Working Student (BISAYA AU FROM TIKTOK)

BAYNTE OTSO

Let go

Naabot mi sa mini forest sa among eskwelahan. Wala kaayo’y mga estudyante nga nagatambay kay oras sa ting klase. Naa la’y isa ka barkadahan nga nagkanta-kanta samtang nagdala og guitara ang usa nila ka kauban. Hinoon, nindot man pud gud diri tambayan kay landong ug bugnaw ang ubos sa mga kahoy.

Ning adto mi sa pinakatumoy kung asa hilom na ang palibot. Wala na namo nadungog ang saba sa mga nagkantahay. Nilingkod ko sa isa ka bakante nga bench samtang nagpabilin siya nga nag tindog sa akong atubangan.

“Wala tika gipugos gahapon nga isulti sa akoa kung unsa man imong problema. Pero karon, alarming kaayo ang makita nga naghilak ka.” Seryoso siya.

Wala ko nitingog ug ako ra siyang gipaminaw.

“Sulayan nako nga dili manghilabot. Pero Langga, atleast pahibal-a ko kung unsa man na.” Miduol siya sa akoa.

Ganina naa ko sa urge nga isulti tanan sa iyaha. Karon ning bintaha na akong gibati kay nakalma nako pero maklaro gihapon akong mata nga gikan naghilak.

Naa sa akoa iyahang panan-aw samtang giplastar nako akong kaugalingon.

“Nagtuo si Karille nga dili tinuod atong relasyon. Nagtuo sila nga gigamit ra ko nimo para paseloson si Cherry.”

Mikun-ot iyahang agtang ug hinay hinay nga napulihan og kabalaka.

“Ug nituo ka mao nang nihilak ka?”

Naglingo-lingo ko. Nakit-an nako nga nahuwasan iyahang reaksyon.

“Nisulti ko nga dili tinuod. Pero nasuko siya. Gihunahuna niya nga nag nagkauyab daw ta tungod...” Nihunong ko.

Dili ko sigurado kung isulti ba jud nako sa iyaha ang hinungdan sa akong paghilak.

“Tungod kay unsa, Langga?” Seryoso siya nga naghulat sa akong sunod nga istorya.

“Tungod kay gi-seduce daw tika. S-sexually.” Milikay ko sa iyahang tinan-awan.

Mobalik balik lang sa akong hunahuna ang gipagawas nga istorya ni Karille ganina bahin sa akoa. Ug sa tinuod lang, dili ko komportable.

“I’m sorry kung gipangutana pa tika,” sulti niya human mitalikod.

Gipasagdahan ra namo nga ing ato among posisyon og pila ka segundo. Wala ko kabalo kung unsa iyahang gihunahuna pero kabalo kong parehas mi nakabati’g ka awkward. Kabalo kong normal ra ni nga topic istoryahan para sa ubang relasyon pero sa amoa, dili pa mi andam para ana. We are too young and pure for that thing.

Mitan-aw ko pag atubang niya.

“Makig istorya ko ni Karille. Gusto nako makabalo siya nga maling tao iyahang gihilabtan.” Kalmado iyahang tingog pero kabalo kong nagpugong ra na siya

“Dili na kinahanglan. Please. Ayaw na.” Naglingo-lingo ko.

Dili ko gusto hunahunaon nila nga clingy ra kaayo ko nga pagkauyab para magpalaban kay Janvier. Isa pa, humana man pud. Sigurado kong dili nato mausab pa.

Mikun-ot iyahang agtang ug nilingkod sa akong tapad.

“Langga, nag talk shit siya sa imoha tungod sa akoa. Dili ko mosugot ana.”

“I know. Pero kaya ra ko ni. I mean, mahandle ra ko ni. Actually, nasagpaan gani nako siya,” tug-an nako.

Nitaas iyahang kilay nga mura’g na sorpresa sa akong gisulti. Nagtuo ko og malain siya sa akong gibuhat. Imbis, ang pagka seryoso sa iyahang nawung hinay hinay napulihan og paglakra sa pahiyom sa iyahang ngabil.