وتيرة الاعرج

الوتيرة الثانية والخمسون

-ارسلان: هاي شبيج

-غياهب: ايدك شيلها

- مو نطيتج الورقة

- اوووو .. وهيج انه غبية واصدك هل الورقة نفسها الي جانت على السيارة

دفعت ايده وكدرت اسحب الورقة الاصليه منه ابتعدت عنه مبتسمة بانتصار ..

- من تجذب بعد جذب على واحد قشمر وغبي

مسح على مكان لحيته بقلة صبر ..

فتحتها بهدوء وكلي فضول اعرف شنو الي بداخلها طبكت حواجبي من شفت الي بيها مخطوط سهم بالدم مو بقلم بس ماجان مكتوب شي بيها غير هل السهم المرسوم بالدم بلعت ريكي

- شـ شنو هذه

اخذ الورقة مني يباوعلها ضل طابك حواجبه وصافن بالورقة ..

- شنو معناها ارسلان

- تهديد هذه مبطن

- ليش ؟؟ ومن منو

- جدج سالم

بقيت صافنه وجسمي تشنج احاول افهم كلامه ..

- جدي سالم

- اي

- بس ليش يخلي تهديد الك ؟

- لان عرف انه الي حركت المعمل وكتلت مجيد وداز فيديو الخالج يهدد بيه

- ثواني ارسلان خليني استوعب يعني هسه انتَ حياتك بخطر

- مو بس انه حتى خوالج مخلي اباله يحاسبهم لان سكتو عني من كتلت مجيد

- وضامين هيج شي خطير علينه انتَ تعرف منو سالم انسان مجرم خطير مرته وذبحها بايده

- غياهب اذا نحجي راح الخوف والقلق يسيطر عليجن سواء انتِ او اختج والباقين

- هسه عرفت ليش انحطت الحمايه وليش ابويه وخالي جذبو عليه طلعت هيج السالفه جنت شاكه والله العظيم شكيت جاي تضمون شي

- جاي ندور عليه جدج مو سهل يا غياهب جاي يلعب  بس الله كريم

ماريت متأكدة جدي ماراح يسكت شغل السيارة وطلعنه من المكان طول الطريق داخله بافكاري فرحتي بخبر التوأم انكسر بس مو شي جديد كضيت عمري فرحتي ناقصه فزيت على صوته ..

- غيااهب

رديت بضياع ..

- هاا

- شبيج بابا صارلي ساعة احجي وياج

- مادري ماسمعت جنت صافنه

لزم ايدي وحجه بنبرة مليانه حنيه ..

- انه يمج لا تخافين من شي

- ارسلان شلون طالعين هيج احنه وحدنه بلكي سوا شي النه

- منو كالج وحدنه

- لعد ؟

- اكو حمايه ورانه بس بدون ما يخلون احد ينتبه عليهم يمشون ورانه بحال شافو شي غريب يبلغوني