သူ ဘယ်သူလဲ

အပိုင်း ၄၉

သူပြောလိုက်သည်နှင့် ရှမူဟိုင်အထဲသို့ ဝင်လာခဲ့သည်။ ရှမူဟိုင်၏ စိတ်ဝိညာဉ်သည် ပြန်လည်ကောင်းမွန်သွားခဲ့ပြီဖြစ်သည်။ သူသည် ကြက်ခြေထောက် တစ်ချောင်းကို ကိုက်ဝါးနေပြီး ပိုပြီး အံ့သြစရာကောင်းသည်မှာ သူ့လက်မောင်းအောက်၌ ကြက်ကင်တစ်ကောင်လုံးကိုလည်း ညှပ်ထားသေးသည်။ ကြက်ကင်မှ ဆီများသည် သူ့အဝတ်အစားများ၌ပေပွနေပြီး သူ့ဝတ်စုံသည် ဆီအစက်အပြောက်များစွာဖြင့် ပြည့်နှက်နေခဲ့သည်။

ဤရှုပ်ပွနေသောအသွင်အပြင်ကို ကြည့်၍ ရှမူဟိုင်က အပြည့်အဝပြန်လည်ကောင်းမွန်လာပြီဖြစ်ကြောင်း လီချန်ချင်း နားလည်လိုက်သည်။

သို့သော်လည်း လီချန်ချင်းသည် ရှမူဟိုင်က ကြက်ကင်ကို လောဘတကြီး စားသောက်နေသည်ကို ကြည့်ပြီး သက်ပြင်းအသာအယာချလိုက်သည်။

မူဟိုင်ဖုန်းတောင်က တကယ်ကို ဆင်းရဲတာပဲ

ဂုဏ်သိက္ခာရှိသော တောင်ထိပ်သခင် တစ်ယောက်သည် ဤကဲ့သို့သောအခြေအနေကိုရောက်နေခဲ့သည်။

သူ ငွေပိုရှာရမယ်၊ သူ့သားကို ဒီလိုအဆုံးသတ်ခွင့် မပြုနိုင်ဘူး။

"ကြည့်ရတာတော့၊ တောင်ထိပ်သခင်ရှ၊ မင်းပြန်ကောင်းလာပြီထင်တယ်" လီချန်ချင်း သည် အပြုံးတစ်ခုဖြင့် ပြောလိုက်၏ ။

ရှမူဟိုင်က ရှေ့သို့လျှောက်လာပြီး လီချန်ချင်း၏ ဘေးနားရှိ ဖေးကို တစ်ချက်လှမ်းကြည့်လိုက်သော်လည်း ဖေး ၏ တည်ရှိမှုမျိုးမခံစားရသည့်အတွက် ဘာမှပြန်မပြောခဲ့ပေ။

လီချန်ချင်း မွေးမြူထားသည့် ခွေးလေးတစ်ကောင်လို့သာ သူထင်လိုက်သည်။

" အစ်ကို ချန်ချင်း ကျွန်တော့ကို ပေးခဲ့တဲ့ ရတနာအတွက် အစ်ကို့ကိုကျေးဇူးတင်ရအုံးမယ်" ရှမူဟိုင်သည် ကြက်ခြေထောက်ကို ကျောက်တုံးတစ်ခုပေါ်တွင် တင်ကာ သူ့လက်များကိုအဝတ်ဖြင့်သုတ်လိုက်ပြီး တရိုတသေ ဦးညွှတ်လိုက်သည်။