مر أسبوع كانت مقابلة فيه بسمة مبيريكة ، محيداتش من حداها كانت تاكل معاها فالغرفة وتبدل حوايجها وترجع تجلس حداها ، رغم إصرار صلاح على أنها تمشي ترتاح فدار حيت مريضة وتقابلها هدى ولكن رفضات وقالت ليهم أنا غانقابلها ، كل نهار كانت تجي هدى وطل على مها وتجلس مع بسمة شوية وتنوض وصلاح كل مرة غادي جاي لكلينيك يطل على مو ويجيب لبسمة ماتاكل او حوايجها باش تبدل واخا قالبة عليه وجهها وكي يهضر معاها دور فيه ولا تسكت وتجاهلو كان مسايس معاها ومخليها على خاطرها ..
فصباح ومع جوايه العشرة كانو كلهم خارج الغرفة منتضرين الفرمليات يبدلو لها حوايجها باش يخرجوها ، كي حلو لباب دخل صلاح هزها وحطها فوق الكرسي المتحرك ديالها وخرجها على برا ، حطها فطموبيل لور وجلسات حداها بسمة مخلياها تكا عليها حيت يديها ورجليها فاشلين عليها وتوازنهم ممتحكماش فيه ، تاجه لدار وموراه طموبيلة فريد ومعاه هدى
كي وصلو طلعو لدار او لقاو رقية جالسة كتسناهم لي كي ساقت لخبار بلي مبيريكة غاتجي فاقت بكري وجات لدار لقاات صلاح عاد خارج خلاها تماك كتوجد لفطور مع وصلو مع حطات كولشي فوق طبلة وقدات بلاصة لمبيريكة فين تجلس حيت عارفاها كيعجبها تجلس فنفس بلاصتها ديال ديما أما لبيت غير كتخنقها حيت مضلمة ومكترتاحش تجلس فيها فصباح
رقية : ( جلسات جنب مبيريكة ) كي بقيتي اختي شوية
مبيريكة : ( غير كتشوف فيهم مقادة دوي لسانها تقيل عليها ) صمت
هدى : ( تنهدات ) حمد الله ارقية شوية مع الوقت غاترجع دوي فحال لول دابا غير لسانها تقيل عليها
رقية : ( حركات ليها راسها بالإيجاب ) إن شاء الله .. يلاه زيدو تفطرو غايكون فيكم جوع
كل واحد كلا غير شوية ورجع لور هدى رادة لبال مع مها وكتوكلها بشوية عليها وصلاح وفريد نزلو لتحت ومشاو لقهوة جالسين فيها .. كي فطرات مها ناضت مع رقية جمعو الطبلة وغسلات هدى الماعن مخلية بسمة متكية على لمخدة ومغمضة عينيها بعياء .. بعد دقائق كانت نازلة هدى فدروج تحل لباب بعد ماسمعات دقان فيه
هدى : ( كي حلات لباب لوات شفايفها ) خالتي !
ملعيد : ( دخلات شادة فركابيها وجارة موراها صاك فيه حوايجها ، باينة فيها معولة تجلس شي يامات ) حيدي ابنت ختي من طريق ، ختي ناعسة فسبيطار سيمانة وأنا آخر من يعلم
طلعات فدروج حتى وصلات لبيتها حلاتو ملقاتهاش ومشاات نيشان لصالون فين كتكون جالسة ديما ، كي دخلات وشافتها شهقات ولاحت صاك من يديها ومشات كتجري عندها
ملعيد : ( كتندب حناكها ) اويلي على ختي لحبيبة وشنو طرا لها اويلي على ختي وطلعو لها طونسيون بالفقصة ( شافت ناحية بسمة بكره لي غير شافتها تقدات فجلستها وبقات تشوف فيها بنص عين ) صحيحتك على قد لحال وصايفطوك لسبيطار نيشان
