S O U D A

CHAPTER - 1

....Main apne parivaar ke saath Goa ke ek shaant aur khoobsurat ilaaqe mein rehta hoon . Mere Papa aur Trisha Didi navy ke postings aur duties ke silsile mein aksar baahar rehte hain . Isiliye.. hum tino ghar par rehte hain . Mummy . Yash Aur Main!
yahan se Samandar thodi doori par hai . Din ke waqt kuch pata nahi chalta . Lekin raat ki shaanti mein Samandar ki thandi hawaayein aur door se aati lehron ki tez aawaz hamare ghar tak aa jaati thi .

Hamara ghar do manjila hai . Neeche ki manzil par ek bada sa living room, dining area, Mummy ka kitchen aur ek chhota sa study room hai, Par saare kamre upar ki manzil pe bane hue hain, jahan se aane wali thandi hawa seedhi balcony ke raste kamron mein aati hai . Mera kamra upar ki manzil ke aakhri kone mein hai . Waise bhi - Is do manjila ghar ki har ek seedhi . har ek deewar aur har ek mod . Dimaag mein bilkul saaf chapa hua hai . Papa aur Didi ki kami zaroor mehsoos hoti hai par Mummy ki dekhbhal aur Yash ki shararat aur bachkani harkaton ke beech yeh ghar hamesha zinda lagta hai .

Mere ghar mein neeche se upar jaane ke liye theek atharah seedhiyan hain . jinhe ginte hue jaana . meri to aadat ban chuki hai Upar jaate hee pehla kamra Papa aur Mummy ka master bedroom hai . Ekdum shaant aur room se phoolon ki khusboo aati hai . Uske theek bagal mein Trisha Didi ka room hai Jahan se unke boots aur clean wardrobe ki ek ajeeb si disciplined khushboo aati hai . Hallway ke doosre chhor par Yash ka kamra hai . Jahan se jyadatar uske gaming console ke fan ki sansanahat aur thode bikhre hue samaan ka ehsaas hota hai . Sabse aakhri kona mera hai . Jidhar mere audio gadgets aur digital braille setup ke alawa koi faltu cheez nahi rakhi jati taaki mujhe chalne mein asani ho .

Upar ek ghumavdar lohe ki seedhi seedha chhat ki taraf jaati hai, Chhat par kadam rakhte hee samandar ki tazi thandi hawa chehre se aakar takrati hai aur wahan pe Mummy ke lagaye hue tulsi aur gende ke paudon ki meethi mehak faili rehti hai . aur railing ke paas khade hokar door se aati lehron ka shor bilkul saaf sunai deta hai . Jab main neeche gate se bahar nikal ta hoon toh.. paanv ke neeche pattharon se bani driveway mehsoos hoti hai .

Ek taraf chhota sa garden hai . jahan se geeli mitti aur ghaas ki khushboo aati hai aur lohe ka bada phatak paar karte hee dhalan wali road shuru ho jaati hai, jiske dono taraf ghar hain aur shaayad unche- unche ped bhi hain . lekin mujhe zyadatar wahan se guzarti cars aur bikes ki aawaz hee sunai deti hain . Humara ghar City se bas kuch hee doori par tha isiliye.. Lekin itna door bhi nahi tha . Paas main police station tha aur hospital bhi . kyunki main Ghar par baithe-baithe roz unke aane- jaane ki aawazein suna karta tha ..

Lekin... yeh baahar ka shor ya shehar ki chamak mere liye kabhi mayne nahi rakh payi . kyunki Mere liye yeh poori duniya sirf wahi tak simti thi . jahan tak mere haathon ka sparsh aur kaano ki sun-ne ki shakti jaa sakti thi ..

Agar mein apne baare main bataun toh..
uske liye aapko mujhe thoda aur peeche le jaana padega us kambakht din ki taraf, jis din meri aankhon se roshni ka har ek tukda hamesha-hamesha ke liye mujhse chhin gaya tha . Us waqt main sirf teesri kaksha ( 3rd standard ) mein padhai kar raha tha tab meri duniya aam bachhon ki tarah hee rang-birangi thi mujhe Aasman ka neela rang, pedon ki hari pattiyan aur doston ke chehron par aane wali Pyaari muskurahat Sab kuch dhundhladhundhla hee sahi par mehsoos hota tha .

Woh din mujhe aaj bhi yaad hai . ek Aam dopahar thi school ki chhutti ke baad jab main aur mera chhota bhai Yash ghar ki taraf laut rahe the ( Us waqt yash bahut chhota tha ) hum dono ek dusre ka haath pakde hue the . Raste mein ek tej raftar truck ne achanak apna santulan kho diya tha, Sab kuch itni jaldi-jaldi hua ki kisi ko sambhalne ka mauka tak nahi mila . Yash ko kuch nahi hua . Waqt rehte hue maine usko dhakel diya tha shaayad, mujhe sahi se itna kuch yaad nahi hain!