ဦး

💌 12 💌

ထယ်ယောင်းစားချင်သမျှ မှာကျွေးပြီး စားနေတဲ့တစ်လျှောက်လုံးလည်း တစ်နေရာမှမလစ်လပ်သွားရအောင် သေချာဂရုစိုက်ပေးသည်။

" ယွန်းဂီဟျောင်းလို့ပဲ ခေါ်မယ်နော် ကျွန်တော့်ထက်ကြီးတယ်ဆိုတော့ "

" သဘောဗျာ...ကိုယ်က အခေါ်အဝေါ်တွေကို သိပ်ဂရုစိုက်တဲ့ထဲမပါဘူး "

သို့နှင့် တစ်ညနေအတွင်းမှာပင် ထယ်ယောင်းရည်းစားရသွားတော့သည်။ သားဖြစ်သူရော မောင်လေးဖြစ်သူရောကပါ တစ်ယောက်ကမှ မိန်းကလေးလက်တွဲဖော်မရွေးခဲ့ခြင်းအတွက် မမကိုတော့ နည်းနည်းအားနာမိသည်။

ညနေစာစားပြီးနောက် ယွန်းဂီဟျောင်းက သူ့ကိုအိမ်ပြန်လိုက်ပို့သည်။ အိမ်ရှေ့ရောက်တော့ ကျေးဇူးရှင်လေးကလည်း သူ့လူနဲ့အတူ အိမ်ပြန်လာတာနှင့်ဆုံသည်။ သူတို့မရောက်ခင်လေးတင်ပဲ ဂျီမင်းက အိမ်ထဲဝင်သွားပြီး သူ့ဦးကလည်း ကားမောင်းထွက်သွားသည်။ နေပါစေလေ။ အိမ်ထဲရောက်မှ ဆယ့်ခြောက်ချက်လောက် ခေါက်ပစ်ဦးမည်။

" ပြောပါဦး အကျိုးအကြောင်းမပြောဘဲ ငါ့ကိုထားခဲ့ရတဲ့အကြောင်းလေး "

အခန်းထဲရောက်လို့ ထိုင်ကာရှိသေးသည်။ ဦးငယ်က တံခါးပင်မခေါက်ဘဲ ဝင်လာကာ မေးလာတော့၏။

" လန့်လိုက်တာ ဦးငယ်! သူများအခန်းကိုဝင်မယ်ဆို တံခါးခေါက်ရမယ်လေ "

" မခေါက်တော့ ဘာဖြစ်..မေးတာကိုပဲ ဖြေ "

" လိုက်တယ်လေ... ယွန်းဂီဟျောင်းနဲ့ ဦးငယ်က လိုက်တယ်ထင်လို့..."

" မင်းကြီးတော်ကြီးကို လိုက်တယ်ထင် "

" ဦးငယ်ကလည်း... ကျွန်တော်က ကိုယ့်ဦးလေးကို တွေ့ကရာလူဆီ ထိုးထည့်ပေးပါ့မလားဗျာ ယွန်းဂီဟျောင်းကို ကျွန်တော်သေချာလေ့လာပြီးပါပြီဗျ "

" ကြီးကြီးကျယ်ကျယ် မင်းကဦးလေးလား ငါကဦးလေးလား ရိုက်လိုက်ဦးမယ် "

ဦးငယ် သူကိုယ်တိုင်လည်း သဘောကျပြီး အခြေအနေမဆိုးခဲ့ပုံပေါ်ပါသည်။ ဒါကို အမောခံပြီး လူကိုလာပြီး ဆူနေသေးသည်။ ယောက်ျားလေးကြိုက်ပါတယ်လို့ come out မလုပ်ထားပေမယ့် ဦးငယ်က သူကြိုက်ရင် Gender ရွေးနေမည်မဟုတ်သည်ကိုသိတာကြောင့် ဂျီမင်း စီစဉ်ပေးမိခြင်းဖြစ်သည်။ ယွန်းဂီဟျောင်းကလည်း ကြိုက်တယ်ပြောလာတာကြောင့်က ချိတ်ပေးမိတဲ့ အဓိကအချက်ပင်။