When I Fly Towards You ( ဘာသာပြန် )

Chapter-10

ထင်ထားတဲ့အတိုင်းပဲ ၊ သူမ တတိယထပ်ကို ရောက်သည်နှင့် ရေသန့်ဘူးဖြင့် စာသင်ခန်းထဲမှထွက်လာသော ကျန်းလုရန့်ကို တွေ့လိုက်ရသည်။ စူးကျိုက်ကျိုက် မြန်မြန်ဆန်ဆန် လိုက်လာပြီး သူ့နောက်မှာ တန်းစီရပ်လိုက်၏။

သူမစိတ်ထဲတွင် ခဏလောက် ရုန်းကန်ပြီးနောက် စူးကျိုက်ကျိုက်သည် နောက်ဆုံးတွင် အံကြိတ်ကာ အော်ခေါ်လိုက်သည်။

"ကျန်းလုရန့်"

ကျန်းလုရန့်က သူမကို လျစ်လျူရှုပြီး နောက်ကိုလှည့်မကြည့်။

စူးကျိုက်ကျိုက် ဘာပြန်ပြောရမှန်းကို မသိတော့ဘဲ စိတ်တိုလာရသည်။ အလျင်စလို အခိုက်အတန့်တွင် မတွေးတောဘဲ သူမက စကားလုံးတွေကို ရှေ့နောက်မစဉ်းစားဘဲ ပြောချလိုက်၏။

"ဒါနဲ့ နင် အင်္ဂလိပ်စကားလုံးတွေကို အလွတ်ကျက်ပြီးပြီလား?"

ရှေ့ကလူက ပိုလို့တောင် တိတ်ဆိတ်သွားလေ၏။ စူးကျိုက်ကျိုက် ချက်ချင်းဆိုသလို တုံ့ပြန်လိုက်ပါသည်။

မဟုတ်ဘူး! သူမ ဒီလိုပြောဖို့ မရည်ရွယ်ခဲ့ပါဘူး!

သေချာတာတစ်ခုကတော့ သူမမှာ သူ့ကို ထပ်ပြီးအရှက်ရစေမဲ့ ရည်ရွယ်ချက်မျိုး မရှိပါဘူး..

မဟုတ်ဘူး ၊ သူ့ကိုအရှက်ခွဲဖို့ သူမ ဘယ်တုန်းကမှ မတွေးခဲ့ဖူးဘူး။

အခြေအနေကို ဘယ်လိုကယ်တင်ရမလဲ စဉ်းစားနေတုန်းမှာပဲ ရှေ့ကလူမှာ ရေဖြည့်ပြီးသွားခဲ့ပြီ။ ကျန်းလုရန့်က ခေါင်းကိုလှည့် သူမကို စိုက်ကြည့်ကာ '...အင်း' ဟု အသံတိုးတိုးဖြင့် ပြန်ပြောသည်။

ထိုအချိန်တွင် သူမ၏စိတ်ထဲ၌ တင်းကျပ်သော ကြိုးတစ်ချောင်းမှာ ရုတ်တရက် လောင်ကျွမ်းသွားပြီး သူမစိတ်ထဲတွင် မီးရှူးမီးပန်းများ ပေါက်ကွဲကာ သူမမျက်လုံးများရှေ့သို့ ကျလာပြီး မူးဝေသွားရသည်။

စူးကျိုက်ကျိုက် တစ်နေရာတည်းတွင် ခဏရပ်နေခဲ့သည်။ အနောက်ကလူတွေက သူမကို စိတ်မရှည်စွာ သတိပေးလာသည့်အချိန်မှသာ နောက်ဆုံးတွင် သူမ အသိပြန်ဝင်လာသည်။ တောင်းပန်ပြီးနောက် ရေတောင်မယူတော့ဘဲ သူမ မှင်တက်ကာ ပြန်လာခဲ့၏။ ယခုလေးတင် အလှလေးက သူ စကားလုံးတွေကို စတင်ကျက်နေပြီလို့ ဝန်ခံခဲ့တာပဲမဟုတ်လား?