طوبى "جنة طوبى"
#جمان_فريد
#الجزء_117"رحلة حب وحرب"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#تاج_الذكر
لاإله إلا الله وحده لاشريك له له الملك وله الحمد وهو على كل شيء قدير.. 🌿🌿🌿🌿🌿🌿🌿🌿🌿🌿🌿🌿🌿🌿🌿🌿
🍁 "وإذا رُزِقتَ بمَنْ يُحبُّكَ صَادقًا
حَافظْ عَليهِ فَمِثلُهُ لا يُوجَدُ
يَكفِيكَ قَلبٌ واحِدٌ عَنْ أمَّةٍ
تَحظَى بهِ بعدَ العَناءِ وتَسْعدُ"🍁
__________________________________________
طول الطريق كان الصمت سيد الموقف..
هي قاعده تحس بشعور الإحراج والكسرة..
تحبه وحبها ليه كبير مدسوس في قلبها وع بالها مايعلمش بيه وهي ماتعرفش انه يحبها اضعاف حبها ليه..
تعرف بس ان زواجه منها من باب الواجب وانه يأدي في حق لطفي الواعر عليه اللي أمنه ع عيلته قبل ايام من موته..
حيكون في بالها انها حمل ثقيل عليه خداها مريضه بش يساعدها تتعالج..يعني حيعانيها ويتعب معاها والله اعلم مرات يمل بعدين ومعاش يقدر يتحمل..
ممكن لو كان راجل تاني ماتكنلاش اي نوع من المشاعر كانت الحكايه هينه عليها..
لكن هي تحب الراجل هدا ومعجبه بيه اعجاب كبير واي مراة تتمنى تكون ديما حلوة ونظرة وبهيه وفي احسن حالاتها قدام الراجل اللي تحبه وللأسف هي توا في اسوأ حالاتها وجمالها معادش موجود،غير هدا كله هو راغب غيرها وكان ناوي ع الزواج منها يعني حتعيش معاه ع انه زوجته وفي قلبه غيرها!!
مرة تانيه...!
نفس الحالة مرة تانيه!!
بس هالمرة اصعب لأنه تحب من كل قلبها..
هدا كله كان كفيل يخلي طوبى تحس بالكسرة والنقص وشويه الثقه بنفسها اللي قعدت عندها تتلاشى نهائيا..
☘اما هو ياما شايل وعقله مابطلش تفكير كل مرة في حاجه..لكن قلبه وسط ضلوعه بيفر فران..حجم المشاعر اللي داسهم في صدره حسهم حيشقوه ويطلعوا...
يبي يتنهد مافيش غير التنهيد يريحه ولو شويه..
تنهد من وسط قلبه..والتنهيده هي سمعتها وفسرتها ع انها تنهيدة هم...
حطت ايديها ع بعض وشدتهم ببعض بقوة والدمعه في محجر العين..
فجأة وقفت السيارة..شافتله..
هو بدون مايشوفلها قال..
/شويه وجاي..نزل من السيارة وسكرها كويس ومشي..
هي قعدت تبع فيه بعيونها شافاته خش لمحل حلويات غيرت عيونها عنه وقعدت تمرر فيها ع السيارة،من ريحتها تبان جديده.
ثبتت نظرها ع الدومان"مقود السيارة" لماشافت خاتم تسبيح عالق فيه هدا وين انتبهتله..ابتسمت ابتسامه خفيفه بعدين ردت نظرها للمحل شافاته طلع بسرعه غيرت نظرها القدام..
وصل في السيارة فتح الباب وركب..
سكر الباب وحط كيسة جابها معاه ع رجليه وبيده تانيه حط طاسة افوكادو قدامه ع التابلو..
هي كانت حاسه بخجل واحراج ووجهها محمر اللون
شافه..ابتسم..بعدين مدلها بوكس متوسط الحجم وقال..
/متأكد مش كيف اللي ديري فيها..
شافت يسارها جو عيونها ع بوكس الحلو مدت ايديها اللي كان يرجفوا وخداته
فتحاته لقت فيه طرف دونات كبير مزين بصوص الفرواله والحلوى..
مدلها طاسة الافوكادو وقال..
/مش عارف كان تحبيه ولالا قلت نجرب حظي وناخده ع فكرة انا حظي ديما سمح..
هو يتكلم وقلبها يستجيب بكل لهفه مع كل كلمه مع كل حرف مع اللكنه اللذيذه ونبرة الصوت اللي كلها رجوله وفيها حنيه..
وجهها من احمراره حساته سخن لو تنزل عليه ميه تتبخر..
شافت للطاسه ومش قادرة من خجلها تقيم عيونها فيه وكأنه عمرها لاشافاته ولاعرفاته مدت يدها خدت الطاسه وحطتها جنب البوكس وقعدت تشوفلهم..
هو بإبتسامه قال..
/هيا كولي وماتتحشميش خليك عاديه اعتبريني مش موجود..
🌸لاوين تعتبرك مش موجود هي توا معاش تبي تحس الا بوجودك معاها وحواليها..
بدت ع وجهها ابتسامه خفيفه..شافت لإيديها اللي كانوا مغطيات بقفازات لونهم رمادي قعدت تفكر لثواني بعدين بدت تحول فيهم وهو ماقدرش يحول عيونه عنها..
عيونه ماصدقوا بش يقعدوا يتأملوا براحه بدون خوف ولاحياء من رب العالمين...
هي بعد ماحولت القفازات خدت كلينكس وجت بتاخد بيه الدونات لكن وقفت لما انتبهت لحاجه بدون ماتشوفله قالت..
/وانت!؟
هو بإبتسامه قال..
/مانحبش الحلو واجد وتقدري تقولي نهائي..
خدت الدونات وقعدت تقسم فيها بين اتنين ماكانوش متساويين واحد منهم جي اكبر من التاني مدتله الكبير بدون ماتشوفله..
هو بضحكه قال:والله لو نبي خديت لكن ع خاطرك ناكل مش رادك..
وخداها من يدها ورجع يتأمل فيها..
تفكر اول مرة شافها فيها..
شاف حنانها ورحمتها لما نزلت من سيارة لطفي بش تسقي الكلب..كانت اقرب للملائكه في هديكا اللحظه بريئه وصافيه وحلوة بالمرة..ولعند هاللحظه قاعده في عيونه هكي..
تبدلت نظرة عيونه المغرمه للحزن وهو يتأمل فيها وقلبه موجوع عليها..اللي زيها هي يستاهل يكون سعيد عمره كله لكن لله حكمة وهو ارحم بيها من اي حد وفي الف دليل ودليل ع رحمته العظيمه بيها..
بدت تاكل وتشرب شويه شويه..وهو ياكل مرة ويتأملها مرات لعند ماكملت حصتها من الدونات لكن الافوكادو ماقدرتش تكمله..
عبد القيوم بإبتسامه..
/تحبي الحلو واجد شكلك!؟
هي اللي كانت تمسح في فمها بالكلينكس قالت بخجل..
/ليا هلبه عليه..
تنهد بعدين قال..
/كملي العصير..
طوبى:رزين هلبه ماقدرتاش..
عبد القيوم:يعني ماتحبيه؟
ضحكت بإحراج وقالت..
/الصراحه ايه..
عبد القيوم بإبتسامه..
/باهي شن تحبي..
بخجل قالت..
/الفراوله والمانجا...
ضحك ضحكه خفيفه بعدين خدي البوكس اللي كان محطوط ع رجليها حط فيه ماقعد من حصته وحطه بينه وبينها وشغل السيارة وتحرك..
رجعوا التزموا الصمت لكن القلوب مابطلتش كلام القلوب مازال عندها ماتحكي مازال وهما حاليا مجبورين يكتموا كلامها إلى أجل غير معلوم..
🍃🍃🍃🍃
وبعيد عنهم..بعيد هلبه..في احدى مستشفيات دولة اوروبيه..
طلع مختار من حجرة بروفيسور قلب وكهربائية قلب وهو يرفع في كمامته ع فمه وانفه..
جاه اتصال قلب عيونه بملل ورفع تليفونه..شاف المتصل بنظرات امتعاض بعدين فتح الخط ورد..
/قال نفس الكلام يافاتن لازاد لانقص..
"اكيد يامختار!؟"
مختار بتهكم..
/لافي الشك..
"مختار"
مختار:والله هدا ماقال واني خلاص اخر مرة نعاين عليه قلبي هدا مليت منه قريب نطلعه ونلوحه للكلاب بش نرتاح من همه.
سمع صوت ضحكتها ابتسم..
"باهي خلينا في الجد مرات الحكايه تكون ليها علاقه بالنفسية يعني نوبات هلع او خلعه يسببوا نفس الأعراض"
مختار:مامشقيه روحك يابنتي وانتي دوري ورا هالعله..
"مش اني بس حتى علوشي"
مختار ضيق عيونه وقال..
/علوشي..لالا فكينا منه الدلع هدا ..
"علاش"
مختار:تعرفي التوانسه شن يقولوا للخروف!؟
سمع صوت ضحكتها..
مختار:قوليله علاوي علاوي لين رونق وهيبه..
ردت عليه وهي تضحك..
"باهي يارونق انت بنقولك مشيت اليوم درت ايكو وشفته كيف ولى قريب طلعته من بطني معاش عندي صبر"
مختار بإبتسامه..
/تو يطلع ويهبلك وتقولي شن درت في عمري..
"لالا مانقولهاش"
قاللها وهو مبتسم...
/باهي خلاص سادك يانفاخه بنسكر..
"رد بالك ع روحك يابراوي"
ضحك وقال..
/حتى انتي..تشاو..
ونهي المكالمه وهو طالع برا المستشفى..
فتحله الاقجم باب السيارة من الخلف..ركب وهو يفكر في كلام البروفيسور اهم نقطه في كلامه بالنسبه ليه هو تحذيره من اي شي يسببله في إنفعال او توتر..
تحركت السيارة..هو نزل المرش وقعد يتفرج ع مناظر الطبيعه الحلوة..
يحاول يلهي نفسه عن التفكير في اخر لقاء بينه وبين طوبى..
هداكا اللقاء اللي طلع منه وهو في قمة الغضب..
🔺️🔺️🔺️قبل اسبوع🔺️🔺️🔺️
بدي يتكلم معاها بحماس وبلغة ترغيب واغراء..
/في بالي مشروع حتكون فيه مصلحه لينا كلنا لعيلة الواعر
عيلة علي مختار الواعر اللي انشهروا بقهوتهم التي لايعلى عليها...قهوة جنة..المشروع اللي في بالي نبي نرد بيه هديكا الأيام بأحسن ماكانت عليه..مشروع كبير ياطوبى وينافس ويطلع برا البلاد..نبي نرد مطحن جنه للشارع مرة تانيه ونخلي عيلة شنيبه يسيبوا القهوة وينسوا البن ومايجوا منه..
☘هو يتكلم ومش مركز ع ملامح طوبى ونظراتها البارده
وكأنه مايشوف في شي غير في حلمه اللي يحكي عنه كان عايش حاله غريبه وهو يتكلم وفي عينه باينه لمعة الدمعه..
مختار:طوبى..نبي نشري حصة عمي وعمتي من حوش جدي..ونبي نشري منك الحوش هدا..توسعوا عيونه وهو يقول بمحاولة اقناع..حنشريلك خير منه في منطقه احسن من هادي..وندخلك معاي شريكه وكله بالورق مش مجرد كلام..حنديروا مع بعض مشروع كبير..كبير هلبه..الحوش هدا نديروه مطحن..والحوش اللي جنبه مقهى وحداهم محل الحلويات حتكون صفة كامله بإسم جنة من زيها الشفشه..ضحك بعدين قال..طاوعيني ياطوبى وصدقيني مش حتندمي..
طوبى عقدت حواجبها وقالت..
/تو مش انت عندك مطحن؟
خف شويه حماسه بعد ماسمع سؤالها وركز ع النبرة اللي قالاته بيها..
مختار:بعته..
طوبى تنهدت وقالت..
/ماعلينا..شوف مختار وخل نجيبهالك من الآخر..الحوش هدا..انساه..طلعه من حساباتك..الحوش هدا وصية بوي وصية بوي اللي فرطت في جزء منها لما خليتك تخش عليه وتطلع..الحوش هدا مستحيل نسلم فيه مادامني حية..راجيني لين نموت بعدين دير ماتبي..
🍃بعد مانهت كلامها ماردش عليها بغير نظرات بارده مخيفه..بعدين ناض ومشي طلع من الحوش وهو يغلي من الغضب..
🔺️🔺️🔺️الوقت الحاضر🔺️🔺️🔺️
مختار بوعيد قال في نفسه..
"حناخده ياطوبى تبي ولاماتبيش حناخده"
🍃🍃🍃🍃🍃
وبالرجوع لأرض الوطن روحوا يوسف وجهينه استقبلهم اخ جهينه ورفعهم لحوش اهلها قعدوا نص ساعه وبعدين طلع يوسف بسيارة نسيبه مع زوجته لحوش جده علي الواعر..
ويحظوا بأحلى إستقبال من العيله..
صفيه قعمزت جنبها كنتها اللي كانت فرحانه بيها وبحملها فرحه كبيره..ومابطلتش اسئله عن حالها وعن وضع البيبي وجهينه الكنه اللطيفه المحترمه كانت تتعامل معاها وكأنها امها وتساير فيها وتشرحلها بالتفصيل واميمه حداهم تسمع وتتأمل في جهينه وهي فرحانه من قلبها اللي ربي عوضهم بكنة بنت أصل زي جهينه..
غيرت نظرها عنها لبنت عمها غرفه وهي كيف خاشه عليهم..
عيونه حمر وصوتها مبحوح كانت حزينه جدا ع حال اختها وفاقدتها وخايفه عليها وجت مجبورة تسلم ع ولد عمها ومرته من باب الواجب..زي مادارت اريج..
الزوز ماقعدوش اكثر من نص ساعه وروحوا بالصغار..ماكانش عندهم قابلية لشي وبالهم مشغول ع طوبى..
🍁🍁
طوبى اللي كانت هادي وصلتها هي وراجلها لحوازته في مدينة الخمس..
خش بالسيارة وهي جنبه تتفرج ع منظرها الحلو قدام الحوش اللي فيها..لاحظت ان فيها حاجات متغيره..
التنسيق..الاضويه.. فيها حاجات متغيرة مش قادرة تحددها زايدة المكان حلاوة.
"طوبى"
رعشة قلبها لما سمعت اسمها بصوته وهو ينطق فيه احلى نطق عاطي الإسم حقه وقظتها من سرحانها..
شافتله..لقاته واقف ع باب السيارة من جيهتها بعد مافتحه..
نزلت عيونها وهي محرجه ومرتبكه وين جت بتنزل من السيارة تلخبطت خطوات رجليها وكانت حطيح لكن هالمرة تلقاها لما حط ايديه ع ذراعاتها وهو يقول..
/بالشويش..
زادت احراج ع احراجها كان تلقى الارض تنشق وتبلعها..
هو بعد عنها وقال..
/انزلي ع مهلك..
نزلت وتباعدت ع الباب وهو سكره وقال..
/الجو حلو ونسمته باردة..
طوبى:اممم..
هو شد ضحكته..مش متعود عليها بهالحاله ومع هذا عذرها مافي شي من اللي صار معاهم كان طبيعي وتبي تاخد وقتها بش تستوعب وتتعود..
جي جنبها وقال..
/تعالي..
مشي وهي معاه..رجعت توزع في نظرها ع المكان..حست بشعور غايه في الحلاوة هو نفس الشعور اللي تحسه لما تخش الخمس بس هالمرة كان حلو بزياده..
وصلوا للباب..كان حديد ع هيئة قضبان مزخرفه لونهم اسود في الذهبي..فتحه..
جي بعده باب خشبي لونه رمادي اعلاه اشبه بالشباك فيه مربعات من زجاج فتحه ووقف ع جنب..اشر بيده داخل وهو يقول بإبتسامه..
/سمي بالله وخشي..
ابتسمت ابتسامه خفيفه وقدمت خطوة بعدين خشت برجلها اليمين..
فتحت عيونها ع وسعهم بإنبهار لما شافت التغيير الكبير اللي طرأ ع الحوش..
ديكوره كله متغير..كان حديث لكن يفتح النفس بسيط في مظهره لكن حلو بالمرة...
خش بعدها وقال..
/المرة الوحيده اللي جيتي فيها هنا كانت قبل سنه..تغيرت عليك!؟
طوبى:كأنها مش هي!
عبد القيوم بإبتسامه..
/شن رايك!؟
ابتسمت وقال..
/حلو..
قربلها وخدي يدها..هالمرة ماكانش فيه حائل..مسكته هادي كان تأثيرها اقوى من الاولى..
مشي بيها وهي مش حاسه بنفسها وكأنها ريشه طايرة في الهوا..
وقف بيها قدام الكوجينه اللي كان نظامها بار وقال..
/بعد ترتاحي خشيلها شوفيها كان لقيتي حاجه ناقصه قوليلي..
وخداها مرة تانيه جهة الديار هي كانت تشوفله وقلبها يدق بكل قوة..
وصل في الدار اللي قبل باتوا فيها هي وعيلتها..
فتح الباب وقال..
/هذي دارك..
خش فتح الضي وشافلها..
هي مررت نظرها ع الدار ديكورها حلو بالمرة بس لونها كان مفاجاة بالنسبه ليها..سماوي درجة من درجات اللون الازرق اللي تحبه..
هو قال..
/نخليك تتعرفي ع دارك وتاخدي راحتك..
شاف لساعة يده قال..توا 9ونص..العشرة اطلعي جهة المظله الكبيرة نرجى فيك غادي..
هي هزت راسها بإيجاب بدون ماتتكلم..
مشي بيطلع وهو يقول..
/كان احتجتي شي ناديني..تمام!؟
التفتت وقالت..
/بارك الله فيك..
ابتسم وخدي الباب وسكره..
غمضت عيونها وخدت نفس عميق..بعدين طلعاته شويه شويه..
فتحت عيونها والتفتت لشناطيها وصلوا قبلها بيوم للحوش..
كانوا محطوطات جنب كنبه طويله لونها سماوي في الأبيض..
قدمتلهم وخدت وحده منهم نزلتها وقعمزت ع رووس اصابعها وفتحتها
وقفت ع حيلها ومشت للدولاب اللي كان سحاب وفتحاته..
جمدت في مكانها لما شافت باقة ورد بلدي شكلها حلو بالمرة..
ارتسمت ع وجهها ملامح الضحكه وقلبها ولاقال نهدا..مدت يدها وخدتها وهي تتأمل فيها..تنهدت من قلبها وقربتها لوجهها..غمضت عيونها وهي تشم في ريحتها وتتفكر في كل شي صار بيناتهم من لما ركبها السيارة لعند هاللحظه..
فتحت عيونها لما نبههاعقلها وفكرها بحاجه غايه في الأهميه..
🔺️🔺️في وقت سابق🔺️🔺️
طوبى بصدمه وخوف ودموعها ينزلوا..
/لهالدرجة وضعي خطير..لدرجة هو يضحي ويتزوجني وانتم ترضوا بهالحاجه هادي عادي!؟
سدرة قالت بنبرة باكيه..
/ايه يابنتي مش كاذبه عليك خطير هلبه والراجل لما عرفه هو اللي اقترح هالحل وقال هادي وصية بوي الله يرحمه هو أمنه علينا..
طوبى بنبرة مخنوقه ونظرات عيون كلها كسرة وحزن.
/تبيني نعاود نفس الغلطه ياسدرة نعيش نفس المأساة مرة تانيه ناخد راجل يحب غيري ويبي يتزوجها!؟
رشفت سدرة وقالت..
/يابنتي هدا مش زواج بمعنى الكلمه..هو بياخدك بش يقدر يعالجك لأن هالنوع من السحر يبي حد يفهم فيه يكون مع المسحور طول الوقت ويعرف يتعامل معاه..يابنتي المرة اللي فاتت لولا لطف ربي راك رحتي فيها..
طوبى بدت تبكي وهي تقول..
/فاهمه والله فاهمه لكن واعرة ياسدرة وانتي تعرفي علاش واعره..
ضمتها لحضنها وقالت..
/الله غالب حبيبتي الله غالب هدا قضاء الله وقدره وانتي تعرفي ربي اكثر مني قولي الحمد لله وارضي بحكمه..
زادت خشت في حضن سدرة وهي تبكي بألم..
وسدرة كان تلقى تحطها في قلبها وتسكر عليها وتحميها من شر الدنيا ومواجعها...
🔺️🔺️🔺️الوقت الحاضر🔺️🔺️🔺️
طاحوا دموعها..دمعه وراها دمعه..باعدت الباقه والتفتت حطتها ع الكنبه..بعدين مشت للشنطه وقعدت طلع منها الحوايج وتحط في الدولاب"الخزانه" وهي تبكي بصمت..
🍁وبرا الحوش اللي قاعده فيه..
كان عبد القيوم واقف يجري في مكالمة مع...
"السلام عليكم ورحمة الله وبركاته ياهراب معقول تعدي من غير ماتسلم ياولد اختي"
عبد القيوم بإبتسامه..
/سامحني ياخالي عقلي ماكانش معاي..
"عارفك مخليه فطرابلس"
ابتسم وقال..
/تزوجت..
"والذي رفع السماء بغير عمد عرفتك بديرها"
عبد القيوم:ماقدرتش ياخالي والله ماقدرت..
"قتلك عارفك جيتني وقلبك محروق اول مرة نحقك بهالحالة لكن قولي كيف بدير مع باقي العيله"
عبد القيوم؛حاليا مانبي حد يعلم لما يجي الوقت المناسب نخبرهم...
"نا واثق فيك ونعرفك راجل قد قرارتك وقد اي حاجه تخش عليها..استعن بالله ولاتعجز ياولدي وخلي ديما في بالك ان المراة توا قعدت امانه في رقبتك وبينك بينها ميثاق غليظ رد بالك تكسرها ياولدي وتزيدها على مابيها.."
تنهد بإبتسامه بدون مايرد..
"سمعتها التنهيده وفاهم المعنى منها لكن نبي نقولك الحب بروحه مايدير شي في حاجات مازال اهم مع الوقت تعرفها"
هز راسه وقال:ان شاء الله..المهم خالي حنقعد معاك ع اتصال خلي هاتفك معاك في كل وقت..
"حاضر ياولدي حاضر"
عبد القيوم:ماتبي شي..
"دير اللي وصيتك عليه"
بإبتسامه قال:إن شاء الله..
"تصبح ع خير السلام عليكم"
عبد القيوم؛قدامك كل خير..وعليكم السلام..
نهي المكالمه وهو يشوف للهاتف بنظرات ضيق وحزن..
التفت للحوش شافله بنفس النظرات ومن وسط قلبه بنبرة ألم قال..
/يارب..
☘إياك نعبد وإياك نستعين☘
🍃🍃🍃🍃🍃
ومن الخمس لزليتن..
في سانية العمة كامله اللي كانت لامه بناتها وخواتها من قبل صلاة الجمعه..
كامله وخواتها وبناويتهم علاقتهم ببعض قويه ومتماسكه..وخديجه منهم حتى هي..بنتهم..لكن مش واخده تكون وسط اجواء عائليه كلها الفه ومحبة وود وفي الاساس علاقتها بيهم سطحيه ياترى كيف دايرة معاهم!؟
🍃"محتارة شن ناخد نبي نطلع مختلفه واجد في العرس هدا"
خديجه:جسمك حلو هلبه مفيده ننصحك تشري افارول..
مفيده بإستنكار:افارول!!؟ تتسهوكي ياخديجه!؟
عماتها وبناتهم نظراتهم ليها كانت نظرات امتعاض وعدم تقبل..
خديجه؛وعلاش بنستهوك!؟ قصدي مفيده انتي مازال صغيره جو العبايات المغربيه والخليجيه مش لعمرك..
كامله:وشن تبيها تلبس ياحنه !؟
خديجه؛قلتلها..
وحده من عماتها قالت..
/شبحتي فيك شبحه تبيها تطلع مضحكه ولا...
خديجه ببرود؛لانبيها ستايل وحاجه مختلفه ع قولتها وحتى لون شعرها تغيره مخليك في عمر امك..
كامله:لسانك مايبي الا القص..
خديجه؛ماقلتش غلط عمتي وانتي مفيده كان سمعتي كلامي والله ماحتندمي..
كامله:نوضي نوضي قصي شوفي العشي تحركي..
ناضت خديجه وهي مبرده ع الاخر ومشت طلعت من حداهم..
بعد ماطلعت وحده من عماتها قالت..
/اعوذ بالله..ناسخة امها نسخ..
كامله:غير كان تعاونوني ودورولها ع راجل وتريحوني من همها..
🍃في الكوجينه..
تتمت خديجه ع العشي وطفت عليه..ولما جت بتجهز الصواني جاها اتصال..
طلعت هاتفها من جيب قفطانها شافت المتصل عيونها تعبوا دموع فتحت الخط وردت..
/نانسي..
"خديج شن حالك"
خديجه بإبتسامه..
/الحمد لله شن حالك انتي وشن حال امي وبوي وخوتي..
"الحمد لله بخير..شن دايرة"
خديجه؛اهو قاعده نحرق في دم عماتك.
"ربي يهديك ياخديجه ماتشعفي"
خديجه:ومن شن نشعف وعلاش..صدقيني يانسرين الناس في وقتنا هدا ماينفع معاهم الا هكي غير انتي درويشه وخيتي..
"صدقتي درويشه..تعرفي عمري ماحسدتك ع شي غير قوتك وقلبك الميت."
خديجه:بش تعيشي في الدنيا لازم تكوني هكي..
"وانتي توا عايشه ياخديجه!؟"
خنقتها العبرة وهي تقول..
/تو نعيش وتو تشوفي..يجي يوم ونفكرك يانسرين..
"خديجه محي الدين تزوج"
نزلوا دموعها وهي تقول..
/الله لايهنيهم ولايربحهم..
"ماقاهرني كان راما مالهاش نهارين دايرة العمليه ونفسيتها زي الزفت وهو ولا مدور"
خديجه بنبرة باكيه..
/شن دايرة!؟
"تقهر ياوخيتي تبكي ع قرايتها والسنه اللي ضاعت عليها"
🍃فهالوقت كانت مفيده جايه للكوجينه ناويه تهزب خديجة وتسمعها كلام تحرق دمها بيه..
وين خشت عليها لقتها منهارة بالبكي..
نست علاش جايه وقدمتلها وهي تقول بخوف.
/خيرك..
وخديجه تبكي بالعبرة وصوتها يرعش..
بسرعه مفيده صبتلها ميه وجتها بيها وهي تقول..
/اشربي..
لما خديجه جت بتاخدها منها فقدت الوعي وطاحت ع الأرض..
🍃مفيده نادت ع امها وخالاتها كل من موجود في الحوش مشولها يجروا..
شافت كامله خديجه مغمى عليها خافت في النهايه بنت خوها وامانته وباقي عماتها وبناتهم قعدوا يعانوا فيها مع كامله لين فاقت..
اول مافاقت خديجه بدت تبكي وتقول..
"بنتي"
خلتهم ولأول مرة يشفقوا على حالها واكثر من تأثر باللي صار معاها..مفيده..
🍃ونسرين اللي كانت نفسيتها مدمرة بسبب تغير حال راجلها معاها ندمت اشد الندم ع اللي داراته..
هي كانت تبي تشكي لأختها ومالقتش غير هالمقدمه بش تبدا ليها شكوتها...
🍃وربيع فهالوقت..
كان في حوش اهله..امه مريضه وجاها بش يطمن عليها والطبيعي ان يلقى خواته معاها ومع خواته كانوا نساوين خوته كلهم موجودات..
وهني عاد امه استغلت الفرصه وبدت ترمي في الكلام ع نسرين وكل وحده من بناتها قالت ماعندها من مشاركه مع صمت الكناين اللي كان عاجبهم الوضع..
🍃وياكم من قصص خراب بيوت سمعنا عنها كان سببها تخبيب الازواج ع بعض..يبدا الراجل يحب زوجته ومتفاهم معاها ومش شايف منها الا كل خير يجوا اهله امه وخواته يشوهوا الحلو فيها في نظره ويفتحوا عيونه ع عيوبها لين يكرهوه فيها،بالذات لو كان راجل زي ربيع عنده استعداد داخلي لتأثر بكلامهم والاقتناع بيه..
🍃وشتان..شتان..بين ربيع وصديقه عبد القيوم...
🍁بعد ماخدت دوش وصلت فروضها..لبست فستان صيفي مستور وواسع لونه خريفي..بني..ولبست شاربه لونها بني باهت طلعت حذاء خفيف من احذيتها لبساته وطلعت من الدار..
شعور التوتر مافارقهاش ومجرد ماطلعت من دار حست معاه بشعور الارتباك..
قعدت تمشي وهي تمرر في نظرها ع المكان اللي كانت تحس فيه بدفء عجيب وكان مليان طاقه ايجابيه..
حتى ديكوره الاضواء متاعه عاطينه رونق خاص..
قلبها رجع يدق بقوة لما شمت ريحة عطره وهي معبيه المكان لهاللحظه مازال مش مستوعبه اللي هي فيه وكأنها قاعده تحلم..
☘طلعت برا الحوش وقعدت تمشي بخطوات حذرة وخجوله بعض الشيء وهي دور فيه..
عقدت حواجبها بإستغراب لما شمت ريحة سمك مشوي!
قعدت تبع فيها لعند ماقربت توصل لمكان المظله..
وقفت في مكانها وهي تشوفله كيف واقف ع شواية كبيرة "منقل شواء" ويشوي في سمك"الوراثه"
لاحظت انه غير حوايجه..كان لابس قميص ابيض وبنطلون اسود وتوا غيرهم لتيشرت نص كم لونه رمادي وسروال جينز لونه ازرق..
مابتش تقدم اكثر..كانت تبي تتأمله وتاخد غايتها كله حلال في حلال..حتى لو ماقدرت طول قلبه ع الأقل تحظى بالنظر ليه وتأمل ملامحه الجذابه جدا بالنسبه ليها..
هو قام يده شاف الساعه بعدين غير نظره عنها لجهة اليسار لقاها واقفه تشوفله..
هي من ربكتها نزلت عيونها وقدمتله..
وهو قعد يشوف لمشيتها الخجوله بإبتسامه وين قربت توصل فيه..
رفع راسه وغمض عيونه وهو يقول بصوت عالي بعض الشي..
/يارب تطلع تحبه يارب..يارب تطلع تحبه يارب..
نزل راسه وفتح وحده من عيونه وشافها وهو مازال يدعي..
لقاها منزله راسها وهي تضحك..
فتح عينه التانيه وقال بإبتسامه..
/تحبيه؟
طوبى:عادي ناكل فيه..
هو تحرك من ورا الشوايه ومشي فات من قدامها جاب كرسي خشبي حطه جنبها وقال..
/ارتاحي.
ولاقالت تغلط وترفع عيونها فيه..قعمزت ع الكرسي وقالت..
/شكرا..
مشي ولى لمكانه وهو يقول..
/العفو..
وقف ورا الشوايه وقعد يشوفلها يبي يشوف عيونها يبي يتملى منهم بس هي مش عاطياته فرصه..
كانت تشبح القدام وتبان سرحانه بتفكيرها
عبد القيوم:شن اكثر شي شدك في المزرعه اول مرة جيتيها!؟
طوبى بدون ماتشوفله..
/كلها..كل شي فيها حلو وماراحش عن بالي..
هو قال..
/اكيد رسمتي منها شي..
ابتسمت وعيونها تعبوا دموع وهي تقول..
/ايه..التفتت وقالت..رسمت الجهة هديكا اللي فيها جذع الشجرة
بإبتسامه قال..
/عجبك مكان الجذع!؟
ردت نظرها القدام وقالت..
/ايه..
عبد القيوم:وشن عجبك تاني!؟
طوبى:المشتل حلو هلبه..ضحكت وقالت..ايه حقه ناسي حاجه في الدولاب!؟
نزل راسه للشوايه وقلب السمك وهو مبتسم..
شافتله وقالت..
/برغم اني مانفضلش الورد البلدي لكن شكرا..
قام عيونه جو في عيونها قعد مركز عليهم بالنظر وهو يقول..
/باهي شن تحبي من الورد..
ردت نظرها القدام وقالت..
/الياسمين..والفل..والاقحوان هو قال:اها معناها الاقحوان اللي في جنان حوشك انتي زرعتيه.
طوبى:ايه..
ابتسم وقال:باهي خلينا نكملوا كلام ونحنا نتعشوا..
هزت راسها بالموافقه بدون ماتتكلم..
عبد القيوم؛اسبقيني للمظله..
ناضت ومشت للمظله قعمزت تحتها وهي عاطياته بالظهر..
لاحظ ان نبرتها تغيرت ولت جاده زياده وكأنها ماتبيش تاخد وتعطي معاه هلبه في الكلام..
غير نظره عنها وهو مضايق وبدي يجهز في العشي..
☘نسقه في الصحون بطريقه تفتح النفس..
مشالها بيهم وصل فيها..حط صحن قدامها ولف من وراها خش للكرسي اللي هي مقعمزة عليها وقعمز جنبها بمسافه..
رجعت حست بالإحراج ماعرفتش كيف تبدا تاكل قدامه..
هو لاحظها..حمحم وقال..
/طوبى..شوفيلي..
قلبها قريب طلع من مكانه ووجهها بدي يحمر..
عبد القيوم:طوبى..
شافت جهته ورفعت عيونها فيه..
ابتسم وهو يشوفلهم وبدي يقول..
/خليك عاديه وخودي راحتك قدامي ومعاي نا راهو انسان بسيط جدا ماتفكريش نهائي قبل لتتكلمي معاي ولاتتصرفي قدامي..تصرفي براحتك وتكلمي براحتك ديري كيف ماانا داير معاك...
طوبى وهي تشوف لنظرات عيونه الحنونه وتسمع في كلامه اللي يقول فيه بنبرة هاديه تريح اللي يسمعها حست بقلبها طلع منه ومشاله وحضنه بقوة..
《 يابنتي هدا مش زواج بمعنى الكلمه..هو واخدك بش يقدر يعالجك》..
عقدت حواجبها وغيرت عيونها لصحن السمك وهي تقول..
/لما نتعود تو ناخد راحتي..
ابتسم وقال:تمام..تعشي..
مدت يدها وبدت تاكل..مازال قاعدة مرتبكه وملخبطه وهو يشوفلها..
ماباش يدخل ولايحسسها انه مركز معاها غير نظره عنها وبدي ياكل..
وللأسف طوبى خجلها كان مسيطر عليها خلت السمك وقعدت تاكل في السلطه..
شافها ماقدرش مايدخلش هو يبيها تاكل بش تعوض اللي فقداته بسبب المرض وتعبها النفسي والى جانب هدا محاربة السحر تبي جسم قوي بش يقدر يقاوم لأن اعراضه تنهك الصحه...
كان دايرلها نظام غذائي معين حيخليها تمشي عليه بش يردلها صحتها والسمك اهم حاجه في هالنظام...
قاللها؛شويه..وخدي صونيتها وبدي يقطلعها فيه ويخلص فيه من الحسك..
وهي تتأمل فيه وعيونها معبيات دموع..
عبد القيوم:تعرفي حتى نا ماعنديش عليه واجد نحب الدجاج اكثر منه ومن اللحم..ضحك وقال..في من حكي قدامك ع الطاجين اللي ندير فيه!؟حاجه عمرك فحياتك ماكليتي زيها ولاحتاكلي..
قربلها الصونيه وشافلها وهو يقول بضحكه..
/مش من طبعي نشكر روحي لكن الحاجه اللي نديرها نحب نشكرها..ضحك وقال..دوتي واجده عارف..هي تعشي بش نريحك من نشفتي..
ضحكت ضحكة خفيفه وشافت للصونيه وبدت تاكل..
وهو هدا وين ارتاح..ورجع ياكل بشهيه...
☘كملوا عشاهم بصمت..وبعدين ناضوا خشوا للحوش..
هي مشت للحمام بش تغسل ايديها..
وهو خش للكوجينه غسل الصحون وغسل ايديه كويس ومشي لداره..
طوبى بعد ماطلعت من الحمام مشت للكوجينه كانت تبي تغسل الصحون لكن لقتهم مغسولات..
ابتسمت من قلبها ومشت شربت ميه..
بعد ماشربت مية جتها رغبة تتفحص الكوجينه بكل شي فيها..
☘وهو في هالوقت خدي دوش ع السريع ولبس تيشرت اسود نص كم وسروال اسود وبعد مشط شعره غسل نفسه غسل بالعطر وطلع من الدار...
لقاها في وسط الحوش مقعمزة ع الصالون مربعه ايديها وتبان سرحانه..
قدملها وقعمز جنبها بمسافه..
شمت ريحة عطره استاقظت وشافتله..
ابتسم وقال:تبي نطلعوا برا ولانقعدوا هنا!؟
طوبى:لاخلينا هني احسن..
عبد القيوم:ع راحتك..نزل عيونه وخدي نفس..شبك اصابع ايديه في بعض ورفع عيونه فيها وقال..
/طوبى اكيد عندك خلفيه عن حالة السحر اللي عندك..
بدون ارادة منها نزلوا دموعها هو قلبه انقسم نصين عقد حواجبه بألم وهو يقول..
/لالا طوبى لا..وبأصابعه الابهام مسح دموعها ونزل ايديه وهو يقول..المؤمن المصاب..والرسول عليه الصلاة والسلام ربك ابتلاه بالسحر..فكري بس انك قاعده تاخدي في أجر لما تصبري ع الابتلاء وفوق هكي تكفير ذنوب..هذي حاجه..الحاجه التانيه والأهم..لازم يكون عندك يقين قوي..ايمان قوي بالله سبحانه وتعالى انه حيشفيك ويخلصك..تفكري ولايفلح الساحر حيث اتى هذى كلامه سبحانه وتعالى..اعتبري نفسك خاشة حرب مايحارب فيها معاك حد غير الله سبحانه وتعالي تتوقعي انك تخسريها!؟ مستحيل..بنقولك حاجه مهمه واجد..نوع السحر هدا لو صاب حد تاني غيرك اثره حيكون اشد لكن انتي وكيف مانعرف عنك متمسكه بصلاتك واذكارك تحفظي في القرآن دايرة خير مع ناس واجده هذى كله ساعدك ومازال حيساعدك ياطوبى..ربك اللي ابتلاك ماخلاكش وسخرني لك بش نساعدك وحندير معاك اللي يطلع بيدي واللي مايطلعش لعند مايخلصك الله من هالابتلاء ويشفيك..
☘كلامه هون مصابها في عيونها وحسسها بشعور قوه تسلل لقلبها اللي قاعد يرجف من المتكلم ..
بنبرة ألم وهي مبتسمه بإمتنان قالت..
/انت بالذات مش عارفه كيف بنوفيك حقك ع كل شي درته وقاعد دير فيه..اللي عشته خلاني معاش نصدق ان الدنيا مازال فيها خير..لكن انت غيرت نظرتي هادي خليتيني نفهم علاش بوي وجدي الله يرحمهم كانوا قراب عليك هلبه ويحبوك..
حك رقبته من الخلف وغمض عينه اليمين وقال بضحكه احراج..
/وجهي انحمر صح! ضحكت بخجل..
هو كمل يقول..
/انحمر كيف وجهك توا غير مش باين..
بدت تضحك من قلبها..
وهو مع ضحكتها يضيع حتى نفسه ينساها..
قعد يشوفلها بنظرات تغزل في الحب غزل لمعته باينه في عيونه وقلبه طاير وسط ضلوعه جن جنونه في ضحكتها..
هي هدت ضحك وشافتله..شافت في عيونه نظرات اول مرة تشوفهم من حلاوتهم ماقدرتش تغير عيونها عنهم..
وزادت ضيعاته في عيونها الحايرة اللي علقوا قلبه فيها..
اللحظات هادي اللي يتمنوها تستمر وماتنقطعش..
قطعتها رنة تليفون طوبى..الرنه كانت مزعجه لكن خلتهم يستاقظوا..
حمحم وقال بشي من الربكه .
/هاتفك..
طوبى بتوتر:وينه نسيت وين حطيته..
مرر نظره حواليه وهو مازال مرتبك بعدين حك رقبته من الخلف وناض مشاله..كان محطوط في الشحن ع طاولة الشاشه..
خداه وفكه من الشحن ورجعلها مدهولها..
هي خداته شافت المتصل ابتسمت وفتحت الخط..
/السلام عليكم سدرة..
"وعليكم السلام ياعيوني هاه شن حالك حبيبتي توا وشن الجو عندك وهدا عبد القيوم شن داير معاك يعامل فيك كويس!؟ قولي كل شي بنتي ماتخافيش"
ضحكت بإحراج وقالت..
/بالشويه حبيبتي هدي نفسك والله حالي باهي واموري تمام..
"هو شني معاك قولي الحق"
طوبى بخجل:كويس..
عبد القيوم وهو ماشي الكوجينه سمع طوبى شن قالت عرف شن قالتلها سدرة ابتسم وحرك راسه يمين ويسار..
"باهي بنتي باهي تعشيتي"
طوبى:ايه..
"شن تعشيتي"
طوبى:وراثه مشويه..
"باهي كويس كويس صحتين.."
طوبى:ع قلبك حبيبتي..مشيتي شفتي يوسف ومرته؟
عبد القيوم وهو في الكوجينه يشرب في الميه كان مقعمز يتأمل فيها وهي تتكلم..
"لاغدوة ان شاء الله نمشي"
طوبى:بالله طمني غرفه واريج وقوليلهم تو نكلمهم ماسنجر..
"باهي باهي"
طوبى: معاش كلمتي عمتي مطيرة..
"كلمتها بعد ماروحنا حالها خير من قبل والاعراض خفت عليها الحمد لله"
طوبى:تو نكلمها غدوة ان شاء الله..
"ان شاء الله..باهي بنتي بنسكر توا ردي بالك ع روحك وشن مايصير معاك اتصلي طول تلقينا بعد اقل من ساعه اني وعمك المهدي قدامك"
طوبى:ان شاء الله مانفقدكم يارب حتى انتي ردي بالك ع روحك..
"حاضر..تصبحي ع خير بنتي"
طوبى:قدامك كل خير حبيبتي..
نزلت طوبى الهاتف بعد ماسكرت سدرة..
شافت القدام لقت عبد القيوم مقعمز يشوفلها لما شافاته ابتسم وقال..
/الشفرة هذي فيها رقمي ورقم سدرة وخالك بس؟
طوبى:ايه..
ناض ومشالها وفي يده شيشة ميه متاع ربع لتر..
وصل فيها مدهالها وقال..
/اشربيها كلها..
طوبى:مية رقيه؟
هز راسه بإيجاب..
طوبى:ماديرلي شي..
عبد القيوم:هما يبوك تفكري هك بش تخليها اشربي اشربي..
خدت نفس وفتحت الشيشه سمت بالله وشربت...
وهو يشوفلها..
كملتها وهوقال..
/عندك حاجتين حاليا تمسكي بيهن وبقوة..كثري دعاء وكثري سجود..يعني ماتصليش الفروض بس حتى النوافل..
طوبى بضيق..
/صلاة الفرض وصعبه عليا..
هو قال:معليشي قاومي وفي البدايه مش لازم تصليهم كلهم..
تنهدت وهزت راسها بإيجاب..
عبد القيوم؛حنبدوا بالتدريج وحده وحده لعند مانوصلوا ل14الشهر الجاي..
طوبى بخوف:زعمه شن يصيرلي تاني!؟
ابتسم وقال..
/كل خير..ماتنسيش ربي فوق معاك وانا هنا جنبك..
ابتسمت ابتسامه خفيفه بعدين ناضت..
هو قال:اخر شي لما تجي ترقدي باب الدار خليه مفتوح..
هزت طوبى راسها بإيجاب ومشت بإتجاه الدار..
قعد معاها بعيونه لين خشت للدار وسكرتها..
تنهد من قلبه..بعدين مشي لداره..
طلع منها غطا ومخده ومشي بيهم للصالون..
قعمز وحطهم جنبه خدي هاتفه من ع الطاوله وقعد يشوف فيه لقي رساله وصلاته من شخص عزيز ع قلبه لما قري محتواها ضحك...
فتحت طوبى باب الدار شافاته يشوف لهاتفه ويضحك..
حست بشي غم ع قلبها..تباعدت عن الباب ومشت خشت السرير تغطت بالغطا وبدت تبكي بصمت..
《 يابنتي هدا مش زواج بمعنى الكلمه..هو وبياخدك بش يقدر يعالجك》
《 راك تكسري قلبك وخليك ديما متفكرة فترة وتعدي》
رشفت وقالت بهمس..
/معاش تنسي ياطوبى معاش تنسي..
غمضت والدموع مازالوا ينزلوا منهم وهي نقول بألم
"يارب"
☘وعدت ساعه رقدت فيها طوبى لكن هو ماقدرش يرقد غمضه..قعد يشوف جهة دارها بنظرات كلها حزن..
ناض ومشي للدار..خشلها..قدم خطوة ورا التانيه لين وصل فيها..
باينه حتى في نومها حزينه..ملامح وجهها قطعت قلبه اللي يموت عليها..
لقي روحه بدون مايشعر نازل لراسه..طبع قبله خفيفه..بعدين مسح ع شعرها وهو يتأمل في ملامحها بحب وحزن..
وقف ع حيله..القى عليها اخر نظره..بعدين مشي لكنبه في دارها قعمز عليها بالطول..ربع ايديه ورفع راسه وغمض عيونه...
#رحلة_حب_وحرب
#طوبى
...يتبع...
