#طوبى "جنة طوبى"
#جمان_فريد
#الجزء_105"كانون الأول/موسم الثلوج"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام]
#الصلاة_على_النبي
قال السخاوي رحمه الله :
الصلاة على النبيّ ﷺ ، من أبْـرَكِ الأعمال وأفضلها وأكثرها نفعا في الدّين والدّنيا .
القول البديع.أهـ.( ١٠٩)٦
.......... 🌿🌿🌿🌿🌿🌿🌿🌿🌿🌿🌿🌿🌿🌿🌿
🍃"حتى و إن تجاوزت كل ما يؤلمني، فأنا لم أعد كما كنت دوستويفسكي|"🍃
______________________________________
من باب مصحة القدس..
خاش وهو يمشي بهيبته بمساعدة عكازه اللي يضرب ع الارض بخفة..
يمشي وهو يوزع في نظره ع المكان لين وصل في الاستعلامات قال للموظفه..
/السلام عليكم..
ردت عليه:وعليكم السلام تفضل بوي..
علي الواعر:بننشد ع دكتور يخدم هني اسمه أسامه الأحمر..
قالتله؛ايه الدكتور اسامه جي اليوم..
علي:وين نلقاه؟!
دلاته ع مكانه وهو شكرها بعدين كمل طريقه..
وصل في المصعد خشله وركب بيه للدور التاني..وفي اقل من دقيقه وصل..
طلع منه ومشي وهو يقرا في اللافتات لين قري اسم القسم اللي يخدم فيه اسمه..توجهله..
وهو ماشي شاف طبيب شاب وقفه وقال..
/معليشي ياولدي وين نلقى الدكتور اسامه الاحمر؟
:دكتور اسامه عنده مرور ع المرضى ياحاج تبي نرفعك لمكتبه تراجيه قدامه؟!
علي:لالا مشكور مشكور..ومشي كمل طريقه وهو يدور لين وصل في ممر خشله..شاف قدامه طبيب واقف ع راجل كبير في السن يشرحله عن حالته ويحاول يطمنه كان اسلوبه محترم فيه شي من الفكاهه طمن بيه الراجل الكبير...
ضيق عيونه وهو يشوفله بتركيز قعد واقف يستنى لين مشي الراجل..مشاله طول..
علي:يادكتور
بإبتسامه قال؛تفضل ياحاج..
علي الواعر:نبي نسألك عن الدكتور اسامه الاحمر وينه نلقاه؟
اشر على نفسه وقال..
/معاك اسامة الاحمر...
عقد علي الواعر حواجبه ومرر نظره عليه من فوق لتحت
واسامه قعد مركز عليه وحس روحه شايفه قبل..زاد دقق في ملامحه بدت ع وجهه ملامح ابتسامة ارتباك لما عرفه..
علي:معليشي نبي ندوي معاك كلمتين..
تصنع الثبات اخفاء لإرتباكه وقال..
/تفضل لمكتبي ياحاج...واشر بيده القدام..
مشي علي الواعر واسامه معاه وهو متوتر بعض الشي..
☘علي الواعر راجل مهيوب اللي يشوفه يهابه واسامه برغم ان كان واثق من نفسه وعارفها كويس لكن غصب عنه توتر وارتبك في حضوره..☘
وصلوا في المكتب فتح اسامه الباب ودخله بعدين خش وراه وسكره..
🍃وفي قسم تاني من نفس المصحه..
كانت في ممرضة تمشي ودور ع اميمه لين لقتها في حجرة مرضى تابع في حالاتهم نادتها..
"دكتورة اميمه"
اميمه شافتها بعدين اشرتلها بيدها تستنى..
كملت شغلها مع الحاله..ومشت طلعت للممرضه..
اميمه؛خيرك انعام؟
:شفت جدك هني..
هي بصدمه؛جدي!؟
:ايه شفته وقف ع الاستعلامات بعدين مشي ركب الاصنصير وين سألت مودة متاع الاستعلامات قالت سأل عن الدكتور اسامه..
حطت يدها ع فمها وهي تضحك..
الممرضة بإبتسامه..
/شكله الدكتور اسامه جاه امتحان مفاجئ..
نزلت اميمه يدها وهي قالت بضحكه..
/كويز ع غفله...
🍃🍃🍃
ممكن الامتحانات اللي دارهم في سنين دراسته ماخلوشي متوتر ربع التوتر اللي عايشه توا قدام جد حبيبة العمر..
علي:شن وضعك بالزبط شن درت وشن ناوي دير!؟
اسامه؛اني كملت دراسه في كندا وخدمت غادي وان شاء الله نبي نكمل غادي..
علي؛وعلاش روحت توا؟.
ابتسم وقال..
/نبي نتزوج ونولي مع زوجتي..
علي:وزوجتك غادي شن بيكون وضعها !؟ طيب وتغسل وضم بس!؟
اسامه بضحكه؛لانهائي مش هدا بس هي طبيبه نبيها تكمل وتخدم معاي غادي..
علي؛انت عارفني من نكون!؟
اسامه:ايه جد الدكتورة اميمه الواعر..
عقد حواجبه وقال..
/تزبط شكلي قصدك!؟ وين شايفني!؟ مراقبها ومدور وراها!؟
اسامه بشي من الفجعه..
/لالا مش هكي..
علي قال؛وين المشكله حقك تراقب وتسأل عن المراة اللي تبيها تولي زوجتك..
ابتسم بتوتر وقال..
/لا والله لاراقبت ولاشي..اني شفتك قبل في حفل التخرج..
علي الواعر رفع حاجبه وقال..
/اها..مركز عليا من هداكا الوقت!..
وجه اسامه تغير لونه ولسانه انعقد ضحك بإحراج وشي من الخوف وماقدرش يرد..
تنهد علي الواعر وقال..
/شوف ياولدي..يقولوا مااعز من الولد الا ولد الولد..واميمه عندي بروحها دون باقي احفادي..اميمه مرات تولي امي ومرات تولي وخيتي مكانتها عندي كبيره فوق ماتتصور..ظلمتها مرة لما سمحت نعطيها لواحد ظفرها برقبة مية من امثاله..ماعرفش قيمتها وضيعها من بين ايديه وقاعد لتوا متحسف عليها..جوها بعده هلبه سكرت في وجوههم الباب كلهم لأن مافيش واحد منهم كان يستحقها..لكن انت بنعطيك فرصه لسبب واحد بس..
اسامه ولمعة الدمعه واضحة في عينه يراجي بلهفه يكمل كلامه ويعرف السبب..
علي الواعر:نخليه في نفسي..
استغرب اسامه وقعد محتفظ بصمته..
وعلي الواعر مكمل يقول..
/إن شاء الله تطلع تستاهل هالفرصه..
اسامه:كملت كلامك ياحاج..
هز علي راسه بصمت..
اسامه:نبي نكون معاك صريح اللي بنقوله توا مش متحشم منه واحتراما لجيتك هني لعندي نبي نقوله بش نطمن بالك..اني ياحاج كنت ناوي نخطبها بعد التخرج لكن في من سبقني وتم النصيب بينه وبينها ولما عرفت انها ماتوفقتش حسيت ان ربي كاتبلي فيها نصيب ماراجيتش روحت طول بش نخطبها طول وصدقني ياحاج حندير جهدي كله بش نعوضها ونساعدها توصل للي تبيه..زمان لما كنا زملاء كانت تقول طموحي نولي اخصائيه جراحة مخ واعصاب وبإذن الله حنوقف معاها بش توصل فيه خوده عهد مني ياحاج...
علي الواعر وهو يسمع فيه ركز ع عيونه وع ملامحه وهو يتكلم..كان باين عليه الصدق وباين معاه حبه لأميمه ارتاحله هلبه وحس انه فعلا حيكون العوض ليها..
لكن ظاهريا قال بجديه..
/ان شاء الله خير..قعد نقولك الشرط متاعي..
اسامه؛قول ياحاج!؟
علي الواعر:نبيك تعقد عليها لكن الفرح يكون بعد 3شهور من العقد..اني ماعنديش مشكله لو ماتفاهمتش معاك تطلق مرة تانيه المهم عندي تختار تكمل حياتها مع الراجل الصح...
☘حاليا تمرير فكرة ان الطلاق مش "بعبع" بالنسبه لأهل البنت للخاطب واهله بالذات ولت مهمة جدا بش يعرفوا ان مافي شي يقدر يكسر شوكتهم ولايخليهم ولايخلي بنتهم يتنازلوا عن كرامتها..في من يدير الف حساب للحاجه هادي اما انه يصرف نظر من البدايه او يكمل في الموضوع وهو يشوف ان البنت غاليه ولازم يحافظ عليها..☘
اسامه لما سمع شرطه وباقي كلامه ماخافش..اسامه قريب طار من الفرح..هو كان يلقى يحطها في عيونه ويحرسها برموشهم من ايام الكليه كان مايدور الا في راحتها ويدير اللي يضحكها ويفرحها حتى في القرايه وقف معاها وساعدها هدا كله وهما مجرد زملاء بس فكيف لو ولت حلاله ومسؤوله منه!؟..
ابتسم وقال؛اللي تبيه اني فيه ياحاج..
هز علي راسه بعدين ناض وهو يقول..
/تقدر تبعت ماليك..وعقد القران كان فيها كيف يتم يوم السبت اللي بعد الجاي..
رفرف قلب اسامه فرح ولهفه حاول ع قد مايقدر مايبينهاش وقال..
/بإذن الله..
علي:السلام عليكم..
ومشي بيطلع ناض اسامه وسبقه وفتحله الباب..
هز علي راسه يحييه ع فعله وطلع من المكتب..
وقف اسامه في الباب قعد يشوفله وهو يمشي لين درق من قدام عيونه..
ع طول خش لمكتبه وسكر الباب طلع هاتفه من البالطو وحط ع رقم امه واتصل بيها وكله فرح ولهفه...
☘حلم حياته اللي بعد عنه فتره ومقرب البعيد رده وخلاه واقع☘..
🍃🍃🍃🍃
نزل علي الواعر للدور الاول..
وهو ماشي شاف الطبيب اللي خطب اميمه منه قبل واقف ع ممرضات يهدرز ويضحك رمقه بنظرات ازدراء بعدين غير نظره عنه وكمل طريقه..
"حاج علي"
وقف وشاف يساره لقي اياد جاي ناحيته..
وصل فيه وقال:انستنا ياحاج..
علي الواعر:الله يأنسك ياولدي..كيف حالك؟
اياد بإبتسامه:الحمد لله..انت شن حالك جاي تعاين ولا جيت تشوف الدكتورة؟
علي؛لاكان في عندي موضوع تميته وتوا بنشوف الدكتور وين..
اياد؛تعالى نرفعك لقسمها..
علي:هيا..
ومشوا مع بعض واياد يقول..
/العيله كلها حالهم باهي!؟
علي:الحمد لله بخير ونعمة من ربك..لكن الحق زعلت منك شويه اللي ماجيتش لفرح يوسف..
اياد:كنت مسافر لولدي..
علي:اها..كيف حاله؟
اياد؛الحمد لله وضعه كويس واستقر في خدمته..
علي:ربي يفتحها عليه..شوف ولدي الدنيا قسمة ونصيب ماتخلي حياتك توقف عند حد دور ع بنية حلال تكمل معاها عمرك وماتقعدش بروحك سلم ولدي..
ابتسم بود وقال:إن شاء الله خير..
علي:إن شاء الله..
ضحك اياد وقال..
/اهي الدكتورة..
ابتسم علي وهو يشوف في اميمه جاياته وهي تضحك..
وصلت فيه وقالت..
/شن المفاجآت الحلوة هادي!؟
ابتسم اياد..
علي الواعر:كان ماعندك شي روحي بيا..
اميمه:خلاص كملت بنطلع توا راجيني شويه..
ولفت ومشت بسرعه..
اياد:الله يبارك عليها ولت من اكفأ الكوادر عندنا في المصحة..
هز علي الواعر راسه وع وجهه باديه ملامح الفخر..
🍃🍃🍃🍃
الفخر..من حقه يفخر مش بس لأنها حفيدته...بل فخره اساسا بكفاحها ومقاومتها لظروف حياتها وتغلبها عن كل العواقب اللي جت في طريقها بش وصلت لهني..الاهم من هدا كله..اميمه كافحت بش تحافظ ع اخلاقها العاليه وتربيتها الغاليه رغم كل شي قاسي عاشاته..
🍃لكن في اللي يخلي ظروفه شماعه يعلق عليها انحرافه ودناءة نفسه وافعاله الشريره..
اي صح البيئة عامل مساعد في تشكيل شخصية الانسان بس اللي يكون خيره غالب شره لما يلقى فرصة التغيير للأحسن لايمكن يضيعها من يده اما اللي شره مسيطر عليه مهما تعدي عليه من فرص يعمي عيونه عنها...
🍃"قصة موتها فيها حاجة ناقصه الحق"
ابتسام؛حتى اني حسيت هكي..يللا المراة ميته فكينا من الدوة عليها..
دق باب شقة خديجه..
ناضت وهي تقول..
/اهي جت..
ابتسام؛نادي راما تفتح..
خديجه وهي ماشيه..
/عندها امتحانات..
ابتسمت سلفتها تهكما..بعدين قعدت معلقه عيونها في مدخل الصاله تراجي في خشة نجاة..
وتخش نجاه ووراها خديجه..
هالمرة نجاة نزعت ثوب الحزن ع اختها..كانت لابسه احلى لبس ومتأنقه وحاطه زينه والذهب يبرق برق في ايديها ورقبتها ووذانها..
جت لإبتسام سلمت عليها وقعمزت جنبها..
ابتسام؛الله يبارك طالعه عسل..
نجاة بإبتسامه؛تسلمي حبيبتي..
قعمزت خديجه وحطت رجل ع رجل وهي تقول..
/خلاص سادك حزن مابتردي اختك كان قعدتي حازنه عليها
نجاه اكتفت بالصمت وع وجهها باديه ملامح الحزن..
ابتسام:الله يرحمها ويغفرلها ماينفعها كان الدعاء توا..
نجاه:ايه..الله يرحمها..ابتسمت وقالت..وين ننوسك؟.
ابتسام؛خليته عند عمته عواطف هو وخوته..
خديجه؛تعرف صغار مني تشد زمان ماكانتش متحمله صغاري بكل..
ابتسام:بصراحة هي مش متحمله صغار حد غير ولد الفرخة صفاء واني بلعاني حطيتها في الامر الواقع وخليت الصغار معاها..
خديجه برفعة حاجب..
/كيف!؟
ابتسام:جيتها قدام عمتي قتلها بنخلي عصومي عندك حتى هو يبي شويه من حب عمته..
ابتسمت نجاة ع جنب..
خديجه؛ماقالت شي!؟
ابتسام:ماقدرت تقول شي قدام امها..
خديجه بغل:اني هادي اللي اسمها صفاء كان يخلوني عليها نعطيها طريحة نسمح كبدي فيها..
نجاة؛من البدايه باين عليها مش هوينه..
خديجه؛لفعه من تحت لتحت عاد ربايه هدوكا الشيطانات..
ابتسام شافت لنجاة وقالت..
/سمعتي ضرتك السابقه بدوا يخطبوا فيها..
نجاة؛اخر همي..يخطبوها ولاتنحرق..
خديجه؛كان صار وتزوجت ناخدوا بنتنا..
التزمت نجاة الصمت وفي داخلها دمها يغلي من الغضب
ابتسام؛هو هدا في النهايه بنت هادي مش حتتربى في حياش برانيه..اني علاش مالي راجلي الاول خدوا مني الصغار لماخداني عبد الفتاح مايبوهمش يتربوا عند راجل براني..
نجاة:اللي زي طوبى عايشه دور المراة المضحيه ماظنيش تتزوج مرة تانيه
ابتسام رفعت حواجبها وقالت..
/مالا ردي بالك..
شافتلها نجاه بحده..
خديجه عقدت حواجبها وقالت..
/لالالا مستحيل خوي ونعرفه بعد اللي داراته لايمكن مازال يقبل يشوف في وجهها..
ابتسام:اني قلت هكي خوف منها هي مش منه هو هلبه زيها في الاول دير العبيتر بش تطلق وبعدين ترجع تلف ع طليقها لين ترده
خديجه:نقولك مستحيل اني ادرى بخوي..
ونجاة تفكر في الكلام اللي تسمع فيه بخوف..اساسا هي من غير شي متوترة بسبب زيارة الجالي لبنته غدوة وقلبها مش مرتاح...
🍃الجالي اللي طلع من القراج وخش لجنان الحوش وهو رافع في يده حاجه مستطيله الشكل حجمها كبير كانت مغطيه..
خش بيها داخل الحوش شاف قدامه معاذ طالع من الكوجينه وفي يده كيكه ياكل فيها..
جاه يجري وهو يقول..
"مسدس"
الجالي بضحكه قال..
/باهي راجي شويه نركب نجيبه..
وتوجه للدروج..
فات من قدام الكوجينه اللي كانت فيها سميرة..شافاته قربت للباب ووقفت قدامه وهي تشوفله بريبه وتقول بصوت منخفض..
/ووك عليا..!هدا شني اللطف تقول جثة مكفنه..!
🍃وهو وصل فوق وتوجه لجناحه فتح الباب وخش بالحاجه اللي جايبها..
فك المفتاح من ع الباب بعدين سكره بيه من داخل..
خدي نفس ومشي لجهة معينه..
وقف فيها...فك خيوط الغطا طاح...
وتبان لوحه كبيره عليها صورة طوبى بفستان الزفاف...
ابتسم وعيونه لمعوا..بعدين وقف اللوحه كويس..تباعد عنها شويه وهو يتأمل فيها تنهد من اعماقه وقال..
/حتوليلي ياقلبي حتوليلي ونكمل عمري معاك..والصورة هادي نحطها في دار النوم...التفت وشاف للسرير كان حاط فوقه مجموعه من الصور ليها تتوسطهم اكثر صورة يحبها فيهم اللي كانت مرافقاته طول فترة العلاج...
تنهد مرة تانيه وقال..ياريت مايقعد في هالدنيا حد غيرك معاي ومانشوف وجه غير وجهك الحلو..تعرفي ياقلبي لما توليلي انتي وبنتنا نطلع بيكم من هالبلاد بكل ومعاش نولوا لو شن يصير..خلاص معاش نبي حد غيركم..نبيكم انتم وبس..نبيك انتي بس تقعدي مرتي ياحياتي كلها..
ضحك..حط قبضة يده بين سنونه عدين قال..غير امتى يجي غدوة ونشوفكم بس..
🍃🍃🍃
امتى يجي غدوة!؟
طوبى من خوفها منه كانت تتمنى لو مايجيش..
هالخوف كان حيسيطر عليها لولا انها دراكت نفسها وهربت منه لمصدر راحتها وسكون نفسها...
..القرآن..
ثقلت في لبسها شويه..وطلعت للجنان قعمزت وشغلت القرآن من جهاز MP3..وحطت السماعات وبدت تسمع فيه بصوت قارئها المفضل احمد العجمي..
🍃وعيون سدرة عليها وهي واقفه فوق السطح دموعها ينزلوا زي السيل دموع قهرة وحسرة عليها..
لفت ومشت وهي تفكر في اللي سمعاته اليوم..
تفكر في اللي مازال ماتعرفاش..وتفكر في حاجات تانيه...
وكل اللي تفكر فيه كان مؤلم ولونه اسود قاتم...
وقفت فجأه لما شافت لدار الخزين..
تفكرت اللي انحكالها عن الحادث وتفاصيله...
امعنت النظر هلبه في دار الخزين...شويه بدت تشوف قدامها في مشاهد مش واضحه..بعدين بدت تتوضح..
هي في الدار راكبه ع كرسي وفي يدها شنطه سكرتها وحطتها فوق..بعدين نزلت مسحت عيونها كويس..ومشت خدت قفص وبدت تنظف فيه...
وبعد لحظات خشت عليها اريج...ومابعد هكي تفكراته كله..
شافت للسياج شويه..بعدين مشت بإتجاه الدروج..
لما وقفت عليهم شافت للمستراح..جت بين عيونها اللحظه اللي حست فيها بدوخه ومابعد هاللحظه خلاص معاش تتفكر شي..
لأنها معاش وعت بشي في الدنيا لمدة تسعة شهور...
قعمزت ع الدروج لما حست بتعب..حطت يدها ع راسها بالجنب وع وجهها كانت باديه ملامح الضيق الشديد وقعدت تحدث في نفسها بهلبه كلام مؤلم ومخيف في نفس الوقت..
غمضت عيونها بشده..وحطت ايديها عليهم وبدت تبكي بكتمان...
🍃🍃🍃🍃🍃
نزل الجالي من الجناح وفي يده لعبة مسدس خرز مغلفه قبل ليوصل لوطا خطر ع باله شي..
حول الغلاف ولوحه وراه في المستراح وكمل نزول..
وصل لوطا ومشي للكوجينه بين راسه لقاها فاضيه..
وخر والتفت للصاله مشالها وخش..لقي فيها سميره بروحها تتفرج ع التلفزيون وين شافاته خاش عليها بدت ع وجهها ملامح الارتياب..
مشالها وحط ع الطاوله المسدس..بعدين قعمز وحط رجل ع رجل..
سميره وهي تشوف للمسدس قلبها بدي يدق بسرعه من الخوف ووجهها انخطف لونه ..
المسدس شكله يبان حقيقي وخوفها منه زاد اكدلها هالشي..
هو رفع حاجبه وقال..
/معاذ وين!؟
رفعت عيونها فيه وقالت..
/في اادار حدا وخيته وبنت عمه براله غادي..
تنهد وقال:ماعنديش نيه..غير نظره للمسدس وهو يقول..اكيد شايفه سلاح قبل خوك الله يرحمه كان آمر عسكري..
سميره:هاك قلتها شايفاته عند حد يعرف يستعمله..
فنص فيها وقال..
/شن قصدك!؟
بفجعه قالت..
/لاوالله ماقصدي حاجه..قصدي واخد عليه خوي عادي.والله ماقصدي اللي فهمته...
رخي عيونه وغير نظره للشاشه..
سميره وهي مرعوبه قالت في نفسها..
"في الجديد نشوفه خاش نيبس في الجناح لين يروح بوه"
رجع نظره ليها وقال..
/حطينا ع قناة ليبيا الاحرار..
طول خدت الريموت وحطت عليها..
الجالي:علي الصوت..
ودارت مايبي..
قعد يتفرج ع الاخبار..وهي تشوفله بخوف وتفكر تنوض تطلع ولاتقعد..
فجاه نادى بصوت عالي زي الرعد..
/معاذ..
انتفضت من الفجعه..
عاود ناداه بنفس الطريقه..
هي بتوتر قالت..تو يجي تو يجي..
ع خشة معاذ..نزل الجالي رجله وقرب للطاوله خدي المسدس ووجهه لمعاذ..
هني سميره عقلها طار وبدت تعيط وهي تقول..
/حي يانهار احرف اسود..لاسلم ولدي لا قول لاإله الا الله تربح..
التفت عليها ووجهلها المسدس وهو يفنص فيها ويقول..
/نقصي صوتك..اسكتي..اسكتي بكل..
حطت يدها ع فمها وهي ترعش..
جاه معاذ وهو يقول..
"مسدس مسدس"..
شافله وعطاه المسدس..خبطت سميرة بإيديها ع وجهها..
خدي معاذ المسدس والجالي يقول..
/اضربها..طاع طاع..طاع..
معاذ وهو يضحك وجه المسدس لسميره..
سميره غمضت عيونها بشده وهي تقول ببكي..
/اشهد ان لاإله الا..
وسكتت لما سمع صوت طلقات المسدس..
فتحت عيونها وشافت للجالي وهو بدي يضحك عليها يصوت عالي...
ع جية مغليه تجري من الدار..
خشت عليهم وقالت..
/خيركم شن في!؟
سميره وهي تشوف للجالي بحده..
/انشدي ولدك..
مغليه:جالي!
والجالي مش قادر يبطل ضحك..
مغليه بضحكه؛خير بلاك!؟
هدى ضحك وقال..
/ركبتها السكر كان ماعندهاش مسكينه جديد عليها مازال ماتعرفش بصارتي..
شافتلها مغليه وهي مبتسمه بشماته بعدين قالت..
/تتعود..
مررت سميرة نظرها بيناتهم بعدين تبتت نظرها ع الجالي وقالت.
/انت هكي ولا!؟..خلاص ذنبك ع جنبك..
ومشت بتطلع من الصاله..
هو بلع ضحكته وناض بسرعه وراها يقول.
/خالتي سميرة بصارة..بصارة ياخالتي خيرك..
وتخش سميره لجناحها.
وهو وقف في نص الممر وقال بإستياء .
/حمار..بعدين لف بيمشي شاف امه واقفه تشوفله بشك..
هو هرب بعيونه عنها ومشي طول لباب الحوش فتحه وطلع وخلا امه تفكر بقلق...
🍃🍃🍃🍃🍃
وفي شقة بنتها اللي كانت تجهز في الضيافه لضيوفها..
ضيوفها كانوا حطينها ع القرمه..
نجاة؛وين بنتها اللي من بكري وهي ماشيه جايه..
ابتسام:ع اساس تقرا..
نجاة ابتسمت بتهكم..
ابتسام:بيني وبينك البنت بايرة وماتنفع في حاجه..
نجاة:دلع امها خلاها هكي..
سمعوا صوت طقطقة شبشبها غيروا الحديث..
ابتسام:خودي واحد اصفر وخودي اخضر..
نجاه:تو نشوف..
هي بدت توزع عليهم في الضيافه وتسأل..
/على شنو تحكوا!؟
🍃وبنتها في دارها مسكرتها عليها طارحة كتاباتها قدامها وتكلم في صاحبها ع الماسنجر..
(قتلك مانقدرش والله مانقدر)
(راك وصلتيها لوين وين )
(باهي شن تبيني ندير طلعتي صعبه هلبه)
(خلاص نتلاقوا وقت المدرسه فوتي يوم ماتمشيش خلهولي اني بس)
هي انصدمت بقوة وبدت تكتب وهي ترجف بعدين بعتت..
(مستحيل والله ماهي صايرة)
قعد لحظات مابعتش بعدين وصلتها رسالة صورة..
الصورة اللي شافتها جمدت الدم في عروقها..
صورتها هي لابسه فستان مش مستور..
الصورة خدتها في حفلة عرس عمتها نجاح..
هي مابعتتها لحد غير اسماء كيف وصلاته!؟
معقوله تكون اسماء عارفه بعلاقتها بيه وانتقمت منها!؟
لكن اسماء ليها فترة مسيباته وقطعت علاقتها بيها حتى هي!!؟
اكيد وحده من مجموعتهم خبرتها وهي انتقمت بطريقتها..
أين كان اللي خبر واللي بعت معاش يهم..
المهم توا ان صورها عنده وبدي يستخدم فيهم بش يبتزها ويخليها تنفد طلباته..
في عز صدمتها وفجعتها اللي كادت تقتلها..
بعتلها رساله..
(دبري بأي شكل نبي نشوفك ماتخافيش مني مش دايرلك شي نقعمزوا نهدرزوا في السيارة بس حبي)
طيحت التليفون ع السرير وغمت وجهها بإيديها وهي تقول..
"حي عليك ياراما حي!"
🍃🍃🍃🍃🍃
بعد ماتمت السورة اللي كانت تسمع فيها..
ناضت قطفت من شجرة الفل شويه فل وقرباته لأنفها وشمت ريحته الحلوة..ابتسمت من قلبها..
فجأه..سمت صوت جري..
التفتت لقت اميمه جايتها تجري وهي تضحك بفرح..
وقفت عليها وقالت..
/كان نقولك يابيبو..
طوبى بضحكه..
/شني!؟
خدت اميمه نفس وقالت..
/استقبلي..فاتحتي اني واسامه السبت الجاي..
طوبى بدهشة؛كذابه!
اميمه بضحكه؛والله العظيم بري اسألي جدي..
طوبى بضحكه مفاجأه..
/معناها مع عمتي مطيره..
اميمه وهي تضحك..
/ايه..
ضمتها طوبى بيد وحده وهي تقول بضحكة فرح..
/الحمد لله الحمد لله..ربي يتمم ع خير ويهنيك ياقلبي..
ع طلعة مطيره ووراها سدرة واريج..
مطيره بعدم استيعاب..
/حق اللي سمعته من امك يابنت!؟ قالت ام اسامه كلمتها وتفاهموا ع قراية الفاتحه معاي في نفس اليوم!
اميمه بضحكه؛ايه..
وتطلقها مطيرة زغروده بعدين ضمت اميمه وهي تباركلها..
اريج بدت تصفق وهي تغني..
/حني مشتلنا مشتل لوز..حتى عرايسنا بالزوز..
طوبى:زوز عرايس ياسعدودي..والحنه حنة عبودي..
مطيره شدت ايدين اميمه وبدت ترقص هي وياها وتغني..
نور العين عطوها هلها..للزين اللي يستاهلها..
وهما يردوا وراها ويصفقوا..ماعدا سدرة اللي كانت تشوف لطوبى بإبتسامه حسرة...
🍃في هالليله اميمه مارقدتش من الفرحة والحماس..وحال اسامه من حالها..من فرحته كان خايف يرقد ويفيق يلقاه حلم...
🍃لكن في اللي الخوف حرمه طعم النوم زي راما وهي تفكر في المصيبه اللي جابتها لروحها بإيديها..شن بدير كيف تتصرف مش عارفه مش قادرة دير شي ولاتقدر..هي توا قاعده تتمنى تموت وتخلص...
🍃واللي يموت يبدولنا انه ارتاح من الدنيا وهمها لكن يخلي بعده حي يبكي عليه دم..زي ماصاير لمناسك وهي راقدة جنب مروة تبكي بكتمان لكن مروة كانت حاسه بيها وفي نفس الوقت خلتها تعيش حزنها ع راحتها..
🍃وطوبى اللي هرب عنها النوم..سهرت وهي تصلي وتستغفر وتقرا في القرآن وتدعي..ومرات تقعد تتأمل في جنه بألم وقلبها مليان خوف..
🍃زي القلب اللي يحبها..كان خايف عليها هي من وقع اللي بيصير غدوة...خايف تتفكر اللي صار فيها وتتعب..وفي نفس الوقت نار الغيرة كانت تاكل فيه مش متحمل اجتماعها مع الجالي في مكان واحد..
🍃الجالي اللي عايش في عالم الحب المرضي اللي كله اوهام في اوهام قاعد يقنع فنفسه انها في يوم من الايام حتولي واقع..هو توا سهران يتخيل شن بيصير في لقاء غدوة هل ياترى يقدر يشوف طوبى ويكلمها!؟..
🍃وفي من كان غارق في النوم ومايندريش انه غدوة ع موعد مع لقاء ممكن يحرمه طعم النوم ايام وايام...
المهدي..
🍃لكن اللي قاعد بعيد عن الصورة كان واصله كل شي صار وحيصير اول بأول وعقله مابطلش تفكير وتخطيط..
مختار....
🍃🍃🍃🍃🍃🍃
وبجي يوم الجمعه وموعد اللقاء المنتظر...
مع الساعه خمسة تماما كانوا سدرة وطوبى وجنة معاهم بالسيارة قدام العماره..
بعيد عنهم شويه كانت واقفه سيارة عبد القيوم..
عيونه ع سيارة طوبى"سيارة سدرة سابقا"..
شاف سدرة نزلت هي الاولى بعدين نزلت طوبى..
☘هي كل مرة يشوفها فيها كأنها اول مرة يتلخبط كل شي فيع وقلبه يدق بقوة..☘
مشت للباب الخلفي نزلت جنة وهي رافعتها في حضنها ..
سكرت السيارة ومشوا مع بعض خشوا لمدخل العمارة..
التارقي توا بس ادرك ان طوبى حتخش الشقه متاعه تلقائيا بانت ع وجهه ابتسامه حلوة بالمرة وزادت دقات قلبه في قوتها..
لكن اللحظه الحلوة ديما عمرها قصير..
تلاشت ابتسامته لما شاف سيارة المهدي جايه..
درس قدام سيارة طوبى..
نزل هو الاول..بعدين الجالي نزل بعده...
لما شافه عبدالقيوم بدت ع وجهه ملامح التهجم وياقداش تمنى يحلله قتله...
مشي الجالي للباب الخلفي نزل منه زوز اكياس هدايا كبار
سكر المهدي السيارة ومشوا مع بعض لمدخل العمارة..
🍃🍃🍃
في شقة التارقي..
كان ربيع مقعمز بروحه في المربوعه..
وسدرة وطوبى مع نسرين في دار المعيشه..
نسرين كانت تلهي في روحها بجنة هربا منهم..
بالذات سدرة اللي شافت في عيونها نظره خوفتها من اول ماخشت..
فجأه سمعوا جرس الشقه رن..
قلب طوبى انقبض خافت هلبه لكن في الظاهر كانت تتصنع في القوة والثبات..
نسرين شافتلها..وسدرة تشوف لنسرين..غيرت نسرين نظرها ليها..
قالت سدرة؛طلعيهاله معاش عندنا وقت..
نسرين بضيق؛باهي..
ناضت بجنه ومشت طلعت من الدار وقلب طوبى المرعوب لحقهم..
🍃في المربوعه..
استقبلهم ربيع وقعمزوا مع بعض..
وتخش عليهم نسرين بجنه..لما شافها الجالي قلبه فر وعيونه غرقوا بالدموع..
نزلتها نسرين وهي مبتسمه ودموعها في عيونها..وجنه مشت طول للمهدي وهي تقول بلغتها الحلو..
"أمو"..عمو..
ضحك المهدي ورفعها لحضنه..والجالي يشوفلها بلهفه وألم..
ربيع وين شاف حالته اشفق عليه وزاد قلبه وجعه لما شاف دموع مرته..
المهدي؛جنونتي السموحه هدا بابا..
شافت جنه للجالي..
هو رفع ايديه اللي كانوا يرجفوا وقال..
/تعالي..تعالي..
ولأن جنه بطبعها ماتستغربش طاحت عليه..
هو ضمها وقعد يبوس فيها وعيونه مغمضات..
ربيع ناض ومشي طلع من حداهم ومن الشقه مرة وحده..
ونسرين قعمزت تشوفلهم ودموعها مابطلوش نزول..
شافت المهدي كيف شد كتف خوف بش يخفف عنه شويه...
وخوه يشم في ريحة بنته بشوق وألم...
🍃وتمر دقايق هالساعه وطوبى تحت سيطرة القلق..
كانت تفرك في ايديها ببعض بإستمرار..
سدرة لما شافت حالتها حست بخوفها مبالغ فيه بس لما فكرت شويه استنتجت ان هالحاله سببها موقف صار معاها قبل..
طوبى بتوتر:الساعه خمسة الاربع خلاص ساده..
سدرة؛اهدي طوبى مازال ربع ساعه..
تأففت طوبى بعدين بدت تستغفر وسدرة تشوفلها بحزن..
شويه وخشت نسرين بجنه ومعاها كيسة هدايا..
فزت طوبى ومشت لبنتها خدتها من نسرين وضمتها بقوة..
سدرة:طلعوا!؟
نسرين رشفت وقالت..
/لا..الجالي يبي طوبى شويه..
طوبى استغربت وخافت..
ناضت سدرة وهي تقول..
/سمعنا الباب تسكر من اللي طلع؟
نسرين؛ربيع..
هزت سدرة راسها ومشت طلعت من حداها ونسرين لحقتها وخلوا طوبى واقفه بجنه وهي مصدومه في اللي بديره سدرة توا..
🍃في المربوعه..
المهدي:في شن تبيها نبي نفهم!؟
الجالي:تو تعرف..
دق الباب..
الجالي بلع ريقه وهو يشوفله بلهفه والمهدي مركز معاه..
شافه عقد حواجبه بإستغراب وقلق..
"السلام عليكم"..
المهدي حس روحه جمد ماقدرش يتحرك بكل..
الجالي:وعليكم السلام..
ربعت سدرة ايديها وقالت.
/مع انكم والله ماتستاهلوا السلام لكن الواحد يعمل بأصله
هني شافلها المهدي..وضاع بالمرة ونسرين تشوفله بضيق..
سدرة وعيونها ع الجالي..
/خسارة والله خسارة ماكنت متأمله فيك خير ونشوف فيك حاجة كبيرة..عطيتك اغلى ماعندي بنتي اللي ربيتها وكبرتها وخليتها احسن بنت في الدنيا كلها والله في ربعها مانك لاقي..عطيت الغالي للي مايفهم كان في الرخيص..لكن الحق مش عليك انت..الحق ع اللي جابك ليها..الحق ع اللي كانت تعرف كل شي وسكتت اللي درتها صاحبتي ضحكت عليا في وجهي وقهرتني ع اختي..
نسرين بدت تبكي..
شافت للمهدي وقالت..
/والحق ع اللي وين تجيه الفرصه بش يقهرني مايضيعهاش بكل..قولي انتقمت مني بطوبى زي مادرت مع عيشه الله يرحمها قبل!!؟
المهدي كان مصدوم ع الاخر ومش مستوعب اللي يسمع فيه منها..
غيرت نظرها عنه لخوه ودموعها ينزلوا وهي تقول..
/شن درت فيها قولي شن هو اللي درته فيها لدرجة مش قادرة تحكيه!تكلم...
الجالي بلع ريقه وشد دمعته بقوة وقال..
/عندك حق شن ماقلتي عندك حق..مش حندافع ع نفسي ولانبررشي لالنفسي لأنه غالط ومادرتش باهي بكل..ولانبرر لأي حد من عيلتي لا نسرين ولاخديجه ولاامي..ولابوي ولااي حدمن عيلتي الا شخص واحد بس ياسدرة..المهدي..
رمشت عيونها بسرعه لما دق قلبها دقه موجعه..
وهو يشوفلها بألم وأسف شديد..
الجالي كمل يقول بنبرة ألم..
/المهدي زيكم ياسدرة ماعنده علم بشي ولما عرف وقف مع طوبى ولولاه هو ..سكت بعدين مسح بيده ع وجهه وقال..اني ياسدرة توا مانبي شي غير ان طوبى تسامحني ع اللي راته مني وهي تعرف ان نصه ماكانش بإرادتي..مانبي منها شي غير السماح بس..التفت خدي كيسه وحطها ع الطاوله وقال..وهادي حاجه تخصها كانت عندنا لما سألت عنها وعرفت انها موجوده خديتها وجبتها طول..نبيها تعرف اني نبيها تتجاوز اللي صار ع خاطر جنه مانبيش بنتي تكرهني مانبيهاش تحكيلها شي يكرهها فيا ع خاطرها هي بس..علا صوته شويه وقال..سامحيني ياطوبى والله ماكنت نبي يصير هكي لكن الله غالب..بصوت مخنوق عاود يقول..
الله غالب..
ومشي طول طلع من حداهم ومن الشقه بكل..
🍃لما سكر الباب مشي بسرعه للدروج ونزل وهو مبتسم بمكر..
☘داخل..
بعد ماطلع سدرة غيرت نظرها للمهدي..
هو ناض وقف وقاللها بنبرة عتب...
"صحيتي"..
هي نزلت عيونها ومشت طلعت من المربوعه..
وخلت نسرين تشوف لخوها بحزن وقلق وهو ماشي لين طلع من قدامها بعدين طلع من الشقه..
خدت نفس عميق وقعدت في المربوعه...
شويه وفاتوا من قدام المربوعه طوبى وسدرة...
ولحظات سمعت باب الشقه انفتح وتسكر...وتنهار باكيه..
🍃نزلوا سدرة وطوبى والصمت مسيطر عليهم..
طوبى نست همها وكلام الجالي ومايجي منه قعد عقلها مشغول بأختها اللي شاده دموعها بالسيف..
عارفتها لما وجعت المهدي انوجعت معاه..
وصلوا لوطا وطلعوا من العماره..
سيارة المهدي ماكانتش موجوده..لكن التارقي قاعده وربيع مقعمز جنبه..شافوهم جايات للسيارة..
ركبت سدرة..وطوبى ركبت جنة في كرسيها من الخلف..
بعدين مشت ركبت..شغلت السيارة وتحركت طول..
روحوا ومارفعوا معاهم شي من اللي جابه الجالي...
🍃عبد القيوم بقلق:شكلها ماعدتش ع خير..
ربيع بضيق؛والله يوجع ويقطع القلب..لاحول ولاقوة الا بالله..
وعبد القيوم يسمع فيه وهو مضايق ع الآخر...
#كانون_الأول
#طوبى
....يتبع....
