نجهل الوعد و نحقق الاماني

البارت 16

بالمستشفى بمكتب عزيز الي استدعى ندى لغرفته ، و اول م دخلت ندى ارتبكت من نظراته لها .
نطق بتوتر : هلا دكتور طلبتني
عزيز بصراحة : انا مسوي لتس شيء ؟
ندى : وش
عزيز : وشو وش ! انا اسألتس وش بلاتس متغيره علي
ندى : وش بيننا عشان تقول كذا !
عزيز : بالله يعني كل ذا و م فهمتي ! ولا تتعمدين الغباء
ندى بحدة : شفيك انت !
عزيز بعصبية : لهدرجة م فهمتي علي ي ندى
ندى : خير ان شاء الله ليه تعصب علي و اي م فهمت
عزيز بربكة : م فهمتي اني معجب فيتس !
انصعقت ندى من كلامه م توقعت ابداً يجي يوم يقولها عزيز هالكلام توترت ولا تدري وش ترد او وش تسوي ، زفرت بتوتر و قالت : بالبداية إلا فهمت لكن بعدين م ادري حسيت لا
عزيز بصدمة : ليه حسيتي لا ! شفتي شيء مو زين مني
ندى الي توترت اكثر و م حبت تخرب علاقتها ب بيان نطقت : م ادري حسيت اني اتوهم
عزيز بضحكة : لا م تتوهمين انا فعلا معجب فيتس و بيجي يوم اخطبتس فيه
ابتسمت ندى و قالت : عن اذنك ب اطلع
عطاها الاذن عزيز و حس انها موافقه و فرح فرحه م يعلم فيها الا الله قّلب مكتبه حفله من الفرح ! .
-
-
بينما بالجانب الثاني عند ندى الي كانت طول اليوم سرحانه
و عقلها مو معاها و كانت بيان ملاحظه هالشيء عليها ، ف تكلمت بيان و قالت : ندى ! ندو
ندى : هلا
بيان : وش بلاتس اليوم
ندى بفرح : مستانسه
بيان بضحكة : عن وش علميني
ندى : م عليتس مني لكن شرايتس تجين معاي للبيت اليوم نسهر و نكمل الاوراق سوا لانو امي و رهف و سعاد طالعين
بيان الي استغلت الفرصه : موافقه تم
ندى : خلاص بعد المغرب لا تروحين مع سواقكم تعالي معي
بيان : زين ببلغ امي و اقولتس
ندى : ارسلي لي واتس لاني عندي مريض الحين بروح
بيان : زين م عليتس
-
-
~~~~~~~~~~~~~~~~~~~~~~~~~~~~~~~~~~~~
بالمركز الساعه 6 كان سلطان بمكتبه و يفكر بكلام عذاري له و كيف كان وده يقولها انه مو متعمد يشيل الدبله نسى القضيه و نسى كل شيء مجرد م شاف عيونها و خاطرها المكسور ، تنهد بضيق و طلع من مكتبه و اتجه لبيتهم يرتاح عقب الكارثه الي صارت له اليوم مع عذاري
-
-
بينما عند بطلتنا الي كانت جالسه ببيتهم و تحديداً بغرفتها تتألم من يدها و تشوف لها فلم لكن عقلها و قلبها ابدا مو مع الفلم عقلها و قلبها كان مستحوذه سلطان م توقعت بتحبه و ان مثل حركة الدبله بتزعلها زفرت بضيق و هو تطالع للورد اخذته و رمته بالزباله بغيظ ! نطقت بقهر مثل م شلت الدبله اشيلك من قلبي ي سلطان !
-
-
~~~~~~~~~~~~~~~~~~~~~~~~~~~~~~~~~~~~
اما عند عزيز الي طلع مع عدنان و محمد لبيتهم و مثل اي جلسة عيال يلعبون بلوت و يسولفون و كانوا متفقين يسوون مفاجاه لعمر اذا رجع بكرا !
عدنان : انتبهوا لي ي عيال
محمد : اخلص وش تبي نبي نلعب سوني
عدنان : الحين مو عمر بكرا يرجع
عزيز : ايه
محمد : اي ليه
عدنان : طيب اصبروا خلوني اتكلم شرايكم نسوي له مفاجأة
عزيز : مثل
عدنان : طلعه للبر
محمد : قدام موافق
عزيز : وراك جامعه ي ورع
محمد : اسكت انت ي دكتور
عدنان : احول تهاوشوا طيب و الاتفاق
عزيز : خلاص موافقين
محمد : اي يوم
عدنان : الجمعة
عزيز : ممتاز
محمد : اجل قرروا وش تبون نسوي
عدنان : طلعة شبابية
محمد بضحكة : يعني بناتيه
عدنان : يا سخيف
عزيز : وهو صادق محمد اكيد طلعه شبابيه
عدنان : والله انكم سخيفين
محمد : انحشر انحشر
عزيز بسخريه : شبابية
عدنان بضحكة : والله م اجلس عندكم
محمد : تعال ي ولد خل نلعب قيم بس و عقبها رح
عزيز : شف المصلحجي !
عدنان : بلعب عشان اهزمك
محمد بتسليك : اي تهزمني بس تعال العب
جلسوا العيال يلعبون و يكملون سوالف و ضحك بينهم .
-
-
~~~~~~~~~~~~~~~~~~~~~~~~~~~~~~~~~~~~
بالمستشفى الساعه 7 الي طلعوا ندى و بيان سوا و متجهات لبيت ندى و بيان الي بلغت امها ، و اول ما وصلن شافن سيارة سلطان ف دخلن البيت و كان هدوء و اتجهن للدور الثاني لغرفة ندى و اول م دخلن جلست بيان على الكنبه و ندى تنزل عبايتها ،
نطقت ندى بتعب : البيت فاضي هدوء احسن شيء
بيان : طيب جوعانه خلينا نطلب اكل
ندى : ببدل و انتي نزلي عبايتس و اذا طلعت نطلب
بيان : زين
نزلت بيان عبايتها و طلت مع الدريشه الي شافت سلطان داخل المجلس الخارجي ابتسمت و صارت تبي تسوي الي تبيه براحتها ، لفت على ندى الطالعه و راحت تجلس على الكنبه و نطقت : ها وش تبين نطلب
ندى : شرايتس بـ بيتزا
بيان : يلا اجل اطلبي
ندى : يلا
طلبت ندى من المطعم بيتزا و عقبها تكت على الكنبه مع بيان و جلسن يسولفن .
ندى : اي وش صاير لتس اخر فتره
بيان بملل : م صار شيء من البيت للمستشفى
ندى بذكاء تبي تشوف و تتأكد من اهمية عزيز عند بيان و نطقت : شفتي الدكتور عزيز ؟
زفرت بيان بعدم اهمية : شفيه
ندى براحة : اقصد اليوم شفتيه
بيان : شفتها بداية الدوام و عقبه اختفى
ندى : اما
بيان باستغراب : ليه تسألين
ندى بتوتر : انا بعد م شفته كثر اليوم مثلتس
بيان : مو مهم مهب واجب نشوفه
ندى بصراحة : وش نضرتس له
بيان بصدمة : مين ؟ عزيز !
ندى : الدكتور عزيز مو عزيز حاف
بيان : شلون وش نضرتي له ! اكيد زي اي شخص اعرفه
ندى : اها
بيان : وراتس انتي اليوم ؟
ندى بضحكة : م فيني شيء والله
بيان : اقول ذا متى بيجي
ندى : هذاه ارسلوا لي يقولون نص ساعه و يجون
بيان بقصد : طيب روحي جيبي لي ثلج من المطبخ
ندى : البيت فاضي روحي انتي
بيان : يا عجازة بروح انا خلاص
طلعت بيان و هي مبسوطه انه ندى م طلعت معاها ، و اتجهت للمطبخ و هي تتمنى تشوف سلطان و اول م طلعت الثلج من الثلاجة و اخذته لفت على الباب إلا بوجها سلطان ! انصدم سلطان من تواجد بيان و نطق باستغراب : بيان !
بيان بدلع : سلطان هلا والله
سلطان : هلا هلا بس وش تسوين هنا
بيان بضحكة كلها تصنع : شكلك نسيت اني مع ندى
سلطان بنظرة : اي صح نسيت
كان بيطلع سلطان لكن استوقفه اليد الي مسكته من عند كتفه لف عليها و عطاها نظره بيننا بيان الي ابتسمت و قالت : اخبارك كيف خطيبتك عذاري معاك
سلطان بحدة : وش دخلتس بعذاري
بيان بدلع : شدعوه اتطمن عليها ! انا الي اسعفتها
سلطان : شكرا م قصرتي
بيان : طيب سلطان شفيك مستعجل كلمني مثل قبل
سلطان بضحكة : مثل قبل ؟ متى كلمتس اصلا بغير رسمية
بيان بسخرية : وين خاتمك ! يعني لي الحق استغل الفرصه
سلطان بصدمة : لو م انتي بنت عمي كان عرفت اتصرف معاتس لكن لي كلام ثاني معاتس بعدين
بيان بتوتر : وش بتسوي بتقولهم انك تتقرب مني !
سلطان : بالله انا الي اتقرب ! ولا انتي الي الحين مو راضيه تبعدين عني م تفصلنا الا بلاطه وحده !
بيان بدلع : و ليتها تصير اقل
صد سلطان عنها و نطق : الله يشغلتس بنفستس
-
-
طلع سلطان من بيتهم و راح لبيته مستقرف من بيان و حركاتها الي م تتغير ! اما بيان الي زفرت بغضب و صعدت عند ندى ، و اول م دخلت شافت ندى بتقوم تجيب الطلب .
ندى : بروح اجيب الطلب
بيان : عجلي
ندى : طيب طيب
بعد مرور خمس دقايق جت ندى و معاها الاكل جلست ياكلن و يضحكن سوا و عقبها دخلن عليهن رهف و سعاد الي شافنهن ياكلن .
سعاد : الله بيان عندنا
رهف : وش تاكلن
ندى : بسم الله متى جيتوا
بيان : خرشتنا
سعاد : شعندكن هنا مو بالمستشفى
بيان : خلص دوامنا
ندى : امي جت
رهف : اي جت و صعدت لغرفتها
بيان : اجل تعالن أجلسن
ندى : وش صار بالعزيمه
سعاد : اول شيء ليه امي م جت
بيان : م لها خلق تقول
رهف : احسن لها ليتني بعد سويت مثل عمتي و جلست
ندى بضحكة : ليه وش صاير
سعاد : عزيمه خايسه
بيان : اووف فيه سوالف شكله
رهف : اصبرن ببدل و اجي
سعاد : انا بعد
طلعن البنات اما عند بيان و ندى الي صارت يضحكن على اشكالهن و يتعشن .
-
-
~~~~~~~~~~~~~~~~~~~~~~~~~~~~~~~~~~~~
من بكرا الضهر بالمطار الي وصلوا ريم و عمر و بسرعه ركبوا السياره و اتجهوا للبيت ،
-
-
اما بالبيت الي كانوا موجودين ام ريم و ابو ريم عندهم عشان يشوفون بنتهم ، و ام عمر و عذاري يجهزون للغداء و الكل مخترش عشانهم ! و عند الرجال الي جالسين ابو عمر و ابو ريم ينتظرونهم و عزيز واقف بالشارع اما بالصاله ام عمر و ام ريم جالسات و عذاري تتصل على ريم تشوف وينهم فيه .
عذاري : الو ريم وينكم
ريم : تونا طالعين من المطار و جايين لكم
عذاري : يوه يعني مطولين
ريم : مسافه طريق و حنا عندكم
عذاري : زين يلا
قفلت عذاري من ريم و لفت على امها و ام ريم و نطقت : توهم طالعين من المطار
ام ريم : يوه
ام عمر : يجون يجون
عذاري : تقول ريم مسافه الطريق و يوصلون
ام ريم : ان شاء الله يارب
عذاري : بروح اقول لابوي و خالي
طلعت عذاري للحوش و الي شافت قدامها عزيز رفعت صوتها تناديه يلتفت لها : عزيييز عزييز
عزيز : وش جابتس
عذاري : تراهم توهم طالعين من المطار
عزيز : اي بلغني عمر و قلت لابوي و خالي
عذاري : زين اجل انا برجع
وهي راجعه عذاري جاها اتصال فتحته بدون م تشوف المتصل توقعت انه عمر ولا ريم ولا لينا لكن انصدمت من الصوت الي سمعته .
سلطان : عذاري
عذاري الي ضربت راسها انها م انتبهت و نطقت : نعم
سلطان : يقولون هلا
عذاري : وش تبغى ! انا الحين مشغوله
سلطان بحنية : م تتفضين لي
رق قلب عذاري لكن نطقت : لا
سلطان : م احسها من قلبتس
عذاري : بالله
سلطان بأبتسامة: طيب أحبتس
ضاعت علوم عذاري من الكلمة رق قلبها م تحملت و ابتسمت و سكتت م ردت اما سلطان الي ضحكته اعتلت و نطق : ترى حسيت بالابتسامة
عذاري بصدمة : شلون !
سلطان : العصفوره قالت لي
عذاري : ي ذا العصفوره الي تقولك كل شيء
سلطان بغزل : موصيها على قلبي تنتبه لتس
عذاري الي استحت و قالت : بقفل تبي شيء
سلطان : انتي
عذاري بحدة : سلطان !
سلطان : و انا صادق م قلت شيء غلط تراتس زوجتي
عذاري : بقفل ترى
سلطان : لا تخليني اجي بيتكم الحين
عذاري : يرحم والديك لا تجي
سلطان : عشان العصفوره ولا كان جيت
عذاري بضحكة : مع السلامه
قفلت عذاري من سلطان و دخلت داخل تضحك عليه ، اما سلطان الي غصب عنه اتصل عليها م تحمل م يسمع صوتها ولا يسمع ضحكتها او يحس ب ابتسامتها .
-
~~~~~~~~~~~~~~~~~~~~~~~~~~~~~~~~~~
-
-
انتهى ، لا تنسون تعطوني رايكم بأحداث البآرت❤️‍🔥❤️‍🔥🤯!