#طوبى "جنة طوبى"
#جمان_فريد
#الجزء_117"رحلة حب وحرب"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تاج_الذكر
لاإله إلا الله وحده لاشريك له له الملك وله الحمد وهو على كل شيء قدير..
🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍃قيل فى الغيره..
ستلهث كأنك تتسلق جبلا وانت فى مجلسك متكئا🍃
________________________________________
خش للحوش قابله باب دارها مسكر..
تنهد بضيق وتوجهله..
وصل فيه..وقف قدامه ودق عليه وهو ينادي..
/طوبى..
ردت عليه تقول..
"معليشي بنرقد"
ضم شفايفه لداخل بضيق واسف بعدين قال..
/تمام...
وخر خطوة وهو يشوف للباب بعدين لف ومشي طلع من الحوش بش يدخل ماعين الفطور..
🍁وهي داخل راقده ع السرير..ضامه نفسها وتبكي بصمت..
🍃زي ماقاعده سلافه تبكي بعبرتها موجوعه بقوة وجعها ع قد حبها ليه اللي قعد يكبر في داخلها كل يوم لعند ماولى عمره سنتين..
حب سيطر عليها وخلاها ماتشوفش غيره..وع قد ماصار رفضت تفقد الامل فيه..هالأمل اللي زادوا كبروه فيها اهله وخلوها طير بأحلامها لبعيد وللأسف جتها اللحظه اللي خلتها تهوي ع الأرض والطيحه كانت اشبه بالموت..
بعد مااجهدت نفسها بالبكي رقدت ومازال دموعها ينزلوا وخلت امها واختها موجوعين ع حالها..
🍃شاديه بحزن؛معناتو نحنا فهمنا غلط يابنتي..
لبانه ودموعها في عيونها..
/هلأ انا بس بدي اعرف من هي اللي تزوجها!؟
شاديه قعدت ساكته وهي تفكر وقلبها محروق ع بنتها الحاله اللي شافتها بيها خلتها تعرف ان حبها لعبد القيوم مش مجرد حب عادي ينتسى بسرعه وهالشي خلاها تخاف من ردة فعلها..
🍃🍃🍃🍃🍃
"يوسف"
هادي سدرة خشت لحوش جدها وهي تنادي في خوها..
وهو اللي كان مقعمز في الصاله مع مرته ومرت بوه اول ماسمع صوتها ناض وطلع بسرعه..
تقابل هو وياها عند الباب وضموا بعض بقوة..
ماقدرش يشد دموعه نزلوا حزن ع الراجل اللي كان يحبه اكثر من بوه مات وهو بعيد عنه وماقدرش يحضر عزاه...
وسدرة طبطب علي ظهره ودموعها ينزلوا وعيون صفيه عليهم وهي تشوفلهم بحزن وتمسح في دموعها..
🍃في الحوش اللي مجاورهم..
كانوا غرفه واريج دايرين سفرة فطور لامين الصغار عليها..
ملامح وجوههم كلها بؤس ومابطلوش للحظه تفكير في طوبى..
☘اريج وهي تشوف لجنه كيف تاكل في الخبزة فتحتلها طرف جبنه ومدتهولها وهي تقول..
/كولي جنوني...
شافت جنة لطرف الجبنه بعدين خداته وعيون غرفه عليها
شافتها كيف بدت تاكل في الجبنه غيرت نظرها للسفره خدت منها باكو"علبة" حليب صغيرة بنكهة الفرواله فتحت الشيريمو "القصبة" وحطتها ومدتها لجنه وهي تقول..
/خودي جنيوه..
شافت جنة للحليب..حطت الخبزة في السفرة وخدت الحليب من خالتها...
اواب كان يراقب فيهم وهو ياكل..قلدهم وخدي شريحه طماطم مدها لجنه وقال..
"خودي جنيوه"
ضحكوا امه وبنت خالته من قلوبهم..
مهاب لما شافهم كيف تفاعلوا مع حركة خوه غار منه وقلده وخدي حبة زيتون ومدها لجنة وهو يقول..
"خودي جنيوة"..
وجنة تمرر في نظراتها بين شريحة الطماطم والزيتون بحيرة
وغرفه واريج يضحكوا عليهم..
🌸كانت لحظه اشبه بالنسمة الباردة اللي تهب في عز الصهد طبطبة ربانيه تخفف الحزن وتبدد البؤس والله لما يعطي يجود حتى في مواساة عباده...
🌸قدام باب حوش طوبى درست سيارة نوع (هونداي جنيسس) سودا..
انفتحوا البيبان الخلفي والامامي نزلوا منهم زوز نساوين وحده منهم رافعه طفل رضيع ومعاهم ولد في عمر12عام..
وقفوا قدام الباب ووحده فيهم قالت للولد..
/رن ع الانترفون..
الولد وهو مبتسم ضغط ع الجرس..
☘داخل سمعوا الجرس قالت غرفه..
/مني زعمه؟
اريج:ان شاء الله مؤمن..
وناضت ومشت طلعت من الدار..
وصلت في السماعه خدتها وردت..
/مني؟
"فرخة اريج"
اريج بصدمه؛آلاء!؟
"تي اطلعي افتحلينا انحرقنا"
لوحت السماعه وهي تقول بلهفه وصوت عالي..
/الاء ياخالتي الاء..
ومشت تجري للشماعه خدت شاربتها وطلعت من الحوش..
غرفه لما سمعتها شن قالت ناضت وهي رافعه بنتها في حضنها وتقول بدهشه وضحكه..
/شني!؟
وطلعت تجري والصغار في جرتها...
🌸برا..
وصلت اريج في الباب فتحاته وتلقى قدامها امها واختها..
قعدت تضحك ودموعها ينزلوا..
خشت فردوس ووراها الاء ومعتز..
ضمت اريج امها بقوة وهي تبكي..
وامها تحضن فيها بشوق وتبكي معاها..
ع طلعة غرفه اللي لما شافتها قالت..
/روفي حبي!..عطت ولدها لخوها معتز ومشتلها بسرعه..
وغرفه نزلت مئاب وقدمت لبنت اختها..وصلوا في بعض وضموا بعض وبدوا يبكوا..
ومعتز بحداهم يسلم ع الصغار وهو مندهش فيهم لما بانوا عليه كبروا هلبه فهالشهور..
طلقوا فردوس واريج وغرفه الاء بعض وتبادلوا في السلام..
لما ضموا غرفه وفردوس بعض قعدوا يبكوا بالعبرة..
اصواتهم وصلت لحوش جدهم سمعوهم اللي فيه ومشولهم..
لما خشوا من الباب الفاصل..
صفيه قالت بمفاجأة:فردوس!
نزلوا دموع سدرة وهي تشوفلها قدمتلهم خطوة وراها خطوة لين وصلت فيهم..قالت بنبرة باكيه..
/فردوس..
تباعدت فردوس عن غرفه وشافت لسدرة..ابتسمت وسط دموعها وقالت بنبرة باكيه..
/سديرة..
ضمتها سدرة بقوة وهي تبكي وفردوس تحضن فيها وتبوس في راسها وتبكي معاها..
واللي حواليهم تأثروا بهاللقاء اللي كانت فيه المشاعر مختلطه بين شوق وحزن ع غوالي راحوا..
🍃🍃🍃🍃🍃
فتحت عيونها لما سمعت آذان الظهر..
مررت نظرها ع المكان وهي تحاول تستعيد وعيها..
ناضت بالشويه وقعمزت..حست بصداع قوي نازل ع عيونها غمضتهم..وشدت عظمه انفها وقعدت دلك فيها..
"الله اكبر الله اكبر..لاإله الا الله"
نزلت يدها وفتحت عيونها وهي مضايقه ع الآخر..
حطت يدها ع صدرها لما حست بكتمه مفاجأه بضيق شديد قال..
/حسبي الله ونعم الوكيل..
ونزلت من السرير..لما عفست برجليها ع الأرض تخيلت وكأنها حطتهم في الهوا..نزلت عيونها لرجليها لقت ع الارض فعلا لكن ماكانتش حاسه بيهم..
خافت..ناضت وقفت وقعدت تمشي عليهم..كانت تمشي عادي بس وكأنها تمشي ع الهوا مش ع الأرض..
غمضت عيونها وبلعت ريقها..وبصوت مخنوق قالت..
/حسبي الله ونعم الوكيل..
فتحتهم ومشت بإتجاه الباب وهي تحاول تتجاهل اللي قاعده تحس بيه..
وصلت فيه..فتحاته وطلعت..
عيونها جو ع عبد القيوم وهو راقد ع الكنبه..
فوق الاحاسيس المؤلمة والمخيفه اللي عايشتها وجع القلب من مرض الحب العضال..
خدت نفس..ومشتله..وهي تمشي قاعده مش حاسه برجليها لكن استمرت في التجاهل..
وصلت في الكنبه اللي راقد عليها مررت نظرها ع هيئة نومه...
كان مربع ايديه وعاطي بوجهه لظهر الكنبه..
ابتسمت ابتسامه خفيفه فيسع ماخفتها لما قربت منه بش تفيقه..
حطت ايديها ع ركابها وطبست شويه وهي تنادي..
/عبد القيوم..عبد القيوم..
فتح عيونه وضيقهم وهو يسمع يحساب روحه يحلم..
"عبد القيوم الظهر آذن"
حرك عيونه ناحيتها وهي وقفت ع حيلها...
طوبى:نوض الظهر آذن..
قعد يشوفلها وهو ساكت هي انحرجت من نظراته كيف جايه بتمشي وقفها لما قال..
/ارجي شوي..
ناض قعمز شويه بعدين وقف ومشي للكوجينه وهي قعدت واقفه في مكانها تشوفله..
هو طلع شيشة ميه 7لتر..مشالها بيها وهو يقول..
/الميه هذي مرقيه وفيها ورق سدر اغتسلي منها بس مرة وحده في اليوم..
هي وعيونها ع الشيشه هزت راسها بإيجاب..
مشي بيها لدارها وهو يقول..
/خليها تقعد في دارك كل مرة تاخدي منها الربع تغتسلي بيه..
طوبى وهي ماشيه وراه قالت..
/عادي في الحمام ولا كنت نغتسل بمية الرقيه في الحمام قبل..
خش للدار وحط الشيشه جنب الزيانه وهويقول..
/هو عادي لكن الافضل تغتسلي في مكان تاني..اكيد شفتي في الحمام حوض نايلو لونه موف خديته لهالسبب..
نزلت عيونها وهي محرجه ع الآخر وقالت..
/امم..
ابتسم وهو عاقد حواجبه بعدين قال..
/ابدي من اليوم توا..لكن الايام الجايه مع الفجر تمام..
طوبى بدون ماتشوفله قالت..
/تمام..
هو شافلها بإبتسامه بعدين طلع من الدار..
سكرت وراه الباب وهي تقول..
/عليك احراج..ياربي كيف بندير القدام!؟
تنهدت بضيق وشافت للشيشه..زفرت بعدين فتحت الباب وطلعت من الدار بش تجيب الحوض..
🍃وفي حوشها كانت هي محور الحديث...
فردوس وهي مقعمزه جنه في حجرها قالت ودموعها تنزل..
/ربي يشفيها ويعافيها حبيبتي..
كلهم بأصوات متقطعه قالوا..
/آمين..
فردوس وهي تمسح في دموعها قالت..
/باهي قداش بتقعد؟
سدرة:مش معروف يادوسه مش معروف..
فردوس بريبه..
/مش عارفه علاش حاستكم مدرقين عليا حاجه..
الاء واريج شافوا لبعض بحزن..
وسدرة قالت..
/غير شن بندرقوا عليك يافردوس بس..
اريج؛اللي هناك كله خبرتك بيه يام..
هزت فردوس راسها وهي تمرر في نظرات عدم الاقتناع عليهم..
ناضت صفيه وهي تقول..
/هي نوضوا ياهاديه وياغرفه بش نديروا الغدي..
اريج؛نسيبنا بيقعد للغدي؟
آلاء؛لالا بيمشي يتغدا عند واحد من عمامه بعدين بيخطم ع خوته..
فردوس:قتله يجي يتغدا هني غدوة قبل ليسافر..
غرفه؛قداش ناويين تقعدوا هني؟
فردوس؛شهر..
ابتسمت اريج بفرح..
صفيه؛اني سابقتكم..
ناضت هاديه وهي تقول..
/جايه معاك..
ومشوا مع بعض للكوجينه..
سدرة شافت لغرفه وقالت..
/تحركي الحقيهم..
شافت اريج لجهينه اللي كانت مقعمزة معاهم ماحبتش اسلوب كلام سدره مع غرفه قدامها..
وغرفه كانت ع اعصابها من سكات ناضت ومشت طلعت من الصاله..
شافت فردوس لأريج بإستغراب اريج رفعت حواجبها ونزلتهم..
سدرة وهي تشوف لآلاء قالت..
/جيبي بطبوطك جيبي..
الاء بضحكه:هي جاياتك..
ناضت ومشت لخالتها قعمزت جنبها وهي تقول..
/في اما شهر خويله؟
سدرة وهي تشوف لولد آلاء..
/خشيت السادس..
فردوس بإبتسامه..
/تحلي عويناتك ع خير..
سدرة وهي تلعب في ولد الاء..
/امين سلمك حبيبتي..
شافت الاء لجهينه وقالت..
/بتجيبي في 11..
جهينه بإبتسامه؛في اخره ان شاء الله..
فردوس؛لا انتاج وسيفه ان شاء الله بيجي عسل في عسل..
ضحكت جهينه بخجل وهي تقول..
/تسلمي يارب..
سدرة؛مش غير زينه في شكلها بس حتى طباعها واخلاقها بنت عز بمعنى الكلمه..
فردوس:كله باين يستاهل وسيفه..
جهينه بضحكه خجل..
/بارك الله فيكم..
🍃في الكوجينه..
صفيه؛جديده عليك ياغريفه!؟
غرفه ودموعها ينزلوا.
/مش قدام الناس ياخالتي..
اريج بضيق:معليشي تحملي وسايري..
مسحت دموعها وقالت..
/مانبي منها شي غير تعطيني رقم طوبى نبي نكلمها..
اريج؛تو بعدين نطلبه منها..
والحديث يدور بيناتهم كانت هاديه لاهيه بالغدي ومتجنبه حتى النظر ليهم...
🍃من حسن اسلام المرء تركه مالايعنيه🍃
🍃🍃🍃🍃
طلع من داره بعد ماجهز نفسه للمشي للجامع..
سكر الباب وشاف لدارها حس بشي من القلق والتردد..
في صوت في داخله قاله..
"اقعد ماتخليهاش بروحها"..
مشي لدارها وقف ع الباب ودق عليه..
سمع صوت تصفيق فهم انها تصلي..
تنفس بإرتياح ومشي بإتجاه الباب وطلع من الحوش..
🍃في دارها..
كانت تصلي عادي..تصلي وهي مرتاحه بعض الشي..لعند ماسلمت من الصلاة..
حست فجأه بشعور غريب وكأن في حد رافعها عن الارض..
نزلت عيونها للأرض لقت روحها قاعده مقعمزه عادي..
حطت ايديها ع الارض بش تتأكد..!
وفي لحظه..
حست بشي ركب مع ظهرها لين وصل في راسها من الخلف وكأنه تيار كهربائي..جتها دوخه وقلبها قعد يدق بسرعه رهيبه .
خافت خوف شديد..ناضت بسرعه وكأنها تبي تهرب لكن ماقدرتش تمشي للباب وكأن في شي يمنع فيها..
بدت تاخد في انفاسها بصعوبه..داهشه وكأنها كانت تجري في سباق..والخوف مسيطر عليها لدرجة حست فيها ان جسمها ثلج..
اسنانها بدوا يصطكوا وايديها يرجفوا..
قعدت تمشي بصعوبه للسرير وهي داهشه وصلت فيه طاحت عليه بتعب..
تبي دير شي تبي تستنجد تحاول تتكلم تحاول وتحاول لعند ماقالت بألم...
"يارب..يارب"
🍃🍃🍃🍃🍃
"تشربي قهوة سدرة"
سدرة بضيق:لالا مانبي شي..
وناضت ومشت بتطلع من الصاله..
صفيه؛تحسي في حاجه؟
سدرة:لالا بنمشي نصلي..
طلعت من حداهم وتوجهت للدار وهي مضايقه وقلبها مقبوض..
خشتلها وسكرت الباب..شمت ريحة طوبى فيها دموعها عبوا عيونها..
شافت للشماعه لقت وحده من ملايات طوبى معلقه عليها..
مشت خدتها لبستها وريحة طوبى في انفها..
خدت نفس وقالت..
/تو نصلي ونكلمها..
🍃وصلت سدرة الظهر ومازال قلبها مقبوض..
مجرد ماكملت مشت للزيانه خدت هاتفها وحطت ع رقم طوبى واتصلت بيها..
🍃طوبى وقتها قاعده راقده ع السرير لكن مش بالنوم..
كانت حاسه بتعب ووهن شديدين وحاسه وكأن في امواس تشرك"تشرط" في صدرها تسمع في هاتفها يرن ودموعها بدوا ينزلوا ومازال تردد بصوت يدوب طالع..
"يارب"
🍃فهالأثناء..
روح عبد القيوم من الجامع..نزل من سيارته وسكرها ومشي بسرعه للحوش..كان حاس بقلق بالغ ومتمني من قلبه لو يطلع مجرد شعور مش استشعار لشي صار لطوبى..
خش للحوش وتوجه لدارها طول..
وقف في الباب ودق عليه وهوينادي...
"طوبى"
نادى مرتين وماجاه رد ماقدرش يمنع نفسه من فتح الباب..
فتحه ويشوفها راقده ع السرير بطريقه مثيره للريبه..
قربلها بسرعه سمعها تأن بصوت ضعيف وهي تقول..
/يارب...
حس قلبه رجف من الخوف عليها..
قعمز ع السرير وهو ثاني وحده من ركابه..
حط يده ع راسها وقال..
/طوبى!..
طوبى بضعف ونبرة مرتعشه..
/خايفه..
قلبه انفطر من الألم.. قعمز جنبها كويس وهو يقوللها بنبرة صوت حاول ع قد مايقدر يخليها هاديه..
/ماتخافيش..نا معاك..
عاودت قالت مرة تانيه بنفس النبرة..
/خايفه..خايفه هلبه..
معاش قدر يتحمل رفعها وضمها لقلبه وهو يقول..
/ماتخافيش نا معاك جنبك مانخلي شي يضرك..
حطت يدها الضعيفه ع صدره وقالت بصوت يدوب طالع..
/ماتخلنيش..
باس راسها وقال..
/مش مخليك..معاش بنخليك خلاص بنقعد ديما معاك ديما..
وحط يده ع راسها وبدي يقرا في سور وآيات الرقية العامه..
وهي تسمع فيه نزل عليها النوم غمضت عيونها ورقدت..
رقدت براحه مالقتش زيها في حضن حد قبله..
سكنت نفسها الخايفه عنده..وهدي قلبها المفزوع في قربه
ودفي قلبه بدد البرد اللي كان مجتاح كل جزء فيها...
مافيش نعمة تجي بعد نعمة الاسلام زي نعمة الزوج الصالح اللي يحن ويدعم ويساند ويحتوي..مايستناش ع اللي يدير فيه مقابل..ولاعنده من وراه غايه ولاهدف غير انه يشوف شريكة حياته مرتاحه وسعيده...
🍃وفي ازواج..يبانوا صالحين..يراعوا ويهتموا ويحاموا ويديروا حاجات حلوة لزوجاتهم..يخلوا الحياة تبان مثاليه وسعيده..
ومع اول اختبار ينحطوا فيه تنكشف حقيقتهم اذا كانوا صالحين فعلا لكل ظرف وزمان ولاليهم مدة صلاحية يجيها يوم وتنتهي..
••خش ربيع للعمارة وهو مروح من الخدمه..
ركب الدروج وهو متمني من قلبه مايلقاش نسرين.. اللي صار بينهم الصبح والاسلوب اللي كلماته بيه خلاه معاش طايقها حرفيا..
وصل في الشقه متاعه طلع المفتاح وفتح الباب وخش..
ويسمع صوت يحيى وهو يلعب..
غمض عيونه بإستياء وفتحهم..
سكر الباب..رمي سبيدروه وخش داخل..
شافه يحيى اللي كان يلعب بسيارته نزل منها ومشاله يجري لكن في نص الطريق وقف مفجوع لما سمع ربيع بصوت عالي يقوله..
/اقعد غادي..
وكمل طريقه لدار النوم..خشلها لقي نسرين واقفه تتسنى فيه وكان باين عليها الخوف..
سكر الباب وقال..
/تو اني شن قلت الصبح قبل لنطلع!؟
نسرين بندم:اسفه سامحني مش عارفه كيف قلت اللي قلته انت عارفني خايفه من الكورونا هلبه وديما نقولك رد بالك والله ماقصدي اللي قلته بكري..من الضغط النفسي طلع معاي الكلام..
ربيع بلامبالاة؛معاش يهمني خلاص توا توا توتي حوايجك انتي وولدك اللي خايفة عليه مني وتتوكلي لحوش ماليك..
قدمتله وقالت برجاء..
/والله لو كنت بوه حق كنت حنقولك نفس الكلام ياربيع والله ماقصدي اللي فهمته..
ربيع:باهي خليك مني اني..امي امي نقولك مريضة اتصلي بيها شوفيها ماقلتش بريلها ماعدلتيش عليها بكل واني وين ماتصير في امك ولاخوتك ولاحد من عيلتك حاجه اني اول من يكون معاهم ونجري عليهم يخي..رفع سبابته وقال..لاحظي يانسرين اني مراعيك هلبه في ماليك لكن انتي ولامرة ع خاطري حاولتي مع امي ع الأقل..وللأسف اني جيت معاك ضد امي وخواتي وفي النهايه شن حصلت منك..
قلدها وهو يقول..
" دبر لروحك..احجر روحك ولادير حل.."
ضم شفايفه بحسرة بعدين قال..
/ياخسارة وخلاص..
نزلوا دموع نسرين:عندك حق عندك حق..اني اسفه..قربت منه حطت يده ورا راسه وباست جبينه..بعدت وهي تقول..وكانك ع عمتي مستعده نمشيلها اليوم العشيه..شدت يده بإيديها الزوز وقالت..غير بالله عليك سامحني..
🍃ايه هي لازم دير هكي..اول شي لأنها غلطت معاه فعلا..وتاني شي لازم تتنازل بش ماتلقبش بلقب المطلقه مرتين..بش ماتزيدش اهلها هم ع همومهم..بش ماتشمتش فيها القريب والبعيد..بش مايقولوش الناس طلعت هي اللي ماتنفعش مش راجلها الأول..لهالاعتبارات وغيرها تغاظت نسرين عن معايرته ليها بأهلها..المهم عندها توا المركب تمشي🍃
وربيع حس بشي من الشفقه عليها وخاف يظلمها..لهذا قاللها..
/خلاص خلاص..بعد العصر نرفعك تشوفي امي..وهاه من توا شن ماقالت تسمعي وتسكتي كلها ساعه وتروحي مش حتقعديلها العمر كله..
هزت راسها وهي تقول..
/حاضر..
مشي للدولاب بش يطلع حوايج..
قالتله وهي تمسح في دموعها..
/نوتيلك الغدي؟
هو قال..
/لا..مش جعان اطلعي شوفي ولدك..
بلعت ريقها ومشت طلعت من الدار هو التفتت مالقهاش غمض عيونه وتأفف بتذمر...
🍃🍃🍃🍃
فتحت عيونها شمت ريحة عطره...
غمضت عيونها بشده ورجعت فتحتهم حست بشي غريب..
رفعت عيونها شافت نظرات عيونه الحنونه وهو مبتسم والحواجب معقودات..
عبد القيوم؛امم..شن جو توا!؟
رمشت عيونها بسرعه مرتين بعدين نزلتهم وتمعنت في النظر حواليها..ولما ادركت حقيقة الوضع من صدمتها تباعدت عنه..
هو ضحك وقال..
/شن تحسي روحك توا؟
طوبى بخجل واحراج..
/كويسه..
شبك اصابع ايديه في بعض وقال..
/احكيلي شن صار ؟
خدت نفس وزفرت بعدين قالت..
/لما اغتسلت بمية الرقيه حسيت روحي زي اللي بندوخ بش ماطولش الشعور هدا فيسع ماوليت عاديه
بعدين توضيت وصليت الظهر عادي اللي صارلي صار بعد ماسلمت من الصلاة..حسيت روحي وكأن في حد قايمني يطير بيا..تعبوا عيونها دموع وهي تقول..بعدين حسيت وكأن ضي ضربني في ظهري لين وصل لراسي نحساب راسي بينفجر..حاولت نهرب من الدارماقدرتش..نزلوا دموعها وهي تقول بنبرة مرتجفه..خفت هلبه..
قربلها شد وجهها بإيديه وقعد يمسح في دموعها وهو يقول بلوم وندم..
/نا الغالط مفروض مانخليكش بروحك سامحيني..وقرب منها باس جبينها بعدين تباعد عنها ونزل من السرير وهو يقول بإبتسامه..
/بنوكلك مكرونه اليوم في حياتك ماكليتي زيها هيا صبي اغسلي وجهك ولانقولك توضي احسن وحولي الملايه لأنها سخناتك وخلاتك تعرقي..والبسي حاجه مريحه وبلاش منها المحرمه تمام..غمزلها بإبتسامه بعدين مشي طلع وهو يقول..نولي مرة تانيه نلقاك قاعده كيف ماانتي نديرلك كل اللي قتلك ديريه..
🌼هي كانت في عالم تاني..تأثيره عليها اقوى من تأثير السحر..حطت يدها ع مكان قلبها كان يدق بقوة..خدت نفس وزفرت بعدين غمضت عيونها وقالت..
/تحكمي في روحك ياطوبى تحكمي في روحك اللي يديرلك فيه كله من باب الشفقه بس واجعه حالك من عيونه باين كيف صاخف عليك..تفكري اللي صار الصبح وراك تنسيه..زي ماقالت سدرة بالزبط..فترة وتعدي..
رفعت عيونها وغمضتهم وهي تقول..
/يارب..
فتحت عيونها ونزلتهم لما سمعت هاتفها يرن..
نزلت من ع السرير بالشويه لأنها مازال حاسه بالتعب..
خدت الهاتف من ع الزيانه شافت المتصل فتحت الخط طول وتكلمت..
/سامحيني سديرتي كنت راقده..
"اكيد راقده مش مريضه مافيك شي!!؟"
طوبى وهي تحاول تخفي ارتباكها..
/لالا راقده بعد ماصليت الفجر مارقدتش بكل مع الساعه11رقدت..
"باهي شن دارالك غدي"
طوبى:قال بيدير مكرونه..
"كان ماتطلع مبكبكه انتي ماعندكش عليها"
طوبى:تو نقوله يديرها سباقيتي ناكلها سباقيتي عادي..
"المهم كولي كويس..باهي قوليلي بدي معاك العلاج"
طوبى:من اول ليله يعطي فيا مرقيه نشرب ونغسل بمية مرقية فيها سدرة..
"باهي شن حسيتي في تجاوب"
طوبى بضيق؛ايه..
"معناها تعبتي"
طوبى:طبيعي سدرة..
"عارفه بنتي عارفه حتى اني مجربه خلينا من الدوة هادي واسمعي فردوس وآلاء جو زيارة"
طوبى بدهشه؛بالله عليك!؟
"والله..داروها مفاجأة ياحنه"
طوبى بضيق:خسارة..مستاحشه فردوس هلبه..
"بعدين كلميهم ماسنجر'
طوبى ودموعها تنزل..
/باهي باهي..رشفت وهي تقول..حالهم باهي!؟
"الحمد لله كلهم في خيار خيرهم"
طوبى:الحمد لله..باهي عمتي كلمتيها!؟
"ايه الصبح حالها باهي"
طوبى:الحمد لله..
"خلاص توا بنمشي نتغدا نكلمك في االيل"
طوبى بإبتسامه..
/تمام..بالسلامه..
"بالسلامه ياعيوني"
🍃وهي تكلم في اختها هو في الكوجينه بادي يطيب في المكرونه وقلبه قاعد مفجوع وموجوع عليها مابطلش وهو يلوم في نفسها ويأنب فيها اللي خلاها بروحها وهي فهالحاله..
حط الطبيخه ع النار وغطاها وطلع من الكوجينه للصالون قعمز وعيونه ع دارها اللي كان بابها مسكر..
قعد يستنى فيها وماطلعتش..
ووين جي بيرمي المكرونه مشالها للدار ومن ورا الباب سألها..
/طوبى..خرز ولاسبيقه!؟
ردت عليه..
"سباقيتي"
ضحك عليها كيف قالتها مشي للكوجينه وهو يقلد فيها بصوت منخفض..
"سباقيتي"
خش للكوجينه وطلع المكرونه من فريز الثلاجه لأن تخزينها برا في الجو الساخن يخليها تسوس بسرعه..
☘☘☘
وطابت المكروته وطوبى طلعت من الدار وهي تشم في ريحتها اللي تشهي..
مشت للكوجينه وخشتلها..
لقاته يصب في المكرونه في صحون غارقه..
قالتله؛عطيك الصحه..
قام عيونه وقال..
/سلمك..مرر نظره سريعا عليها لقاها مادرات شي من اللي قاللها عليه..لبست فستان واسع ومستور لونه بترولي وعليه شاربه لونها رمادي...
ابتسم ورجع نظره للي يدير فيه..
هي قربت من الطاوله وخرت كرسي وقعمزت..
وهو بعد كمل صبان مكرونه حط الطنجرة في الحوض وفتح عليها ميه..
ورجع خدي صونية طوبى حطها قدامها وقربلها سبات الخبزة وقال..
/ايه..كاشيك..ومشي طفا الميه وخدي زوز كواشيك من الشباك مشالها حطلها واحد قدامها بعدين خدي صونيه وقعمز..
خدت الكاشيك وبدت تاكل وهو يسرقلها في النظر..
قعدوا في حالة صمت للحظات بعدين هو قال..
/عجباتك!؟
طوبى:كويسه..
ضحك وقال..
/حتى هي ماتحبيهاش..
طوبى:الصراحه جو الماكله الجاريه ماعنديش عليه..
ابتسم وقال..
/خلاص قوليلي ع اللي تحبيه كله ونديره..
طوبى:ماتشقيش روحك بزياده تو نتعود وناكل اللي ديره..
عبد القيوم؛تو انتي مش شكالك وقالك شاقي!؟
طوبى حطت الكاشيك وشافتله وعيونها مليانات دموع..
/اني كنت نعرف نطيب كل شي حلو ع حار مافي شي حاجه نتعلمها الا ونجيبها من اول ولاتاني مرة..نزلوا دموعها مسحتهم وقالت..توا معاش وليت نعرف ندير شي..تصدق حتى القهوة معاش نعرف نديرها..
يسمع فيها وهو يشوفلها بحزن وقلبه معصور عصر من الألم..
رشفت ومسحت دموعها وهي تقول..
/زعمه نولي زي ماكنت ؟!
ابتسم بحب وقال..
/واحسن وقولي عبد القيوم قالها..
رجعت نظرها لصونيه المكرونه وقالت..
/يارب..
خدت الكاشيك وولت تاكل وعيونه مش قادرين يفارقوها من وجع قلبه عليها عاهد نفسه يدير المستحيل بش يساعدها تشفى وترجع خير من قبل..
كملوا غداهم وهما في حالة صمت..
بعدين ناضت طوبى خدت صونيتها وقالت..
/جيب صونيتك اني بنغسل الماعين وياريت ماتناقشنيش بكل..
بضحكه قال..
/احسن..خل نلهى بالشاهي..
طوبى:ماتحسبنيش بنولي نرقد
ناض حط الصونيه جنبها وقال..
/تمام لكن قبلها بنحكي معاك في موضوع
هي خدت الصونيه وغسلتها وقالت..
/موضوع شنو؟
مشي طلع من الكوجينه وهو يقول..
/كملي وتعالي للصالون..
********
قعمزت جنبه بمسافه وقالت..
/شن هو الموضوع اللي تبيني فيه؟
خدي نفس وقال...
/كيف ماتعرفي نا عضو في جمعية الفنون الخيريه..الجمعيه عندها نشاطات دير فيهن غير المعارض..زي الدورات التعليميه والتدريبيه وورش العمل..فا..من قبل اسبوعين استاذه نفيسة سلتمني ادارة ورشه حتكون في الزاويه يوم 15 تسعه يعني بعد يومين..سجلتك فيها..
بدت ع وجهها ملامح الصدمه وهي تقول..
/علاش!؟
بإبتسامه قال:كيف علاش!؟تبيني نمشي ونخليك بروحك؟
طوبى:لاارفعني لحوش خالي نقعد عنده لين تروح..
حس بشي غم ع قلبه لما تخيلها تقعد بعيده عنه يومين الفكرة نفسها ماتحملهاش..قاللها برفض قاطع..
/لا..ورجلك ع رجلي..وين مانعدي معاي..ووين ماتمشي معاك..
طوبى بضيق:مانبيش نخالط حد ولانشوف حد..
بإبتسامه قاللها:انتي غير جربي مرة وحده بس ماتعرفيش مرات تنسجمي وتحبي فن الخط وتولي خطاطه حتى انتي..
نزلت عيونها وضحكت ضحكه خفيفه..
تنهد بإبتسامه وقال..
/عندك علم ان الخط العربي في من يعتبره فرع من فروع العلم الشرعي لأن ليه علاقه بحفظ القرآن وكانوا قبل ينهوا عن حضور مجالس الخط من غير طهارة زي الصلاة وقراية القرآن..
هي بإبتسامه قالت..
/لما كنت نحفظ فالقرآن كانت عندي مذكرات نكتب فيهم السور واني نحفظ فيهم..
قاللها:جايبتيهن معاك؟
طوبى:ايه..تبي تشوفهم؟
بإبتسامه طالعه من القلب هز راسه بإيجاب..
ناضت وهي تقول..
/شويه بس..
ومشت بإتجاه الدار وعيونه معاها لين خشتلها تنهد من قلبه وقال بصوت منخفض..
/غير غبتي عن عيني توا استاحشتك كيف لو تبعدي يومين..تنهد من قلبه وقال بحزن وخوف..ماتحرمني منها يارب..
رجع ابتسم نفس الابتسامه الحلوة لما شافها جايه وشاده بين ايديها مذكرات..
وصلت فيه مدتهوله..
هو خداهم وهي قعمزت في مكانها..
قعدت تتأمل فيه وهو يتفرج ع اول مذكرة ويقلب في صفحاتها..هامت في تفاصيل ملامح وجهه..رجوليه وجذابه جدا..واكثر تفصيل جذبها الخطوط اللي يبانوا بين حواجبه لما يعقدهم..
عبد القيوم وهو يشوف للمذكرة..
/عندك طريقه حلوة في رسم الخط..
طوبى بضحكه:هو خطي كويس لكن مانحسش فيه يشبه خطك حتى شويه..
شافلها بإبتسامه وقال..
/تتعلمي وتولي خير مني..سكر المذكرة وقال..الورشه بنديروها لتعلم خط الثلث يعتبر اهم انواع الخط العربي متأكد انك حتتقنيه..
بإبتسامة ضيق قالت..
/مش عارفه..حاسه روحي مش متقبله نمشي..
هو قال؛بعد تمشي معاي تغيري رايك..
تنهدت وسكتت..
هو حمحم وقال...
/ع فكرة سلافه تعرفيها..
تغيرت ملامح وجهها ولون وجهها انخطف لما سمعت اسمها منه..
هو لاحظ وقال مستدركا..
/مشاركتني في ادارة الورشه..
طوبى بضيق شديد..
/معناها مش ماشيه..
عبد القيوم:ليش!؟
بلعت ريقها وقالت..
/تعرفني وتعرف الشارع وتعرف البنات اللي يخدموا معانا في المحل مرات تقول لامها وامها تنشرها..
هو قال؛من هالناحية اطمني سلافه مش من هالنوع..
رفعت حاجبها وقالت..
/مالا من اما نوع!؟
رفع حواجبه وهو يشوفلها بإبتسامة تعجب مصطنعه..
هي استاقظت لنفسها..احمر وجهها وغيرت عيونها عنه وقالت..
/مش ضامنه حد مرات تقول والدنيا كلها تعرف..
عدل جلسته بحيث خلا جسمه كله مقابلها وقال..
/بحتي فيا..
حركت عيونها ليه..شافتله بطرفهم..
عبد القيوم:اخر همي ومش مخوفتني الحكايه هذي نهائي وكنت ضدها من البدايه لكن خالك وسدرة حكموا رايهم قالوا احتياط مااحتياط..
هي بضيق قالت..
/هما خايفين عليك..
هو قال:وانا مش خايف ع حد غيرك انتي..
قال هالجمله بنبرة حلوة خلت قلبها يفر..عيونها قعدوا يشوفوا لعيونه..نظراتهم فيها شي غريب مش قادرة تفسره..ولاخايفه تفسره..وخوفها هدا ليه هلبه اسباب..
غيرت عيونها عنه وقالت..
/باهي نمشي..ناضت وهي تقول..بنمشي نرقد..
هو ابتسم وقال..
/خلي باب الدار مفتوح
هزت راسها بالموافقه ومشت بإتجاه الدار وقلبه ماشي معاها..
اختفت من قدام عيونه ضاق صدره..بانت ع وجهه ملامح الحزن..تنهد بضيق وناض توجه للكوجينه..
🍃🍃🍃🍃🍃
بعد العصر..
جت ميار لصاحبتها سلافه بعد ماسمعت من لبانه الخبر الصادم..
سلافه لما شافتها انهارت مرة تانيه..كانت حاضنتها وتبكي بدون ماتتكلم وميار تواسي فيها لعند ماهدتها..
🍃ميار:اني نبي نعرف من هي هادي اللي تزوجها بالدرقه ع ماليه
سلافه بصوت مخنوق..
/هي مافي غيرها واضح انو اهله مابدن ياه يتزوجا..
لبانه؛لكن ماما اتصلت مبارح بمرت عمها وطلبت تحكي معها قالتلا انها سافرت مع خالها
سلافه بتعجب شديد..
/طيب مين هي اللي تزوجا من ورا اهله!؟
ميار ضيقت عيونها وهي تقول..
/شكله بيطلع واحد لخباط ياسلافه يحب وحده ويعلق تانيه ويتزوج غيرهم مش لخباط بس نرجسي..
سلافه بعدم اقتناع..
/مستحيل..لو كان هيك كنت حسيت
ميار:النوعيه هادي ثعالب ياسلافه يديروا فرواحهم محترمين زياده عن اللزوم بش يبعدوا الشبهه ويطيحوا البنات في شباكهم
لبانه وهي تفكر بخوف..
/معقول!؟
سلافه؛والله لو بشوفوا بعيني مابصدق صادفت رجال بحياتي من هالنوع كانوا مكشوفين قدامي من عيونن بعرفن..هو مو مثلهن ابدا لاتنسي ميار شو عمل معي مشان تعليق ع الفيسبوك لو كان مثل مابتحكي كان ماصدق...
سكتت ميار وهي تفكر ولبانه قالت..
/معك حق..
ميار:باهي شن رايك تتصلي بعمته ديري روحك بتباركيلها..
سلافه بخوف..
/بدك اياني اعمله مشاكل مستحيل!
ميار:بحسن نيه كلميها بحسن نيه..
لبانه:لالا ميار رح تعمله مشكله وهو يعمل معها مشكله وتطلع بمنظر بايخ قدامه..
تنهدت ميار وقعدت ساكته..
نزلوا دموع سلافه وهي تقول..
/شو ماكان..انا لازم شيلوا من بالي خلص هو صار رجال متزوج لازم شيلوا من بالي ومن قلبي ومن حياتي..بعد هالورشه رح اترك الجمعيه .
ميار بصدمه؛سلافه!
سلافه:ومشروع المعهد رح الغيه..
لبانه تسمع فيها وهي موجوعه ع حالها..
مسحت دموعها وقالت..
/خلاص بالنسبه الي انتهى من اليوم..
بدت ع وجهها ملامح البكاء غطت وجهها بإيديها وقعدت تبكي..
وميار ضمتها وقعدت طبطب عليها وهي تشوف للبانه كيف تبكي بصمت من زعلها ع حال اختها..
🍃هو قلب المراة رهيف يابال لو حب!..
ونسرين مراة..قلبها انكسر مرات ومرات بحب وبدون حب حتى كرامتها معبيه جروح منها اللي قعد اثره ومنها الجديد ومازال حيجي غيرهم...
🍃وصل ربيع بسيارته قدام حوش اهله في منطقة بن عاشور،الحوش هدا خدوه بعد الحرب وربيع دافع نص حقه واول مرة تجيه نسرين..
درس وقاللها؛انزلي..
فتحت الباب ونزلت وولدها في حضنها كانت مضايقه ومتوترة عارفه شن يراجي فيها داخل ولأن ربيع تغير معاها تغير جذري مش حتلقى من يدافع عنها وخافت ينزل فيها قدامهم..
نزل ربيع من السيارة وسكرها ومشي للباب وهو يقول..
/تعالي..
مشت وقفت جنبه وهو حط المفتاح في الباب وقال..
/زي ماتفاهمنا شن ماتقول تحملي واسكتي...
نسرين بلعت ريقها وقالت..
/باهي..
فتح الباب وخش سمع حس هدرزة شاف القدام ويجوا عيونه ع الهام لما شافها حس بشعور حلو خلاه يبتسم لاإردايا...
حمحم والتفت لنسرين عقد حواجبه وقال..
/خشي..
خشت نسرين وهي تسمع في صوت وحده من حمواتها تهدرز شافت جهة الصوت لقت حماتها واقفه مع وحده شافتها قبل مرة ولاتنين..
غيرت نظرها لربيع لما سكر الباب وقال..
/تعالي..
مشي وهي ماشيه وراه ومستغربه شن يدخله داخل وهو يشوف في وحده غريبه واقفه ع اخته!؟ركزت ع ابتسامه اللي ارتسمت ع وجهه وهو يشوفلهم بعدين قال..
/السلام عليكم..
شافتله الهام وتفاجئت..اما اخته قالت بضحكه.
/ربيع..وهالضحكه تعكرت لما جو عيونها ع نسرين وولدها..غيرت نظرها عنهم وقدمت لخوها صافحاته وقالت..
/شن جو!؟
هو سرق نظره لإلهام بعدين حك مقدمه انفه وقال..
/تمام شن جوك انتي..
قالتله؛تمام..
نسرين بشي من التوتر:كيف حالك سهى..
شافتلها بطرف عينها وقالت..
/الحمد لله...ردت نظرها لخوها لقاته يسرق في النظر لإلهام..
التفتت لإلهام لقتها تمرر في نظرها ع الجنان ابتسمت وقالت..
/لومي تعالي...
شافتلها الهام وابتسمت بعدين قدمتلهم وهي متحشمه وعيون ربيع عليها وعيون نسرين عليه..
نسرين اللي انتابها شعور بشع..شعور ياما حساته مع راجلها الاول...
وصلت فيهم الهام وقالت؛السلام عليكم..
ردوا عليها..
/وعليكم السلام..
الهام لنسرين؛كيف حالك نسرين؟
بلعت نسرين ريقها وقالت..
/الحمد لله..
ربيع بضحكه؛واني مانحصلش كيف حالك ربيع!؟
ضحكت الهام بخجل واخته ضرباته ع ذراعه وهي تقول بضحكه..
/مبردك..
الهام بإبتسامه خجل..
/كيف حالك..
هو بإبتسامه قال:الحمد لله..شن حال الصغار؟
عقدت نسرين حواجبها بإستغراب وضيق شديد وعيونها تعبوا دموع وهي تشوفله..
الهام:الحمد لله..
ربيع؛جبتيهم معاك؟
اخته ؛لاجت هي وامها بس،سمعوا بأمي مريضه جو يطيروا عليها فيها السو..
ربيع شاف لنسرين بنظرة احرجتها وهو يقول بنبرة غريبه..
/بارك الله فيهم..
الهام شافت لنسرين كيف منحرجه واخته حتى هي شافتلها من فوق لتحت..
غير ربيع نظره لأخته وقال..
/خشوا داخل خشوا الجو فيه غبرة...
اخته قالت:باهي..هيا لومي..
الهام وهي تشوف لنسرين مشت مع صاحبتها..
ربيع شاف لنسرين وقال..
/شن تراجي؟
شدت دموعها بقوة ومشت خشت بعدهم...
هو حرك راسه يمين ويسار بعدين مشي للمربوعه...
🍃🍃🍃
وتجي نسرين للموقف الأصعب اللي حتعيشه وهي مهدوده من داخل..
في الصاله كانت مقعمزه عزوزتها وحواليها اربعه نساوين كبار
تلاته منهم حماوات عزوزتها والرابعه تكون ام الهام..
ام ربيع لما شافت نسرين وجهها انقلب..
ونسرين نزلت ولدها اللي كان مستغرب المكان ومستوحشه لحق امه وهي ماشيه لعزوزتها وهو شاد في طرف تنورتها..
وصلت نسرين في عزوزتها طبست ع راسها وباساته بعدين قالت..
/لاباس عليك عمتي..
ام ربيع بتهكم؛راجيتي لين نموت بعدين جيتي.
وجه نسرين انخطف لونه..
وعيون الموجودات عليها واخت ربيع تشوفلها بنظرات مكر من فوق لتحت..
ام ربيع:معقوله هكي معقوله!؟ لافي اعياد الاسلام تجيني ولا بعد نخش حوشي هدا تجيني وبعد نمرض تسمعي بيا وتستخسري فيا اتصال..
نسرين بإرتباك واضح..
/سمعت امس بس..
قالتلها؛ماهو كان تتصلي ودوري راك عارفه قداش ليك.. نسرين وهي شاده دموعها بالسيف قالت..
/تعرفي ياعمتي الظروف اللي مروا بيها ماليا والله معاد لهيت حتى بروحي..
ام ربيع؛اياه عاد كانك ع ظروف ماليك ومشاكلهم ننسوك مرة وحده سلامتهم مشاكلهم ماتمش..
الهام شافت لصاحبتها وصاحبتها شافتلها وهي تهز في راسها وترفع في حواجبها وتنزل بمعنى..
"ريتي!؟"
ام ربيع؛خلاص توا لاينفع لوم ولاعتب بري قعمزي بري وشدي ولدك راسي قاعد يوجع فيا مش متحمله دوشة الصغار..
التفتت نسرين لولدها ودمعتها في طرف عينها خداته ومشت قعمزت والعيون عليها..
ام ربيع شافت لإلهام وقالت..
/ايه لهومه قولي شن صار الموضوع اللي جاك..
ام الهام؛رداته ياحاجه الراجل قاللها خلي صغارك عند ماليك كان عليا اني احب ع قلبي لكن هي ماتبيش صغارها يفارقوها..
اخت ربيع؛الهام ماتقدرش تتنفس من غير صغارها..
ام ربيع؛كيف مالا مش كبدها!؟
اخت ربيع شافت لنسرين وقالت.
/مش كل الامهات هكي يام في اللي تبيع صغارها ع خاطر راجل..
ام ربيع فهمت ع بنتها وقالت..
/صدقتي وفي اللي بعد ماتطلق تلوحهم لبوهم وتقول معاش نبيهم..
الهام؛في اللي دير هكي من كرهها في بوهم..
ام ربيع؛ديريها انتي!؟
بضحكه قالت:مش عارفه الحق بس مانقدرش نتخيل..ضمت ايديه لصدرها وقالت..ووك لالا صغاري مستحيل نخليهم..
ضحكوا وام ربيع قالت..
/سلمها ياربي..ربي يفرحك بيهم..
الهام بإبتسامه:سلمك خالتي..
🍃واستمروا في هالهدرزة ونسرين اللي كانت حاسه بخنقه وضيقة صدر مستكردة من الجميع...
وتكمل عليها مرة وحده لما يجوا سلفاتها ويبدوا في تمسيح الجوخ وعزوزتها تاخد وتشكر فيهم وهالشي لما لاحظوه الهام وامها تأكدوا ان نسرين فعلا ماتنفعش..
ونسرين قعدت تراجي بالدقيقه امتى ربيع يقول هيا لو طولت اكثر من هكي حتنهار حرفيا..
وبعد ساعه ونص بالزبط اتصل ربيع وقال..
"هيا"
وهي ماصدقت ناضت بولدها اللي رقد من الملل..
ومشت سلمت ع عزوزتها وباقي الحاضرات سلمت عليهم بالكلام بس وطلعت وحماتها طلعت وراها..
ام الهام قربت من وذن بنتها وقالت..
/وين طاحت فيها العوبه هادي !؟
الهام فنصت فيهاوقالت
/ماما!
امها قالت:والله لو عندي كنة زيها راني من زمان مطيرتها..
ضحكت الهام وهي تحرك في راسها يمين ويسار...
🍃🍃🍃
برا..
ربيع شداته اخته في الفم ونسرين واقفه حداهم ع اعصابها..
اخته؛بنطلب منك طلب بالله عليك ماتكسفني..
ربيع عقد حواجبه وقال بضحكه..
/ياستار..
ضحكت وقالت..
/الهام صاحبتي تبي دير عيد ميلاد لولدها واني قلتلها ديريه في مطعم خوي وتو نوصيه يراعينا..
ضحك..
وهي قالت بضحكه؛بالله عليك ماتكسفني قدامها..
هدا ضحك بعدين قال بإبتسامه.
/باهي ياستي مش كاسفك قدامها..
بضحكه قالت؛ياسلملي وخيي ياربي..
ربيع بإبتسامه..
/امتى بالزبط؟
قالتله:الاربعاء هادي..
هز راسه وقال..
/تمام.. هي ماتبوا شي..
بإبتسامه قالت:سلامتك..تصبح ع خير..
ربيع ؛قدامك كل خير..
خشت اخته للحوش..
وهو لف ومشي للباب الحوش الخارجي بعدين ماقال لنسرين..
/هيا..
ونسرين مشت وراه ودموعها طاحوا..مسحتهم طول وحاولت تتماسك ماتبيشي يحس بيها وتصير بينهم مشكله تانيه...
هي توا تبي تلحق نفسها قبل فوات الاوان وتحاول تحافظ ع راجلها ع قد ماتقدر..
🍃وياه ع الفرق بين نسرين وغرفه بنت الواعر اللي عاشت حالة شبيهه بحالة نسرين توا مع اختلاف التفاصيل وفضلت كرامة اهلها وكرامتها ع كلام الناس ونظرتهم المتخلفه..
☘"عطيني رقم طوبى"
سدرة:تبيني نضربك!؟
غرفه ضيقت عيونها وهي تقول بشي من العصبيه
/علاش ماتبيش تعطيني رقمها؟!
سدرة بنفاد صبر:هكي عقلي قالي ماتعطي رقمها لحد..
غرفه هزت راسها وقالت..
/ع العموم انتم مدرقين حاجه واني تو نعرفها بروحي..
ولفت ومشت فتحت باب الدار وطلعت..
سدرة حركت راسها يمين بإزدراء وطلعت وراها..
🍃وهما ماشيات في الممر شافوا فايزة واقفه فم الباب مع فردوس واريج..مشولهم..
☘فايزة بإبتسامه:يااه يادوسه ليك وحشه..
فردوس بضحكه:انتي اكثر..
فايزة وهي تمرر في نظرها عليها قالت..
/الله يبارك محلوة وصاغره..
فردوس:ياحنه الاء ماتخلي وين ترفعني مراكز تجميل النادي متاع الرياضه حتى المدربه متاع ياربي..وقعدت تحاول تتفكر..ياودي كلمه انجليزيه ماشديتها في راسي المهم تخلي فيا نحضر معاها في حصتها.
اريج بضحكه:قلتلها امي تقول طالعه الزمن..
كلهم قعدوا يضحكوا وفردوس ضربت اريج ع ذراعها وهي تضحك..
فايزة بإبتسامه:استاحشت هدرزتكم هلبه بإذن الله ساعه ونروح..
فردوس:بتباتي راهو..
فايزة:من غير كلام..
سدرة بحسرة:ياريت مهدي يخليني نبات.
غرفه؛فنصي فيه تو يقولك اقعدي شهر..
سدرة شافت لغرفه من فوق لتحت واللي حواليهم كانوا شادين الضحكه..
فايزة ركزت ع سدرة لاحظت العصبيه باينه في وجهها غيرت الموضوع وهي تقول..
/روفي سيارتي معاش تنفع نبي نصلحها ونبيعها ونزيد ع حقها وناخد وحده تانيه..
غرفه بإبتسامه:اختاري يوم فاضي عندك نمشوا فيه للمعرض ووازي السيارة اللي تعجبك..
فايزة بضحكه:سلمها ياربي..رفعت مفتاح السيارة وشافت لأريج وهي تقول..في الحفظ والصون..
اريج بإبتسامه؛هدا علاش عطيتهالك..
ضحكت فايزة ومشت لسيارة اريج..
فردوس:الله يبارك عليها تصغر ماتكبرش..
اريج بضحكه؛والرجاله قاعدين يجروا وراها..
فردوس بفضول:في جديد..
اريج؛خشي نحكيلك..
خشت فردوس واريج وراها ولما جت بتلحقهم غرفه شدتها سدرة من ذراعها وقالت..
/احترمي نفسك ياغرفه اخر مرة نحذرك..
غرفه برفعة حاجب..
/اني محترمه نفسي انتي اللي مش محترمتيها..وجبدت ذراعها وخشت وسدرة خشت وراها وسكرت الباب وهي معصبه..
🍃🍃🍃🍃
"وين القهوة يامفيده"
مفيده وهي خاشة للصاله قالت بإبتسامه..
/اهي جت..
راجلها قال:طيب فينا..
مفيده ضحكت وقدمت لضيفها مدتله وهي تقول..
/تفضل جمال..
جمال بإبتسامه؛يزيد فضلك..
خدي فنجان القهوة وامتنع عن الحلو..
مشت عطت لراجلها وقعمزت جنبه وهي تقول..
/راك تقول جاك السكر؟
هو قال بضحكه:سكر شني الله يعافينا نبي نحافظ بس..
مفيده؛اها..
راجلها قال؛تعلمي منه..
شافتله بطرف عينها بحده وجمال يشوفلهم و يضحك عليهم..
☘مفيده متزوجه من ولد عمتها وجمال يكون ولد عمها وفي نفس الوقت ولد خال راجلها..
جمال مهندس معماري كبير عايش في دوله خليجيه يدير في شركة لأحد رجال الأعمال غادي وناجح جدا في شغله تزوج قريبته وطلع بيها برا ولأن كل حياته شغل مرته ماتحملتش العيشه معاه وقعد معاها في مشاكل حتى بعد جابوا صغار وبعد سته سنوات زواج طلقها وخلا الصغار عندها وفي كل اجازة يجي يقعد في ليبيا شهر بش يشوف فيهم اهله وصغاره☘
مفيده تنهدت بتهكم بعدين قالت لجمال..
/ايه جمال شن حالك شن داير في الشويت..
ضحك وقال..
/زي قبل مافيش جديد..
مفيده؛جوك الصغار؟
جمال؛ايه روحت لقيتهم في حوش العيله قبلي..
مفيده؛باهي قولي شن دايرين مع الكورونا!؟
جمال:طلعت من عينها يابنت عمي..
مفيده بصدمه؛حي عليك!؟
راجلها قال:قالك طلعت من عينها..
جمال بضحكه:الحمد لله الرعايه غادي ممتازة مافتش اسبوع والاعراض اختفت وقبل لنسكر شهر شفيت منها تماما..
مفيده؛باهي حمد لله ع سلامتك..
راجلها قال:حتى هني حالات واجده برن من الكورونا..
جمال:وجعني الحاج بريك مسكين..
مفيده؛هو وجاره بلعيد ومرت بلعيد خالتك سالمه كلهم ماتوا من الكورونا..
جمال بأسف؛لاحول ولاقوة الا بالله..انا لله وإنا إليه راجعون..تنهد وقال..بالله شن حال خالتي كامله؟
بإبتسامه؛الحمد لله في خيار خيرها..
جمال؛تو نديرلها زياره الايام هادي ان شاء الله..
مفيده وهي تشوفله خطر عليها خاطر عليها تبتسم وهي مضيقه عيونها بعدين قالت..
/مرحبتين بيك..
