عدت شهور ولا عدا الشعور

31

~سند~
دخل الساحه وضربو له التحية العساكر وبصرامة ارعبتهم : استرح … اليوم فيه مهمه على طريق اللي بين الرياض والشرقية بيتم القبض على بعض المشتبهين من المروجين وتراهم يتبعون لشبكه قويه وممكن يعدون بدون مانحس عشان كذا ابيكم تنفضون لي الطريق ذا نفض محد يطلع من الطريق وهو ماتفتش والعسكري اللي يستر على احد نهايته ماراح تكون مرضيه والطريق يتقسم الى اربع نقاط تفتيش لمدة اسبوع ثم نخليها نقطتين عشان نضمن والحين بيقسمكم العقيد تركي وتنطلقون
اتجه الى مكتب صديقة ودخل بدون يدق الباب
وقف بصدمه: هلا بالقاطع اللي راح ونساني
ضحك: نساك الموت ولا نسيتك بس تعرف مشاغل الدنيا
عبد العزيز حضنه : مشاغل هاه وانت جيت للرياض ثلاث مرات ولا ادري الا من سياف ماتقول عندي صديق مسكين تاركه ومخليه ياكل تبن بشغلك
سند بسخريه: تحسب يوم اني اخذت الاجازه ذي ارتحت؟ لا والله اني من مشاكل لمصيبه ومن مصيبه لقضايا اشتغلت على اربع قضايا معقده وبقت لي وحده وزود على هذا فتحت ملف قضية ابوي وبرجع احقق فيها لان حمد طلع براءه
اتسعت عيونه بصدمه: استحلفك بالله تقولها صادق؟
سند: ايه والله صادق والله اني شيبت منها وودي لو ارجع اقفلها لكن مقدر مسكت كم طرف و انفلتو مني
عبد العزيز: ماعليك انا بساعدك
سند: لو حليتها بترقى
عبد العزيز بمزح: قدك اصغر عقيد وش تبي اكثر حول لي القضيه وانا احلها
سند: ياشيخ طير بس انا شيبت منها ومن الاشياء اللي فيها لقيت ادله ماهي موجوده بالملف تتوقع كم دافعين عشان تتسكر القضية وماعاد تفتح وتندثر؟
عبد العزيز: مين كان ماسكها اصلا واحد من القسم ولا متقاعد؟
سند ضحك: مب متقاعد الا بالقبر وعظامه متحلله
عبد العزيز ضربه: مايضحك الله يرحمه
رجع ظهره على ورا ومدد رجليه: بعد فتره من طلوع حمد او نقول قبل اسبوع انطعن سعد من واحد مجهول والسبب يبيه يبعد عني انا قررت ما ارجع هناك الا وانا متخلص من القضيه ذي كامله اخاف ما اروح ويتاذون واخاف اروح ويتاذون بعد واذ فكرت اقفل القضيه بتعرض لمسألة وتحقيق و اشياء مالها اول وتالي
عبد العزيز: ماعليك الحين انا وانت نبدا بالشغل عليها وماينتهي ذا الشهر الا وهي محلوله
سند: بس انت ماحسبت حساب شي
عقد حواجبه: مثل ايش؟
سند بهمس خافت: جوالي مراقب والحين جوالك وغمز له: تعال نطلع لابراج الرياض ونتمشى والقضيه بعدين نفكر فيها
عبد العزيز بوناسه: يلا عندي لك مكان توهم مفتتحينه يجنن

~في عهد الاحبه~
تاكي راسه على جدار بيتهم ويفكر كيف يوصل لها انه يحبها اكثر من نفسه! غمض بقهر ان حتى اشواق رفضت تكلمها سمع صوت بنت تغني مع المسجل بالحوش ومن بحتها عرفها هي نفسها وقف بتهور وتلثم ورفع ثوبه طلع على اغراض كانت موجوده وطب عليها شافها وليته ماشافها اوجعه قلبه من منظرها وهي تتمايل على الاغنية وتطالع ظلها اسرته وزاد نبض قلبه للجنون تقدم بهدو وتوازن عكس الحرب اللي داخله حاوط خصرها بتملك ويده الثانيه على فمها
محمد: اشششش لا تطلعين صوت وننفضح …تسمحين لي برقصه تذوب قلبي؟

~صباح يومهم~
طلع بحماسه لذا اليوم وقرر انه لازم يشتغل على نفسه ويكون نفسه وياخذ شعلة قلبه وفاتنته شغل السياره وانطلق على ورشه بعيده عن ام جلاجل…
وقف ونزل: صديق عبي زيت للمكينه
دخل واحد هيئته مرعبه وصوته اللي  ارعدهم: وين المكينه اللي جابها سلمان؟ 
رجف العامل الهندي من الخوف: هو فيه جيب بس كلام مايعطي انت مكينه
ابو عز: مايلزمني كلامه ذا عطني المكينه اشوف
راح يركض العامل بخوف للمستودع
ابو عز: هنود مايجون الا بالعين الحمراء
طلع العامل وهو يسحبها ومد له المكينه: هذا بس هو فيه جيب
جلس بالارض يتفقدها وفجاه حذفها: الحيوان قص السلك عشان ما استفيد منها …ولا اكيد انت اللي قصيته عشان ما اخذها
رفع يده بيضربه
مسكه محمد: ماعليك يالطيب انا عندي وحده مثلها تبيها؟ اذ مره يعني محتاجها
طالعه ابو عز لثواني وحس انه شخص مناسب بدال سلمان اللي دايم يورطه ولا عمره جاب له اللي يبي: تعال برا
طلع معه محمد وهو من داخله يرجف من الرعب والظاهر عليه الثبات: قلت لك انا عندي وحده كانك نبيها انتضرني هنا نص ساعه
ابو عز: لا ماعليك اجلس بقول لك شي …انت تشتغل؟
محمد: ايه بس ببقالة ابوي وبطلع ادور لي تجاره ابيعها واعتمد على نفسي
ابو عز: اجل مايحتاج تطلع وتدور انا عندي لك شغله دخلها ملايين واضعاف الملايين
محمد: ايش الشغله؟
ابو عز: نبيع خرده من اهل الديره
عقد حجاجه: كيف احس مافهمت عليك
ابو عز: يعني بالمختصر الصريح نسرق اغراضهم ونبيعها على المناطق اللي حولنا وفكر فيها ترا يدخل ملايين فكر فيها وقلبها زين بمخك وبعد اسبوع تعال هنا بنفس ذا الوقت
قام بسرعه وركب سيارته بدون مايدفع وحرك
طلع الهندي: والله انا فيه كلام حق مدير تعال ادفع مهمد تعال

~بعد اسبوع~
فتح عيونه اليوم لازم يعطي ابو العز رايه وقف بتردد: خلاص محمد الى متى وانت تعتمد على ابوك بدخل معه فتره لين اكسب واكون نفسي وبعدها اتركه واسوي لي تجاره
ايه هذا الكلام الصح
بسرعه بدل وطلع مستعجل
ام محمد: محمد يا يمه تعال افطر صار لك اسبوع تارك الاكل وهزلان
محمد بستعجال: بعدين يمه بعدين انا طالع قولي لابوي ان محمد لقى وظيفه والحين رايح اشتغل
ام محمد: على البركه ياولدي بس وراك مستعجل تعال كل لك لقمه على الاقل
محمد: هاه وهذي اللقمه اخذتها عشان خاطرك يايمه ودعواتك
ام محمد: الله يوفقك ويبعدك عن عيال الحرام
تجمد محمد ثواني على الباب وبعدها استوعب على نفسه وطلع للورشه
وشاف ابو العز مشغل السياره بيحرك
نزل: عسى ماتاخرت عليك؟
ابو العز: الا …هاه وش قرارك؟
محمد: موافق لكن بشرط متى مابغيت انسحب انسحب بمزاجي
ابو العز: تم لكن لازم تختار لك ناس ثقه بالنسبه لك عشان يعاونوك وعلى دخل مبيعاتك اعطيك انا زياده نهاية كل شهر …اركب معي الحين ونروح لمكان بيكون هو مستودعك وفيه مصطفى عامل مصري بتعطيه الاغراض وهو يبيعها ويتصرف فيها
ركب محمد بدون اي تردد وحرك ابو عز للمستودع
ابو عز: لكن انا عندي شرط اول سنتين ممنوع تنسحب بعدها بكيفك
طالعه محمد لثواني: تم

(لَأّ تٌـجّـعٌلَوٌ مًؤلَفُـتٌـيِّ تٌـلَهّـيِّکْمً عٌنِ أّلَصّــــلَأّةّ)
لاتنسون النجمة والكومنت