#فلاش_باك
فوقت متأخر من الليل وبضبط مع جوج أونص كان شاد طريق غادي يقضي غراض .. عينيها على طريق وبضبط على الباراج لي قرب يوصل حداه ، وقف طموبيل كيتسنا السيارة لي قدامو دوز وفنفس الوقت وقف عليه جدارمي ، نزل زاج دطموبيل وطل عليه
جدارمي : ( البيل فيديه ضارب على طموبيل وعينيه عليه كيشوف واش داير سمطة او لور واش كاين شي حد ولا غير بوحدو .. ) عطيني وراق دطموبيل
صلاح : ( حرك راسو بالإيجاب وعطاهم ليه ) هاهما
قلبهم جدارمي وردهم ليه وبعدها سمحو ليه يدوز .. كمل طريق طالق موسيقى كيدندن معاها حتى وصل لباراج آخر وهاد المرة كان جدارمي مصوب البيل على سيارتو وداير ليه إشارة باش يخفف سرعة او باش يوقف ، دار لي قاليه وفتح زاج دطموبيل وهو عاقد حجبانو كيكره يدوز من الباراجات واخا مهاز والو ومعندو حتى حاجة علاياش يشدوه ولكن كيكره كل مرة يوقف ويتقلب ..
جدارمي : ( ضرب على طموبيل بيديه ونطق بصوت عالي وقوي ) نزل أشريف
صلاح : ( زاد عقد حواجبو ونطق بصوت حاد ) علاش بسلامة ( دوز عينيه ناحية سطافيط دلبوليس ورجع كيشوف فيه ) تقدر دير خدمتك بلا منزل
جدارمي : ( تحنا حتى تقابل معاه ونطق بنبرة عالية ) غاتوريني شغاندير نزل ولا نزلوك بزز
تنهد بقوة ونزل ساد موراه لباب بجهد دار كيشوف فيه مخنزر وفلبلاصة تاجه عندو البوليسي دفعو حتى دار وبغا يشد لو يدو يدير ليه المينوط
صلاح : ( تنطر منو ) آش كدير لاش باغي دير لي المينوط !!
البوليسي : ( رجع دور وتنطر منو تجمعو عليه ثلاتة ودارو لو المينوط ) الكوميسارية وتعرف شنو داير
صلاح : ( دفعو بدراعو ونطق بصوت عالي جعروه ) واش مريض فمخك باشمن حق تشدني ونا مداير والو لقيتوني عندي شي حاجة ؟ قلبو طموبيل متلقاو باش تنقيو سنانكم
نزل لاجودان من سطافيط دلبوليس وتم غادي عندو بشوية عينيه عليه ويديه فجيابو .. دوز يديه على ذقنو ونطق بنبرة مافيهاش مجال لنقاش
لاجودان : بلا ماتبدا تجابد معانا هنا غادوز دابا نيشان لكوميسارية ولا بغيتي ينقلوك لحبس أكادير أما دابا تبقا جالس فكوميسارية دفاس ( دار إشارة لبوليس يدخلوه لسطافيط ونطق بالستهزاء وهو داير يديه على جنابو ) ولا بغيتي تعرف لاش شادينك بيعو بيك
عض على لسانو من لداخل بقوة وعينيه ضلامو طلع وجلس فالقنت مفرق رجليه وراسو على شباك ، تنفس بعمق ومشاات ذاكرتو نيشان ليها ! عض على شفته سفلية معصب ! واخا مبايناش فيه من برا وكيبان مكالمي وكأنو مولف يتشد وعندو عادي ولكن هاد المرة متصورش غايتشد ففاس كوميسارية معندوش معارف فيها وحتى المحكمة !
دوزوه نيشان لكوميسارية طلعو سميتو وجبدو گاع تهم لي كان مشدود بهم من قبل ، نزلوه لسيلون نيشان بلا ميدويو معاه وبقا تماك حتى صبح صباح ودوزه نيشان لوكيل الملك تماك عرف شنو كاين بضبط .. دراري من لي خدامين عندو تشدو وهما مدوزين سلعة كي حققو معاهم طلقو سميتو وبيعو بيه .. كي خرجو من عند وكيل الملك دوزوه نيشان لحبس ففاس ، دوز ليلة فيه ونهار تاني عرف رجال لي عندهم تلفونات ولي كيدخلو سلعة حتى لحبس سلف من عند واحد تلفون مقابل فلوس وهضر ديك ساع مع بسمة ..
