وتيرة الاعرج

الوتيرة التاسعة والاربعون

وتيرة_ الاعرج
بقلم: حوراء السعيدي

حبايبي لاتنسون التصويت من النجمه+التعليق
بين الفقرات + ومتابعة لحسابي .." 🍂hawraalsaidi

-غرام: فتحت عيوني باوعت بهدوء للمكان هاي المستشفى لدقائق جنت فاقده اخر مره شصار بس ماطولت وهيه ترجعلي ذكرت اخر لحضات من الي صار انفتح الباب ودخل كُميل يخابر انتبه عليه وكف قريب عليه ما ادري ويامن يحجي سده كعد بصفي ..

-كُميل: شلون صرتي

- لا تسئلوني شلوني

درت وجهي على الجهه الثانية ودموعي اخذت مسارها امي الماتت وماشفتها ولا شبعت منها وهسه ابويه

- الله يرحمه علويه هيه هاي الدنيا

رديت من بين دموعي مختنكه ..

- الحمدلله على كل حال

درت بوجهي اله وادري بالجواب بس ليش سئلت ما ادري ..

- اريد اروح للفاتحة

باوعلي بنضرات حيره مسح على وجهه ..

- الفاتحة بيت عمامج مو بيت اختج لو بيتها جان خذيتج ما اتردد بتفكيري بس عند عمامج

- يعني ما اروح مو

- ما اكدر اخذج هناك نرجع للبيت ونصليله نقراله قران الميت يريد هل الاشياء تخفف عليه وابجي براحتج محد يمنعج

- واختي ؟ تبقى وحدها

- استغفرلله ياربي .. ترجع البيتها وبعيوني اخذج

شهكت بدموعي شنو هل الظلم والقساوة حتى فاتحته ماكدر احضرها وانحرمت منها ولا فاتحة امي حضرتها اخخ ياگلبي شتتحمل بعد

طلعنه من المستشفى وروحي ميته دخلنه للبيت وصوت سراج يصرخ فز گلبي على صوت ابني المفرفح اسرعت بخطواتي ودخلت جوه جانت نيروز واكفه شايلته تسكت بيه وهَوُ وجهه مكلوب احمر من البجي مجرد شافني وهَوُ يريد يذب روحه عليه ركضتله اخذته منه كعدت بالكاع حاضنته الصدري اثنينه نبجي

- ياروح امك اجيتك انه لا تبجي

-نيروز: البقاء بحياتج علويه

اكثر كلمة ثكيله على البشر من يفقد وتنكال اله هل الجملة ..

-غرام: حياتج الباقيه

طلعن مليكة وناز يباوعلي بتعاطف وحزن عزني اخذت ابني وكمت من مكاني دخلت الغرفتي نزعت عبايتي كعدت باوعت الابني الوجه والعيون حمر من البجي والشهكه بصدره

دخلت مليكة كعدت بصفي رفعت ايدها
تمسد على راسي بحنيه ..

-مليكة: ادري بيج مكسورة يا يمه

بجيت اكثر ..

- اهواي مكسورة مو شويه

- يروحون فدوه همه وشواربهم وعكلهم لدموعج