High Education Private School
ဒီနေ့မှာ ဆယ်တန်း ကျောင်းသားဖြစ်သည့် မြင့်မိုရ်၏ ပထမဆုံးသော ကျောင်းတက်ရမည့် နေ့ဖြစ်၏။ကျောင်းပြောင်းလာသည့် ကျောင်းသားဖြစ်သော မြင့်မိုရ်ကို ကျောင်းနှင့်အသားကျစေရန် ဖခင်ဖြစ်သူ ဦးလွင်မင်းက နံနက် ခုနှစ်နာရီကျော်ကတည်းက ကျောင်းလိုက်ပို့၏။
ကားပေါ်တွင် ကျောပိုးအိတ်ကို ပေါင်ပေါ်တင်ကာ မြင့်မိုရ်က အိတ်ထဲရှိ စာရေးကိရိယာဘူးထဲမှ ပစ္စည်းတွေ စုံ၊မစုံ စစ်နေလိုက်၏။
" ကျောင်းရောက်တော့မယ်။ "
" ဟုတ်ကဲ့အဖေ "
မြင့်မိုရ်က ကျောပိုးအိတ်ကို နောက်ကျောဘက်တွင်ပြန်လွယ်လိုက်ပြီး အဆင်သင့်ပြင်ထားလိုက်၏။ကျောင်းအသစ်မို့ အနည်းငယ်တော့ စိတ်မသက်သာစွာ ခံစားနေရသည်။
" အဖေ အထဲထိ လိုက်ပို့ပေးရမလား။ "
" နေ ... နေပါစေ ... သား သွားတတ်ပါတယ်။ "
" သူငယ်ချင်းတွေနဲ့ ကျောင်းကို ပတ်ကြည့်ပေါ့။ ဒီလိုပဲ နောက်တော့ အသားကျသွားလိမ့်မယ်။ "
" ဟုတ် "
ကျောင်းရှေ့ ရောက်နေပြီမို့ ဦးလွင်မင်းက ကားရပ်လိုက်၏။ မြင့်မိုရ်က ဦးလွင်မင်းအား ပြုံးပြလိုက်ပြီး ကျောပိုးအိတ်ဘေးတွင် ချိတ်ထားသော ဦးထုပ်အဖြူလေးကို ဆွဲဖြုတ်ကာ ဦးခေါင်းထက်တွင် နောက်ပြန်လေး ဆောင်းလိုက်ပြီး ကားပေါ်မှ ဆင်းလိုက်၏။
" ကျောင်းမှာ အဆင်ပြေတဲ့အကြောင်း မင်းအမေကို ဖုန်းဆက်ပြောလိုက်ဦး။ "
" ဟုတ် "
Private School ဆိုသော်ငြား ဒီကျောင်းမှာ ငါးတန်းမှစပြီး အထက်တန်းအထိ ရှိသည်မို့ အတော်အသင့် ကျယ်ဝန်း၏။ တံခါးဝတွင် တာဝန်ဖြင့် အလှည့်ကျ စောင့်နေသည့် ဆရာမနှစ်ယောက်အနက်မှ တစ်ယောက်မှာ မြင့်မိုရ်ကို မြင်သည်နှင့် ပြုံးပြကာ အနားရောက်လာ၏။
" ကျောင်းသားအသစ်လေး ... သားအခန်းက ဒီကနေ တည့်တည့်သွား ပထမဆုံးမြင်ရတဲ့ နှစ်ထပ်အဆောင်ရဲ့ အပေါ်ထပ် အခန်း ( B ) "
YOU ARE READING
Youth , Sweet Love
RomanceMyanmar×OC Fic cover crd to pinterest နုနုပျိုပျို ချစ်ခြင်းလေးတစ်ခု ႏုႏုပ်ိဳပ်ိဳ ခ်စ္ျခင္းေလးတစ္ခု 11.4.2024 _
