عدت شهور ولا عدا الشعور

40

~سند~
سند طالعه بشك: انت انجنيت؟ خرفت؟ صايبك زهايمر؟ بنت اخوك وتتهمها بأسوء التهايم!
سلطان بعدم مبالاه: والله عاد ما اتهمتها ولا تسوي حالك بريئ انا شفتك بعيني
سحب منه الجوال: شفت بعينك بس لكن ما تاكدت رميت كلام اذ حتى حمد ما قدر عليك انا اقدر اوقفك عند حدك
سلطان باستهزاء: وش عندك؟ وعلى اي اساس تهدد
شغل التسجيل: على اساس هذا …صوتك صح ولا لا؟ …واعتقد بما انك عريف تعرف ايش عقاب قذف واتهام المحصنات وزيد عليها كلامك اللي قبل ثواني كله مسجل
انلجم لسانه وتلعثم: انا بس كنت احاول اني احمي شرف اخوي وبواقي سمعته الملوثه و احاول تطهيرها من العار
بسخريه: بنشوف كيف حضرت العريف سلطان غنام الغنيم كيف بيتجرجر بالمحاكم عشان بنت اخوه وبينفصل من شغله ويتعلم درس بحياته كلها من عقبها مايتعرض لبنته اخوه
غُند قامت وهي تحاول تستوعب وبنفس الوقت تفكر بالمصيبه اللي طاحت فيها: انا مابي ارفع قضيه على عمي
مشى للمزرعه وتركهم: مالي دخل القضيه مرفوعه يعني مرفوعه دامها بتحول بينك وبين ناصر والله لارفعها ويتكلم بشرفك ويطعن فيه لا والله يبي له درس من الحياه والناس تركنا لهم القيل والقال
اخذت جوالها وحاولت تلحقه: مب على كيفك تراه عمي لو يقول اللي يقول مالك دخل فينا
تجاهلها وهو يمشي ويستعجل بخطواته ويرتب الاحداث  بعقله ويربطها ببعض
دخلو المزرعه ومشو بين النخل لمكان جلستهم وغُند لا زالت تعيد وتكرر بكلامها على امل تقنع سند
سند انفجر فيها بغضب: والله لو ابوك عايش ماراح يرضى عليك كلمه وحده من كلام سلطان وبيوريه الويل لو قال لك بنت الكافره انا اسعى اني اسوي اللي كان بيسويه حمد لو تازم الموضوع لكن بطريقه اسرع ابعد سلطان عن حياتك وتعيشين بدون مذله وقهر واحفظ لك كرامتك واردها لك باي طريقه
غُند بغضب اكبر: محد طلب منك تتدخل وكرامتي محفوظه انت بس ابعد عني وبعيش بدون مذله ولا قهر
سند: ما يحتاج تطلبين مني انا بنفسي اقدمه لك عشان تعيشين مع ناصر بدون مشاكل
غُند بجنون: انت كذا بتعطبها وتدخلني بمشاكل واشياء انا بغنى عنها اطلع من السالفه وانسى انك كنت عندنا هناك وسمعت كلام وراحت وتركته مشى وراها بقهر ومصمم الا يسوي اللي براسه
سند رفع جواله: عبد العزيز اطلب استدعاء لسلطان غنام الغنيم بسرعه
استعجلت بخطواتها: ماراح ينفع معك الا عمي حمد
سند: محد بيردني باللي راح اسويه
رفعت صوتها اول ما وضحت لها الجلسه وصارت قريبه منهم: عمي حمد الحقني
فزو بخوف من صوتها ركض لها سعد: وش فيك
غُند اشرت عليه: بيدمر حياتي بيدمرها الحق علي
حمد صرخ عليها: غُند بلا عبط وش فيه تكلمي
غُند: بيشتكي على عمي سلطان ومعه تسجيل راشد ذاك اليوم واللي ممكن يخلي عمي ورا الشمس
سند: وانا صادق لازم نتحرك لان رسميا لو ام غُند ترفع خطاب تطالب فيه ببنتها واستكمال مشاريع متوقفه ماراح يكون بيدنا شي وسلطان بنفسه بيخلي الموضوع يمشي بواسطاته احنا من الحين نحجز سلطان ونفتش بماضي ام غُند يمكن نمسك عليها شي ونمسكها وتبقى بنتكم عندكم بالحفظ والصون
حمد: ميشا يمكن لكن سلطان كيف!
سند شغل التسجيل الجديد: بصفته طعن بشرف المحصنات واتهمها باشياء خليني ساكت عنها
الجده: قلنا اعقلهم سند طلعت اخبلهم! وين تبينا نودي وجهنا من العربان؟ تبي بنتي ترفع قضيه على عمها؟! انت صاحي! عمها اللي كفلها سنينها ترفع عليه عشان كلمتين
سند: كلمتين ماهي هينه ولا هي حلوه بحقها
الجده: ولاهي حلوه بعد بحق عمها يجي الحين سلطان ويتصافون بينهم ولا للشرطه مكان عندنا ولمشاكلنا هو صار بينهم ولا احد داري عنه غير رب العباد هو اللي بيحاسبه على كلامه لكن ليه نخلي الديره كلها تعرف باللي بينهم والله يهدي النفوس
غُند باست راسها: ينصر دينك ياشيخه الحمدلله اللي سلمك لنا
سند قام: انا علمتكم و اي شي يصير بعدها انا اخلي مسؤليتي منها ولا عاد ترجعون لي اذ صارت سالفه
حمد بتسليك: يصير خير يارجال يصير خير
دقه: وجع لا تسلك
مشاعل طالعته: وين بتروح؟
سند رفع يده يمسح فيها على قلبه: ابد والله لو تاخرت بينخصم راتبي ولا ودي اتاخر خصوصا اني طالع مهمه والمفروض اني راجع مع الدوريه
مشاعل: الله يحفظك بحفظه
اشر لها من بعيد: كثري لي دعوات الفتره الجايه والله اني محتاجهم
غُند: فارس تروح معي للاسطبل
فز: بشرط نتسابق انا وانتي وتميم اللي يصل اول الباقين يعطونه خمس ميه
غُند باعتراض: لا والله تبيني اركض بعباتي! مسخره ذي
سحبها: اقول الحياه مره وحده امشي نتسابق
لمست جبهته: عليك حراره؟!
هز راسه بنفي: لا فيني طاقه ابي اركض لين اطيح
تميم: هالكني من اليوم نركض انا تعبت اركضو لحالكم
فارس غمز له: تميم خمس ميه ريال كفيله تعيشنا اسبوع من شاهي ابو مصلح اللي بالطريق
تميم بحماس: تم والله انك كفو تعرف كيف تجيب راسي
فارس: افا عليك انت مني وفيني
غُند بأحراج اشرت على تميم: انا ماعندي مشكله معك واحسك بزر لكن فالح وراشد يعني احراج اركض قدامهم
تميم: بتجاهل انك سبيتيني بس اخواني محترمين شوفيهم عطوك ظهرهم
غُند بحماس رفعت عباتها: اجل يلا إلهام عدي للثلاثه واحنا بنركض
إلهام بضحكه: واحد … اثنين … ثلاثه انطلقو
اديم: قومي ياختي نلحقهم
إلهام: العايله اليوم مسطوله انا متاكده ان الفطور كان منتهي اليوم مو طبيعي

~قريب الاسطبل~
فارس: تميم حدها بسرعه لا تسبقنا
تميم: اوريك فيها حركه شوف شوف
مد رجله بخفه قدام غُند وطاحت
غُند حذفت عليه جحر: لعبكم ماهو نظيف انقلعو مالت عليكم
فارس: ما سوينا لك شي انتي اللي طحتي تميم احنا سوينا لها شي؟
تميم: لا ماسوينا شي
قامت وهي تنفض الغبار: اردها لكم بس صبر
مد يده لها: خمس ميه يلا
طنشته: فارس فارق عن وجهي خلني اتونس مع كحيلا
تميم: تبينا نروح؟ عطينا الف وبنروح
رفعت جوالها: اصبرو لين ينزل الراتب
فارس: مافيه فايده انتي حتى الراتب ماينزل لك
غُند: بلا غباء باخذها من سعد
ف: وزودي عليها ميتين
دفته: يلا عاد عطيتك وجه زياده فارقو
فارس سحب تميم ودخلو للاسطبل: تميم مافكرت تشتري خيل للان اخوانك كلهم عندهم خيول
تميم: كان عندي واحد سيسي بس ابوي باعه يقول مالنا فيه لكن خيول سند وفالح بالبيت ولا قدر ابوي يبيعهم خالي تركي مسوي لهم اخر بيتنا اسطبل صغير على ان ابوي عارض وشل الدنيا وقعدها واذ ضاقت فيني اخر الليل انزل اجلس عندهم لين ربك يفرجها
فارس: صدقني انك حاليا تحتاج وبقوه حصان انا اسمع صوت الخيال اللي داخلك يصارخ
تميم ضحك: خله يصارخ لين ينبح صوته طالع من شر و ارجع له بيديني
فارس مسك ذراعه وقربه منه وبهمس: هذا وانا كنت ابيك تطلع معي بدباب اشتريته من الحراج
شهق: تستهبل فارس صح؟
فارس سد فمه: لا والله ما استهبل بس قصر صوتك عندنا اخت الجني الازرق لو سمعتنا رحنا فيها

(لَأّ تٌـجّـعٌلَوٌ مًؤلَفُـتٌـيِّ تٌـلَهّـيِّکْمً عٌنِ أّلَصّــــلَأّةّ)
لا تنسون النجمه والكومنت الحلو …