها وربيتها ! وبلشت أمشي خطوة خطوة ونزلو دموعي غصب عني يابا .. نزلو .. ونزلو .. وما وقفو غير لما حضنتيني

شفت الفرح بعيون بنتي بعد ما صار حلالها ، ولما تكون معو بتكون فراشة طايرة عن الأرض ! خطبت بنتي وصارت تشكي وجعها لشاب ثاني ، صار هو ان زعّلها تسوّد الدنيا بوجهها !
بطّلت اضحّك بنتي بكلمتين ، صارت تستشيره اله بكل أمور حياتها ، صارت تسهر معه بالليالي ومعادتش تحضر الأفلام معي ولا تركض ع حضني وتحكيلي يابا اشتريلي ، يابا أحملني ، يابا لاعبني

حب الأب أناني يابا ( بس يالي بواسيني ياحبيبة أبوكي ) إنك أخدتي رجال ابن رجال ! بيحملك ع كفوف الراحة وبيلف فيكي ! برتاح بس أشوف خوفو عليكي وحرصو وإهتمامو فيكي ، وبحمد الله مليون مرة ( وبقول بصلاة الفجر ) سبحانك أعطيتها حدا يحبها مثلي واكثر

كبرت بنتي صغيرة أبوها
_______
ليست من تأليفي وإنما أحببتها وكانت على الوجع ..
____________
بمناسبة زواج رفيقة عمري وحياتي وروحي وأختي ....لما.... التي تزوجت من حبيبها بعد سبع سنوات حب وأكثر ....وعشت قصتهم بكاملها..واليوم كان زفافها وعن جد كثير تأثرت وبكيت كثير..ودموعي فرح لزواجها وحزن على فراقها
الله يهنيها....
حبيبة قلبي لما
تحقق حلمك الأبيض وكنت أحلى عروسة ... وبحبك أنا يا أختي...