[COMPLETED]ကျုန်းလိဘုရင်က ဒီနေ့လဲသူ့ဇနီးတွေကိုအလိုလိုက်နေပြန်ပြီ

(၉၃)

"ကျုပ်ကိုယ့်ကိုကိုယ်ဂရုစိုက်မှာပါ။ ဘဝခရီးလမ်းကရှည်တယ်။ တွေ့ကြ၊ဆုံကြပြီးရင်ခွဲခွာရမှာပဲလေ"

အလွန်တည်ငြိမ်နေဆဲဖြစ်သည့် ဘဏ္ဍာရေးအမတ်ကိုကြည့်ရင်း အတိုင်ပင်ခံအမတ်ကြီးကခေါင်းတငြိမ့်ငြိမ့်ဖြင့်။ သူထင်ထားသည်ထက် ဒီလူကတည်ငြိမ်နေခဲ့သည်။ အစက သမီးဖြစ်သူ၏အရိုးပြာကိုပိုက်၍ အဆုတ်ကွဲမတတ်အော်ဟစ်ငိုကြွေးတော့မည်ဟု ခန့်မှန်းမိ၍ အမတ်ချုပ်ကြီးကိုဆွဲကာသူတို့နှစ်ယောက်သားရောက်လာကြခြင်းပင်။

သို့သော်လည်း တစ်ဖက်လူကတည်ငြိမ်နေသည်မို့ ဘာမှနှစ်သိမ့်စရာမလိုတော့ပဲ ဘေးကအဖော်ပြုပေးရုံသာတတ်နိုင်သည်။ သမီးတစ်ယောက်၏ဖခင်အနေဖြင့် အမတ်ချုပ်ကြီးသည်လည်း ဘဏ္ဍာရေးအမတ်၏ခံစားချက်ကိုထပ်တူနားလည်ပေးနိုင်သည်မို့ သက်ပြင်းသာချလေ၏။

"ခင်ဗျားတစ်ယောက်တည်းအဆင်မပြေဘူးဆိုရင် ကျုပ်အိမ်လာနေလို့ရတယ်"

မည်သို့ပင် အစေခံများရှိသည်ဟုဆိုစေကာမူ ၎င်းတို့ကအလုပ်လုပ်ပေးရုံသာတတ်နိုင်ကာ သူတို့သခင်ကြီးကိုအဖော်ပြုပေးဖို့မတတ်နိုင်ကြချေ။ အကယ်၍ ၎င်းသာအမတ်ချုပ်ကြီးအိမ်တွင်လာနေပါက သူ့အိမ်သို့ခဏခဏလာတတ်သည့်ဝမ်ရယ်တို့သားအဖနှင့် မာကျောက်ကစားခြင်း၊ ကဗျာစာပေဖွဲ့ဆိုခြင်းစသည်ဖြင့် အဖော်ပြုပေးနိုင်သည်မို့ အတွေးများကာစိတ်မဆင်းရဲရတော့ချေ။ သို့သော်လည်း ဘဏ္ဍာရေးအမတ်ကတော့ခေါင်းသာခါ၏။

"ကျုပ်တစ်ယောက်တည်းမဟုတ်ပါဘူး။ ကျုပ်ရဲ့သားတော်ကအဖော်ပြုပေးဖို့အိမ်မှာရှိတယ်"

သူ့စကားကြောင့် အရှေ့မှအမတ်နှစ်ယောက်သာမက ဈာပနသို့လာသည့်အခြားသူများပါ အံ့သြသွားကြသည်။ ဘဏ္ဍာရေးအမတ်၌သမီးတစ်ယောက်ရှိသည်ဟုသာ လူတိုင်းကသိထားကြသည်မို့ သားတော်အကြောင်းထုတ်ပြောလာသည့်အခါ ဘယ်သူမှမျက်မှန်းမတန်းမိကြချေ။ ဤအဘိုးကြီး၌အမှန်တကယ်ကြီး သားတော်တစ်ပါးရှိနေသေးသည်လား?

သို့လော၊ သို့လောမေးခွန်းများအောက် တည်ငြိမ်စွာထိုင်နေသည့် ဘုရင်မင်းမြတ်၏ နှုတ်ခမ်းပါးကအနည်းတွန့်ကွေးသွားကာ ဘဏ္ဍာရေးအမတ်ဘက်သို့လှည့်၍ဆိုသည်။